|
| |
 June
|
六月三十日 |
勁錄MD |
 |
今日好多野做呀!!要幫DADDY勁錄MD,錄成超過100首歌,搞左大半日,好攰呀!!
下午同媽咪諗住落街食午飯,發覺商場果間餐廳今日結業!!終於去左酒樓食啦~!
今日終於睇完一本比我睇左成個月既小說,對眼好攰呀! |
|
六月二十九日 |
好野!有得一齊玩! |
 |
今日問左DADDY下個星期日去唔去釣墨魚~!DADDY都去呀~!好野!下個星期日有得去玩啦!
夜晚經過西田去搵TRACY,因為佢今日會去果度擺ROADSHOW,我想比手信佢囉!行左兩轉先搵到TRACY,真係"太好運"了!!
今晚去左食火鍋,好好味呀~不過好飽呀!!! |
|
六月二十八日 |
一齊玩啦! |
 |
今朝早同媽咪出街買餸,我地去過旅行社睇過D澳門,香港遊,早排都已經想去嫁啦,不過無時間,又要去日本,下個星期又要返工,所以睇怕都去唔成澳門啦...真可惜!
不過,我又睇到個香港遊既團,有得釣墨魚,仲有得食海鮮,都係$138,真係抵,所以我諗住今晚問下阿婆同阿姨,聽日問埋DADDY,睇下佢地去唔去,我想可以一齊去玩,好耐都無試過一齊開開心心出去玩一日~!希望DADDY肯去玩啦! |
|
六月二十七日 |
革命成功 |
 |
今朝終於無事啦...有野講點都好過無野講,但係我依然想保留我唔去英國繼續讀書既決定,我始終都係唔鍾意去果度,唉,唔去又好似好衰,睇下點先啦...靠人始終唔興香,想講野大聲D都唔得..
第日既事始終唔知點,唯有見步行步! |
|
六月二十六日 |
抗戰第二日 |
 |
尋日得罪左人,今日係抗戰第二日,依家果個人仲嬲緊,先頭話唔煮飯比我食,尋晚後尾都有煮到,我見佢肯施捨一餐飯比我食,我唯有係佢冷嘲熱諷之下洗晒D碗佢,我要D人明白,我唔係白食白住!
尋日仲話連衫都要我自己洗,果然真係,我大不了自己洗!!
今日同LOUIS返左學校見KEVIN,傾左關於教AUTOCAD同3D STUDIO VIZ既問題,KEVIN要趕住開會,所以走先,之後同LOUIS係CAFE傾左一陣,撞到SQUARE,真係好~我地同SQUARE傾計,發覺SQUARE原來好鍾意砌模型,仲傾左一D關於日本既野~!今日總算有一個快樂的下午! |
|
六月二十五日 |
極嬲 |
 |
心情極差...!!!!!!!好煩,無啦啦又炒大鑊..!!真係想快D到七月,因為可以返工,唔洗成日得罪人地,又要鬧交,好死煩!
家豪,多謝你安慰我~! |
|
六月二十四日 |
千機變 |
 |
今日天氣終於無咁差啦~下午我同媽咪去西田食飯,我叫左拿破崙意粉,好味呀!!
家豪約左我今晚行街睇戲食飯,下午我專登早D出去買戲飛,因為我知道千機變係好多人睇!所以早D去排隊囉!
激死我啦!!你個死人野又話可以早放工,結果你又遲到兩個半鐘頭,害我等足你兩個半鐘!!
夜晚我同家豪去食點心火鍋,因為我地九點半先睇戲,所以食點心火鍋可以消磨時間囉~!
講真吖,千機變呢套戲D劇情就真係唔得,不過D 3D
ANIMATION就做得幾好,畢竟,可以令我睇到好投入既戲唔係好多,呢套千機變都算OK啦! |
|
六月二十三日 |
執衫 |
 |
今朝我終於捨得執下D衫,一開衣櫃門好似山泥傾瀉咁...!
下午出左街飲茶,好想食蝦餃呀!!特點咁貴...始終都係無食到...!
