|
Billy Lau Ho-Him's
Home Page |
|
|
8月 newsletter (簡述: 這是Billy八月尾返港探 望病危的婆婆, 同聖靈之間的對話記錄和所見所聞.)
家中 8月初, 聽爹地話比比(Billy對婆婆既稱呼)最近好唔舒服, 唔知點解, 成日都好累. 佢地懷疑比比中暑, 於是, 三舅母陪佢去睇醫生, 先知原來比想像中嚴重得多, 要即時送入醫院, 那時, 大概是 8月10號左右.
本來計劃九月才返港的我, 恐怕要提早起程. 同旅行社查機票價格, 國泰同加航都剛剛做完特價, 美航同聯合要到下禮拜先有優惠. 今個禮拜走, 除左貴伍伯蚊, 要求老細比多幾日假(今年再冇假去温書 prepare 10月的考試)之外, 仲可能冇機位.
8月16日, 比比接受輸血之後情况大大好轉, 問題係:「禮拜五走? 等到下個禮拜二, 定係九月頭先走呢?」 爹地媽咪都話, 睇比比的情况應該唔洗咁急, 而且要排期照胃鏡先知發生乜事.
我要求旅行社幫我 hold住左各大航空公司的機位, 有一晚時間考慮. 果晚我祈禱, 問神三個問題: 第一, 應該幾時走? 第二, 回程時順道去唔去埋日本? 第三, 比比既病好唔好得番?
一, 應該幾時走佬? 神讓我記起四年前嫲嫲病果陣時, 香港果邊 同樣話佢好好地, 唔洗急住返去, 結果情况急轉直下, 最後, 我同爹地只能出席她的安息禮拜. 冇機會讓嫲嫲見到我地最後一面. 所以, 只要有機位, 唔理情况好壞, 走為上著.
二, 回程時順道去唔去埋日本? 如果比比係我去日本途中有乜野冬瓜豆腐, 會唔會有人怪我呢? 我自己又會唔會好內疚呢? 又如果比比係我係香港果陣有乜三長兩短, 而我又夠期要走, 我又應唔應該走呢? 要知道死亡紙同安息禮拜都唔係即日又或者幾日就安排到的事. 遇到的話就真係人生交叉點.
不過, 神卻鼓勵我去日本: 「能夠一個人背一個背囊, 去一個講陌生語言的異國旅行, 這種機會 係你需要珍惜的.」 事實上, 每一次遠遊都係一次好好的退修 (retreat), 同神親近的時間, 今次都唔會例外, 我亦唔容許有例外.
三. 比比既病好唔好得番? 但神冇正接咁答我呢個問題.
於是, Billy 將公司的工作, 投資, retreat裡的靈修 都處理好, 就將一切交託比神, 交戴比人, 急急離開.
機場 8月19日, 多倫多遇見罕有的暴風雨, 到處水浸, 回港那班機亦因此 delay左兩小時. 睇住雨點的塔的塔, 不停咁落下, 令我諗起一首詩歌的歌詞, 歌名叫<<我的感謝>>.
正因為 delay兩個鐘, 我填完<<特約時刻>>呢首歌, 以及有了作首哀歌的念 頭&靈感. 飛機度同各大侯機室渡過左廿八個鐘頭, 讀左四十章聖經, 同三分一本唐佑之牧師寫的神學釋經書.
