Marriott

我地八點幾就去左泳池游水，泳池設計好靚，池邊有個小酒吧，游緊水都可以叫野飲，隔離仲有個暖水按摩池，咁早泳池冇乜人，最 Relax，我地響泳池都影左好多相，之後就去酒店既健身中心 涑涼，然後就響酒店既"The Market" 食自助早餐。

呢度既自助早餐都有好多選擇，即做既 Pancake ，炒蛋 及 粉麵，粥，冷盤及熱盤等，你亦可以選擇坐室內或者室外對住河景食早餐！

下圖 - 暖水按摩池

左圖 - 自助早餐

BTS Skytrain

食完早餐，我地就出發去 Jatujak Weekend Market。

我地先乘酒店免費提供既船去對岸既 BTS Train "Saphan Taksin" 總站 (船程約15分鐘)，然後轉乘 BTS 架空鐵路 到 尾站 "Mo Chit" ，一出站就係 Chatuchak Market，車程約30分鐘。

搭 BTS 好簡單，同搭香港輕鐵一樣，先到自動購票機選擇要去既區，然後入錢買飛。

BTS 既站唔係好多，不過都足夠去到主要既 Shopping 區。仲有好處就係免左塞車，不過講價錢，搭的士會抵Ｄ。下圖 - BTS

Jatujak Weekend Market

約十一點幾，我地就到達車站內既找換店再換Ｄ泰銖，然後就開始行呢個自稱世界最大既市集。呢度逢星期六及日開門，星期六約八成商店開門。

市集真係極具規模，分左好多個區，每區都賣唔同既物品，有園藝，手工藝品，衫褲，香薰，家居用品，燈飾，連動物都有得賣，真係行成日都行唔晒！

大件事！

行到 2 點幾既時候，發覺大件事喇！個背包被人打開左，最慘係入面個細袋唔見左(護照都冇埋)，好彩銀包同信用卡跟身，我地即刻到市集入面既 旅遊中心 (Tourist Information Center) 求助，職員用英文教我地先去旅客警處 (Tourist Police Center) 報失，然後再到中國大使館 (China Embassy) 辦手續，跟住仲要去 泰國入境處 (Immigration Department) 補辦入國資料，不過今日係星期六，大使館及入境處都休息。原本星期日要走，即係話最快都要等到星期一！

因為酒店電腦卡都唔見左，所以我地亦都立即通知酒店。

Tourist Police Center

我地跟住就坐的士到離開市集約20分鐘車程既"旅客警處"報失，首先我地要用英文填報失紙，然後職員就會翻譯成泰文版本，期間問下我地一Ｄ補充資料，職員除左識英文仲識講國語，態度友善。

職員給我地兩張報失紙 (泰文、英文各一張)，中國大使館及泰國入境處地址，一張地圖，之後就教我地以下落黎要做既事：

1. 到中國大使館 (China Embassy)，辦理証件

2. 到泰國入境處 (Immigration Department)，補辦入境手續

3. 兩張報失紙正本要帶去機場有需要時給職員撿查。

完成就可以上機返香港，不過所有手續都要星期一先可以辦理。

我地逗留左約 1個鐘，就返回酒店。

Marriott

約4點半回到酒店，酒店給我地新電腦卡及派職員向我地了解情況，我地向職員表示需要多留一晚及通知航空公司更改回程日期。可惜酒店已經爆滿，明天要轉酒店喇！

航空公司又因為星期六日休息，改唔倒日期。後來致電回港托朋友問知道我地張機票係冇得改，結果又要另買機票。

下午既酒店好熱鬧，好多外國人游水 Relax，我地休息左一陣就坐的士到 China Town 食魚翅、燕窩 晚飯喇！

China Town

位於 Yaowarat 路，冇 BTS 站，所以又係搭 的士， 我地 六點幾 到達 唐人街 既 "海外天魚翅酒樓"，呢間酒樓被好多香港雜誌介紹過，所以門口貼左好多雜誌內容。

酒樓唔係太大，裝修簡單，而且因為時間尚早，唔係太多人。

我地食左一個魚翅(下左圖)，兩個燕窩，一個炒飯及一碟菜都只係720泰銖 (144港圓)，好好味，確係抵食！

下右圖- China Town 既大排檔，不太衛生。

China Town 好古老，好多金行，冇乜野行，而且交通非常繁忙，好多人等的士，我地等左好耐先有的士，要去 Body Tune 按摩中心，點知的士司機又話唔識路，好在女友醒目，叫司機去至近既 BTS 站。

Silom Road Night Market

我地約八點半又到位於 Silom Road 既 Body Tune 做 1.5 小時按摩，不過女友今次做 Oil Massage ，係要剝光豬做架！750泰銖 (150港圓)

約10點，按摩完我地就行 Silom 路夜市，呢度係曼谷主要既夜遊浦點，好似香港廟街非常熱鬧，兩旁都係小販，賣既野有衫褲鞋襪，精品，公仔，香薰，燈飾等，全部響 Jatujak 都有得賣，不過呢度賣得貴，要勁講價先得！

沿Silom 路行會經過兩條滿佈酒吧，Disco及夜總會既橫街，就係好出名既 Patpong 1 & 2 road。沿路間唔中都有Ｄ泰國人介紹你去Club ， Disco 之類。

大約11點，我地就坐 BTS 到 尾站 Saphan Taksin 轉船返酒店喇！