|
| |
 September
|
九月三十日 |
人都顛!! |
 |
今朝返8:30,我專登遲到半粒鐘,因為我明知師奶果堂唔上都罷,我就慢慢食我既早餐,同埋施施然咁出門口~!
頂,死師奶無啦啦話下個星期二QUIZ!!妖...有病咩...?!小學生呀?!玩測驗,真係低能!
唉,好多野做呀...大姐...!我唔理咁多啦!幾大都做好DESIGN PROJECT先啦~!
有時間咪"係咁二"溫下D死人NOTES囉! |
|
九月二十九日 |
發脾四!! |
 |
頂!!今日好鬼炆!!好多野做呀...!!又要出個死人FLOOR
PLAN...,又要計餐死,又要睇例...,煩死我!
D人真係衰格,買野比妳食,又話我有心害妳!妳都痴媽根,我就黎好得閒咁專登用自己D錢買野比妳食黎害妳啦,低能! |
|
九月二十八日 |
返黎啦! |
 |
尋晚細佬已經返左黎香港啦,好彩能趕得及日本大地震之前回來,總算鬆一口氣...!
尋晚去到機場接機,細佬出黎見唔到我,我明明專登企好前,因為我矮吖嗎...!我搖晒手,佢都依然好似見唔到我咁,後尾我叫佢,佢先認得我,...哈哈...,有冇搞錯呀...衰仔,我減左肥姐...,又唔係整左容,咁都唔認得我...?!
今日係阿爺生日,夜晚我地成班人同阿爺一齊食飯,大家見到我都話我瘦左靚左,好開心呀~
阿爺見到細佬好開心呀,因為成一年冇見過細佬啦喎~ |
|
九月二十七日 |
大混亂!!! |
 |
今日真係好混亂...!!!尋晚完全瞓唔著,今朝8:00又自己醒左...瞓唔到,唯有起身,一早就擔心呢樣擔心果樣...,點知,今日有好多突發既事發生...!
先係細佬D野搵唔到宅急便寄返香港,突然間,我媽咪又唔知食錯左D咩,又痾又嘔...!又擔心細佬趕唔到飛機!!又忙住打電話追佢快D出門口!
本來今日要去聽英國留學講座,不過屋企既情況好混亂!!唔去啦,又要帶阿媽去睇醫生,又要趕去接機!好彩我D同學幫我攞留學既INFORMATION同埋肯話番比我知個講座既MAIN
POINTS,好多謝你地既幫忙,多謝LOUIS同埋AIRY~! |
|
九月二十六日 |
痛心+難過 |
 |
不單只絕望...痛心...,我已經唔想再信你啦...,你到今日都仲講大話騙我...,你當我是白痴嗎...!?枉我從小到大都很信任你...,我冇野好講...! |
|
九月二十五日 |
好DOWN |
 |
今日返左CITYU,因為要去CHOIR既MINI CONCERT!
好無心機,成個人DOWN晒,冇咩反應,活死人一樣,請原諒我的無能為力...我預計到一切,卻愛莫能助... |
|
九月二十四日 |
無話可說.. |
 |
今日真係好無奈,無啦啦比PROFESSOR猛料浪費我既時間,害我又要四個鐘天地堂...!
返到屋企,驚聞一個壞消息...好無奈,好失望,完全無話可說..因為我都無能為力... |
|
九月二十三日 |
嶺大遊記 |
 |
今日好眼瞓,梗係啦,尋晚做功課做到3:00,今日上堂勁"釣魚"!!!死!
上BUILDING
SERVICES果陣,果件"蘿蚊",都唔知佢講咩!!去左CANTEEN買TEA請班FRIENDS食,阿虎,大頭啤係課室食豆腐花,仲要係阿SIR面前"兜口兜面"咁食,我又買左碗仔翅請家寶食,但係佢好似唔敢食囉,哈哈~
4:20同TRACY去左U-CIRCLE上車去嶺大ANNUAL
PERFORMANCE,我第一次去嶺大咋~!勁好奇~~!