我想買個有鏡頭既手提電話呀...! |
|
六月二十二日 |
好掛住你呀! |
 |
今日係自日本番黎之後第一次見家豪,好開心呀~!今日就著靚D!
下次我著得靚果陣你可唔可以讚下我呀!!!成碌木咁...!!!
係圖書館搵到我一路都好想借果本書,好野~!
夜晚去左粗菜館食飯,先頭唔知咩叫"噴火魚",原來係好辣既魚,但係我好似唔多鍾意食魚囉...! |
|
六月二十一日 |
寄野比細佬 |
 |
尋日行銅鑼灣買左個HEM袋比細佬,好型呀~!所以今朝同媽咪一齊出去食早午餐,之後去左郵局寄野!
尋日我又買左本幾米,都未開始睇!
今日天氣好差,好悶呀...!今日係屋企UPDATE網頁,無街去呀...! |
|
六月二十日 |
ADD番 |
 |
今朝一早起身就狂打電話比KEVIN同DEREK,終於十一點比我搵到佢地啦!好彩DEREK叫我填番ADD
FORM,交比佢簽名,再交比校務處,而下午我已經交番啦!
見到KEVIN,我送左手信比佢啦!好彩佢提點我,我ADD科先無事咋!又搵唔到ANNA,之後去左銅鑼灣行街,夜晚我同媽咪去左金鳳食牛扒,好開心呀,好耐無食過啦,細佬番黎一定要帶佢去食呀~! |
|
六月十九日 |
走了 |
 |
今日終於要返香港啦,勁唔捨得,因為尋晚太夜瞓,今朝唔知醒送細佬番學,唉...!
起左身之後,我即刻幫細佬執屋,媽咪就抹窗洗衫,十二點幾,終於要走啦!我地約左細佬去池袋食午飯,之後去搭機場巴士,可能因為唔捨得細佬啦!午餐我又食唔落...到上機場巴士,我又喊啦...真係無鬼用...!細佬仲追出酒店門口同我地拜拜,好唔捨得呀...細佬,你要加油呀!
去到機場,CHECK行李果陣,阿JOE的行李比人CHECK左好耐,後尾先知原來佢帶左煙花出境,O
NO..!我唔知佢會買煙花,如果我知道,我一定會叫佢唔好買!
番到香港屋企,已經好攰啦!一上網,九千幾個MESSAGE要覆,仲比我發覺到一個恐佈既事實,就係我唔知發咩神經,錯手DROP左科TRAINING,死啦...聽日要返學校搵DEREK...
好彩LOUIS話比我知要RE-ADD,真係要唔該晒LOUIS! |
|
六月十八日 |
最後一塊 |
 |
今日係最後一次行新宿啦!因為聽日就要返香港,有D唔捨得呀~後埋細佬放學後,我地又再去周圍買野,今朝去左OKADAYA,媽咪又買左裁縫工具啦!
下午細佬又同我地去行人O1O1
CITY,又行多一次伊勢丹,都買左D衫啦!後尾仲去左紀伊國屋書店,又買左兩本設計書!
午餐細佬同我地去食天丼,熱辣竦既天婦羅飯,好好味呀~!夜晚我地去左食壽司,細佬食左成十碟!!好犀利呀!
搭JR到浦和,我地去左DONKI HOTE買野,我地又買左D日用品比細佬!
今晚同細佬玩JENGA層層疊,玩到四點幾,聽日要離開日本啦,有D唔捨得細佬... |
|
六月十七日 |
上野買手信 |
 |
今日朝早出左新宿行地下街,又買左一大堆衫,地下街D野真係好鬼平,正!!
下午我地等埋細佬放學就去左食飯,食完飯,細佬幫阿JOE打電話去ANA延遲機位,因為原本阿JOE係聽日走既,但係佢想後日JOIN埋我地一齊走,但係ANA
D人話唔改得,咁無法啦!阿JOE突然話想去上野買手信,咁我地就走左去上野!嘩!!我都係第一次去上野,我以為好"鄉下"!原來好多野賣嫁!細佬帶左我地去一條叫"AME橫"既街,果條街好長,好多野買呀~!勁多手信!!全部都係野食,我地又買左一大堆啦!好抵,不過好鬼重!!
