|
Billy Lau Ho-Him's
Home Page |
|
|
2006/12/31 百分百豐收
2006年轉眼來到, 又轉眼過去. 04年發生左好多野, 令到生命彷彿停頓在一片愁雲之中; 05年克意擺脫, 事事求變, 一切重新開始, 新工, 新教會, 新小組, 新投資策略/組合; 06年 daddy返加, 少左獨力料理家務既担子, 在神既話語(聖經), 金融分析, 以及創作上都有突破性發展, 呢個亦係 06年頭既目標.
聖經方面 唔知係幾耐之前, 開始覺得自己越來越「大食」, 單在教會學習「唔夠食」. 自從網上講道越來越盛行/普及, 「任食任飲」既機會越來越多, 所謂「食得就唔怕 肥」, 自從 4th year U, 一個禮拜平均聽一兩堂 online 講道.*1
不過, 網上講道固然有幫助, 但太到 point, 太精要, 又太實用. 對於整本聖經, 書卷結構, 以及經文多向的理解, 唔係咁容易兼顧到. 即使睇書, 來來去去淨係識睇果幾個出名既牧者寫既書, 唔係咁容易「跳出去揾食」, 因為有 D唔岩口味, 有 D又驚食左會肚瀉 :<
教主日學, 知識上勉強應付得來, 但課程準備/內容/問題, 以致教學目的同目標.......等 點樣令弟兄姊妹明白吸收的同時, 唔覺悶反而更有心追求? 就算我自己覺得聖經好有趣同好有用都好, 弟兄姊妹覺得佢悶同好廢都達唔到目標.
基於這些原因, 所以, 就有左讀神學既衝動和需要. 天道神學院(唔知係咪簡稱「天神村」?) 我冇時間要上堂, 英文又唔得, 所以揀左紐神. 有 D朋友認為, 我又冇打算做牧師, 點解要讀神學呢? 其實我希望做一個聖經學者, 用盡所有方法推行讀經運動, 令人明白聖經, 就係我一生既目標. 至於, 係咪可以在有生之年 trigger到一個幾乎冇可能扭轉教會既主流觀念/意識形態, 唔係最重要, 反正我整人既 message就己經係讀經. 06年, 在紐神讀左 4科, 仲有18科先畢到業. 感謝神, 2科 pass左, 另外 2科未知.
讀神學的確擴闊左我既視野, 包括對神話語既深度廣度, 又在聖經以外「基教」上有所學習. 能夠和各地神學生在網上「華山論劍」, 切磋交流實在一樂. 平時主日學 setting, 可能要尊師重道, 又或者時間緊逼, 通常過唔到兩招就收劍 :< 對於平時喜歡「左右相搏」的我, 下下插都要點到即止, 網上討論係好玩得多.
不過, Billy讀經指數因此由 8章跌到 4章, 關心弟兄姊妹由「中等减級別」跌到接近「垃圾級別」. 創作(下半年)更加跌得勁, 由一個月兩三篇跌到零. 神學的確抽乾好多時間同精力, 07年究竟應唔應該繼續呢? 求問結果係: 第一季唔 take, 等第二季 take, 之後, 再睇情况而定.
除左神學之外, 06年查經班終於由「地下式」走上團契小組的舞台. 由每月一次, 每次一卷舊約裡揀一章, 由出埃及記到列王紀半綜半查. 目的有 3個: 1) 令弟兄姊妹明白舊約書卷大概講乜 (60% done, 可能係教學技巧唔惦, 要更努力) 2) train弟兄姊妹點讀經查經 (20% done, 好差) 3) 令弟兄姊妹讀經唔覺咁悶; (40% done, 要繼續祈禱同花多 D心思設計課程.)
有見及此, 07年變陣, 由舞台再走返入幕後, 主力 train人, train查經組長, 透過 train人學點 train 人. 求主保守.
金融分析方面 Billy 2000年 8月中, 開始由學生哥變身成打工仔, 至今<<我們工作 6年>>.
以 financial year來計算, 07年起, 就是 Billy既安息年, 若以 "Billy"年曆計, 06年 9月開始安息年. 根據聖經, 工作第 6年神會祝福, 賜 3年既收成, 好叫子民到第 9年都仲係食緊陳糧. 因為呢個原故, 神賜福比 Billy: 06年以75%股票25%債券比重, 稅後投資回報 26%, 係市場(稅前)既 2倍, 係 budget既 3倍, 即係 3年既收成. 替媽咪管理的香港户口回報, 亦係 06年恆指升幅既 3倍, 港股budget 既 6倍.
