私人重地,
非請勿進!!
偷睇我9月既日記
11月 12月
1月 2月
3月 4月
5月 6月
7月 8月
1-10-2000
今日好乖咁執野...整理左d相(+底片--都幾多喎),
信紙. 似乎我都仲有好多野未搞掂. 又開始忙啦~~
2-10-2000
今日又俾人甩底,
不過無所謂啦, 你真係有緊要野做呀麻, 我唔介意既,
尤其我今日心情唔錯^^ 今日朝早整理左部份衣物,
相信需要帶走既野應該都執得七七八八,
等電話既時候睇一本我第二次睇既書,
居然一次又一次咁係度傻笑... 係咪有少少低能呢??第二次睇依然可以覺得好笑...
而且個本仲唔係笑話tim. 等我帶埋本書去重慶,
睇下我仲可以笑多幾多次先. 呵呵呵 ^0^
下午online好有意外收獲,
林文海居然係度, 前幾日先同tar係度話佢又失蹤左.
好耐冇見到佢^^, 都算係因禍得褔. 呵~ "知己好友'個一part係我既嘔血之作喎,
句句都係憑我既記憶同感覺黎寫架, 緊係寫得好啦=^^=(唔好話你讚寫得好既原因係純粹因為我讚你呀下,
俾我自我陶醉一下^^).
不過最好都係唔好俾文浩知道, 費事佢不滿啦... hehe^^;
不過好奇怪,
今日居然開唔到自己個page既guestbook. 比較諷刺lor~~
3-10-2000
約左十一點八,
居然可以十二點二先出現, 而且仲要毫無悔意,
一個天生既開心果, 一個天生既遲到王, 我都無話可說,
鬧完就算啦(發洩一下唔算好過份卦?^^;), 反正下次都依然會遲架啦, 不過打個電話,等我唔駛趕頭趕命,
搞到成身汗呀~~算.... 冇野.
4-10-2000
今日去左唔少地方, 做左唔少野.
不過好似始終都係差d野未買, 未做. 唔知做乜, d排有少少short
short 地, 講野語無倫次, 做野丟三忘四.
希望去到重慶後會正常番啦. 都持續左幾耐啦, 應該short完啦卦,
去到重慶要更加tough, 一定要捱得到, 一定要
好大壓迫感, 好煩,
其實係出於好意, 但係咁樣反而令我覺得好大壓力,
又多好多野做喎, 其實三個幾月者, 一月份都番黎啦,
又唔係去左唔番... 有冇咁既必要?? 突然覺得好辛苦...
我去讀書喎, 我有自己既目標, 可以寸得起, 咁有乜唔好?
永遠留係佢地既身邊係一件好事咩? 有時放下我出去咪重好...咁先曉長大架麻>.<
細舅父送左部手機俾我,
終於有一部屬於我自己既手機, 唔駛同人share lu.
不過我一直都唔覺得我去重慶會有咁既需要...是但啦, 都好既.
番黎香港都用得呀麻,
咁人地唔駛怕打我手機時會係另一個人聽
聽日走啦,
聽朝之後可能有一排都唔可以upload 野上黎.
希望可以儘快係個邊上到網, 希望重慶個邊唔會ban左台灣網站.
希望我係個邊會一切順利, 希望我既決定無錯~~
5-10-2000
再見!! 輪都輪到我偷下懶啦,
有一排都唔會load野上黎架啦, KPS交俾Karen同Sarah 照顧住先啦...
Sarah 話星期五就會有時間架啦, 係咁啦, 遲D見...
11-10-2000(午睡時間過後)到重慶後第一次打哦
呢幾日超混亂,超忙,
係呢邊太多野同香港都差好遠, 要一時間習慣呢邊既生活好難,
不過我諗都冇問題既, 我揀得我會捱得住既,
但係真係有幾多野係出乎意料之外... 原本話係單人房,依家係四人房,
不過同房都好好人,好照顧我, 可能因為我真係好低能啦,
乜都唔識, 講野都未講得好, 或者住四人房會對我仲好,
不過去洗手間就真係好有問題...-_-..........
本來以為係普通話會有問題,
黎到之後發現聽到人講普通話到巳經好有親切感lu,因為我起碼聽到一大半呀麻,
不過呢度d人都唔講普通話既, 唔係重慶話就係四川話,
有部份老師們都係用呢d語言上堂既,
我諗我五年入面一定會學識聽多兩種方言...係好事黎架,
不過我未識聽之前點算好呢?? 希望快d明白到啦,.. 上堂既時間表係超密, 密到冇時間執野... 不過fine la,
唔駛擔心我, 我會頂得順既, 應該.
生日快樂呀, 青檸妹妹, 雖則我upload到呢日既diary上黎既時候可能巳經過左好多日...
依然唔係好清楚人地寄信俾我應該用乜地址,
因為有兩個版本, 電話線幾時會有亦都係一個謎,
不過巳經有熱水爐啦, Yeah!! 手機都有號碼, 不過好貴喎.... 遲d先啦..
