31 October, 2005

各位朋友, 萬勝節快樂!! 你地去左邊反呀?! 我好乖呀, 去左我阿姨屋企食飯之後就返屋企做公司d野lu~

今日本小姐心情非常惡劣, 惡劣得能夠吃掉一隻恐龍然後在彌敦道噴火!! 雖然我不知道吃掉一隻恐龍然後在彌敦道噴火代表甚麼, 也不知道吃掉一隻恐龍然後在彌敦道噴火等於有幾忿怒。總之我就是想吃掉一隻恐龍然後在彌敦道噴火!!!! 至於有甚麼導致我非吃掉一隻恐龍然後在彌敦道噴火不可..... 我不知道~ 大概因為.... 一早起來很眼訓、馬鐵又壞了變成十五分鐘一班、火車地鐵上迫滿了一頭又頭豬、還有一頭超級肥又不要臉的"監粗lian"的擠進車廂內然後把我迫得幾乎雙腳離地之餘還要步步進逼令他的身體緊貼我的八月十五(這時候我恨不得立刻轉身然後兜個膝頭哥鋤落佢細佬度!!! 當然最後我並沒有這樣做, 因為我已經雙十離地咁滯, 根本做不到, 而且我的EQ也非常高。所以, 我只在心裡咀咒他: 明天便會變成400lbs, 光頭, 性無能.... 下刪一萬字)、去完醫院之後九時許到達公司便開會直到下午五時、不斷被捽數。以上任何一個原因都有機會令我吃掉一隻恐龍然後在彌敦道噴火, 更何況所有事情一齊發生?!

呼~ ^^ 只要你地睇完上面段野, 我就嬲完架喇, 因為你地同我分左d嬲lu~ yeah!!!

點呀?! 你又攪咩呀?! 我見到你咁..... 我真係想打爆你個頭呀!!!!!!!!!!!!!!!!!!!!!!!!!!!!!!!!!!!!!!!!!!!!

30 October, 2005

不少朋友都說我總叫人擔心, 因為我不懂得保護自己, 也不愛自己。如果你問我最令我憂心的朋友是哪一位, 相信那應該是何先生。由中學到現在他都會間歇性地幹些甚麼教人擔心不已的事~

跟我的豬們我關係密切到不得了, 就像不見一星期已經會掛到死。而有些朋友, 一年才見一兩次都已經足夠。(備註: 所以每次見面都要花上一整天來交代所有事情, 哈哈~) 今天, 我就跟圈圈進行了我們的annual meeting, 哈哈! (其實都不算是annual~^^)談東談西就談了六小時, 很開心啊! 大家都很直, 大家都毫不客氣。朋友嘛, 不必做作, 不必修飾, 想說甚麼就說甚麼啦! 她是一個很tough的女生, 永遠都給予我支持, 教我做人道理。可能因為從小相識, 彼此的家人亦相識, 感覺非常親切, 我亦非常信任她。並不是說我不相信其他朋友, 而是.... 她令我有安全感。It's a bit more than friends but less than family. 我不必跟她說我愛她, 不必做任何門面工夫, 很自然~

其實唔關佢事, 不過我就係答唔出一句"關你叉事呀?!"。

28 October, 2005

唔知大家有冇睇過《男女字典》喱套now.com既劇集呢? 本小姐覺得好好睇, 所以將每一集都睇左兩次。亦因為喱套劇而有少少欣賞黃又南.... 食煙個樣~ 我想同大家分享既當然唔係黃又南點樣食煙啦,  而係其中有一集叫做【Backup】。前幾日同朋友甲講開【backup】喱個topic, 所以令我諗起《男女字典》。佢話每人都應該有一個或以上既backup, 咁當你既首選滿足唔到你既時候你就可以搵你既backup頂上。At the same moment, 你可以有好多個backup, 因為backup都可能有唔available既時候, 咁係喱個關頭, 你就可以搵backup既backup, 如果連佢都唔得就搵backup既backup既backup.....。之前提到既滿足唔到你唔係指性方面, 而係任何一個層面。可能係首選唔夠關心你、冇時間陪你、唔識tum你..... 咩都得! 其實你同你既backup之間係冇commitment既, 所以你隨時都可以轉變backup人選, 而你既backup亦有可能根本唔知道自己係你既backup。當然, 如果你地大家都視對方為backup的話就最理想啦, 否則我個人認為做人backup係一件好委屈同埋冇尊嚴既事。點解?! 我覺得咁樣俾人攞黎攝, 好似唔係好respect囉。而係喱一刻, obviously.... 我就係人地既backup勒~

