Hong Kong Airport

原先係乘坐9:05a.m CX早機出發，但係因為遲到，所以要補錢(每位$600)搭另一班 4:00p.m 出發既航機，為左消磨候機時間，我地去左設於禁區內既候機室 "Plaza Premium Lounge".

果度環境相當舒適，因為持有 Citibank 白金卡所以可以免費使用設施 : 淋浴，上網，報紙，按摩椅，電視，房間小睡，自助小食及飲品 (有飯/炒麵，杯麵，三文治，生果，零食，汽水，雪糕)等等，非持卡人收$250 不包括小睡及住宿。

Bangkok Airport

泰國時間約 5:45p.m (約2個半小時航程) 就到達曼谷國際機場，我地先到找換店 (Currency Exchange) 用港圓對換泰銖 (於泰國對換係比較著數架，泰國各大商場內外都有好多找換店) , 然後我地到的士站向機場人員說明要去既酒店，佢地就用泰語轉達給司機知.

泰國搭的士好平，基本上係對咪表比錢，不過最好先問司機 (by meter ?)，起表35泰銖 (約 7蚊港紙)，若遇上收費公路(Tollway)要即時付路費給司機。

(來往機場既的士，多收50泰銖附加費)

Marriott

約 7:00p.m (40分鐘車程) 就到達 5星級渡假式酒店 Marriott Resort & Spa，的士收 390泰銖，約 80港圓 (連公路費及司機索取之附加費)。

呢間酒店好大好有渡假 feel ，只有 7 層高，面向河景，酒店職員服務態度亦非常好，我地住 4 樓 既係 Deluxe Room，有兩張 Queen Size bed，仲有露台對住泳池架！如果唔係有樹擋住，仲有河景睇！

不過呢間酒店稍為遠離市區，唔近 BTS Skytrain 站，附近亦冇夜市，較靜。

Royal Garden Plaza

因為已經好夜，所以響酒店休息左一陣，我地就只係去左酒店隔離既 Royal Garden Plaza 度行街食晚飯，果度係酒店既商場，唔算好大，不過都有好多大小餐室，麥當勞都有，亦有賣衫褲，手工藝品店，Massage 店，仲有 英國名牌 Boots 專門店賣化妝品及護膚品等。

我地食完飯就去左 Boots 度掃貨，直至人地 10:00p.m close 為止呀！