12-10-2000(5:00p.m. sth.)
落雨唔駛上體育課令到本來巳經係最得閒既一日更加悠閒,
好正呀, 如果所謂既"大學生思想道德修養"真係政治既話,
咁星期四以後就會係我最悠閒既weekday 啦^^
尋日下午天氣特然轉涼, 之前幾日仲熱到我死, 依家就凍到死...
重慶既天氣果然強
13-10-2000
尋日打左一半,
章曄係樓下叫我落樓食飯,
之後出去買野買到過左去睇表現既集合時間, 於是乘機唔去,
留係宿舍, 整理D野, call馬老師教我地用熱水爐,
有熱水沖涼太好啦, 而且問左星期四既夜晚果然係上政治堂.
星期四悠閒啦, 不過星期五就成日都有堂.
今日好狼狽,
落雨要擔遮又要拎住一大堆野....因為能力問題不斷咁跌野落地...好"lor">.<...
中午既午睡時間又因為自己既失誤要趕功課,
仲要麻煩高露同田娟幫我... 都算係請槍, 不過冇辦法啦...夜晚又搞錯時間遲左到,
不過冇所謂啦, 咁多人佢都唔得閒理架啦.
住宿舍真原來真係幾好玩架喎,
對面男生宿舍既人鬼死咁得閒, 冇事做就係度對住我地D邊係度嘈,
章曄上次作左些許回應, 結果係引黎個邊極大既回響.
今晚跟佢地去食堂舞廳玩, 睇住有D人跳舞既樣真係好搞笑,
笑到我胃痛^^
22-10-2000
建築果然係一科讀死人既科目...忙死,
功課多, 時間表密, 不過好玩, 暫時我都冇後悔,
雖然真係好辛苦. 睡眠不足再加上未能適應重慶既溫度巨變, 又感冒,尋日仲發燒TIM>.<
病既時候果然係最掛住屋企既,
同房再細心關懷亦不及媽媽雙手在額頭上輕撫時既感覺受用,
再聽到媽媽打黎既電話, 眼淚好唔聽話,
係眼角度走左兩滴出黎, 冇鬼用, 正笨蛋!!
今日絕對係可憐既一日!!
成日都冇水!!! 我要水呀~~~我唔要等到聽日六點.....
我要電話線! 我要係宿舍上網,唔要網吧! 我要ICQ, 唔要OICQ!!
24-10-2000
尋日夜晚第一次去重慶既醫院,
不過睇病既唔係我, 同房既周筠跌親, 剷起左半片腳甲,
因為我地唔係係屋企, 始終都係小心d好,
所以我地就打的送佢去醫院.
去到醫院後果然如章曄所講咁要成塊指甲起左佢,
因為我最怕見到d咁既野, 所以就係外面等,
田娟同章曄陪周筠入"手術室",
一個人坐係外面聽到周筠既喊聲, 感覺好陰森, coz'
呢度既醫院夜晚係冇人架. 唔似香港咁"熱鬧"(咁形容好似有d怪...)
我地既619號房既物資越黎越豐富啦.
尋晚佢地煮麵同米糟湯圓食. 今日又食左章曄幫我整既lunch--牛奶窩蛋.
我地既宿舍太有家既感覺啦, 有電腦可以睇VCD, 有熱水沖涼,
有熱水壺煲水飲(雖然拎左去維修), 有飯煲仔煮既食,
有大量既公仔麵儲備, 有掛牆鐘, 有鞋架(入房要換拖鞋),
或者你可能覺得係咁咋麻, 有幾豐富呀?
但係如果你知道全間學校可以有熱水沖涼既學生宿舍應該只此一間既時候,
你就會明白我地的而且確係好豐盛架,因為我地房四個人都係有少少特殊背景,
有"後台"架.可惜冇乜位放洗衣機, 要自己手洗,
又唔夠力擰乾d衫喎, 每日都要花上唔少時間同d衫搏鬥,
如果唔係d衫有排都唔乾...又未有電話線. 好耐冇玩icq 啦.
好耐冇見我既好網頁啦. 好掛住佢呀!! 我要上網呀... >.<
今日我決定要走堂... 上過朱Sir既Comp,
我發現我實在接受唔到呢度上電腦堂既情形(特別係practical)...
好懷念以前朱Sir既C.A.堂
27-10-2000
全身肌肉酸痛... 天呀,
以後每個星期五都係咁既, 咁我仲得掂既?
尋日上體育堂跑八完百米, 學完立定跳遠,
今日起身之後簡直覺得想死. 痛到每一個動作, 每一個笑聲,
咳聲既背後都係痛楚... 我諗我體育係無可能合格.
佢地個個都係受過多年既八百米訓練, 每年考立定跳遠.
但係我咁多年係第一次跑完八百米,
跑得完對於我巳經係一大突破, 立定跳遠就更好笑.
讀大一仲要個老師慢慢咁一個個動作教我...唉... 點 pass 呀??