雖之話人人都應該有個backup, 不過我就從來冇試過咁做, 即係話我從來未試過有任何一個backup。一來可能因為我唔需要啦, 二來我覺得咁樣好似有少少衰 (as long as 果個人鍾意你的話, 如果佢唔係鍾意你, 咁都冇咩問題既~)。其實.... 你同你既 backup 之間可以咩事都冇發生, 可以只係當首選唔得閒時搵佢傾下計, 或者出下街食下飯飲下酒..... 咁當然亦都可以有更高層次既交往, 咁喱d野就睇你自己既道德標準去到邊喇。唉, 不過係喱個moment... 我連首選都冇呀, 仲學咩人講backup丫~

27 October, 2005

有兩個人, 人甲同人乙, 佢地每人講野一句說話。昨天人甲跟我說:『你點會唔理佢丫~ 』今天人乙跟我說:『我知你係唔會變心既!!! ^^』當我問佢地點解要咁講既時候, 佢地都俾左同一個答案我:『因為我了解你囉。』人甲人乙, 你地好抵死~

喱個星期工作好唔順利... 去到間間醫院都搵唔到醫生, 日日都醫車錢白去醫院浪費時間! 朝早又唔係好願起身....

唔記得同大家講.... 前日我睇左醫生呀, 睇下把聲點解成日都咁沙, 因為其實中五之前我把聲唔係咁架嘛。原來我聲帶起左幾個枕, 原因有幾: 講野發聲方法唔正確、講野太多、唱k時選擇左一d太高或太低音既歌黎唱~ 於是醫生幫我排左期做語言治療, 學下點講野~

點樣可以令自己個腦休息下呢?! 我覺得自己日日都冇乜點休息, 精神上好攰。每日一係就諗住佢, 一係就諗工作, 一係就玩接龍, 就算連訓覺都要係咁發夢, 根本完全冇停過!!! 就算連發夢呀, 都係日日夢見佢, 唉..... 發埋d咁激動(p.s. 係激動, 唔係激情! 你地唔好諗多左~) 既夢, 好傷神架!!!

26 October, 2005

下星期就係最後一堂跳舞堂喇, 學左兩個月跳舞, 我地都仲係連 warm up 都做唔到, 更加唔洗講跳唔跳到隻舞呀! 我同Dora豬已經諗定下一站天后係..... 學整蛋糕!! 係咪好~~~~ 女仔呢? 我地忽然由 the class of wild 跳去 the class of lady, 嘻嘻~ 有好多人我好想可以整蛋糕俾佢地食架, e.g. honey, 羊豬豬, 佢, 爸爸..... 哈哈哈, 學都未學就諗定要整俾人地食~ honey, 你放心啦, 你唔洗做白老鼠呀, 你返到黎我應該已經整得好叻架喇!!! ^^ 不過你要瘦d先返黎, 因為我同Dora豬兩個都爭住整俾你食, 一定食肥你, 呵呵~ ^^