仲有,今日既ANNUAL
PERFORMANCE係我第一次出席既表演,好緊張同埋開心呀~~!好彩,順利完成,我仲覺得自己既表現非常好添呀~哈哈! |
|
九月二十二日 |
忙到痴線 |
|
今日無啦啦DAY-OFF,又賺左,因為PROFESSOR猛料病左,我有D驚佢囉,佢會唔會流感或SARS嫁?!?!?!?!
需然"DAY-OFF",但係都要返CITYU同虎哥,大頭啤傾PROJECT,傾到黃昏6:00,再同其他同學"清談"下,嘩,死得!原來自己好唔掂!!
返到屋企,咩都唔理呀!拿拿聲做功課,做到凌晨3:00,就黎死...好彩,都比我做得七七八八啦...聽日要去嶺南大學ANNUAL
PERFORMANCE,明晚我一定唔會做功課囉...!攰死! |
|
九月二十一日 |
睇到令人火滾既<六樓后座> |
|
今日同家豪入左科大,因為有D緊要野要做呀~!
做晒D野都已經好晏啦...D時間又唔拖唔水,入左科大圖書館睇<六樓后座>,好無聊既一套戲!睇到有D火滾!
同家豪由科大搭車到坑口,上左MTR,搭搭下車,家豪突然同我講,過左站唔記得落車!已經火滾!!所以鬧左佢一大餐!
有D後悔自己鬧佢鬧得咁絕...!開始覺得自己"冇品",講對唔住,佢就唔嬲我啦!對唔住呀~我今日太過份了,好彩你唔嬲我,多謝你呀~!
你對我真係好好,夜晚又帶左我去食譚仔"特辣腐皮米線",你仲"破天荒"咁叫左"麻辣既小辣"添~!結果你食到面都紅晒,又流晒汗,哈哈哈...其實你唔洗學我食咁辣嫁~你女朋友個口同個胃係特別構造嫁~!
你肯陪我,我已經開心到彈起~!好多人既男朋友都冇你對我咁好~我好感動呀~~! |
|
九月二十日 |
公主貓 |
 |
今朝明明約左NETVIGATOR既人上黎換MODEM吖嗎!果個咁既死人野同我玩遲到!明明約左11:00,佢成1:00先上黎!!終於都比我剷到佢痴肺!!
下午做TREATMENT,比人"車"左成粒鐘!!超痛!!
夜晚又同家豪見面~~好開心呀~你對我真係好,我鍾意食譚仔既"特辣腐皮米線",你又肯陪我去食,突然覺得自己好似公主呀~! |
|
九月十九日 |
終極"天地堂" |
 |
今朝返學上AUTOCAD,休息得太足夠啦~!心情極好~~
12:30已經放左學,本來可以走人,但係我今晚要去CHOIR既EXTRA
PRACTICE呀,因為下星期二要去嶺南大學JOINT U CONCERT吖嗎,仲有星期四既MINI
CONCERT呢!但係...我12:30已經放左學啦喎...成七粒鐘天地堂呀...大佬,點捱呀...!
LUNCH之後跟左阿虎同TRACY打壁球,不過我冇打呀,唔可以運動,一路睇小說一路觀戰囉~唔好意思呀兩位...我又做左你地既電燈膽...
之後去左BST
OFFICE搵PROFESSOR猛料,搵唔到...反而撞到LOUIS,欣恩佢地,好開心咁傾左成個鐘頭計~我地仲約埋一齊係下個星期六去BRITISH
COUNCIL聽UCAS既講座~好開心呀,可以大家一齊去~~
之後去左搵MILLIE傾DESIGN PROJECT SITE
DIMENSION既野,傾完就好無聊咁坐係STUDIO,諗住整理好本新買既SCHEDULE
BOOK啦~點知撞到WYMAN,佢好似有D唔開心囉,之後佢索性走埋黎同我傾佢既心事,傾左好多好多,傾傾下,佢直頭傾到眼有淚光...!嘩!!嚇死我...!好彩佢冇再喊落去...唔係人地以為我整喊佢就大鑊啦...!就咁樣,我同佢就傾到6:15!
