六月二十七日 (星期日)
今日婆婆同叩虎買左一包甘荀比我呀！好開心呀，佢地話係用來比我做早餐的，佢地都幾有新意喎！婆婆成日講兔你愛吃紅蘿蔔的！其實我很多野都愛吃的呀！今日婆婆仲比我試食呢！味道唔錯！
六月二十六日 (星期六)
bbb今天我呵爛屎呀！可能因為我為食啦！我又唔小心喎搞到個屁股痴住左屎喎！>.<好唔開心呀！果個叩虎仲係咁想搞我個股喎！我咪逃走law，都唔知佢想做乜，如果媽媽係度就好嘞，佢一定會幫我清理左d屎屎去的，bbbbbbbbbbbbbb
(叩虎：死仔！我都係想幫你整走舊屎咋喎！)
六月十日 (星期四) 晴
婆婆今日d早餐終於有新花款，比左d草磚比我呀！咁先有返少少興趣咋！但係我又成日唔小心跌左舊草磚落下一層喎！如果有人送到入口咁就好嘞！話曬我都係王子，有呢個諗法都唔係好過份姐！
今日媽媽返到屋企係咁同我拍短片，又搵我玩，有時我都覺得我媽媽個人好有傻勁的(因為都無乜人好似佢咁無聊的！)。
六月九日 (星期三) 晴
我發現我越來越憎食草呀！為左表明我既立場係幾咁堅定，所以我今日決定絕食呀！(只係唔食草咋！你知啦唔食野會死的麻！我係一隻熱愛生命既丙來的呀！我係唔會為左咁少事而犧牲的，講開熱愛生命呢，我又要講下我對時下年青人既睇法嘞……
@ 丙主： 你幾時可以講返入正題呀！@ )
希望婆婆明白我既心意，明天開始早餐有d新意，唔好餐餐都係A餐，應該加入B、C、D、E、F、G餐麻！比你日日食白粥你都悶啦！
更何況我係一隻對生活有要求，有品味既丙！
六月八日 (星期二) 晴
今日媽媽下午留左係屋企執行李喎！仲同我“傾計”傾左好耐呀！
我最鍾意媽媽係屋企的，最最最鍾意媽媽同我“傾計”(兔仔係無聲帶的喎，點傾計？)，因為媽媽次次同我傾計呢，我都有菜菜食的，通常係佢係咁同我講野，我就係咁食佢手上既菜，所以我好鍾意同媽媽傾計的呀！
六月七日 (星期一) 晴
今日我嚇親呀！話說呢今日媽媽同d姨姨去左街街喎！咁婆婆就放我出來玩啦！我見媽媽唔係屋企無人同我玩，我咪自己一個去探險law，咁我就走左去露台果度尋幽探秘嘞！比我發現左一個洞穴喎！咁我咪爬入去睇下裏面有乜law，個洞穴個入口好細，我幾經辛苦先爬到入去，點知入到去發現乜都無的，咁咪想出返去玩law，就係呢個時候我發現自己點出都出唔到去喎！我係咁試都出唔到
。我當時好驚呀！因為無理由入到出唔到的麻！但我真係出唔到呀！後來唔知過左幾耐，婆婆見我咁耐無影，咪叫“丙”，如果係平日我一定衝出去搵婆婆的，但我而家被困，又出唔到又入唔到喎。我心諗會唔會就咁困死係度呢？
婆婆見叫我無反應，就開始四處找我啦！但都搵唔到喎！跟住連叩虎都出馬搵我呀！叩虎進行地毯式搜索，終於係個洞穴度搵到我，仲搬開曬所有野來救我呢！叩虎個人雖然平日惡d，但我次次有事佢都出手救我的。
( 叩虎： 衰仔！好心你咁肥就唔好四圍爬啦！搞到入得唔出得！仲以為自己身手好敏捷，學人去探險！)
六月六日
(星期日) 雨
今日早餐有紅蘿蔔食，好開心！其實媽媽佢地應該唔好比草我食麻！我一早食都厭曬嘞，所以我而家見到草都唔蘇啦！今朝叩虎仲幫我掃我個地盤，呵！仲係度話我唔食草喎！叩虎你試下日日早餐食埋同一樣野丫，比你都無心機啦！我覺得食唔食有我既自由喎！(
丙主：見你成日唔食草都知你食厭啦！所以我今日買左隻新草磚比你，睇下你明天個反應啦！)
六月五日 (星期六) 晴
今日唔知點解個個人都走曬唔係屋企呀！仲要我飲曬d水都無人加比我喎！又無人同我玩。婆婆返左屋企無耐又走左。佢地搞到好夜先返屋企，我先有得玩咋！(
丙主：因為今日我同叩虎約左老師食飯，之後又要去探親戚麻！)
六月四日 (星期五) 晴