飛機到左芝加哥國際機場, 已經係11點 25分, 下一站.....東京, 11點30分 起飛. 等到我落機, 對對錶已經係 29分, 「你上機仲有...一...分鐘, 多謝」, 真係挑戰<<極速 60秒>>. 「閘口係邊? 唔知. 」 「個報告牌係邊, 唔見.」 「 不過, 好似記得個機長講過係 K16閘口. 」 「有冇聽錯? 唔知.」 「神啊! 救我.」
話還未說完, 忽然聽到隔離有班日本人話去 XXX 班機個閘口係 K16, 當下再冇考慮既餘地, 跟住前面果個人衝. 果一刻我好似 Forrest Gump咁, 跑過所有在前在後的日本人, 令一切在前既人反而墮後, 而墮後既我反而在前. 聖靈既聲音亦係耳邊響起:「跑啦! 跑啦! 唔好停亦唔係回頭.」
我係一個好鐘意停低, 映相既人, 搭左個幾鐘機, 想去埋洗手間先再上機. Billy:「反正後面仲有成村人跑緊, 唔洗驚啦! 你比我去一去洗手間, 回頭映一映萬馬奔驣, 起勢咁趕果個勢都唔怕死啦! 你芳班機唔等埋我地.」
不過, 聖靈卻不停催促:「唔好停, 起勢跑, 要搏命咁跑.」(令我忽然間諗起天使救羅得的故事) Billy: 「OKKKKKK......咁我見到16号個閘口, 你就比我停低歇歇, 成不成?」 神: 「也可以, 但要快.」 Billy: 「收到啦! 不過, 乜個閘口咁遠, 仲遠過 18号, 轉左兩個彎都仲未到.」
幾經艱苦, 終於跑到去. 但係16号閘口巳經空無一人, 得番一個殘疾老人家同佢倆個家人未上機 (因為行動唔方便), 似乎大部份人都上左機. 見到咁, 我當然唔敢再去洗手間, 即刻入閘啦! 誰知我一入左閘佢就落閘. (冇放狗, 但放飛機.) 一入到機倉, 成班搭客都拍晒手掌, 仲放埋炮仗咁歡迎我.(發緊夢)
我仲聽到個地勤係對講機度講, 話:「Ok la, 最後四個, 入緊去啦!」 Billy:「最後四個?? 咁我頭先見到後面果班係乜人? 前面衝緊果班又去晒邊呀? 」 Billy:「班日本人呢? 佢地唔係去東京? 唔通留係美國? 我明明聽到佢地講日文, 又聽到佢地話 K16嫁. 如果佢地真係跑快過我, 又或者我行錯路, 都唔會快我好多, 頭尾分半鐘左右的事嘛! 冇理由個機倉裡面個個都執好行李, 好安祥咁等起飛嫁, 好明顯淨係等緊我啦!」 我終於明白點解聖靈不停催促. 「神啊! 究竟你想同我講乜呢?」
追求/成長就好似趕搭飛機咁<<刻不容緩>>, 拖一拖, 等一等, 遲來一秒鐘, 遲疑一秒鐘, 從上機變做目送. 人總會用好多冠冕堂煌, 又屬靈又入世的藉口去叫自己唔成長. 所以, 即使比人跑得更快, 依然要繼續奔跑; 即使有人墮後, 亦唔應該睇住佢地黎做目標.
每日祈禱, 讀十一章聖經, 一個禮拜最少查一次經, 仲有不停咁睇書學習. 呢 D都係神要求做的功課, 我又做左幾多呢? 「你徘徊既日子已經夠耐, 係時侯加快脚步, 如果連呢 D基本功都未做得好, 又點可以一飛衝天? 如果真係想搭尾班機, 就唔好停, 亦唔係回頭, 起勢跑, 要搏命咁跑. 以你對神話語同生命力, 也許是個初中生罷. 但係, 你唔應該只係一個中學生, 又或者一個大學生. 我對人既期望比呢 D都大.」
醫院 醫院同比比做檢查, 情况比想像中嚴重. 個胃同個肝都有腫瘤, 肺部有黑影, 心臟有事, 同埋內出血, 呢D係未期胃癌的徵狀. 早D返港呢個決定無改胃癌未期的事實, 不過, 能夠爭分奪秒, 見多一面或者係我唯一可以做到.
每日下午六至八, 廿幾個親朋戚友輪流探病慰問. 我明白大家既心情同心意, 同時又希望比比可以有時間休息. 日子係艱難, 唔單止知比比, 所有人都好疲倦, 好憂心.
跟據<<皇帝內經>>, 疲倦同憂心傷肝, 亦易令人心苦惱同枯燥不安, 而火燥就製造無謂既紛爭, 怪責, 怒氣, 怒氣就損腎......
