Ihcuac ye ahciz in Miccailhuitl, pehua mocohuaz: Cera, popochtli, popochcomitl, xochicualli. Cehcen xihuitl moxochicualcohua in motlaliz tlamanalpechpan canin moyetzticateh toteotahtzintzinhuan, toteonantzitzinhuan. Imixpantzinco tlamanalo.

Tlein xochicualli momana: Xicamatl, ohuatl, camohtli, xalxocotl, alaxoz, texocotl. Mixpehpena in ocachi oquinmopactiliayah in mihmiccatzitzintin. Intla in miccatzintli oquimopactiliaya pahtli, no yuhqui motlalia ce tehuilocacaxton. No mochihua yuhquin nacatamalli, atolli, elotamalli, tlemolli, etamalli, tlaxcalli. Quemmanian oihquitic ayatl ihuan yuhqui mohuemmana. Inin ayatl ayocuic ica tequitihua, auh cecen xihuitl occehpa motlaliz. Quinmach motlamamalizqueh in miccatzitzintin mochi tlein omamahman.

Ihcuac motlalia cehcen tlamantli in tlamanalpechpan monotza cehcen mihmicqueh, molhuia: "Nonantzin (intla tenantzin ye omiquili), cehcen xihuitl timohuicatz ipanin ilhuitzintli, axcan occehpa otitechmohtilico; mopampatzinco nictlalia inin tlacualli, inin xochicualli, ma mitzmopactili, nican nimitzmotlalia in neneuhcton, mopahhuitzin, motlaxaltzin; xiomahcehuitzino mochi in nican otimizmotlalilihqueh intloc tocoltzitzinhuan, axcan totloc moyetzticateh. Ma cualli ximopanoltihcan ipanin tonalli nican in tlalticpac. Tiyolpahpaquih ca totloc nanmoyetzticateh nanmochtzitzintin, anatotlazohmiccatzitzinhuan".

Ipan inintin yohualli tlepitzalo in ohtlica, mihtohua, ica motonihtzinozqueh tomiccacoltzitzinhuan ihcuac axihua axihua techahchan. Mochtlacah quixoa in ohtlipan, quiyaloah in tletl, mochitin mototoniah.

Ihcuac ye opanoc in Miccailhuitzintli, immanon ye moxehxeola in tlamanalli.

Tlahcuilocatzin: Librado Silva Galeana.

In Yancuic Nahuatlahtolli. No 4. 1991

UNAM