聽婆婆講今日係六四，叩虎去左參加乜野六四燭光晚會，今日雖然係六四，但我肥丙一向做丙既宗旨呢，係只談風月，不談政治格，講開我做丙既宗旨呢就係……(下刪二萬字做丙宗旨
@丙主：無人有興趣聽你講乜野做丙宗旨的呀！而家無人想做丙呀！@ )
六月三日 (星期四) 晴
今日出來玩既時候無乜人理我呀！我咪勁踏地引人注意law！我唔係淨係出來玩就滿足的我，我好需要人關心的呀！好彩媽媽見到我係咁踏地，知道我既心意。不過媽媽都就走嘞，可能無乜人再明白我……
六月二日 (星期三) 晴
媽媽今日無幫我掃下個地盤，結果比婆婆話佢。因為我食完草，通常都整到周圍都係的呀，咁媽媽今日又返左學校印成績表、拎論文喎，咁就比人話嘞！
六月一日 (星期二) 晴
今日媽媽佢地好遲先比晚飯我食呀！平日我七點半就有糧糧食的，今日佢地八點三先記得比我食，我不斷咁企起身望佢地，佢地都無人行埋來，後來好彩婆婆行過見到，叫媽媽快d比野我食咋！
五月三十一日 (星期一) 晴
今日媽媽出左去成日呀！仲去左探太婆。媽媽話比我聽太婆佢問我有無肥到，會唔會掛住媽媽等等，太婆真係好關心我呀！
五月三十日 (星期日) 晴
今日個午覺訓得好甜，因為婆婆昨晚拎左我個專用空調比我( 其實即係風扇 )，涼爽曬！
(丙主：兔仔係好怕熱的呀！因為佢地唔同人，佢地係無乜汗腺的，主要係靠耳仔散熱。)
今日七點半叩虎比糧糧我食又放我出來玩，我食左幾粒糧就忍唔住要出來玩呀！但係我出到來佢地掛住食飯都無理我，都唔係同我玩既，我咪唯有出絕招-------炸死，博同情law！
五月二十九日 (星期六) 雨
今日我好感動呀！因為媽媽今日去左謝師宴，無人理我，本來我都無希望有人會放我出來玩的呀。點知婆婆見我咁可憐，竟然捱眼訓，放我出來玩左一個鐘呀！我一面玩，婆婆一面織頸巾。我真係好鍾意婆婆的呀！因為婆婆成日讚我做乖丙，又比好多野我食，又放我出來玩。i
love u，婆婆！
五月二十八日 (星期五) 陰
今日出面唔做知做乜野工程，整日都係度嘈喎！搞到我訓唔到午覺(
兔仔唔同人，兔仔是晝伏夜出的動物。) ，整日都係度釣魚呀！都唔明點解d人做乜日整夜整的。
不過好彩今日媽媽係度煲湯陪住我，又不時比d菜菜我食喎，我先覺得自己無咁慘咋！
五月二十七日 (星期四) 晴
今日天氣好熱呀！即使全日唔旭訓响度都覺得熱到透不過氣。今日媽媽換左個新形象呀，變左做直髮媽媽，不過無論媽媽點變d髮型都好，我肥丙都會認得佢的。(因為兔仔d視力一向都好差的，佢地係靠其他東西e.g.聲音、味道
來認人的)
五月二十六日 (星期三) 晴
今日婆婆放假喎，叩虎又同人去左南丫島喎！今日簡直係好日子呀！得返我、婆婆仲有媽媽三個嘆世界^.^！
五月二十五日 (星期二) 晴
今日媽媽係咁借d椅摸我d指甲喎！我心諗一定無好野，實係想剪我d甲甲啦！於是我咪採取一級防衛，迫佢放棄呢種無必要的念頭law！唔好唔記得呀媽媽你曾經剪到我流血的呀！一.一到時要睇醫生就麻煩啦！咪話我肥丙唔提你呀！(>.<
丙主：果次係你自己亂旭先整到咋！好人當賊扮)
五月二十四日 (星期一) 晴
今日我終於食到椰子餅嘞！事情係咁o既……話說叩虎今晚食椰子餅喎，佢一開個盒我已經知道係好野，一定好好味，但係我又怕叩虎罵我，我心諗就算我問叩虎拎佢都唔比啦，唯有流曬口水咁眼望望law，後來婆婆見到我眼望望，就奇怪點解我今日唔來問人拎餅食的呢？於是就問叩虎拎左半塊餅，離遠引下我啦！我心諗呢個係我食餅既好機會嘞，於是採取行動，立即起身，問婆婆拎餅食，就係因為我咁英明的決定，我終於食到好好味的椰子餅嘞！所以話做寵物一定要善用你主人的好奇心呀！
下一頁