傾計途中,有一位師弟走埋黎問我係咪住係沙田,因為佢有一次撞到我!嘩,師弟,你都好犀利姐~~咁都認得我?!唔通我醜樣容易認??哈哈...
7:00唱CHOIR,PRACTICE左6首歌,唉...終於都比我學識點樣唱啦...!10:00散水~~! |
|
九月十八日 |
行行企企,食飯幾味! |
 |
早幾日可能真係好辛苦,連續三日返8:30,尋晚又恃住今日DAY-OFF,賴死,到凌晨2:30先捨得瞓,所以今朝成下午12:00先起身~真係超級幸福~~
同媽咪落左百佳買野~好無聊~~!我突然又有D掛住譚仔既"特辣腐皮米線"...冇得食,又無理由依家專登去食吖嗎...算啦,唯有等星期日...!家豪咁錫我,一定會陪我去既~
下午食完野之後極無聊~係屋企入下CHOIR果D譜呀~睇下書呀~行行企企咁就浪費左一日~本來想同家豪出街食DINNER,不過後尾都係冇去到...
又好無聊咁食完DINNER,冇野好做...同媽咪一齊睇有線,冇咩好睇,本來想整理好尋日買果本新既2004 SCHEDULE
BOOK,唔...不過,可能今日悶壞了,都係聽日先整啦,費事整得唔好...!
我愛返學!但最好好似消防員咁,返一日放一日就PERFECT啦~! |
|
九月十七日 |
極忙,極眼瞓 |
 |
唉,今日真係勁攰!!!今朝又係8:30返學!!喂...我真係大昏迷呀...搭火車果陣,我連企係度都瞓得著!!痴線!我真係好憎我個TIMETABLE!!究竟係邊個咁變態呀...一個星期裏面,星期一,二,三都返8:30!!簡直虐待!!
下午我約左媽咪黎城大CANTEEN食飯,我依舊食菜~媽咪食左鹽焗雞脾飯,佢就話幾好食,不過太咸!但係我就覺得呢碟飯最恐佈既係勁多油!!痴線!擠成包TEMPO落去都索唔晒D油!!我冇份食,但係睇到都驚!!
之後我地去左黃大仙,要去黃大仙誕呀~後尾落左尖沙咀整"NEC手提電話",上到維修部,發現原來好多人都攞呢部咁既死人電話黎整!!CHEAP到嘔電!
聽日DAY-OFF~!我一定要好好休息一下啦,要瞓晏D先得~~! |
|
九月十六日 |
唱到喉都沙 |
 |
今日係TRACY生日呀~~生日快樂~~!
今朝又係倒屎咁早就要返學!!我成日都覺得一個星期裏面,最難捱既係星期二,因為要返8:30,果堂仲要係勁悶,尋晚唔夠瞓,今朝上堂勁釣魚...
今日係STUDIO同YEAR
1既師弟妹傾過計~睇到佢地個PROJECT
BRIEF,嘩!勁狗啦!有咩理由要D師弟妹做D咁難既野呀!?大佬,佢地剛剛讀建築,咩都唔太識,得咁少時間比咁大鑊野比佢地做,會唔會過份左D呀??都唔知係咪變態既!
今日下午見D師弟妹咁辛苦,幫左佢地整CHAPTER
123C例書,比心機做好D野啦你地,加油~
今晚唱CHOIR,好開心呀,因為學識左好多新歌~YEAH~! |
|
九月十五日 |
胃痛死!! |
 |
果然係"有咁耐風流,有咁耐折墮",尋日食左兩碗特辣米線,今朝果然肚痾得好厲害,仲胃痛添呀...頂...!
