Zarautzen horma-irudiak eskegiteko bi toki ikus genitzazke: Azoka ondoan, urte osoan zehar, eta aspalditik Zarauzko eraikin adierazgarrien koadro bat dago. "Naïf" kutsua dauka, eta Artezaleakekoek margotu zuten, Jose Luis Zumetaren zuzendaritzapean.
Frantziskotarren komentuaren horma handia, aire libreko museoa bilakatzen da uda partean. Bertan, hiru horma-irudi ipintzen dira pareta apaintzeko asmoz.
Karrikako margoarekin jarraituz, Sanz-Eneako oinezkoentzako lurpeko pasagunea ezin da alde batera utzi. Bertan bi artelan ikus daitezke: sarreretako batetan dauden keramikak, eta pasagune barruan J.A. Legorbururen hormako margoak.

Zarautzek 1985. urtean ekin zion artea karrikara ateratzeari. Antolatu zueneskultura biltzarrak artista ugari elkartu zituen Munoan, eta beraien lanak herriko txoko ezberdinetan ipini ziren. Simposium hau Udaletxeko Kultura batzordeak, Mikel Campo eta Marian Aranburuk antolatu zuten.
Herria beti izan da kulturarekin eta kultur-gizonekin. Horren adierazgarri dira Palmiro Haroren "Basarriri omenaldia" (Luzea dorrea parkean) eta "Francisco Escuderori omenaldia" (Zuhaizti parkea), Jorge Oteizaren "Bertsolariari omenaldia" (Bertsolarien enparantzan), Mikel Campo eta Marian Aranbururen "Lizardiri omenaldia" (Luzea dorrea parkean), edo Miguel Etxeberriaren "Aita Mitxelenari omenaldia" (Mitxelena kalean). Pertsonaiekin jarraituz, ezin da ahaztu Jorge Oteizaren "Madozi omenaldia", turismo bulego zaharraren aurrean.
Esannahi poetikokoak ere badira. Horren adibide dira Concha Zilbetiren "Euskarria ...-n" (Lezeran), Ricardo Ugarteren "Suaren hegaketa" (Hegoalde industrialdearen sarreran) edo Jose Ramón Andaren "Lehioa" (Itsasmendiko zubiaren ondoan). Beste lan batzuk askoz funtzionalagoak dirudite, Jesus Maria Jauregiren "Transformazioa" bezala.
"Vicente Tximu-Arrantzale", Julio Beobiderena, hasieran itsasertzean ipini zen, baina Getariarako errepideko atsedentoki batetan dago. Eskultura berrienak itsasertzeko pasealekuan daude. Narroseko markesen jauregiaren ondoan "Txiliku untziolaren omenez" lana dago Juan Jose Gurrearena. Hondar kalearen bukaeran "H-E-B" dago, lurretik ateratzen den olatu bat dirudi, eta Mikel Angel Lertxundirena da. Dora Salazarrek hiru irudi ditu: "Bihurketa konpentsatua", "...-n bidez" eta "Zipriztindura/Inbertitura". Marcos Hernandok "Zarauzko dama" ipini du, eta emakumeari omenaldia da. Bukatzeko, Elena Asinsek "Canons 22" lan ikaragarria dauka basamortu txikiaren bi aldeetara, 72 harri-irudiz hornitutako obra.
Hauez gain, herriak beste lan gehiago ditu. Mikel Campo eta Marian Aranbururen harri-irudi eliptikoa Sanz-Eneako parkean; Gerardo Arribasen harri blokea lehenik itsartzean ipini zen, baina Udaletxeak gorde egin du biltegi batetan; Kiroldegi ondoan Ivan Rusev bulgariarraren lan bikia dago; Larrosategian Begoña Uriarterena dago; Koldobika Jauregirena Zelai-Ondoko enparantzan kokatuta dago, bolatokiaren ondoan; Guillermo Andonegirena Getariarako bideko atsedentoki batean; Léonard Rachita errumaniarrarena Vista Alegreko parkeko sarrera batetan. Azken hauek denak 1985eko biltzarrean eginak.
Rodriguez Jauregik Pontarlier enparantzan du bere lana. Ibon Basañezek Ixpila plazan dauka behirazko zuntzezko obra handia. Aiako Tailerrak  "Iturria" dauka Tentenea enparantzan. Xabier Loyola zarauztarrak marmol eta burdinezko lana dauka San Luis aurrean. Larrosategian Zarauzko 750. urteurrena ospatzeko Koldo Alberdiren lana dago. Jacint Comellesek San-Eneako sarreran adreiluz osatutako harri-irudia dauka. Adierazgarria da baita ere Jorge Oteizak bere otorduak egin ohi dituen jatetxeari oparitutako irudia.