前幾日去網吧,
本來諗住就咁開下個 guestbook 睇下(唔知點解,呢邊既電腦硬係開唔到geocities既page,
搞到我居然開唔到自己既網頁>.<), 點知個 page 開唔到,
個電腦又睇唔到繁體字喎, 想去 Batis 同 Leo 既網頁睇下,
又只係睇到一堆亂碼... 對住個部電腦既感覺簡直係欲哭無淚.
後來個老闆見到我咁慘, 馬上專門為我裝左個正統既 ICQ.
雖則係98 version, 但係都好過冇呀, 好感動呀...
不過對住好多亂碼 info ( include 自己個個)... 再一次感到無奈.
我幾時先可以好似以前咁上網上到咁爽?? 幾時先有電話線??
幾時先可以再同個我既 friend 暢快咁談天說地??
我真係好掛住你地呀!! 又要等到幾時先可以到我可愛既 KPS??
要咩時候先可以 load到呢段野上去??
我有好多野想知,
要上網先搵到答案架... 我想知到底 Sarah 同 Karen 有冇乖乖地 update
下 KPS, 定係如 Selina 所講, 我走咁耐都冇人 update 過?? 我想知 Batis
最近點, 發生左咩事令到你決定唔再打你既所謂日記, 唔開心?? 我既好 Tartar 既網頁進度如何, photo gallery
有料到未?? Dickson 既 Brain 同 Ivy 最近又點? Kate,
呢兩日有冇開心d? Ada 幫我俾左d相俾 Manley 未?? Karen
點解又咁唔小心病左架?? 青檸妹妹同阿 Mer 最近如何??
你個死仔包有冇好好對我既物品, 有冇好好對待佢地??
係培僑既生活還好嗎?? Sarah 係澳洲既生活又如何??
應該唔會好似我咁激gwar? Cindy 同阿 Per 最近點, Per仲有冇為自己製造煩惱??
又有冇人可以話俾我知 Heidi 點啦? 我真係仲係好擔心佢. Ivy
最近又有番心機讀書未?? 阿 Ling 係澳洲點呀?? Snooky 姐既
part-time 搵成點??
Leo 既 Account 讀成點?? 真係好多好多野想知...
亦都有好多好多野想話俾你地知, 但係而家咁, 打完都冇用啦,
點 load 上去??
29-10-2000
終於有電話線啦,
不過由於我個條係另外申請, 專門上網用既, 所以要另外裝,
換句話講, 即是我依家仲未可以係宿舍上網, 仲未可以玩 icq...
>.<
尋日走左去網吧上網,
好辛苦先開到個 guestbook, 見到個 guestbook上有幾個留言,
想回應一下, 順便留個 message 俾大家, 點知 only 回到一個,
跟住連續打左幾個都放唔上去... 之後等左好耐, 終於download左個
icq,
又 register 唔到, 用盡辦法開左 geocities既 page, 想 load 既上去,
擺左隻 A disk 入去, 發現部腦根本係冇A drive. 唔單止開唔到A
disk 既野, 連隻disk 都拎唔番出黎...>.< 要今日下午再去拎,
個老闆講左一大堆野, 我諗佢係鬧緊我,
不過我根本唔知佢講乜, 所以冇理佢.
我決定以後都唔會一個人去網吧...
31-10-2000
差d唔記得左今日係Halloween.
以前係Paul's Sec. 係唔會唔記得呢一日架, 因為係Paul's Sec.
入面既Halloween真係有好多好多糖食架, 仲記得F.4
個年番到學校先記得, 結果Lunch Time 同 Ada兩個顛婆匆匆忙忙咁係學校食完lunch後同Miranda衝出學校去超市買糖食(因為學校貴,選擇少),
趕頭趕命咁買左一大堆有排都食唔完既糖. 然後係Reading Scheme(一段最適合用黎訓覺,
抄功課, 為Tests作最後衝刺既無聊時間, 係Paul's Sec.
讀過既人就會明白呢段時間既"意義")分贓, 請人食,
雖則咁係比較無聊, 不過真係好過癮架, 唔係因為d糖好食,
純粹係應下節, 貪得意. 係呢一日部份班房既Teacher Desk
會多左一堆糖要黎請人食, 上面會寫 "Trick or Treat"
咁上下既野. 今年Paul's Sec. 仲有冇呢樣野我就唔知,
不過我淨係知道重慶呢度係唔興呢樣野,
最起碼冇人同我提過有關既野, 好懷念Paul's Sec. 既 Halloween^^,
好懷念個種氣氛, 個種感覺. Happy Halloween呀!!^^
上星期日又發燒啦,
我諗除左好細既時候試過一個星期燒一次之外,
都未試過燒得咁頻密, 不過今次好低燒jei.
而且有飯煲仔煲粥食, 再者之前巳經試過一次,
今次冇再好似上次咁咁冇用, 無再流眼淚lu^^
By the way,
買左張可以上網既電話卡,
等個電話冇咁忙既時候試下用唔用到先^^
如果用到既話咁就好啦, 不過呢幾日又要趕圖, 都未必有時間^^;