照住神既吩咐, Billy 06年在投資上有好好既學習: - 06年既學習目標係要跑贏大市, 就此而言, 總算合格 *2. - 在實戰中經歷神好多, 5/6月既跌市, 10月31日既 income trust損手, 油價升到 78再回落到 56, 銀行股 3月插水, 到 7/8月開始反彈...... - Billy資產既最大單日$跌幅(11月1日 - $6,000); 最大單月 $/%升幅(10月); 最大單月� $ 波幅(11月), 亦在今年發生; - 神終於教曉 Billy 實行buy & hold這個本來非常顯淺既道理, 今年有 5隻股票由年頭揸到年尾.
年中換新車, 令雜費推高, 不過雜費依然比 05年少 0.5%, expenses management亦算合格.
為左預備安息年既來臨, Billy 有系统地分析市場同個人 portfolio之間的相互關係, 計出各股市/債市 1%波動對 portfolio既 $浮動/影響; 亦閱讀了手頭上持有股票的公司s既年報, 計算出佢地既內在價值, 以減低股價在短期波動對 Billy既心理影響.
07, 安息年, 神頒佈佢對 Billy既旨意: 1. 將投資户口數目減少, 06年尾 cut左 3個基金户口, 07年將會再 cut 2個; 2. Billy's portfolio update要由一年 100次减到 4次; 3. 在4月之前增持債劵到 35%以上, 以及减低加股比重 10%, 年底前將股票/基金比重由 40/60撥回至 50/50; 4. Buy & hold 所有股票一年, 蝕都唔准放; 5. 停止 study有關投資 theory/分析既書; (因為要學新野, 學乜? 仲未知) 6. 將07年所有額外收入 50%奉獻/50%捐獻, 這要在 Billy稅前13.5%獻金之外
Billy:「蝕唔准放, 但賺呢? 賺到冇得再賺又點? 另外孩子仲有一本有關投資既書, 想讀埋先. 」 基於這一問, 將第四, 第五點修改成: 4. Buy & hold 所有股票一年, 蝕都唔准放; 但當股票高於內在價值, 可以考慮沽出; 5. 讀埋果本之後, 就 stop study.
安息年budget: 指望奉獻, 家用, 儲畜增加 9%, 投資回報 6%, 雜費增加少於 5%, 資產增加 20%. 比較起 06年, 這是個非常保守既預算. 不過, 神話過, 只要孩子守得住呢個安息年, 多D祈禱讀經, 少D動作, 就完成左第二期既學習階段, 可以升班 :>
創作方面 06 年總共作左 8首歌, 比05年 6首多左 2首.
以前 D歌, 最「流行」果首只能去到自己團契的層面, 講既係十幾廿人. 06 年突破是: 教會肯唱我地既歌, 唱既人數由廿幾人增加到百幾人. 由只有我同 Adam( 04年), 多左 Sandra (05年), 做幕後製作人; 到 Carol, Joanne同 Ronald 在台上唱, 之後加埋 Tony同 Eli. 由一兩條友仔到一 term人, 對於一向採取被動既我, 實在係神既恩典.
距離出 CD仲有好多困難 ($係最容易解決既困難) *3, 但比起 05年一劃都冇, 有歌冇人, 己經係超級大躍進同感恩. CD係咪太大理想/野心係見仁見志, 不過 without mp3, 有歌冇人知, 難道只為<<娛樂自己>>?
無論點都好, 神期望 Billy用詩歌去對弟兄姊妹帶來一個衝擊: 一個對神話語/作為改觀既衝擊(做唔做到係另一回事 :P). 嚴格來說, 投資和創作的目的都是和讀經這個大方向有關. 所以, 真正支持 Billy投資和創作做得越來越成熟既根本, 依然係讀經生活. 讀經生活唔好, 投資和創作亦會相應地失色/偏離. 呢個亦係神要 Billy永遠謹記. 當然, 唔會亦唔應該 the other way around.
今年既作品, 唔再困在基督教用來用去果幾個字詞裡, 用左好多生活化, 甚至唔太相關既字眼去表達信仰內函既填詞手法. 可以睇到 Billy用字用詞上既顯著進步, 05年既作品之中, 只有<<4 月 3>>, 在曲詞包辦底下才做得到.