今朝仲PRESENTATION添...我PRESENT得好差,從來都未試過PRESENT得咁失敗!!心情勁DOWN!!
不過,算啦,都已經係PAST TENSE...求其合格咪算囉...
呢幾日勁忙,應該多謝TRACY同阿虎好努力咁做好三塊BOARD!
PRESENT得唔好只係我既錯,阿虎你唔洗同我SAY
SORRY喎...!
跟住落黎大家都要努力D先至得啦! |
|
九月十四日 |
向左"辣",向右"辣" |
 |
今朝同家豪去左睇戲,睇<向左走,向右走>,套戲好鬼正,好TOUGH,真係想去睇多次!果D相遇同埋天意弄人,真係絕到我都冇野好講,睇完就更加覺得TIMING應該係上天跟人類開的最大的玩笑...!
下午諗住同家豪去試下深水埗果間譚仔辣米線果間分店啦,點知就大鑊啦,我地行到果度附近,見到有間米線舖,我地冇咩留意就走左入去!
叫米線果陣,我問左寫單果個人少少野,發覺佢既答案有D九唔搭八,我都有D奇怪啦,點知叫左碗米線埋黎,嘩!!發生咩事?!!?完全唔一樣既???冇法啦,唯有照食啦,可能間間都唔同既呢!
埋單果陣,居然比我發現到MENU上寫住"雞,豬骨湯底"!!!嘩!!!頂!!!好驚!拿拿聲走出門口一睇!!
下!!!!!!點解米線舖個名唔係叫"譚仔"米線??!?!?叫"新昌隆"!?正當我好愕然果陣,我向右一望...
完全明白!!頂!仲咩有兩間米線舖"痴"埋一齊開?!原來左邊果間死人"新昌隆"係扼人嫁!!!勁賤格!!鬼唔望你間死人"新昌隆"執笠!!
好唔順氣,勁有被騙既感覺!!SHIT!
谷鬼氣!!夜晚又專登走返去深水埗果間譚仔辣米線食一次!!
今日真係黑到無倫!!仲要一日內食左兩碗特辣米線!!死啦,聽日肯定肚痾痾死我!! |
|
九月十三日 |
"依依"熠熠耀保良 |
 |
今日星期六,朝早可以瞓到10:00,正!
下午去左做TREATMENT,D人好煩,買咩買咩...!好煩呀,我要買我就自己會買啦,我只想睇書,妳卻偏偏係我耳邊"依依哦哦",頂...!煩到嘔電,我索性扮瞓著!!
夜晚走左去"依依"熠熠耀保良,本來都唔係好想去,但係...唔去又唔得,都算係代表公司去吖,張TICKET成3000蚊,好鬼貴,不過都係做善事姐...算啦,唯有去啦...!
原來今晚有LEON,王菲,仔仔周渝民,記得以前我都好白痴下囉,比成千幾蚊去睇一次LEON,仲好想同佢握手添,依家"兜口兜面"見到佢,我反而唔稀罕...
果然係大個女,已經收心養性啦~! |
|
九月十二日 |
追月唔成 |
 |
今朝一早起身就肚痾,真係冇好日子過...
下午出左銅鑼灣,多野做到嘔!!求其食左D野就算,行左成日,對腳跛咁滯...
想買ANNA SUI既指甲油,太貴,又唔捨得,如果有人送比我就好啦~~
今個星期輕得好少...唔得!!我下個星期一定要實行<一日一代餐計劃>啦!!
由於腳痛,今年追月唔成...噢...! |
|
九月十一日 |
好好過中秋 |
 |
今朝被逼返城大補課,已經眼瞓,仲要聽個死師奶講埋D廢話!!就黎殺左佢!
一於冇佢咁好氣,用個電話同GINIA,TRACY,嘉寶影相先~!已經UPLOAD左上<貓貓與朋友的照相館>啦~!去睇睇啦~~!
