不知從那時開始

	5月26日星期四懶人日記


死啦，原來我咁耐冇打日記架啦?!究竟仲有冇人黎...我唔想架!!(唔怪之得冇人睇啦，原來我都未更新個連結)(眾毆*)因為我"貌似"好忙咁。返多一個禮拜就放假，預備final exam。呢廿日，唔長唔短，都發生左好多事，都唔知由邊到打起好。自己又懶啦，成日諗住打啦打啦，諗諗下就以為自己打左(日記)啦。(汗")唉，如果由頭講起真係一疋布咁長，我盡簡啦。(我d行程真係插針都插唔入呀!!) -------------------------------- 10/5 就考granding啦，個日考先溫，都算咁上下啦。 12/5 考普通話口試，我覺得自己考得都唔錯。(笑)下午就趕過荔景上knit CAD，好似都幾難咁喎。 17/5 電腦份assignment，前一日先趕頭趕命趕俾佢。 (通常都係last day先做架啦) 19/5 marketing測驗，唔夠時間做，如果有多少少時間我諗我會做得更好。放學又閃過荔景上堂，我織左一幅地壇咁大塊既咸旦超人圖案既布，勁靚呀!!送左張俾同學仔，但我又想要多張，咪螺阿sir囉，點知要我用4幅草圖交換。(成交)咁樣我就有兩張啦!!yeah yeah yeah!!唔係賣花讚花香，真係好靚架。放學買完禮物會合阿柴、菠菜一齊去食飯，之後行街影貼紙相，返到上水約埋小丸子食糖水。 20/5 本來今日英文要interview，不過我地個個都話未預備好，就延遲到下星期五啦。 22/5 阿柴大壽，終於19歲啦!! 23/5 原來飯團同阿柴既生日只差一日咋?!不過就差好幾年啦......我真係諗唔明個果你做咩叫我去死?!(r 爆頭) 23/5 終於交最後一份project啦，好感動。不過我完全未做好囉，又係趕頭趕命趕返俾佢啦。merchan派返所有測驗，都考得ok架!!3次test，除左計數個題唔合格，其餘兩題60同65。但我諗極都諗唔明，65分個題我答左4頁紙，但60分個題我只係寫左兩頁。(汗") 24/5 電腦test，我唔記得左點用IF同PMT。不過IF我好似撞0岩左?!希望唔好肥啦，我諗住拎A架。 -------------------------------- 終於打返到今日啦，睇到以上行程，可想而知我係有幾忙呢。日日放成5點，不過總算挨過。家陣乜都教哂乜都考哂乜都交哂，都冇乜堂上囉，所以而家都可以抖返陣；不過遲下又要開始溫書準備我個final exam囉，醒醒定定考好佢呀!!本來目標係全班第3，但而家又好似冇乜可能啦；考得返第6都可以偷笑囉，有d人係完全唔可以睇小。(睇佢好似冇乜攻擊力,查實佢好鬼死醒)講返今日啦，發左個好夢呢!!(呢幾個都夢到想夢到既人)返到學校派返mkt個test，估唔到咁都有75分喎。(呢兩題的確好讀)但好多人都考得好差，三班之中我地考得最差個班。(1,2分都有人夠膽死拎返黎)最後咪勞動到文sir同cindy入黎說教囉。(好鬼死鍾意cindy個比喻)我個班唔知咩人黎架，出值率已經低架啦，測驗都考得咁差，都唔知畢唔畢到業。(話唔定連試都冇得考添啦)之後個堂考普通話畢試，都ok既。不過佢份卷...做到我偷笑。真係...冇得頂。上完堂下就唔駛interview就閃返屋企做功課，終於做埋mkt last一份assgement啦。(感動ing)之後又係打下機咁囉。死，聽日interview都未預備好添......(逃~~) -------------------------------- 7/5 原來今日9點3要去到，但我7點已經起左身。咪玩陣電腦8點9先出門口囉，落到樓下等左勁耐先有車。今日我又早左落車，陰公。我仲要係佢學校後面兜左個圈，我勁白痴。又係0岩0岩好9點3去到試場，但今日冇人坐我個位了。(笑)坐到10點先開考，份卷有點淺呢。(但對返答案原來錯左好多零碎野)一路做一路笑，好似仲淺過我之前考個份SA。考完阿柴已經係門口等我，咁咪一齊去食車仔麵囉。好耐冇吃過啦，記得中學個陣都成日食架。食完野阿柴返工，我就返屋企，等左好耐先有架車；如果我行返去既話，我諗仲快過我搭車。返到屋企play那可愛的電腦，玩到勁悶就開始做功課。不過當所有野考哂個陣，冇野做係好悶架。但其實星期二我要考grading，聽日先溫啦。 -------------------------------- 6/5 (五) 考會考呢一日終於黎啦，有點點緊張啦。8點半開考，我7點9先出門口。落到樓下mm有車，點知我早左勁多落車；咪要行過去囉，仲行錯路添。搭半0岩0岩好去到試場，去禮堂搵位啦。我坐16號，點知兩行坐滿哂人；我咪企係中間數第二行第6個位囉，跟住個阿SIR就走埋黎啦。我個位俾人坐左。(=口=")首先阿SIR睇左佢份準考証係16號既，但我又係喎。