Novotel

今日我地 7 點幾就起身去酒店餐廳食自助早餐，因為要一早去中國大使館 (China Embassy) 辦手續。

呢度既自助早餐竟然同 Marriott 差唔多咁多選擇，仲有熟蛋供應，不過環境埂係冇Marriott咁正啦！不過都有窗位可以望倒街景。

約 8:45 我地就坐的士去 位於 Ratchadapisek road 既中國大使館。

曼谷一早好塞車，9:30才到大使館 (的士費100泰銖)。

China Embassy

大使館護衛指示我地到大使館隔離既一座得幾層高既大廈辦簽証。入面裝修簡陋又冇詢問處，職員只係負責辦簽証，而且當時已經好多人，我把報失信交比職員，佢地只係比張表格及輪候號碼我，叫我去影証件相及影印報失紙，冇了解我地既情況，而且申請所有証件都係用呢張表格。(好在香港入境處教我地要申請"旅行証"，唔係護照。因為旅行証最多幾日就辦好，如果護照，分分鐘辦一個月架！)

簽証部竟然冇影印機及影相機，要幫趁隔離Ｄ街鋪，而且仲要半個鐘先有相。

之後我就交申請表，相片，報失紙及香港身份証副本，職員就給我一張寫有領取日期既紙，領取日期竟然係 4/12，我立即向職員說明希望即日回港，職員亦答應下午3:00出証。

右圖 - 大使館附近

Tesco Lotus

離開大使館後，我地就去左隔離既超級廣場 Tesco Lotus 度行下，呢度好似 Big C 一樣，不過比較舊。

行左一陣就坐的士回酒店 check out，行李暫留酒店。我地又經泰國代埋預訂即日乘"港龍航空"回港機票，起飛時間係 8:00p.m ，我地要6:00到機場，時間好緊迫呀！

跟住我地就去 Siam Center 地下既一間餐廳食 lunch，呢度仲有免費上網。

大約 3:20 又回到大使館取旅行証，不過大使館竟然未開門，原定 3:00開門，最後要 3:30先開。

仲要付 1650泰銖快証費用。取証後，我地就跑去搭的士到泰國入境處辦理最後手續，入境處收4:00。

我地4:10到入境處 Immigration Department，好彩未收工，首先要到地下大堂影印旅行証及報失紙，然後到樓上填一張好簡單既表格，職員就會於旅行証上辦回入境手續，過程唔駛15分鐘，而且係免費。

之後我地就約 Agent 5:30 到酒店取機票，因為仲有Ｄ時間，女友就去左 Siam Square度修甲，不過手工麻麻。

(右圖 - Novotel 酒店大堂)