之後同細佬去左申請YAHOO!
BROADBAND上網,好野!細佬下過星期上到網啦!
之後細佬突然接到ANA電話,話機位又改得啦喎~阿JOE梗係開心啦!
夜晚我地去左新宿食SHABU SHABU,原來細佬同老闆好熟,老闆仲比SUKIYAKI我地食,我同細佬都係第一次食SUKIYAKI咋!好開心~!!好好味呀!細佬話食左有好幸福既感覺呀~哈哈!老闆真係好人~! |
|
六月十六日 |
再戰LAQUA |
 |
今日去左池袋等細佬放學,之後我地帶左阿JOE去LAQUA玩,今次我地帶埋阿JOE玩過山車,細佬話絕對唔驚,我就同阿JOE坐,又係過山車衝落去果下狂叫,差D失聲!!
之後我地又玩左一次摩天輪,上次我掛住狂影相,今次總算睇到晒D夜景啦!走果陣見到原來TOKYO
DOME裏面又有棒球比賽,我地無入去睇呀!不過係門口睇到,睇左一陣就去番池袋食飯,今晚又係食餃子加拉麵呀~好好味!! |
|
六月十五日 |
原宿再掃 |
 |
今日係星期日呀!阿JOE星期六先黎,已經無左一個星期六既時間,我地本來想帶阿JOE去LAQUA,不過星期日太多人,所以今日去原宿涉谷先啦!
朝早我地去左原宿明治神宮先,好慘呀~!我個相機無電,所以影唔到相呀!今次去明治神宮,我終於寫到"繪馬"啦!好開心呀~買左D符,之後去左原宿行下,我今次係宇宙百貨買左對靚鞋,但係無買到衫呀!因為之前都行過,無咩好睇!
之後由原宿行左去涉谷,細佬話好近,原來真係嫁!途中入左BURBERRY BLACK LABEL買左個袋比細佬同埋DADDY!
去到涉谷都係行番涉谷109,果度D
SALES真係著得好型!之後細佬入左去TAITO STATION打機,玩揸巴士,細佬好犀利呀!
夜晚我地番左浦和食拉麵,本來細佬有幾張免費大盛劵,不過後尾發覺過左期,真慘!我叫左叉燒拉麵,嘩,碗麵有八塊叉燒呀~!好多!我知細佬鍾意食叉燒,咁我就比左五塊佢食囉!媽咪就話我整到細佬愈黎愈肥! |
|
六月十四日 |
接JOE |
 |
今日又係星期六啦!朝早我地同細佬一齊去買電話,吸塵機同埋風扇,買完返屋企安裝好再搭JR去新宿!
出到新宿,我地食完野之後周圍逛,我地又去新宿地下街狂買,買左堆衫,好開心呀!我買左手鏈同頸鏈,好靚嫁~!之後去左伊勢丹行下,再去紀伊國屋睇書,我又見到我至愛既安藤忠雄啦!不過今次多左野,我發現到安藤忠雄建築展覽既POSTER,但係一睇日期同地點,勁失望啦!我黎日本前個展覽剛剛係東京完左,依家係大阪有得睇,痴線咩!咁遠!我點去呀??算啦!買左本書啦,都開心啦!另外,我又買左幾本漫畫,我都算收獲豐富啦~!
夜晚我地又去食SHABU SHABU,雖然好好食,不過已經無上次食咁多啦!再食一定肥死我...
食完晚飯要去接車呀~!接邊個?就係公司阿JOE囉!公司比佢黎日本玩吖嗎!本來約係京王百貨門口等,行黎行去都搵唔到佢,搞左一陣先知道佢原來係對面馬路!我地就係咁接左阿JOE番細佬屋企啦~! |
|
六月十三日 |
代官山之直行 |
 |
今日我地係池袋等細佬放學去食午餐,細佬帶我地去食餃子加拉麵,細佬果然無介紹錯!D餃子勁好食~!好似半個拳頭咁大隻,拉麵又好味,好開心~!
