Marriott

一早七點幾，女友就去左酒店泳池游水，然後我地就響酒店既"The Market" 食自助早餐，之後就響酒店影相，呢間酒店好靚，所以我地都影左好多相架！

Central World Plaza

約 10:30a.m, 我地就正式開始曼谷既行程，坐的士到 Shopping center "World Trade Center" (現稱Central World Plaza)，曼谷都幾塞車，所以原本約15分鐘既車程，最後搭左半個鐘先到。

World Trade 入面有日資大百貨公司 Iseten ，大百貨公司 "Zen", Naraya 專門店 及 Jim Tomson 泰國名牌，主要賣手袋及銀包等，平均3000泰銖已經可以買倒一個靚手袋！

女友嚮 Iseten 都有收獲，呢度 (曼谷) 買女性名牌內衣 平香港 3 份 1。

下圖呢間 Naraya 係買紙巾套，手袋之類既用品，入面擠滿日本遊客，皆因產品用料係日本人既至愛，而且超抵，貨品介乎 100 - 500泰銖內。我都買左2個紙巾套及1個酒樽套，只係215泰銖 (43港圓)。

Big C

約 2 點半，行完 World Trade 之後，我地就去左對面既 Bic C 超級百貨廣場，首先係去美食廣場食野，果度又大又新淨，先要到購票處買儲值卡，然後用卡取食物，我食左一個炒飯加一杯可樂，只係50泰銖 (10港圓)。

食完飯就行Bic C ，有兩層，類似香港超級百佳，不過當然比百佳大好多倍啦！貨品種類亦多好多架！買野食超抵，一包幾個公仔麵，平均個幾港紙一個，朱古力，餅乾等亦一樣。我地買左Ｄ貓糧，約兩蚊港紙一包，平香港一半。

下左: 美食廣場，下右: 百貨廣場

Siam Square

約4點幾，本來會行埋 World Trade 隔離 Arnoma 商場入面既日本百貨公司 "Sogo"，不過去到發覺 Sogo 已經冇左，所以就乘的士去另一個 Shopping 區 "Siam Square"，不過個的士司機就好估惑，行左兩三個街口就話前面 Siam 好塞車，叫我地行去，司機就咁收左35泰銖，跟住我地行過去，約行左十幾分鐘就到。

Siam Square 係由幾條街組成既 Shopping 區，有好多大大小小既時裝店及特式食店，有Ｄ似旺角，係年青人既聚集地，週圍都見倒一群群既學生。不過呢度亦都係女仔既購物天堂，因為大部份商店都係賣女仔野。

行左一陣，我地就去左芒果甜品店食野。下圖

我地行到黃昏就到Siam Square 近 BTS 站既地方食"海南雞飯"，只係 40 泰銖 (= 8 蚊港紙)，又抵又好食！(下圖)

Siam Center

食完飯我地又繼續去 Siam Square 對面既 Siam Center 同 Siam Discovery Center 度行街喇！

Siam Center 有 4 層高，超過200間 不同種類既 shop，如Levi's ，Converse，Boots 等都係必到既商店，呢度地方大又好行架！

地下有找換店，非常方便遊客。

Siam Center - 左圖

遊客出示 Passport 仲有折扣優惠卡架！

Siam Discovery Center

約 7 點幾，我地就去連接 Siam Centre既 Discovery Center，有六層高，每層有不同主題，似香港 Time Square ，我地主要係去左日資生活百貨 "LOFT"，都幾大間，貨品價錢比香港及日本平好多，女友響度都買左Ｄ飾物。

遊客出示 Passport 仲有折扣優惠卡架！

呢度仲有一間食自助餐好抵既日本料理 "Oishi"。

Body Tune Massage

約八點行完 Siam ，我地就坐 BTS 架空電車 (於 Sala Daeng 站一出即到) 到位於 Silom 路上既 Massage 中心 "Body Tune"做 Massage，我地冇預約，不過好在有位，我地做左 1.5小時既 Traditional (傳統按摩)，收490泰銖 (約100港圓1人)，先比錢。當我用信用卡比錢既時候，發覺失效，為有用現金。

Massage 於和式房間內做，一人一房，環境非常之好，入面唔可以大聲講野，唔可以開手電，房與房之間有竹簾隔開，同朋友一齊可以拉起。

首先要換上佢地提供既衣服，然後幫我地洗腳，跟住就訓低開始按摩，接近完成時，按摩師會用面模幫你整面，好舒服架！最後換返衫出 lobby 仲有杯熱茶飲添！

然後就給按摩師100泰銖小費。

左圖就係做 Massage 既房間！係咪好正呢！！

做完 Massage 我地就行左一少段 Silom 夜市 (Body Tune 門口就係Silom 夜市) ，約11:00p.m 坐的士回酒店，Ｄ的士司機夜晚都唔願對咪表，個司機一開口就話要300泰銖，嘩！咪同去機場差唔多？，我地當然唔制，女友還價150，最後180成交。

返左酒店我就打去 Card Center 問，點知佢話懷疑我張卡既資料已經被人盜取，建議我取消 account 。泰國用 Card 真係咁危險？