唔知道要飲幾多杯沙參玉竹水, 先可以令大家降火? 又唔知要飲幾多包陽光檸檬茶, 先可以令到「邊度都有陽光.」 醫生話, 比比得番兩日命, 隨時都會唔得, 叫比比同家人有心理準備. 聽朝既陽光一定有, 一定會出來, 不過, 我地仲有冇生命見到佢, 又有邊個可以保證呢? 假如陰天怨天悠人係合情合理, 咁陽光出現又有邊個識得珍惜同感恩呢? 聽到醫生咁樣講, 令到比比成日都冇晒心機.
Billy:「主啊! 求你安慰比比, 令佢唔好咁辛苦, 如果可以既話, 求你醫好比比. 不過, 呢個或者係我一廂情願, 快來快去, 未必唔係一件好事….」 神聽左我地既祈禱, 雖然, 比比既病依然全無起色, 但聖靈卻提醒我一件事: 「你唔開心就唔好扮無事. 不過, 你唔洗太擔心你個比比, 我會安慰佢同照顧佢. 事實上, 佢心裡係明明白白, 比你地每一個都清醒, 你地以為自己仲會行會走, 以為可以照顧他人, 聖靈反而為你地擔心. 你要安慰就去安慰罷.」 Billy:「神啊! 你知道我係拙口笨舌, 點安慰?」 聖靈:「就是要你拙口笨舌. 你乜都唔洗講, 陪伴跟聆聽就足夠. 去罷!」
比比病情惡化, 好似細個一首打油詩話「廣華醫院唔收佢」, 要求我地轉送去善終. 與其去善終, 不如返屋企, 呢個係比比既心願. 我地買左個氧氣機, 又請左日夜更看護服事比比. 總之, 錢可以解决到既問題, 人可以盡既每一份心神精力, 大家都冇保留咁付出. 不過, 健康眞係可以用錢同埋人既努力賺番來係一個問題. 係一日定係一年既抗癌歲月仲係未知素, 金錢同心神精力又係咪應該一日之間毫無保留, 完全透支又係另一個問題.
比比平時咁健康, 冇病冇痛都咁樣. 見到身邊好多人, 用寶貴健康去換取血汗般既金錢, 亦不難預計到佢將來一定要用卅倍, 六十倍, 一百倍的金錢去買返失去左既健康. 只不過, 健康未必可以好似外匯咁, 呢排加幣強, 沽出入港元, 到加幣疲弱再以港元入番. 為左家人既幸福去賺多個錢, 到頭來卻換唔到多一天半日既相聚, 珍惜眼前人係咪比賺錢更加逼切而實際呢? 何必繼續做賠本生意呢? (我係一個對數字較精明既人, 呢條數我識計.) 比比一直都用愛心同埋時間去珍惜呢個家, 愛心同埋時間係錢代替唔到.
送比比返屋企的第一日, 教會裡一位自然療法醫生來探訪, 教左我們好多點照料比比的方法同要注意既地方, 仲分享左好多有關健康既常識. (有遺漏/記錯請原諒) - 要健康其實好簡單, 只要每餐之前食一盤新鮮有機而未經煮熟蔬菜 - 人體需要廿種銨基酸, 要吸收八種, 其餘十二種身體可以用吸收番來果八種去製造, 不過, 今日既食物營養素不足, 任你點均衡飲食, 都無法吸取足夠營養. - 無法吸取足夠營養, 所以要靠食多種維他命丸去補充, 而加拿大既藥係最好 – 平靚正. - 比比身體機能差, 無法從食物中吸取, 可以食葉綠素, 黏多糖以增加抗氧化濟, 以助抗癌 - 生果含有抗氧化濟, 不過要切開之後半小時內食, 最好係連皮連核飲果汁(蘋果有臘面唔得), 街外買果汁當然超過半小時, 而且一定有防腐劑, 因為冇一定保存唔到. - 維他命C人一日要吸引 500mg, 而一個橙只有60mg維他命C, 茫果仲好(不過人話燥) - 癌症病人不宜食提子, 因為會令細胞(包括癌細胞)都更活躍. - 要健康其實好簡單, 只要每日運動同十一點前安睡 如果我地有多D健康既學問, 或者比比根本唔會入院, 不過, 有左知識而不知自愛依然冇用.