食完飯後,我地去左代官山,代官山好好行,不過真係得個"行"字!因為D野好鬼貴!!一條裙都要成千蚊,無辦法啦!我地去代官山既目的唯有直行!
後尾我地搭JR去左自由之丘,自由之丘D野無咁貴啦!我地去左一間書店,因為之前我應承幫DADDY搵一本設計年鑑,但係一落到間書店,我即刻比D建築書吸引住啦!我見到好多TADAO
ANDO既書,其中一本係新出既,好想買呀~!但係成2800YEN,好貴呀!之後又比我搵到本設計年鑑,仲貴!!要18000YEN呀!!!我唯有放棄本安藤忠雄啦...!之後我同細佬去CD店,裏面又有樂譜,樂器,我就周圍睇下,細佬就去打鼓~!
玩完一餐後,我地同媽咪去SHOPPING,媽咪又有收獲啦!買左件好靚既衫~!雖然比新宿D衫貴,但係咁靚都值得既!
之後我地去左自由之丘果間無印良品,細佬買左個筆盒同埋MD盒,而我就梗係狂掃無印文具啦!我不嬲都係無印FANS黎吖嗎!!買左一大堆筆,又買左D野食,都係3000幾YEN,抵到爛啦!
今晚我地又番屋企食飯啦~! |
|
六月十二日 |
涉谷金魚缸 |
 |
今日細佬話帶我地去六本木同涉谷,我地去左池袋等細佬放學,之後去NTT申請電話線,午餐我地去食蕎麥麵,幾好食啦,不過我唔太鍾意D麵既味道!
去到NTT,等緊申請電話線果陣,比我見到有得上網,我即刻上網CHECK成績!我想知清楚自己既GPA,一睇,嘩...!勁低...雖然全部合格,但GPA得果2.67,唉...!不過算啦!做人唔可以太貪心,考得咁辛苦,全部合格晒已經好好彩嫁啦!之後我上左自己個網頁睇,嘩!GINIA同阿虎勁留言比我,我好開心呀~!多謝捧場!我再SEND
EMAIL比家豪,我去左日本咁耐都無搵過佢,有D內疚!
之後細佬同我地去左池袋站,我地又見到D㗎妹瘋狂地掃衫啦!我同媽咪即刻衝入去狂掃一番!
之後我地搭地下鉄去六本木HILLS,細佬話呢
個商場新既,佢都未去過,,去到六本木,果個商場真係好靚好型好有味道呀~!不過D野唔係超級極度十分之勁貴就係未營業,我地行左兩個圈發覺無野睇,之後就走左去涉谷!去到涉谷,細佬帶我地去涉谷109睇衫,不過果度D野幾貴,最慘係好窄,淨係比無飯食果D人著,我媽咪今次無收獲,我就買左一隻大頭夾,好型呀!有樣野都幾好笑,細佬話有一間舖好搞笑,果度既SALES係間舖度好似係金魚缸咁,因為D
SALES無野做果陣,會係間舖度行黎行去,速度極之快!係咁兜黎兜去!我去睇下,真係好搞笑,哈哈!好似睇金魚咁!
之後同細佬去TAITO STATION打機夾公仔,細佬夾左隻POSTPET
MOMO比我,好開心呀~!我地仲食左個直徑8CM既燒墨魚丸,超好食!!之後我地又番屋企食飯~! |
|
六月十一日 |
中古人 |
 |
今日細佬去幫同學整電腦,我同媽咪去池袋SHOPPING下先,差唔多四點細佬先到,本來諗住去NTT東日本同細佬申請電話線,不過NTT已經休息,咁唯有聽日先去啦!