其實每一個人都係自私既, 如果你唔自私, 我會勸你自私d。就好似如果你知道一個你唔鍾意/已經唔鍾意既人鍾意你, 咁你同佢係朋友, as long as 你唔討厭佢, 好正常既人都會 hea 住佢, 得閒又搵下佢、心情唔好又搵下佢、想搵人攝時間又搵下佢, 亦都唔會澄清自己其實已經唔鍾意佢。因為多一個人鍾意、多一個人錫點都冇蝕, 況且喱個世界上唔係你負人就人負你架啦, 咁佢唔開心好過自己唔開心丫! 唔知咩都有話啦『寧叫我負天下人, 莫叫天下人負我』。(其實我好似將句野完全相反左 係咪呀?! 唉, 是旦啦, 總之係喱個意思啦~!!!) 所以, 就算我身邊既朋友做左果d係旁人眼中可能會認為係好狗既事既時候, 我都唔會阻止佢地。唔好話係男定女, 而家喱個社會..... 男男女女根本都係一樣咁衰! 總之.... 有咩就顧掂自己先啦, 你都唔知聽日會發生咩事, 總之凡事要以自己為中心, 為自己而活! 想當初... 佢夠對我超級好, 我夠以為自己唔會好鍾意佢啦! 結果?! 到我好鍾意佢既時候咪"乃"野囉!! 所以話呢..... 咩都係假既, 琴日都仲可以好愛你, 但係聽日已經唔知會係點! 所有野..... 都係好唔 secure 既。只有果d鍾意你而你又唔鍾意佢既人, 你先比較容易handle, 起碼你想點佢地都會就你, 你就唔會為佢地而唔開心, 何樂而不為呢?!

24 October, 2005

今日做左一件對你地唔住既事, 事後都有少少憫自己。我都唔知自己做緊乜! 講一樣、做另一樣、諗又係第三樣野~

人家說, 25 到 30 歲係收爆旦既 peak season, 但點解我覺得而家已經好多咁既?! 琴日飲完, 下兩個星期又飲, 接住落黎知道既都已經起碼仲有四對新人, 你地而家係咪乞兒兜上拿飯食shin?! 放心, 第日我結婚一定請返你地~ wahahhah!!!! 我諗..... 他日我d豬們結婚我一定會感動到係咁喊, 可能喊得仲勁過佢地, 因為果d場面真係令人好感動架, 哈哈哈哈! 而我自己結既時候都應該會喊足一日, 一上台講野就喊得更厲害, 哈哈~ Anyway, 恭喜晒Joyce同貓貓!

23 October, 2005

琴日我經歷左又健康、又悠閒、又頹廢、又刺激.... 既一日。我既活動流程如下: 南丫島郊遊(食 lunch + 行山) → 黃埔打保齡 → 尖沙咀買醉 → 遊車河 → 飛鵝山吹風 → Dora黎我度借宿一宵。

我、羊豬豬、Alvin Hui、Jordy 一行4人中午出發去南丫島, 去果度既目的只有一個 -- 就係食lunch!!!  係咪好有意義, 好有情趣呢?! 雖然話係食素, 不過果一餐都令我地捧住個肚離開!! 不過之後仍然幫親左遠近馳名既山水豆腐花。行山行行行..... 行左一個鐘多d終於行完, 於是又返返鬧市玩~

Bowling 同飲酒既事不值一提啦, 最精彩既係.... 當人人都飲到醉醺醺既時間 Kan 就車我地走。一路上播放住一首又一首流行曲, 大家都好投入咁唱唱唱.... Kan 見我地一個二個好似唱得好開心咁, 於是揸住架車亂咁行, 行行下.... 佢決定車我地上飛鵝山!!! 我咁大個女第一次去飛鵝山咋!!! 一路上, 我好希望快d上到山頂, 睇下果度d車係咪真係會搖搖下, 點知.... 原來冇既!!! 淨係見到d飛車男, 如埋見到架AE 86。嘩..... 果個咁既地方凍到唔知想點, 勁大風, 仲要得17度!!! 山下面有27度, 山上面得17度。一個二個著到鬼咁單薄.... 凍死左都冇命賠~ hea 左唔知幾耐終於決定回程, 不過大家仍然好似唔係好願返屋企, 於是又去左食油渣麵。到左五點幾, 我地終於捨得返屋企.... 呼~

>> Pictures <<

20 October, 2005

今日係姨媽生日, 夜晚一家人去左廟街食煲仔飯, 之後竟然去左.......... 沙田........ 唱k!!! 我覺得我地都幾yeah, 哈哈~

我 supervisor 之前向我透露我 2006 年財政年度其中一條數係170萬, 喱個星期我都忙於做我既 presentation, 內容係 review 返過去幾年既數同埋要 forecast 出年條數。誰不知我 forecast 完條數出黎得70萬, 仲差成100萬!!! 點算?!?!? 就算計埋其他 basic purchasing order 都起碼差成50萬呀我估!!! 點算呀?!?!?!!? 我諗出年....... 都唔洗旨意升職加薪囉~