之後阿SIR話我應該係青衣考，我咪同佢講我去青衣考clothing架。明明寫住我去陳震夏考英文架啦，咁個阿sir咪再睇個男仔個張準考証囉。原來個男仔去錯學校，佢應該去隔離校(李嘉城)考架。呢個時候雲sir走埋黎，睇下隻錶。個男仔冇時間去返間學校架啦，咁咪叫佢讓返個位俾我去第二個位考囉。我覺得個男仔勁慘呀，去錯試場已經慘架啦，仲要最開考個一刻先知，覺得我好似間接害左佢咁。如果我早d到,佢就有機會去返個試場架啦。不過又會咁0岩得咁橋，佢坐個果位又會冇人(即係我)坐，枉佢一直以為自己去0岩試場。之後我咪坐低考，作文我真係唔得。之後paper2都ok既，閱讀埋解我都睇得明；但唔係好夠時間做。後面個part先低b，首先proofreading佢竟然俾埋d字叫我地加插返入去適當地方就得啦喎；之後仲離譜，個篇文俾埋開頭個幾個英文字母叫我地填埋落去。但我唔係好夠時間，咪係咁填囉。(之後上網對返答案,都錯左好多題呢)考完搵阿柴食lunch，再係上水逛左陣。終於配左眼鏡啦，而且仲係黑膠框(想配好耐)。好期待呢副眼鏡面世呢，快d到星期二就好啦。 -------------------------------- 5/5 (四) 唔掂呀，搭火車不停咁溫書。溫書溫書溫書，因為我真係唔想肥。(但完全入唔到腦,0岩0岩讀完之後可以又唔記得哂架)上marketing啦，普通話上左陣就俾我地溫書啦。之後食完lunch又繼續溫，但我真係溫唔到。算啦，merchan呢次肥左啦。一黎俾michelle洗左一獲，二黎自己又溫唔切。(可以話"羅黎煎",自己之前又懶懶唔溫喎)考啦，第二題完全唔掂。炒左，好唔甘心。考完試同佢地傾左陣計就閃人，聽日考CE英文。 -------------------------------- 4/5 (三) 今日要測knitting。都未溫過，都係搭火車返學個陣溫過下。上午返去織左份考試先啦，成個上午就係咁樣用啦。下午食完飯就開始溫書，其實已經半放棄狀態。到2點半測啦，嘩。掩住半邊咀笑，因為佢份野...呵呵呵。不過後面縫盤個到就麻麻地，因為始終冇乜點溫。考完等埋小云就歸家去了，要博命溫merchan；就連電視都唔睇，但完全溫唔到囉。屋企個煩精日講夜講(真係架,每日同老爸講到11點,第朝6點起身又講過,都唔知點解咁多野講)，攪到我溫唔入腦。最後睡魔仲急call，訓死埋。 -------------------------------- 3/5 d燒不斷持續退左燒又燒返。=口= 其實星期日好返少少，但尋晚又燒過。夜晚10點幾開漿始燒，到點幾先退燒。呢3日完全冇乜點溫過書，都唔知點死。訓下又醒下，零神2點幾終於起身溫書。溫到3點幾先去訓，但係好熱。=口= 攪到今日唔知醒，7點半先起身。個頭超痛，但又唔想唔返學喎。(我真是個乖學生!!)8點3先出門口，又唔行得快，一行快d頭又痛又想嘔，攪到9點半先返到學校。(其實同平時又咪差唔多,用左個零鐘先返到學校)之後咪上電腦堂囉。上完堂落返8樓上堂，突然聞到陣味好鬼想嘔。(原來B.M係我後面食吞拿魚包!!)即刻避開3尺!!之後英文堂討論，不過我地似玩多。唉，無經無險又放學。放學仲要冇得抖，首先要買過隻夾啦。(d夾成日都係買左隻新之後舊個隻唔係爛就係唔見架啦,攪到永遠只得1隻夾用,真神奇。我明明買左好多隻架!前前後後都唔知唔見/整爛左幾多隻)之後就去買耳筒等星期六listen用啦。(早知唔考啦,而家連考四科呀,勁慘。聽日knitting,後日merchan,星期五、六就english hkcee......唉,犯賤)跟住去交電話費。(出糧冇耐就將大半錢入哂八達通同交電話費......慘)最後去惠康買火龍果食。為左自己健康著想，我要食多d生果。2點幾終於返到屋企...但我12點半已經放學啦喎。之後咪食野囉，早餐得個蘋果咋。(為爭強抵抗力而吃的)本來想食完睇陣網頁就去溫書架...點知...到而家...5:37p.m...我仲play緊電腦。(逃) 今日成日好頭暈，又成日想嘔。(攪到好似有左咁款=口=)一定食得成藥太多!!下次就首再病死(睬睬睬)，我都唔會食多過2粒架!!(呢2日我已經食左6粒幸福傷風素,但仍然冇效的;証實廣告係呃人架,完全唔可信!!) -------------------------------- 1/5 今日10點半就起左身，攪呢樣攪個樣11點半就出門口。點知行到火車站先發現冇帶八達通，咁咪返屋企拎囉。但係行到一半已經冇哂心情啦，都廢事行囉，咪打俾佢地話唔行囉。返到屋企諗住玩陣電腦後再溫書，但唔知係咪吹得風扇多，有d發燒；其實尋日個鼻已經塞塞地，食左粒傷風素就走去訓，咁呀訓左大半日。唉~~今日又冇溫書啦，都有幾頁字未讀。