之後我地趕去北浦和果間中古店,果度係賣二手野,因為細佬屋企少左一盞燈同埋錄影機,行中古店時,有個人企左係度唔"旭",其實佢係睇緊野,我媽咪又有D近視,以為係假人,埋去睇下嚇左我媽咪一跳,原來係真人,笑死我媽咪!
買完野之後我地就"的"住一大堆野搭巴士番屋企食飯啦! |
|
六月十日 |
定休日 |
 |
今日邊度都無去,朝早係屋企睇電視,日本富士電視台D節目都幾好睇!
午餐我地係屋企食,因為細佬今日要漢字堂,我同媽咪去左超級市場買餸,之後番屋企煮飯食,四點幾鐘,細佬番左黎屋企啦!之後我地既晚餐都係屋企食,咁就過左一日啦! |
|
六月九日 |
細佬生日 |
|
今日係細佬生日,我一早就送左生日禮物比佢啦,係PS2既育成足球GAME,好玩呀!
我地係池袋等細佬放學,之前我同媽咪當然去左SHOPPING啦!我地先去100YEN店睇野,之後去左SUNSHINE
CITY買衫,D野都幾平呀,都係咁二買左D衫啦!之後細佬帶左我地去池袋食燒肉放題午餐,都好好食呀~又平!不過D火好似猛左D囉!差D燒埋D"手毛",哈哈!
食飽後,細佬話想去唱K,佢帶左我地去卡拉OK館唱K,我唔係好識唱日文歌,唱左幾隻就搵D中文歌唱,嘩!!D中文歌舊到阿媽都唔認得...咁唯有細佬唱晒啦,哈哈~!雖然唔係唱得好多隻歌,不過呢間卡拉OK個DESIGN真係好得,入黎睇下都抵啦!
唱完K去左隔離果幢書店睇書,無聽錯,係一幢,好誇張,成幢圖書館咁,好PRO呀!之後我地去100YEN店買左一堆日用品比細佬,夜晚就去左新宿果間"康龍"食拉麵,我次次去日本都見到呢間野排晒長龍,以為好好食啦!車!!食過先知佢原來唔係太好食,只不過佢"懶"特別,有得自己配餸之嗎...食完就番左細佬屋企啦,因為今晚有SMAP
X SMAP睇呀,又有AINORI睇,好好睇呀!AINORI好感動!
今日出成績呀,有D擔心,打電話比GINIA,佢話阿虎同我CHECK左成績啦,全部合格!好開心!多謝GINIA同阿虎~! |
|
六月八日 |
驚叫LAQUA |
|
今日係星期日,細佬帶左我地去後樂園LAQUA,果度係新建既遊樂場,雖然面積唔係好大,但係D遊戲好吸引囉!LAQUA係TOKYO
DOME隔離,TOKYO DOME係用黎打棒球比賽既地方,咁橋我地今日去LAQUA,巨人隊比賽緊,我就買左D記念品囉!有一個係打氣用品,好得意嫁!
之後入到LAQUA,今日好多人呀!可能係星期日啦,細佬用手提電話既I-MODE訂左飛,我地去食左午餐先去玩,因為訂左六點既過山車,同埋七點既摩天輪,所以我地就去玩鬼屋先,鬼屋叫"THE
13
DOORS",好恐佈!!我其實好驚,但係又好想玩,唯有雙眼經常"半開合"啦!無啦啦有隻女鬼係上面飛撲過黎,嚇到我狂叫,跟住就奪命狂呼!!仲有真人扮鬼嚇我地,好彩隻鬼無追住我,如果唔係我實比佢嚇到廁所都唔洗去!
六點鐘果陣,我同細佬去玩過山車,呢個過山車真係好恐佈,一開始就上斜到80幾米,突然間由80幾米衝落去,呢個斜度仲係80度,之後衝向LAQUA商場,由商場幅牆穿過個洞再衝,好嚇人,果個80度斜已經嚇得死我,D離心力好犀利,落到一半我都仲識叫,一半過後我嚇到叫唔出,痴線嫁!
