WingBB微少少東京行DAY 4

今日係逗留日本既最後一日，5點就起身嘞！上洗手間對腳依然酸痛！check-out果陣都未夠6點，當然食唔到嬸嬸美味飯團同麵豉湯！天未光就上演幕「一個人在途上」，我一個人拖住個喼、2個大紙袋，揹住背囊、手袋向車站出發，唔講以為走佬！唔知點解條路變得咁長既？行下又停下差唔多半個鐘至去到！跟住攞命呀，逐級樓梯行落去車站又遂級行上月台，嗚∼點解冇人幫下我架！！>_<

第一站先到上野京城寄存行理，卒之鬆晒！然後搭車去築地，一出站冇幾耐就有人派紙巾，今日仲有餅乾派喎，行行下見唔對路返轉頭行呀行，啱嘞有魚腥味嘞！不過今日係市場休息日係冇嘢睇既，只有零星店舖開門，都有見到郁郁下既北海道（老闆話）長腳蟹、毛蟹等，價＄仲唔平呀（對我來講）！一陣就行晒 lu，頗為失望！原本諗住去幫襯網友推介既壽司清，不過一打開門已經煙霧迷漫，閂門都閂唔切啦仲話入去食嘢！行過隔離原來仲有一間標明係禁煙，好就好但係成十點至開門喎，都係放棄罷！行左兩三間食店，雖聞店仔細細、梗係巴閉！但我都係想坐得舒適ｄ；最後行左去一間24小時營業既Sushimai，大ｄ冇咁迫；我得一個人梗係坐晌BAR枱啦！時間尚早附近未有人坐，只係隔左幾個位有個外國人，我點左個套餐，有成8 or 10件（唔記得hee~）壽司，再叫多客生豪，一客三大隻，好味！全部食晒！心諗晨早食咁多生冷嘢，千祈、千祈、千祈咪肚痾呀下！

食飽又要趕路，本來要去淺草雷門寺，唔知攬乜鬼晌藏前落錯車，行行下又蕩失路！唔怕既！亂咁行都只係見到舊玩具、模型舖，有ｄ仲好似話只係批發.....唉，真係捉虫，行咗好耐都唔見有地鐵站，點算呀？問路囉！有位熱心既叔叔同我一齊行，原來佢咁啱都係搭地鐵既，到雷門嘞，雷門去出面又係冇咩嘢睇，店舖都係賣紀念品、食品為主，揀左ｄ唔記得用咩木造既筷子做手信（都要幾十蚊港紙一對架！）就入寺睇下！入鄉隨俗，買左ｄ香拜下祈福，寺中間有個大香鼎，好多人撥ｄ香落個身度，我又唔執輸同班大嬸迫埋一份 (^o^)”，最後入埋去求籤，籤文中、英、日對照真架！隔離有對香港人正研究ｄ籤文睇唔睇得明！跟住我搭訕話有中、英文架，佢地比突如其來既廣東話嚇一跳（heee）！都係時候起程去上野！

去到上野一出就見到01city，當然要入去昅昅！呢次真係心痛，見到Agnes b counter！仲要見番同一款手袋，真係揼心！退稅呀∼∼行左一陣心懷住肉赤既心情繼續去搵二木之果子，中途路過$100yen店又買左一袋唔等使嘢！最後晌二木買左好多零食，同埋幾包急凍熟既長蟹腳，佢用乾冰同膠袋包好比我（生既冇手拎上飛機嘞），阿檔主（？）以為我係台灣人猛講國語！利害利害呀吓∼∼

拎住咁多嘢本來仲有時間再食下行下，不過算嘞，行返上野京城都幾攞命，仲要晌車站重新執過行李....唉~~跟住梗係搭skyliner去機場，去到又忍唔住多買幾盒草餅！再晌附近睇吓嘢，都係冇咩嘢睇！check-in果陣幾驚佢唔比拎咁多handcarry上機！好在順利過關但係2個大紙袋有ｄ爛，頂住呀∼∼6:00pm登機而家4:50pm喎，點好呢---->都係恰下 lu，我真係撐唔住嘞，就挨晌梳化zzzZZZ，唔知有冇訓到流晒口水呢？！附近有位女士直情成個攤晌梳化呀！臨過海關又拎住咁多嘢阿小姐都要人除鞋檢查，真係ｘｙｚ！

上機被夾4個鐘，除左食嘢外全程都係zzzZZZ，toilet都費時去，鬼咩，阿隔離位小姐感冒跣住咁訓，點好意思叫人借借丫∼∼今趟飛機餐唔多掂喎，飯底仲硬過飯焦，隔離位食果塊牛扒等同鞋底！大家都係咁易掂下！食完嘢飛機上既燈亦教暗咗方便大家休息，不過坐後面果幾位師奶唔生性喺度高談闊論！我忍唔住拎轉頭啤吓佢地，都叫做細聲咗……少少！落機又見到V小姐，原來大家同一班機！出閘後梗係去食嘢啦，好彩都仲趕上尾班巴士，返到屋都零晨1點幾！咁就完左東京之旅^^