Balkie

BALKIEEEEEEEEEE

BALKIEKOERANT - JANUARIE 2003

HALLOOOOOOOO daar. Dis EK, BALKIE, wat hier praat. En hierdie is die BALKIEKOERANT! (JANUARIE 2003)

 

HAAAAI – kan jy GLO dis alweer ‘n NUWE jaar. En weet jy wat – dit was my VERJAAAARSDAG laaas week. BOE HOEEEE – nou is dit verby vir nog ‘n jaar. Agggggge neeeee. Maar aggggge jaaaa – dit was soooooo lekker.

 

Hier was klomp maats en die ma en die pa en Isak en Bert en Karien en Roelf en Miaukatjie. Roelf het ook ‘n hoedjie opgehad en hy het BAIE mooi gelyk. Miaukatjie het hare afgepluk en daarmee gespeel. Katte is baie snaaks. (Die hoendertjies het ook saam partytjie gehou, maar in hulle hok. Ek het vir hulle ekstra mielies gaan gooi. Ek het nie probeer om vir hulle hoedjies op te sit nie. Ek was bang hulle skrik vir die hoedjies en vergeet om eiers te lê!)

 

Ons het BALONNE gehad van al die kleure – ek en die pa het die balonne opgeblaas voor die partytjie. Eintlik het die pa die meeste opgeblaas want dis VREEEESLIk swaar om balonne op te blaas. Die pa was ook naderhand ROOOI in sy gesig.

 

Daar was ook lekkers en chippies en ek het SELF die vorige aand my verjaarsdagkoek versier. Die ma het net die koek self gemaak en toe het sy baie bakkies met smarties en allerande blink eetgoedjies reggesit en ek het SELF ‘n regte BALKIEKOEK gemaak. Dit was WONDERLIK en toe ek klaar was, was ek ook nie meer honger nie. Daar het niks smarties en ander blink lekkergoedjies oorgebly nie.

 

Ons het speletjies gespeel en gehol en gelag en geêet. Almal was so vrolik. En ek het wonderlike presente gekry. Ek het ook ‘n pakkie lekkers vir elkeen gegee en ‘n briefie om dankie te sê. Ek het vir URE lank die pakkies lekkers opgemaak en briefies geskryf. Nou nie sulke lang briefies soos die Balkiekoerant nie. Maar net DANKIE BLANKIE – of nee – dis nie reg nie. DANKIE BALKIE? Jaaaa – dis reg – partykeer raak my kop so deurmekaar dan voel dit asof daar honderde ballonne in my kop ronddryf – elkeen met iets lekkers in om te doen of te dink en te wonder. Ek is so beeeeeesig.

 

Hmmm.

 

Ek hoop dat hierdie jaar vir jou en almal vir wie jy lief is en wie vir jou lief is ‘n wonderlike jaar gaan wees!!! En as JY verjaar dat dit ook vir jou ‘n heerlike dag sal wees.

 

Wat dink jy gaan jy alles hierdie jaar doen? Dis snaaks as mens dink jy kan dink wat jy wil doen, né?

 

BAIEEEEEEE liefde

BALKIEEEEEE

TATAAAAAAAA

 

 

EK, wat BALKIE is, het ook 'n STORIEBLADSY op STORIEWERF! KLIEK hieronder om te lees!