玩完一輪咁激既遊戲之後,我地去左玩摩天輪,呢個摩天輪就犀利啦!係第一個無軸心,用齒輪運行既摩天輪,非常穩定,仲有音樂聽,又可以睇晒成個LAQUA同埋TOKYO
DOME,好正!!
之後我地去左西川口食韓國燒烤,果間韓國燒烤舖係我細佬朋友個阿姨開既,所以D野食樣樣都加料,好好味,但係好飽,因為太多啦! |
|
六月七日 |
肥肉拉麵 |
 |
今日係星期六,細佬唔洗番學,所以瞓晏D先出去玩!
下午細佬帶左我地去新橫濱,新橫濱好靚,不過好遠,今日我地去新橫濱拉麵博物館,一入到場,我已經超級勁興奮!!我最愛既拉麵呀!!好多野睇,連肚餓都唔記得啦~!我地首先去左食拉麵先,細佬帶左我地去一間全博物館最多人排隊既拉麵舖,佢話未食過,但係知道好味,因為原來呢間博物館既拉麵店,全部都由食家評定過,全日本最好既拉麵都係晒呢度,而呢一間係最好味既,排左一陣隊,終於都有得食啦!嘩!!碗麵一黎到,嚇死我!碗麵雖然好貴,要成1200YEN,但係好大碗!仲要係好多塊日式叉燒同埋勁多油,D叉燒又勁多肥肉,原來最好味既拉麵係要多油,叉燒夠肥,唉!我夠肥啦!細佬又話食埋D肥肉,唔,我忍唔住,終於都食埋D肥肉,仲飲左D湯呀...!死啦!就黎變"死肥妹"啦..!不過真係好好味,呢碗拉麵係我食過既最好味既拉麵,好想再食!
夜晚我地去左石川町既中華街,中華街就無我想像中咁靚,都幾污糟,D人都幾無禮貌,後尾先發覺原來果D無禮貌既人原來係大陸人,唉!我地行左一陣中華街,買左XO魚翅包同埋燒賣,就入左一間酒樓食中華料理,呢間正式係"謀人寺",D野食勁貴,仲要係食埋D垃圾!夠膽死比D垃圾人地食,平時我媽咪唔要既菜部份,佢居然用黎炒,又苦又難食,好明顯係呃㗎仔!食過一次之後,以後都唔係好想再去! |
|
六月六日 |
瘋狂地"搶" |
 |
今日終於試到自己同媽咪一齊搭JR去新宿啦!安全到達~!好開心!
尋日同細佬行過新宿,發覺D衫好貴,係香港唔覺唔覺,黎到日本先發覺原來自己好窮...件件衫都要成5000YEN以上,靚都無用,太貴啦!!
今日同媽咪左到新宿,我同媽咪去左地下街行下,順便等細佬,居然比我地發現到有間舖D衫超平!又靚!有好多都係日本製,當時有好多㗎妹係度狂買,我地都唔執輸!買左成堆衫~!買左兩件衫,一條裙,YEAH!
之後細佬帶左我地去原宿,午餐去食意粉放題,即係自助餐,唉...大佬...減緊肥呀,仲食自助餐...不過細佬想食我一定會就佢~!
行左一陣"竹下通",去左"GAP"買左件外套,好靚嫁~!之後又去左BEAMS BOY,因為我知BEAMS
BOY係香港都幾HIT!去到一睇,好失望呀!D衫又貴又細件...又普通!始終都係無買到!
夜晚番左新宿食壽司,好正呀!三文魚勁好味! |
|
六月五日 |
咁夠薑?! |
 |
TATAMI始終係TATAMI,有草味都唔止,仲好硬淨,瞓到腰骨都直埋!朝早目送完細佬番學,就無野好做!坐係度等出門口,因為約左細佬去浦和等,等等下發覺有D問題!細佬番學攞左條鎖匙走,咁我地出去時點鎖門??佢屋企又無電話,點算??我唯有出去街外搵電話打比細佬,媽咪就睇住間屋啦!