19 October, 2005

早前高調宣佈淡出娛樂圈既【咪嘈姐】懷疑因為少浦少運動, 以致心曠體胖, 發福不少。就連佢既屋企人都開始忍無可忍而勸佢 keep fit。有鑑於此, 闊別左蘭桂坊經已有兩個星期既【咪嘈姐】正在慎重考慮是否應該復出。原來錢同體重係成正比架!!!

嘩, 今日我竟然間俾本小姐發現左有一隻同 Derby 個樣相似度有九成以上既狗, 好勁呀!!! 我好興奮呀!!! 佢係我用事隻狗呀, 大家睇下似唔似?!

← 同事甲隻狗Dum dum．．．．．我隻狗Derby →

有請....... 士多啤梨 (又名"ichigo")既新男朋友 -- 范西!!!! (解說: 由於佢家鄉位於法蘭西 France, 所以佢老豆同佢改個名叫范西。自佢老豆由法蘭西帶佢返黎開始, 佢已經有思覺失調, 終日以為自己係一隻獅子~ 佢同士多啤梨一見鍾情, 一拍即合, 火速戀上, 不過應該唔會閃電結婚。因為眾所周知士多啤梨生性滛蕩, 曾與大量男性扯上關係, 當中包括: 李克勤、anyway、阿叔等等~ 基於私懚關係, 我唔可以將其他男性既照片一一刊登)

←士多啤梨(左)及其男友范西(右)

18 October, 2005

遇然看到我久違了的bb..... tattoo~

感受到有一股氣正在迫近, 教我有一點兒緊張, 卻又預料到這會是怎麼樣的一回事。相信即將又一次叫人失望~ 哈哈!

每天想著怎樣 hit budget, 快要瘋掉了!!! >< 錢得來不易, 可惜它留在身邊不久後, 就會如川流不息的河水 (or 瀑布!!!) 一樣沖出大海!!! 天啊!!! 你教曉我原來買 con 水都是如此奢侈的一件事!!

我: 嘩, 好野!! 我琴日終於買左 con 水喇!

Dora 豬: 做咩呀? 你出左糧咩?!

我: 唔係呀, 出左 allowance 呀!

羊豬豬: 你幾時加人工呀?! 三月定四月呀?!

我: 一月啦...

羊豬豬: 你就好啦, 咁快加! 加幾多架?

我: 挑! 果幾百蚊, 趺都趺左啦!

羊豬豬: 你錯! 至少佢令到你可以有錢買 con 水!!!

做 sales 點解有咁多錢?! 除左因為佢地係幫公司搵生意搵錢既前線人員, 要刺激佢地去搵生意之外, 亦都係因為: 佢地要受客人氣、受老細氣、日日四圍走兩個月行爛一對鞋、好天曬落雨淋夏天熱到死冬天俾風吹死、大壓力成日俾人摔數... 佢地果d絕對係血汗錢黎架。所以呢, 大家唔好成日睇個錢字呀, 你估做 sales 係唔洗做坐係度有錢收架咩?!

其實我都反省過自己好幾次, 到底我係咪真係咁樣... 坦白講... 可能有少少啦~

果日同楊門女將出門, 講開又講提到我個人其實好自大, 容易睇人唔起, 成日嫌人地膚淺、冇家教、粗魯、個樣生得衰、蠢、甚至可能會嫌人地冇錢~ 事實上最膚淺果個係我自己, 因為我成日都睇到別人身上既問題, 只有一d好膚淺既人先會咁樣囉我覺得!!! 冇錯, 雖然我未必覺得自己好好, 但係我成日咁樣睇人地已經証明我個人好膚淺!!! 反而對住好多唔抵幫既人、人人都想打佢一身既人我就會好似好體諒佢地咁。當其他人話佢地有咩唔好既時候我就會講一d人地覺得好奇怪既說話:『唔係既, 咁佢都有好既時候既. 平時佢都幾好人丫, 人人都會做錯事架啦, 唔好咁話佢啦!!』拿, 我喱d咪叫應做唔去做, 唔應做就偏去做囉!! 抵死!!

