(Lokman Polat bi navê "ROBÎN" romanek nivîsiye. Roman li ber çapê ye. Dê vê mehê derkeve. Berî ku wê bie çapê, nivîskar ew hêja Dr. Kamiran Bêkes daye xwendin. Bêkes jî ev çend rêzên jêrîn li ser wê nivîsîne. Gotinên wî pêşkêşî xwendevanên kovara MEHNAME tên kirin.)
Çend gotin
Di xwendina romana “Robîn” de mirov pêrgî gelek berxwedan û sînorhilweşandinên hêzdar têt. Romana “Robîn” bi dengekî zîz û hestedar, ku bi evîn, rastî û dilsoziyê avis e, dibêje û radigihîne ku berxwedan ne tenê bi çek û tifingê, berxwedan ne tenê bi alav û azîneyên kevnare têt kirin. Belê berxwedan, her weke helbestê tim xwe nû dike û şêweyên xwe jî bi xwe re nûjentir dike.
“Robîn” jî berxwedaneke nûjen e; ew li hember tiştên qedexekirî ranaweste, ne jî ji bo bidestxistina wan daxwaza şer û pevçûnan dike. Na, na, berevajî wê yekê: ew bi aşkereyî û nazdarî dest davêje wan tiştên qedexekirî, wan dinazîne, ji me re ve nêzîk dike û dibêje mera “mirovan ev sînor û qedexekirin danîn, miravê jî wan hilînin”. Ev yeka bi xwe jî, ango ev berxwedana bi şêweya nû, şana bihêzbûn û nûjeniya romanê ye.