今日係中秋,冇咩做,我又唔會煲臘既,玩火又唔係我既強項,都係陪(睇)媽咪食過月餅之後就早D抖啦...! |
|
九月十日 |
冇好日子過 |
 |
尋晚做功課做到凌晨3點,今朝極唔願意起身,點知一起身,唉!!我個頭好鬼痛!!救命呀...!!
今朝返8:30,又係勁早,返到去,見未有人返到,嘻~!"嘆"係張枱度瞓下先~!瞓左"N"分鐘之後,聽到D聲,彈起身!眼前就見到PROFESSOR"猛料"望住我笑...白痴...!
11:30上師奶既TUTORIAL,嘩!!妳都好悶姐,又差D瞓著...!
12:30,終於都"捱"到放學啦...哈哈...
居然係城大比我撞到以前IVE個同學,不過同佢唔係好熟,所以求其廢話左兩句就閃啦...!
頭先收到師奶個EMAIL,痴媽根!!今日又話星期六朝早補課!依家又失驚無神話聽朝補!!又係妳!!次次都因為妳既"失驚無神"搞到我D計劃亂晒!!正一"EIGHT
WOMAN"!!
等我今日下午仲拿拿聲做晒D功課,咁聽日我就有一個快快樂樂既中秋假期!
遇上妳,唔係我令妳冇好日子過!而係妳令我冇好日子過,睇怕我今個SEM有排折墮...
又害我聽日要返學,正衰人... |
|
九月九日 |
唱CHOIR |
 |
今朝返8:30,勁早...好眼瞓!!師奶果一堂好鬼悶,白痴...我覺得佢完全冇備課囉,講講下書又要睇REFERENCE
BOOK...真係救命呀...!!加上我朝早仲肚痾添...勁折墮...!
以為師奶果堂悶啦,點知下午果堂仲悶!!果件亞SIR仲要係ANTHONY二號,完全聽唔到佢講咩!!
4:30同IVAN傾PROJECT,可能比果兩件騎呢怪悶親,勁眼瞓,都唔知佢講咩...
夜晚去左CHOIR試音,好緊張,又剛剛食完野,唱到高音果陣,差D走音,哈哈哈..終於比人編左去女低音(ALTO)囉~!
7:00唱CHOIR,有D難唱,不過好開心,因為好好玩~!
今日真係充實得不能再充實!! |
|
九月八日 |
攞黎衰 |
 |
尋日果單TREATMENT,果條女好大力,估唔到,痛楚伸延到今日,真係從未如此折墮過!
我有好多缺點,太過堅持某一樣野都係我既缺點之一,例如係咩??
例如今日咁樣,我身上既肉已經好痛,我仲驚死自己唔夠折墮咁,專登拉左家豪"山長水遠"咁走左去大角咀食譚仔"特辣腐皮米線",食到依家個胃"浪浪下",試圖想搞到自己胃痛加周身痛先至安樂...!
真係有咁耐風流,就有咁耐折墮!
抵死又白痴!
冇野好講... |
|
九月七日 |
全日痛 |
 |
尋晚真係好鬼眼瞓,所以11點已經瞓左!今朝9點自己起左身,......,嘩!!!好死頭痛,再屈指一算,大鑊!!!瞓左十個鐘!!次次瞓左十個鐘或以上,我個頭一定痛到爆...唉...
下午去TREATMENT,果個人好大力咁推!!嘩...肉黎嫁,大姐!!妳FEEL唔FEEL到我痛嫁??
不過算啦,佢都係想我好姐!!
今晚做節,冇得同家豪去街,好掛住你呀...!
今晚突然好掛住大角咀既"譚仔"特辣腐皮米線呀~~想食...! |
|
九月六日 |
眼瞓到極點,仲要耍我!! |
 |
今朝係營地,超悶!幾點先走得呀,大佬,簡直渡日如年!!
好鬼眼瞓,唔係冇瞓,係成晚都比D是非聲嘈住晒,根本瞓唔到...
今次去OCAMP最開心係咩?
