Mirov, ji jinê bûyî,
demekê dijît û tijî nearamî ye,
mîna kulîlkê dibişkive û diçilmise,
wek siyê direve û nasekine.
Ji Peymana Kevn ("Tewratê")
BERHEMEK HOSTEYANE
Ax, çi berhemek hosteyane ye mirov! Çend berz bi hiş û bîrên xwe, çend bêsinor bi hinêr û şiyana xwe! Çend birêk û seyr bi liv û dirûvên xwe, di karên xwe de temet melekan, bi ramanên xwe nola afirandiyên yezdanî!
William Shakespeare
HOMO SAPIENS
Ez dixwazim carekê 'Homo sapiens' bibînim. Min ticarî ew nedîtiye.
Conrad Englert
KANIYÊN BEXTIYARIYÊ
Dema li gava rojhilatinê ji nav nivînên xwe rabûm, yekem hêviya min ew bû ku ti name ji min re neyên yan û ti kesek bo seredanê nebe belaya serê min. Bezîm nav daristanê. Ez ê hema ji kêfxweşiyê bipeqîma. Ez ji xwe re li ciyek bêkes û varê gerîm daku ti kes nekeve navbera min û sirişt û xwezayê. Geşesoratiya tîrêjên rojê dilê min bi şadiyê dagirt. Darên girs sîbera xwe diyarî min dikir. Min rondik û hêsir dibarandin dema dipûnijîm ku ev kaniyên şadî û bextiyariyê yên bihagiran, yên pak û bijûn hind nêzî mirovan in lê dîsan jî bêqam ji wan dûr in. Jean-Jacques Rousseau
ÇEM
Çemo, çemê kes nikare bez û herrika te raweste! Tu pêşve dilezî çiku sirişt te dimeşîne û ez jî bi heman rêyê ve dilezim çiku evîn min diherrikîne. Pêşve bileze, li berî min bibizire lê, li ciyê gul û giya terr û şêntir bin, bîskekê meşa xwe rawestîne. Çimkî hingê tu gihayî wî cî yê tava germ û delal gulan li beravan dibişkivîne. Wan pêş min ve maçî bike mîna ku di wan de dest û piyên keçekê bibînî, û bêje ku hemî fikir û ramanên min li ser wan in. Petrarca
HERD DIYARDEYA SIRIŞTÊ
Her diyarde û dirûva siriştê di her bîskê de neynik û awêneya ebedî û herheriyê ye, hemî tê de heye: paşeroja teşe daye wê; pêşeroja derfetên wê di xwe de dihewîne; û evroya wê bi tevayî dadigire.
Volter Kilpi
BIHAR
Li bazarê pare, li bin darê bihar e. Pendek Japonî
BIHAR TÊT
Xemek reş û tarî em dorpêç kiribûn, kûr tarîtî û sarmaya cemidî di dilên me de. Lê niha bêhejmar deng li derdorî me guherînek mezin radiguhînin. Bihar têt - ma çima em nebêjinê: ser çavan.
Maila Talvio
HAVÎN
Min li wir havîn dîtine yên pirr delaltir ji yên tropîkayê, rojên şevan nas nakin (1), deryaçeyên tijî qaz, qû û werdek, wisan gelek bûn ku mîna firindeyên hemî çem û avan hêlînên xwe li wir çêkirin.
Bernandin de Saint-Pierre
DU DINYA
Du dinya hene: yek ew e ya em bi fît û xetkêşkan dipîvin, ya din ew e ya em bi dil û xeyalan hest pê dikin.
Leigh Hunt
__________________
Jêrenot
1) Di vê metnê de de Saint-Pierre basa havîna Fînlendayê dike. Li Fînlendayê û welatên din ên şevên havînan gelek kurt in û ta carinan hema roj naçe ava lew nivîser gotiye ku roj şevan nas nakin.
