{泰國第四遊}

Day 2: Koh Khai>bowling (29 Sep 2003)

一早book晒, 所以七點半只需在酒店的lobby等人來車我地就可以出發. 司機到時點名, 睇番你係邊團, 就貼唔同的label. 我地係橙組, 即係去雞蛋島. 坐住架van, 途經phuket town, 又好好彩俾我地遇到九皇齋節, 遊晒行咁燒晒"炮獎"煙花, 聽導遊講會有人插針入面頰呢.

坐了差不多一小時的車, 到一個沙灘的地方, 分番組就叫你去俾番錢同埋拎救生衣. 跟住又上車坐幾分鐘到一個海灘快艇. 快艇標左半個小時左右, 就到了同胡兄書中一樣的雞蛋島啦.

到左導遊就分配沙灘椅俾每一個人, 之後自己活動一陣. 我呢d已經逼不及待要路落水餵魚啦. 嘩...d魚多到嚇死你, 好似跳左入魚缸一樣, 上百條魚在你腳下游. 好驚啊...有d仲咬我大脾呢. d魚唔驚人, 因為佢知人會俾食物佢, 我手上又拎位晒d在supermarket買的面包喎. 一放落水, d魚發晒癲沖得過去, 好多魚呢. 其實冇帶包都唔怕, 導遊一早有準備, 帶定了一大袋, 不過好似要錢買, 幾錢就唔知啦.

玩到十點半, 導遊就帶我地去另一個島, 係專玩浮潛. 到時隻船就咁停在水中, 唔會靠岸, 你就咁路落海就得架啦. 一路再望埋落海底, 真係好多珊瑚啊. 不過d珊瑚冇乜色彩, 偏深色的. 唔緊要啦, 見到已好開心. 潛中又會有魚魚陪伴你左右, 但佢地唔似koh khai d魚咁癲, 正常好多, 起碼唔咬我, 唔跟住我.

玩了半小時多d就回程, 返去koh khai準備食午飯, 野食唔好奢望會有什麼大魚大肉. 都係地道野, 炸魷魚, 炸雞, 雜菜冬蔭湯, 飯意粉咁. 不過我地食飯就遇著落大雨, 泰國真係幾興無端端落一陣大雨, 一陣就會出番晒太陽.

之後又自由活動. 有樣可以一提, 唔會有乾淨水你沖身, 只得海水, 所以什麼沖涼野唔使帶去, 只得你去個小便咁, 有個廁所, 要俾bahts20, 不過我見有人唔俾.

夜晚就去了bowling, 由holiday inn坐車去十分鐘左右, 埋單bahts60一車, 價錢合理啦. 不過d tuktuk會一開價就bahts100, 你要壓價的. bowling價錢唔係好記得, 兩個人玩了共六局, 租埋鞋, 食了兩個可樂, 埋單係百幾蚊港紙左右, 價錢真係唔肯定. 又有樣野要記住, 回程時唔好旨意會有tuktuk, 因為係遠離大街, 你要行番出大街先有車俾你上, 但唔係太多tuktuk架咋. 我見到有架, 佢居然死唔肯減價, 堅持bahts80, 我未唔上, 行到出patong beach的街頭先上車.

*有樣野值得一提, 在泰國遇著有病, 唔使驚, 試下去當地的葯房, 講出你的病情, 佢地自己會識執葯俾你食, 價錢好難講. 但我自己就親身試過, 仲要係在布吉唔係曼谷大城市. 我用simple eng講出病情, 佢明白, 然後配了三天葯俾我, total9粒葯, 俾了bahts80. 我食足三日, 定時食, 最後真係好番, 醫好左. 泰國好難搵到好似香港的診所, case同大陸一樣, 葯房周街係, 俾我感覺葯房=診所.

Reported On: November 2003