最開心就係走果一刻,極難忘!
因為終於甩難!
返到CITYU,又比人耍左一鑊!!
補課取消...
頂!!取消!?!?!
妳玩我呀!?!?死師奶!話調就調!妖...
得罪我?妳將會冇好日子過! |
|
九月五日 |
史上最悶既OCAMP |
 |
今日朝早上AUTOCAD果陣,有人問我放學後去唔去YEAR 1
STUDENT RETREAT OCAMP,咁我諗住,橫掂我本身都係MENTOR,加上TRACY,阿虎都去,咁就應承左囉~
4:30同TRACY,阿虎傾完功課之後,因為佢地要上JOB
MANAGEMENT,我唔洗,所以我就拿拿聲去幫佢地買D日用品同埋趕返屋企執D野入CAMP啦,嘩,趕到痴肺!
搞掂出左門口,落到樓下,頂...!落狗屎!真係有D想縮沙!!但係始終都去左JOIN佢地!
搭巴士到西貢,仲要轉多一次巴士!!頂...咁煩嫁!!巴士去左個冇街燈既路上,嘩...好恐佈,不見天日,完全係伸手不見五指!!
落左車之後,去左個好死黑既地方......其實我有D驚囉,當時真係有D心寒嫁...!之後阿虎問我地CALL的士去營地好唔好,唔洗問,梗係好啦,大佬...!我幾驚你叫我地行去營地呀!!唔係行既問題,係我好怕黑,好驚!!
最好笑係阿虎CALL左架的士,呢頭收線,果頭架的士十秒內出現,嘩,冇病呀...?咁快?!
好辛苦先到營地,BBQ後上房,落TOILET洗面,嘩!!死人TOILET吖!!衰到冇人有!!我地即刻決定今晚打死我地都唔沖涼,最多發臭!!
個死OCAMP完全唔好玩,勁悶,悶到我想死!!MENTEE又一堆堆,當我地MENTOR透明,自己圍埋成班人講是非...!妖!!我專登入黎聽你地講是非咩!!真係好後悔唔聽家豪話,入左黎OCAMP...
去男仔房睇下有咩好玩,哈~玩TRUE OR
DARE,唔係三級,二級半ONLY,超悶!!唔玩顛D咁玩黎做咩呀...小朋友...!好似D細路仔玩泥沙,頂...悶爆!
都係返去瞓好過... |
|
九月四日 |
中頭獎 |
 |
今日真係嘆呀~因為我今日DAY
OFF,所以我可以瞓晏D,瞓到9:30,真係覺得自己好鬼幸福~~
食完我既早餐之後,我就開始做功課啦,我今日要RESEARCH好多野呀!不過今年既FINAL YEAR DESIGN PORJECT就真係正啦~!因為又係用廟街做SITE,起OFFICE
BUILDING~!嘩!同我熟既人都應該知道點解我話正啦~!因為想當年本小姐讀IVE果陣,YEAR 2就做過OFFICE DESIGN
PROJECT,YEAR 3果陣就更加係做過RE-DESIGN廟街既FINAL YEAR
PROJECT啦~!所以我既RESEARCH係可以快過人地九條街囉~!哈哈!真係正到爆~!最抵死就係做CASE STUDY,我直頭有中銀既AUTOCAD
DRAWING呀~~!真係好,又做少好多野!
不過今日有D折墮囉,我係我既"堆填區"搵番我以前既RESEARCH果陣,開左柜門又唔記得左關好,一企起身就即刻撞親個頭!中正頭獎...!!
頂!!個頭痛到爆!好彩冇撞穿頭... |
|
九月三日 |
一隻"羚羊",兩個"茂利" |
|
尋晚開始睇一本新既小說,叫"情人無淚",聽講呢本書當中既主角個結局係好慘,咁就吸引到我睇啦~但係,我都睇左超過一百頁啦...我喊都未喊過!死啦,我係唔係冷血既呢???
