Sunbilla (108 m) -
Bagatxeta lepoa - Azpilikueta

—Igandea,
1997ko azaroak 9—

 Bertiz Jaurerrian eta Baztan bailaran

SUNBILLA (108 m).
Herriaren hasieran, ezkerrerantzako lehendabiziko kalea hartu eta porlanezko pista bat aurkituko dugu; hemendik jarraitu eta bidegurutzean ezkerretik errekaraino jaisten den hartxintxarrezko bidea jarraituko dugu. Pista hau jarraituko dugu eta baserri batzuetatik igaroz, mendi-bizkarra lepo batean topatuko dugu.

Baztan bailarako panoramika

Toki lauan, ordekan pixka bat ibiliko gara eta bidegurutzean ezkerretik jarraituko dugu, agertzen diren marka zuri-horiak kontuan hartu gabe. Alanbre-hesi bat eta harlauza handiz osatutako harresi batekin topatuko gara. Bost minutu igaro ondoren, pista utzi eta eskuinerantz igo beharko dugu, alanbre-hesia eta harlauzen ondotik. Orbelaz estalitako aldapa labur baino bortitz batek, SALIÑA muinoraino eramango gaitu (564 m).

Pagadian, kordala jarraituko dugu, beti ezkerretik eta harlauzen harresiaren ondotik ibiliz.

Era honetan, SAGASTA muinoa (646 m) gaindituko dugu. Aldapa gogor batek ESKIU leporaino (550 m) jaitsaraziko gaitu. Eskuinean, BERTIZ JAURERRIAn sartarazten gaituen metalezko ate bat topatuko dugu eta pagadi eder batez inguraturiko pista batera, MUGAIRI eta AIZKOLEGI mendia elkartzen dituenera irtengo gara. Pistatik 9. Km-ko mugarriraino igoko gara eta hamar bat minutu geroago, eskuinetik irteten den bide zabal batetik jaitsiko gara; honek PLAZAZELAI lepora (535 m) eramango gaitu, non beste bidegurutze bat topatuko dugun.

Ezkerretik, Mugairi-tik ORABIDEArainoko errepideraino igoko gara. Errepide hau zeharkatu eta eskuinean, hurbilean dugun baserri baterako gurpidea hartuko dugu. Baserrira iritsi baino lehen, iturri batera doan ezkerreko bidezidorra hartuko dugu. Ezkerreko bidetik jarraitu eta urrutian ikus daitekeen pago bakarti bateraino igoko gara. Hemen eskuinerantz biratuko gara eta pagadiaren ertzetik igoko gara. Bidezidorra hirutan banatzen den tokian, erdiko zidorretik, aldapa gehien duenetik igoko gara; berehala beste bide bat zeharkatu eta orbelaz estalitako bidezidorra jarraituko dugu, basotik EEI norabidean igoz ezker aldetik, LEGATE mendiko hegia inguratzearren.

Alkurruntz tontorra

Oso argia edo nabaria ez den bidegurutze batera iritsitakoan, ezkerretik, pista batekin topatu arte jaitsiko gara. Pista beretik eskuinerantz jarraituko dugu eta Legatetik jaisten den pistarekin topatuko gara; pistatik jaitsiko gara BELTXUZI (655 m) lepora iritsiz. Inguru honetan pisten bidegurutze bat dago. Erdikotik igoz, pagadiaren barnetik igoko gara. Errepide estu bat zeharkatu eta aurrera jarraituko dugu. URRIZAL muinoko hegietatik igaroz, kordalera iritsiko gara. Beti pagadiaren ertzetik ibiliz, IÑABERRI, BAGATXETA eta ANDREGAIN lepoetatik igaroko gara; bide ondoan bi bunker ikusiko ditugu.

Gure aurrean ALKURRUNTZ, BETARTE eta LARRO gainak ageri zaizkigu. Azkeneko mendia inguratzen duen pista hartuko dugu. Minutu gutxien buruan bihurgune hertsi batean pista abandonatu eta hegia 700 m-ko leporaino zeharkatzen duen zidorra hartuko dugu. Lepo honetatik, MEAKA lepotik datorren pista zabaletik behera jarraituko dugu; BAZTAN BAILARAko bista ederrak. Ezkerrean bi baserri ageriko zaizkigu; beren eskuinetik jaitsi eta 50 bat metro aurrerago ezkerrerantz biratuko gara, porlanezko pisten bidegurutze bateraino iritsiz. AZPILIKUETA herrixka begibistan dago. Bidegurutze honetan, eskuinekotik jarraitu eta Azpilikuetan sartuko gara; ARIZKUNgo herria aurrean dugu, baita ezkerrean URRASUNgo baserriak ere. Ibilbidearen amaiera.

 Kartografia

 Etaparen profila

 Eta informazio gehiago amaraunean:

• (gazteleraz)
  V Hiriburuen Ibilbide Handia. Patxi Arriagaren deskribapena.
  Bertizaranatik Baztan ibarreraino. Nafarroako bailararik ederrenean.
  1992ko irailak 26: Sunbilla - Sagasta (646 m) - Bagatxeta (793 m) - Amaiur.