17 October, 2005

點解你要咁做?! 你明知道我係唔會唔理你~

嘩哈哈哈, 今日心情靚靚返工去。其實我都唔知做咩心情靚靚架, 總之就有心機做野, 同醫生們又傾得好開心咁囉~

成個 weekend 都滴酒不沾, 仲好乖咁係一日之內做晒個 presentation, 叻女~

Honey: 我好掛住你呀!!! 你做咩去到咁遠 jack?! 你真係曳呀!!! ><

13 October, 2005

好出奇, 竟然果邊仲熱鬧果喱邊。原本諗住果邊係靜靜雞 update, 可以少d人睇, 可以打d真心d, 真實d既野。點知而家果邊好似仲多人睇過喱邊。好多謝大家係咁 sign 我 guestbook, 我好開心, 因為咁樣令我知道你地係關心我。喱邊個 guestbook 已經冷清左好耐喇, 不過大家知啦... 我又唔會叫人去 sign 架嘛, 好似好面皮厚咁。咁我唯有加個 link 係度啦, 點知都好似冇咩幫助。Anyway, 你地愛我, 我你知道既, 我都愛你地。

喱個世界上第一個因為見到我喊而喊既人係 ddwen, 第二個係羊豬豬。唔知係咪因為我喊既時候特別淒涼呢?!

日日都訓得唔好, 晚晚發夢都會見到你, 晚晚都會扎醒。每朝早起身之後既 0.01 秒之內你都會必然地即刻浮現係我既腦海之中。咁樣個人又點會有精神丫, 日日同 dora 豬都好似做完賊咁, 兩條死屍四圍行。

11 October, 2005

公司個爸爸走左, 升職去左中國, 而家哥哥喳大旗, 令我有點不知所措。正所謂『新官上任三把火』, 可能所有野佢都會執得好正, 而佢野做事方法亦可能同爸爸有所不同。加上我同佢唔係好熟, 我都唔知佢想點, 又怕自己會唔知幾時會唔小心得罪佢, 好擔心~ 當然我明白做 sales 既其實只係需要做一樣野 -- 就係到數! 之但係你都想知道你老細有咩 preference 架! 另外, 我公司既財政年度係由十月開始, 大家又要揹一條新數。Supervisor 表示今年條數加大左好多, 平時賣既其中兩樣野會抽出黎當另外兩條數計, 此外我仲可能要賣多一樣野。咁即係話要跑四條數, 我覺得會好吃力囉, 亦擔心自己會做唔黎。此外, 我去澳門做野既 schedule 已經出左, 有六日, 好多呀!! >< 要由朝早八點企到六點, 放工又冇野做好悶... 唉, harsh 左少少~ (dora 豬好可愛, 佢知道我出左 schedule 之後, 即刻話要抄低佢。嘻嘻, 傻婆~)

放工開完會個人冇乜心機, 原本想放飛機, 不過又好似唔係幾好, 於是去左飲野。玩呀玩, 玩玩下覺好好嘈, 又冇咩心機, 於是行左出去門日休息。企左好耐之後, 羊豬豬出左黎睇我, 佢一出黎, 我就係咁喊係咁喊, 喊喊下連佢都係度喊..... 雖然我唔知道佢做咩喊, 亦都冇安慰佢, 不過我相信佢都知道其實我係好愛佢。好耐冇攬佢羊豬豬, 攬住佢, 好舒服~ ^^

仲有仲有, 我心愛既 dora 豬拍拖呀!! 而家有兩個人既男朋友都有同一個名。大家試想想幾個女仔帶埋男朋友去街, 點知原來全部男朋友都係同一個名... 幾得意~

今日係 dicky 生日, 好掛住佢呀, 唔知佢而家點呢?! 仲係咪一條狗呢? 生日快樂~