我覺得自己好勁好夠薑囉!新宿就行得多姐!浦和喎...我D日文又係"有限公司",唯有用我尋晚跟細佬行過既路去300米以外既超級市場啦!嘩!!又驚又熱又曬!!好彩,終於比我去到超級市場,打電話比細佬叫佢放學番屋企,幾勁呀~!食完飯就去左新宿行伊勢丹,我係BURBERRY睇中左個袋呀,好鬼型!但係個袋花左,問下第二間有無啦,個靚女SALES話全日本都無,得番呢個,同埋北海道果間有,唉...又無...!慘!!
後尾我去左AGNES B買左個袋,好靚嫁!好開心!!夜晚去左食SHABU
SHABU,好味呀!! |
|
六月四日 |
等了又等 |
 |
今朝一早就起左身,果然不出我所料,尋日攞住幾噸野走黎走去,今朝D手手腳腳都跛晒!細佬朝早要番學,我地因為未試過由浦和搭JR去新宿,所以朝早唯有留係細佬屋企,等細佬放學啦!
等到兩點幾,細佬終於都番黎啦!食完午飯,細佬帶左我地出新宿行下,順便教我點樣搭JR去新宿,由浦和去到赤羽,再轉線去新宿,好!聽日試下約細佬係新宿等,試下自己出黎先!
夜晚細佬帶左我地去DONKI HOTE買野,呢間野真係好神奇!你講得出既野都有得賣,行行下你會見到有衫賣,之後又會有電器賣,無啦啦連蛋都有得賣!最好笑係連煙花都有...如果香港都有呢間野就好啦! |
|
六月三日 |
日本到著 |
 |
今日搭晏機,由香港去日本要成四個鐘,我唔係太鍾意搭飛機囉,因為都幾辛苦,好彩搭ANA,D飛機餐都幾好食,算啦!我既目的都係為左去日本探細佬姐!又唔係為左食飛機餐!
去到成田機場,先頭有D擔心會因為由香港去日本會比人反轉黎CHECK,好彩順利通過!出到閘口,見到細佬黎左接我地,好開心呀!!我地今次唔係住酒店,係住係細佬既新居,好緊張呀!唔知細佬間新屋係點既呢??
細佬住係浦和,好鬼遠呀!由機場去到細佬屋企,搭SKYLINER,轉車去赤羽,再轉車先到浦和,日本JR幹線又勁CHEAP,無咩扶手電梯,我"的"住成噸重既行李,又上樓梯又落樓梯,手都跛埋!落左JR仲要轉的士先到細佬屋企,成兩個幾鐘頭呀...大佬!
去到細佬屋企都成十一點,同細佬雞啄唔斷一輪之後,瞓覺啦!第一次瞓TATAMI,好硬呀,聽日起身一定散晒! |
|
六月二日 |
極度恐慌 |
 |
今日一早就醒左,好鬼緊張!!緊張到頭都痛埋!!唉...好想知!!打電話打左幾百次都搵唔到佢,都唔知結果係點!!好驚,到下午兩點幾先搵到佢!!一問之下,得左~!好彩無事!又合格!!好野!終於輕鬆晒啦!哈哈!
今日同媽咪出左街買野,之後番黎又繼續執行李!嘩~好多野要帶呀!又差D連喼都合唔埋,哈哈..!
好開心,聽日去日本啦!YEAH~!終於有得去玩,唔洗日日留係屋企發"毛"!又可以去見細佬,勁開心! |
|
六月一日 |
玩到發顛 |
 |
今日朝早同家豪番左城大食早餐,我地食中國點心呀,都幾好食吖~又平!
之後去左銅鑼灣行街,我地去左打機呀~哈哈~!我地次次去到果度都一定會打果隻"爬艇機",但係次次我地都輸,今次比我地掂左!哈哈~勁!不過玩完好累呀!
之後去左深水埗電腦展,多人到嘔電!!
夜晚番左屋企做節,好多好野食呀~正! |
Copyright (c)
2004 Catherine's Home
All Rights
Reserved
|