Saeta li ser zenda min
Ya bi qelemê xêzkirî
şikest !..
Gelo yê şikest
Zaroktiya min bû
Pinpinîkên biharê cî tunebû xwe têxista
Ji derdê berrêdayîna min
Min kuliyan digirtin bi lepan
Êdî ew jî jimin direvin
Gelo yê direviyan
Ciwantiya min bû
Ez têr nedibûm ji tehmên xweş
Rojek qîma min nedikir
Ji bo kêfê, ji bo eşqê..
Min stêrkên xuricî dijmartin
Bi qîzê gund re, li ser baniyan
Gelo yê dixuricîn
Xortaniya min bû
Ez berê kuça di ber malê de wenda dibûm
Û ditirsiyam, digiriyam..
Hêsir û lîçikê min tevî hev dibûn
Lê îro ew der jî jimin re biçûk tên
Dinya limin teng e êdî
Gelo ez mezin bûm
Êdî tu qîz, tu seyran
Ne çiya û ne zozan
Qe dawet û qe stran
Xwîna min nakelîne
Dilê min naperpitîne
Gelo ez pîr bûm
Ev çi qiyamete li ber malê ?
Ma te xêre dayîka min
Te li serê xwe por nehîşt!
Lê tu ne bese bengiya min
Te paxil li xwe peritand !
Bêjin ji min re qîzno, zarokno, malîno
Kî miriye ji vî malî, ji van deran ?!
Wey gidî !!..
Gelo yê mirî ez im ?..