「如果昏迷可以令人更清醒, 如果跌倒可以令人站起, 神啊! 孩子依然希望你未到最後, 都唔好用呢一著. 我地微弱如以色列國, 試問又有邊個受得起?」(摩 7)
油站 呢段日子, 有機會由詩篇讀到以西結書. 值得感恩係: - 對以賽亞書頭廿七章明白跨左一大步; - 對四十至五十五章就由以為明白到發現有好多唔明白
美國經濟自從上任總统克林頓連任後既第四年開始唔惦, 911事件, 阿富汗同伊拉克戰事. 除左03/04年道指反彈左百分之三四十外. (係因為 之前D corporation write off晒 D expenses.). 今日, 又再遇到路易斯安那州颶風, 估計颶風仲會陸續有來, 阿富汗同伊拉克既包袱又要背到幾時呢? 日本已經衰足十七年, 德國自從合併至今仍然積弱, 三大強國之首 - 美國亦在99/00年科技泡沬爆破之後一蹶不振, 睇黎仲有排衰. 反觀, 越來越多人睇好中國. 過去廿五年, GDP每年增長9%, 估計未來廿年增長依然強勁. 究竟乜野令到一個國家由盛轉衰, 又另一個國家由弱轉強呢? 係市場經濟定計劃經濟? 係利率/稅率/匯率? 定係軍事/航天發展? 再唔係, 一句世界/風水輪流轉呢?
以賽亞書話比我地聽無論猶大, 以色列, 亞述, 巴比倫etc, 滅亡唔係因為王帝唔夠精明, 經濟唔夠好, 定係軍事國防唔夠陣, 亦唔係因為敬拜/讚美/事奉 得唔夠投入同委身. 一個國家既安定繁榮在乎政府同國民點樣看顧同照料其中既孤兒寡婦, 在乎係咪從事正當正直而不剝削既商業活動, 在乎社會道德的持守程度….. 呢D一切, 日本, 德國, 美國又做左幾多呢? 中國人為左賺錢不擇手段, 令無數市民惶惶不安既「毒」市生意, 又或者害苦萬千少女既繁榮「娼」盛, 都巳成為左中國既文化特色. 若說這是公民教育既問題, 對於大學生多的是既加拿大亦唔好得幾多. 為左經濟而拒絕罷免醜聞多多, 實幹少少既自由黨令人不忿? (其實經濟好壞同自由黨與否冇乜直接關係, 一切只在乎當時既機勢.) 將支持同性戀等同為支持民主自由, 以致打擊一切異見人仕既政策同社會趨勢又係咪正確呢?
以賽亞書前半部, 係鳥西雅到希西家時代寫成. 當時國力唔差, 特別係鳥西雅年間. 不過先知以賽亞, 以致同期在北國事奉既亞摩司都不約而同咁指責國家國民既「假」敬虔同敗壞, 及滅亡既預言, 點解呢? 我地幾時先識得醒呢?
加拿大係美國隔離, 30-40%出入口depends on美國, 加拿大好, 美國更好, 美國好, 加拿大又未必受惠. 好似猶大同以色列咁, 係巴比倫底下乖乖地ok, 動作多多反而死快D. 真正要處理既問題係乜呢? 油價高企對加國影響好壞參半, 不過, 一個國家前面既路, 真正既加油站又係乜呢? 要走邊條路先係正確呢?
為一個人把脈, 健康在乎身心知足喜樂, 營養飲食同休息運動…. 為一個國家把脈, 又要開乜野藥方, 需要幾多調理先可以冶癒? 如果不知自愛, 就算係回春國手, 亦只有回天乏術. 「神啊! 我可以點?」
「你們要為那城求平安, 為那城禱告耶和華, 因為那城得平安, 你們也隨凓得平安.」(耶29:7b) 「我勸你第一要為萬人懇求, 禱告, 代求, 祝謝, 為君王和一切在位的也該如此, 使我們可以敬虔端正, 平安無事的度日.」(提前 2:1-2)
|