今朝上左DETAILING堂,我帶左一袋係日本買返黎既手信請D同學食,比某人話我"明寸阿SAM"!車!寸咩姐,我都冇必要專登買D手信返黎寸佢啦,依家D野食唔洗錢咩~~
上完堂,因為今日要等報CHOIR,同左TRACY,阿虎返STUDIO睇VCD,因為我帶左隻<咒怨>返學借比阿虎睇吖嗎,咁橫掂咁得閒,咪開黎睇下囉!結果,我,TRACY,阿虎三個"茂利"走左入STUDIO
CS2睇VCD囉~好搞笑,TRACY可能有D驚,睇到"縮下縮下",阿虎就係度勁笑,話個導演浪費菲林,睇左咁耐,鬼影都冇隻,一D驚嚇都冇!阿TRACY一驚,佢又係度笑TRACY!而我可能因為呢套戲大大話話都睇左四次,所以驚都唔驚下...
哈哈,今日真係無無聊聊又一日~~ |
|
九月二日 |
咁都有得放?? |
 |
今朝本來要上堂,但係因為果位LECTURER去左外遊未返香港,所以CANCEL左呢一堂,星期六補番,令我無啦啦有半日假期,可以遲D先起身,太好了~
起身先發覺遲D會掛3號風球,但係我都沒有半點興奮既感覺,因為我諗都唔會掛8號風球啦,次次我好"恨"佢掛8號風球果陣都唔掛既,失望得太多次啦,所以都冇咩期望!
之後同阿虎講左一陣電話,大約都係討論下會唔會掛8號風球啦,返唔返學啦,"間唔中"講下人地是非啦,講左一大堆廢話,之後我又打左比TRACY問下CHOIR既野,又講左一大堆野,又打左比GINIA,又打左比家豪~~
家豪猛咁叫我唔好返學囉,但係城大又未宣佈停課...何況TRACY同GINIA都係城大囉,咁我咪準備返學囉,我仲叫埋阿虎返呀~
點知我落到街,諗諗下有D唔對路,就打電話比GINIA啦,佢都話下午唔上堂啦喎...依家返屋企,我就即刻決定折返!打電話比TRACY同阿虎又打唔通!!搞到要SEND短訊比佢地,叫佢地唔好返學,好彩SEND到!唔係又累人白行一趟!
今日無啦啦有假放,我諗住係屋企睇下書同埋瞓下覺咁啦~! |
|
九月一日 |
開學日 |
 |
今日終於都開學啦...今朝返8:30,真係"倒屎咁早"...尋晚又唔係好瞓得著!今朝真係眼瞓到死...!返到去先知,原來改左9:30,真係想殺人!!早知瞓多一個鐘啦!!係都要搞到我冇好日子過...!
今日DESIGN
PROJECT分左組啦,我同TRACY,阿虎一組,個PROJECT跟IVAN,好彩姐!幾驚跟PART TIME LECTURER呀!真好運!!
不過,今日都好開心呀,因為可以見番D朋友囉,真係好耐冇見,今日見番,先至發覺,一個暑假,大家都變了!!
GINIA變靚了~!嘉寶變得風趣了~!阿虎同TRACY變得甜蜜了~!我卻變瘦了~!!哈哈哈~!一切都變得太快了!有D適應唔到~!
死虎今日"恥笑"我參加CHOIR!!死人頭,我似玩咩!?我好認真嫁!我聽日就去報名!報埋你果份,死未!哈哈~~!
15:30放左學諗住走得啦!!點知比阿"PROFESSOR猛料"捉左我去見MENTEE!頂...!!我已經好死眼瞓啦,仲要我去見MENTEE...後尾我仲頭都痛埋!!唉,好折墮!又冇PANADOL...我個頭真係好鬼痛!!真係黑都嘔,冇運行!
希望聽日好運D啦...
頭痛BYE BYE... |
Copyright (c)
2004 Catherine's Home
All Rights
Reserved
|