Day 3

{台北第二遊}

1st Day	2nd Day
3rd Day	4th Day

Day 3: 中正日 (15 Mar 2003)

今日係好遊客的一天, 何解? 因為我地會去中正紀念堂影相留念.

雖則我地係年輕的一輩, 但並不代表唔可以到旅遊景點拍照留念. 我至鍾意影一d有特色背景的人物照, 所以縱使無端端今日好鬼死熱, 又撞正去中正紀念堂呢個咁烈日當空的地方, 都無損我的雅興.

確實, 一度地方要有氣勢, 學蔡瀾話"浪費空間", 我絕對贊同. 中正紀念堂的空地實在大得恐怖, 行死人啊...太陽又高高掛喎, 真係想死啊. 點解昨日又會咁凍今日要影相就咁死熱架?!

不過由於太陽伯伯高掛, 影出來的相都好靚, 陽光充足嘛!

之後我地就去會合契姐的朋友, 佢係香港人但到了台北工作, 而且仲有個台灣女友啊!

行了好耐, 一路行去一條好多野食的街, 我有少少印象兩年前曾經到過呢條街的area, 我叫唔出個名啊, 朋友們曾提過叫乜名, 但我都係唔記得. 總之係由sogo向前行, 行了一個捷運站, 過了幾個街口咁就到, 真係要當地人先識行. 我兩年前去過好有可能係好無聊咁走街行冒險咁而行到去o個度.

本來係諗住去一間好多cake食的鋪頭, 但實在排長龍得好緊要, 太恐怖! 大家都唔想等, 所以改地方, 而居然呢個地方係一間超多狗一齊食野的鋪頭, 這簡直係要laine姐去死一樣. 佢好驚有毛的動物架! 成餐飯佢食唔安坐唔落, 真的難為佢啊! 不過確實間鋪頭的野食都不錯的!

之後我地一齊坐的士去京華城, 然後各自行街, 嘩...去到京華城我地又好似發了癲一樣, laine姐都翻生一樣啊! 我呢d當然第一時間標去頂樓的誠品書店啊, 買了些書俾爸爸, 主公同埋自己睇! 跟住我地又去行下街, 我又買下手信, 又去睇下brabra, 又去睇可樂野. 跟住仲去了一間鋪頭度買d好似係啫喱蒟蒻的東東來食, 好好味, 買了三隻味, 每人每樣食少少, 好開心. 大家其實好想買番香港做手信, 因為特別d同埋好食嘛, 但要雪的, 所以我地要將佢地就地解決, 想買番酒店食都唔得, 更何況話買番香港喎.

跟住為了滿足契姐的願望, 我地就去了bu bu車食小食, 唔敢食晚飯, 因為要留肚去士林夜市嘛! bu bu車未就係流星花園裏道明寺同杉菜坐o係架車裏面食雪糕那間鋪頭lor. 嘩....由京華城坐的士去要成七十幾蚊港紙啊, 真係幾遠下呢!

食完後我地見有少少飽, 又諗住不如行去士林夜市, 所以我地就一路行街. 一路發現原來呢一區係幾多高尚住宅, 有點兒似香港的何文田咁, 原來呢度叫

之後我地就趕去士林夜市, 呢個地方一定要去, 實在太出名啦! oh....原來士林夜市變了超多, 其實去前我已略有所知, 但估唔到變得咁厲害, 我真係完全唔認得啊! 人啊...多到嚇死你, 迫到死啊. 或許適逢星期六, 連local都特別多呱!

其實太多人真係好辛苦, 而且我地之前已經有d戰利品o係手, 搞到好死重, 行得好累. 中途仲發生了小插曲, laine姐俾架小販車整親少少啊, d人真係亂來, o個度走鬼真係超級危險, 點樣都避唔到, 我地呢d途人最危險. 大家去士林真係要小心d小販, 係無牌小販啊.

o個度d小食都幾好食, 我地又死小丸子呢! 就係咁, 又冇點樣食正餐咁.

哈....我地之後去了samuel & kelvin呢...嘻...為了f4的紙袋去買件衫啊!

唔好以為我地今日節目已完, 大家都錯晒啦! 因為今晚係呢個trip的最後一晚, 所以點都唔可以放過任何時間, 去了一間廿四小時營業的誠品書店睇書仔! 哈....大家o係誠品間cafe坐低飲下野, 傾下偈, 傾飽就各自各去睇書. 嘩....台北人真係唔使訓咁, 好多人啊間誠品, 都有唔少旅遊人士o係度買書呢. 其實本來我地係想去誠品買幾米的精品, 但原來精品部一早close了, 所以最後我地都買唔成幾米精品.

一坐就兩點幾啊, 要回酒店訓覺lor. 咁我地就坐的士返酒店啦, 精彩故事而家先發生啊!

本來我地好想落車過去酒店對面便利店買d野食, 因為食小食實在唔飽, 想食宵夜. 當我地架的士到酒店門口時, 突然laine姐叫我地唔好去便利店, 快d返酒店. 當時我完全唔知發生乜野事, 我冇戴眼鏡睇唔到. 既然咁堅持我又冇所謂....原來係對面有d怪人企o係條街望望貢, 唔知想點. 之後............嘩........又另一高潮來啦.

一落車本想入酒店之際, 居然見到有四個男人抬住個昏迷的女仔由可樂迪ktv抬過來我地個方向, 我同契姐睇到眼都唔郁, 停左o係度慢慢睇佢地. 但一聲叫, laine姐大叫我地仲唔快走, 咁我地未快步入酒店, 快過佢地lor. 我沿途都有望住佢地搞乜, 見到佢地真係抬入我地間酒店啊, 有個男人仲大叫個receptionist (人地休息中呢!), 要開房! 嘩....我地係咁睇住佢地, 跟住就又快步坐lift上番去房.

一返到房我地勁講頭先單野, 我完全覺得係四條佬迷個女仔, 然後抬佢去酒店想做d野, 做乜唔明講啦! 見佢地四個都唔係好人一個, 又唔似係朋友咁, 真係啊.....做朋友的, 見女仔暈了, 係未第一時間入院或者送返人返屋企而唔係開房啊. 你話個女仔係醉了嘔晒就話開間房等佢休息, 但唔係lor, 佢地班人個樣簡直係餓狼一樣啊.

咁多位女士們, 自己小心d啦, 公眾場所, 離開了座位或離開了視線範圍的飲品千萬不要飲啊, 唔係俾人迷左你都唔知啊!

之後laine姐話唔怪得佢地local朋友一聽我地講話住一樂園就咁驚, 契姐的朋友都係咁講, 話西門町夜晚超雜, 唔o岩女仔住咁話. 唔係今晚所發生的事, 我地真係完全唔知有幾雜呢.

*各位住近西門町的朋友, 非必要唔好太夜回酒店, 十二點好返到酒店啦. 好似我地咁成兩點幾三點先返到酒店, 實在太危險啦! 有男仔朋友都係咁講, 因為我有朋友(兩個男仔)試過一點幾落街行下買野食, 都勁俾d怪人勁啤啊, 好鬼危險咁啊.

*去士林夜市前盡量都係兩手空空咁去比較好, 因為人多擠迫, 冇野拎行得都舒服d!