寫作目標(異象)比之前清楚, 加埋 07年 1月才完成的<<友伙心>>在內, 當中有 8首歌可以代表 follow up 課程的 8個單元. 將基教連成一線的填詞路線未必會叫好叫座, 但一來合乎神對自己既召命; 二來係呢個 area暫時冇詩歌, 可以算係一個破口; 三來讚美/福音歌太多人寫, 我一向不喜歡在人山人海裡鑽出頭來, 也自問寫唔到咁出色, 因為神唔係呢個 area 撑我腰. 但寫<<風靈頌>>/<<祈妙旅程>>呢類系统神學詩歌 卻比較在行, 因為果份感動和召命. 想來神叫萬事互相效力......罷!
不過, 正如好多弟兄姊妹都認為: Billy 既詩歌唔容易明, 至少, 唔係聽一次就明. 這與 Billy 執著有關, 點樣平衡同取捨 Billy, 弟兄姊妹同神三者之間的訴求成為左 Billy下半年既檢討重點. 呢一點想唔通就好難係 07年更上一層樓.
創作人通常有份執著, 唔容易改變自己既「原創主義」, 思前想後, Billy 認為<<聯想>>D詞為力求串珠而求歌詞唔夠到肉同淺白, 基於大部份會眾唱詩都唔會串珠, 寫一首串珠歌既價值何在呢? *4 所以, Billy決定修飾一點歌詞, 如果唔係, follow up course 等於廢左一課, 執著跌左可以執番, $蝕左可以揾番, 1 個 chapter衰左會影響幾多人? 知名度叫座力越大, 衰既人就越多, 所以輸唔起, 無謂到人家走來話:「我唔用你首歌.....」 果陣就仲樣衰啦.
創作人要學會將「原創主義」擺埋一邊, 何必高舉一樣唔一定屬於神既東西, 看為神聖不可侵犯呢? 係神既話語進入人心重要緊要同急需要? 還是「原創」/copy right 這些東西呢?
Follow up課程寫完, 07 年下個 topic又係乜呢? 仲未太清楚, 不過, 應該係<<初信造就>>/<<浸禮>>. 希望寫 D比較 practical, 生活特別場境性 D既詩歌, 同時又作 D比較教義味重既歌. 唔知, compare to 流行歌, 又或者 high end既詩歌, 文筆上功力未夠 lor.
除左填詞, 其他分享 06年不多, 不過多了時間睇書, 希望學問長進一點. 如果神可以用一個不學無術的我寫一首又一首歌, 一篇又一篇分享, 到我學問長進 D, 一定可以比神用, 更加爭氣.
小結 06年係值得感恩而 04年係值得謹記. 時間好快過, 一年又一年, 點先可以珍惜今天. 每日同神玩捉迷藏, 有時要佢來捉我, 有時我主動去捉佢, 只有活在這個遊戲既人, 一生才不枉過.
*1. 你可能會話:「小心聽道唔行道, 頭腦知識冇用云云....」我只能夠話, 我係活在另一套 system底下既人, 我唔覺得把 application掛在口邊等於一切. (你讀十幾年書, 有幾多 apply出來? 代唔代表你老細比幾萬請左條廢柴, 百無一用既人返來?) 點解我地讀經要如此這般「急功近利」呢? 或者, 呢個又係一個從另一個 windows 望出去既睇法. *2. 就個人能力/一個唔太識投資既人而言, 呢個回報係驚人地理想, 就專業分析員角度而言係 fair, 在任何情况/角度而言, 當然係恩典啦!! 估票, 瞓醒教可以輸死, 邊個敢話冇可能. 客觀而言, 要 10年平均回報 18%以上才稱得上 OK 既高手. *3. 如果用 $解決到既問題, 基本上唔係問題, 有咪解決左, 冇咪未解決 lor, so easy. 但歌曲既風格, 詞既文筆/主題/對象, 唱歌/篇曲/錄音既技巧/配合/style, 時間上肯唔肯/能唔能負出, promotion同人事, 呢 D一切一切都比 $更難處理. Assumed 我地係合神心意, 同埋圍內分歧(一定有唔同意見)唔會太大. *4. 串珠即係經文引用, Billy每次唱詩, 習慣地將每句歌詞同聖經對一對, 呢個係佢同神玩既遊戲, 不過, 能夠玩到串珠既歌唔多, 就算玩到, 好多都唔 fit到上文下理.
|