Marriott

今日雖然冇得返香港，我地都唔理得咁多，繼續去玩，食完早餐後，我地就參加左酒店既免費興趣班 "Fruit Carving - 生果雕刻"，可能冇乜宣傳，所以得我地兩個學生。

約10:00酒店泰籍女廚師就帶我地到餐廳"The Market"既 1/F上堂，我地各有一個瓜及一把生果雕刻刀，廚師每做一個圖案，我地就跟住做，睇住佢做就好似好 Easy，自己做就真係雞手鴨腳，真係攪笑！約一個鐘頭，我地都大功告成，都幾似樣下。

酒店每日都有好多免費活動，如: Yoga、太極、Tennis 、Thai Boxing、游水班等。每節1小時，時間表於 Fitness Club 索取。

Marriott (萬豪酒店) 真係一間環境好正既 5 星級渡假酒店，大堂人流唔係太多，感覺休閒，接待人員清一色係女仔服務態度好好。

大約 11點幾，酒店就再確定，由於房間爆滿，我地要遷往其他酒店，本來酒店職員為我地安排左另一間 更遠 既 5 星級酒店，但因為明天要去大使館，所以最後請酒店職員幫我地訂位於市中心 Siam Square 既 4 星級 Novotel Hotel (世紀酒店)。

我地逗留至中午就 Check Out ，再坐的士到 Novotel Hotel 喇！

下左 - 我地住既房間 (Marriott)

下右 - 酒店大堂 (Marriott)

Novotel Hotel

我地到達Novotel ，見細小既大堂滿佈遊客，職員忙過不停，感覺與Marriott 成好大對比，房間當然亦都冇得比啦！冇夾萬、又冇浴衣 、電視又壞壞地、幸好 Novotel 剛翻新過，房間都幾新淨，而且居高臨下，窗外面向 Siam Square 。

呢間酒店岩晒志在 Shopping 既人，因為一出門口就係 Siam Square ，又近 BTS 站。

下左 - 窗外可以望見 Siam Square 及 MBK shopping center

下右 - 我地住既房間 (Novotel)

MBK (MaBoonKrong) Center

響酒店休息左一陣，我地就經 Siam Square 步行到 MBK 食野，MBK 除頂層商場外，其他都裝修簡單，每層都有不同主題，有一層集中賣手機，又有賣 CD / DVD，電腦，時裝等，好似羅湖商業城，不過入面有一間日本百貨公司 Tokyu (東急)。

我地約 3:30到頂層商場食雪糕 (供114泰銖)，然後再食日本野 (類似味千拉麵)，兩個人食左一個麵同一個飯都只係 113泰銖 (22港圓) ，又係超抵！

頂層商場裝修得特別靚同 Cyber 係食店集中地，亦有戲院及Cyber 保齡球場。

MBK - 林真香

本來打算幫趁商場入面照相館，影番Ｄ著泰國貴族衫既相 留念(約200-300港圓)，可惜三日後先有相睇，所以冇影到。

我地最後響其中一層既"林真香"分店買左Ｄ豬肉乾，乾魷魚等既食品做手信喇！

"林真香"有超過60年歷史，係泰國有名既食品公司，買豬肉乾，乾魷魚已經係香港人既指定動作！

Novotel Hotel

約 5 點 回到酒店，女友就去酒店泳池游水，泳池設計一般，不太大，水深唔多過1.5m，不過出泳池前會到經過一個大堂，好多唔係去泳池既人都響度，設計好差。

我地約 6點半就坐 BTS 到 位於 "Phrom Phong" 站既 Emporium 廣場行街食野，車程約20分鐘，一出站即到。

Emporium

呢個商場行高檔路線，設計時尚，名牌商店林立，類似香港置地廣場，不過最好行都係入面既 Emporium Department Store ，好多野睇又多野賣，價錢又唔貴，果日仲係 Midnight Fest 大減價，商場開到深夜12:00 (平時收10:00)

女友響度買左好多野，精品啦，衫褲，飾物等。

我地八點幾響頂層既日式餐廳食飯，食左兩個 Set Dinner 都係 286泰銖 (56港圓)，已經算係最貴既一餐啦！(唔計食魚翅果餐)

食完仲繼續 shopping , 11:00 先走。