"1"
Tu .. baranek buharan î, mîna heyvê
Xo d'guhorî li dîf keyfê
Car jiyanê .. d'çavên min da d'çînî
Car hezên min ..
Li ber dergehê girnijînên xo d'mirînî.
"2"
Pir ditirsim !
xwîna min.., ewa liser lêvên te hişk buy
bibîte tûz û ba b'betin
lêvên min pir têhn û hişkin
ka lêvên te ?!
"3"
Ez ademim .. û,
Dêmê te bîstanê darsêvane
Dû sêv ji darsêvekê keftin
Û.., bi sîngê teve nûsiyan
Min destê xo dirêj kirê
Evrên asmanî dest qutan ..
"4"
Bişkurînek ter û şermîn
Gul geşkirin
Û tiblên min, d'gel ruyê hişkê mêzê
Yarî d'kirin..
Xeyala min mirîşkeka veqetiyaye ji gundiyan
Hêkan d'ket ..
Çîçelokên xwîngerm û ezman dirêj
Jê d'tirikin !!..
"5"
Henasa min jiser lêvên te çik na bît
Lêvên te jî bi şermînîve ..,
Ava triyê rezan d'rêjin
Ji ber hindêye
Pevên evîndar serxoşin!!
"6"
Tu kaxezî û ez bahurrim
Nêzîk be û peşêman na bî
Bahurr sîngê germê kaxezane û ..,
'işqeka azirandî ..
"7"
Tena .. bêdeng
Li hemberî min rûniştî
Ji pirça te,
Tîrojkên rojê d'werhin ser çokên te
Dilê min kire bendî û..,
Hez û pêngavên min kevir..
"8"
Bulbilekî hêdî dada ser milê te
Ji nişkekêve ..
Tumkek liser royê te dît
Û .. dimê xo dirêj kirê
Lê, tumik jiser royê te keft
D'dwîfda bulbil
Û, şimka te ya bê serbor
Ew bulbil hûr kir kire gil
Yara min.. ma te ne d'zanî ?!
Dilê min bû.. bûye bulbil
Jiber te ji sîngê min firî bû
Liser royê te yê bê mikiyac nihî bû
Te jî d'xemanda gevizand.
"9"
Ez ji germa rojê bê barim
Ez xerîbê maça parim
Evrên reş û mişext na peyvin!!
Lê, razên me bi keyf û xoşî
Liser sîngê asmanî d'leyzin..
"10"
Min û rojê hevrikî bû ..
Kîjan ji me, dê berî yê dî te bînît
Rojê cîhan kire kanî ..,
Kanîyeka kesk
Û d'herdû çavên te da çand
Lê çavê te bulbilek bû ..,
Liser paniya destê min d'xwand...
"11"
Ji biçukatî ..
Min û rojê evîniyeka dijwar hebû
Û dêmê te d'çavên minda
Semayeka işiqgirtiya gerim hebû
Pêdivî bû .. tu bibiye roj ..
Da tuşî dudiliyê nebim .
"12"
Bişkurînek sade û sava
Min d'lerzînît wek biçîka
Duhî nîvro ..
Perwanek sîs lidef min rûnişt ..,
Dilê min çû hirmîka
"13"
Erê rondikên ser roya ciwantirin ..
Yan ewên diçavanda?
Erê hezên nivistî gerimtirin ..
Yan ewên d'naf lêvanda?
Erê pezên serberday b'bihatirin ..
Yan ewên d'naf govanda?
Tu b'xodêkey, ma maçên birastî xoştirin ..
Yan ewên d'naf xewnanda?
"14"
Ez d'zanim ..
Te d'vêt bêjme te – min tu d'vêy-
Te d'vêt d'işqa te da b'heliyêm û,
Şevbuhêrkên evîniyê li hîvîya dîtna te b'burînim
Û .. tu ne hêy.
"15"
Li dumahiyê ..
Ez jî weko hemû sîyasîyan .., sîyasîme
Her çi parça jiber leşê teve mabît .. min ne dotî
Dê keme ristika serbanî û ..,
Sincatîyê pêve şorkem.
