Bere abizenaren jatorriaz galdetu zaionean, ez dakiela esan du. «Nik dakidanez, aita, aitona, birraitona... Oriokoak izan dira beti. Zumaian ere beste Manterola batzuk ezagutzen ditut (Valentin pintorea) eta Iruñean ere bai (gozotegietakoak, eta Pedro izeneko Arte Ederretako irakasle bat). Gainera hemendik gertu badago Manterola izeneko auzo bat».

«Margolan honetan nire abizena irudikatu dut, nire Manterolatar familia. Gure aitona ni lau urtekoa nintzenean hil zen, eta argazki batzuk dira bere inguruan ditudan erreferentzi bakarrak. Denbora atzera eginez, birraitonarengana iritsi naiz bakarrik; Orion harrapatu zuten azken baleari berak eman zion arpoi kolpea, Benito Lertxundik kantatzen dituen bertso batzuetan esaten den bezala. Horixe agertu nahi izan dut: birraitona balearekin, eta aitona plano hurbilago batean. Eta horretarako kolore hitsak erabili ditut, ia zuri-beltzean, ez baita oroitzapen bizi bat, ezta presente dudan zerbait ere.»