新生活
舊生活~~ 9月
10月 11月
12月
2月
3月 4月
5月 6月
7月 8月
1-1-2001(凌晨)
呢度d人真係好瘋狂,
一到十二點鐘, 出面既人就起哄, 大嗌只係碎料, 掟水彈,
用電筒照其他宿舍, 甚至放火燒野(紙, 煙花等)掟落街, 好high,
不過燒野就似乎變態左d lor....
我同章曄亦趁熱鬧掟左兩個水袋回敬樓下某層宿舍男生既電筒...
新既一年, 幫diary換一個新既版面,其實新既生活係十月開始已經過緊,
只希望新既一年對生活會有新既感受.. 希望我會慢慢成長,
學曉控制自己情緒, 學曉獨立, 唔需要依賴身邊既人^^
亦希望身邊既朋友新既一年過得開開心心!!
新年快樂~~~
2-1-2001
第一次通頂... 冇乜感覺,
不過做模型真係好難..... 切一面牆都用左我幾個鐘.... d幾日睇怕都冇得休息lu....
唯有等下星期一考完畫法幾何先啦...反正數學肥硬,
英文我又冇耐性去溫既..
3-1-2001
加油加油, 努力努力,
做完個模型就搞掂啦, 又唔駛指望高分喎... d男同學們太叻啦,
做模型d家野, 我真係唔夠佢地黎... 今次想唔認女仔係d方面唔夠男仔黎都唔得lu....
唯有寄望下次.
一首"交大無帥哥",
簡直正呀, 下次改做"重大無帥哥"黎唱.^0^
5-1-2001
終於交左模型啦!!
都唔算太醜樣啦, 過得去咁, 雖然比起同學們個d驚世之作,
我既製成品真係唔係好掂, 但係巳經好滿足啦, 睇住自己捱左n咁多晚夜,
通左兩次頂做出黎既模型, 真係幾有成就感~.~
下一個難題係點樣拎佢番香港呢... 輕就夠輕... 但係咁巨型,
真係唔係幾好拎...
6-1-2001
交完模型後...
簡直係好似有昏睡症咁... 兩點幾訓到九點, 連堂都冇上,
然後到左今日清晨五點又訓過, 訓到下午四點幾.....-_-"
唔係好正常tim...
7-1-2001
訓完兩日之後,
今日係活於頹廢中, 聽日考畫幾, 今晚仲走去機舖玩"photo
hunt"(找不同既遊戲, 個名好似係咁, 都唔係好記得),
仲有買左一堆牛肉乾&四包火鍋料準備黎做手信,
不過似乎就唔係好夠.... 執完野之後,
睇下點先再決定買唔買啦. 死啦, 諗諗下好似咁多野拎咁既>.<
聽日畫幾唔知難唔難呢, 希望順利pass 啦, coz' fail 既quota要留俾Maths.
一定唔可以肥多過一科架.
8-1-2001
畫幾能合格嗎??? 好懷疑...
不過船到橋頭自然直.... 合唔合格都已經係事實, 諗多無謂,
睇完報紙訓一下先溫書. 尋晚訓得勁差, 同無訓都冇分別....
9-1-2001
shxt... 居然十幾題數學都記唔住..
如果背得晒, 今日可能pass 到... 而家可能得四十幾五十分....
補考冇貼士既話... 分分鐘鐘考得仲差. 點解又要作感冒?!
11-1-2001
實在想像唔到點解會有咁多野拎....
尋晚最後一次拎個背囊上磅, 已經有接近廿八磅...
之後再塞左d野入去... 睇怕都有三十磅, 雖則話唔係三十斤,
但係已經好係野... 仲有部notebook, 圖筒 and 模型,
突然間覺得自己好強... 咁都揹得起. Last night,
仲要將差唔多所有既野塞入衣櫃....
佢地話唔鎖好會俾人偷架喎...我地宿舍一向物資豐盛,
咁樣一搞淨係pack 野都忙死我地...微波爐, 熱水壺, 電腦.......
一年兩次..... 唉...算啦.... 下次再算啦. 總之,
一陣就可以番屋企, 畫幾又pass 左.... 值得開心既...
12-1-2001
尋日九點幾番到香港第一個感覺係覺得好光,
光到有d耀眼, 習慣左重慶夜晚既"昏暗",
番到黎反而有少少覺得霓虹燈刺眼.
基本上番到黎好都未好好休息, 但係好開心,
番黎食完飯後打左電話俾婆婆, 沖左個好舒服好舒服既涼,
著番條短褲, 雖然比較涼快左少少,
但係好耐未試過可以著咁少衫, 感覺好爽.
執完野後打左電話俾阿Ling, 講左好耐. 好耐冇同佢傾電話,
講到少少停唔到...
今日本來話去培橋接青檸妹妹放學,
然後一齊去唱k... 不過訓過左鐘,
同阿媽食完麥記早餐後行緊上去時, 俾佢打電話黎鬧tim=p
去緊唱k之前, Nora打電話搵佢問佢去唔去唱k喎,
結果就變左四個人去啦, 估唔到, 返黎之後除左d街坊同屋企人外,
第一個見既居然係Nora, 佢仲要唔知我已經去左重慶番黎......
勁搞笑, 唱完k後同青檸妹妹 & 珊去買衫, 買sim卡,
番到屋企都已經六點, 食完飯之後, Ms Fan 就黎幫青檸妹妹補習,
我就打電話報到. Karen媽咪太厲害啦, 居然認得我把聲喎,
然後打左俾per, cindy, ada. 其他都懶得打lu, 反正per and Cindy
話叫成班人星期日黎我屋企, 話佢地會搵人, 唔駛我操勞既,
咁我就偷偷懶啦.
呢兩日番到黎最開心既莫過於係俾人話我瘦左,
但係點解要話我好似矮左喎.... 不過點都好啦,
反正我而家居然可以著得落青檸妹妹既褲,
下次番黎我咩衫都唔駛帶, 返黎著佢既咪得lor.... 呵呵呵.
13-1-2001
尋晚同青檸妹妹係度睇人地既網頁,
睇到好夜好夜, 噢... 應該話好早, 已經係今朝既四點幾,
中午起身後就去左抽血, 終於有機會知道自己係咩血型,
一直我都好怕打針, 所以死都唔肯走去驗,
今次如果唔係唔可以唔打肝炎針, 我諗... 我都唔肯去=p
呵^0^, Sarah幾時update 左佢個part我都唔tim.
之前都only click 入guestbook睇, 同埋入pchome度upload,
都好耐冇去過kps度, 唔係Karen下午同我講既, Sarah靜雞雞update
左, 我都唔知tim, 想唔話自己豬都唔得lu=^^=
16-1-2001
再一次證明我好失魂,
明明將部電話放左落個超大衫袋度, 仲周圍搵佢,
結果就係彎低身既時候跌左佢落地,
第一個反應仲要係諗佢係邊度飛出黎,過左一陣先反應過黎--部機之前係俾我放左係衫袋.......
都算好彩既淨係個mon出左問題, 睇唔清d字.
不過我呢個超白痴將個d保用卡帶左過重慶... 而家點好??
雖然阿正話識整, 不過要麻煩佢好似又唔係幾好,
上次睇戲又係佢請, 我都未請番佢. 唉... 點解我會咁"論盡"...>.<
成日都係咁.
不過除左跌壞左部mobile外,
尋日都算係好日既, 剪完頭髮先後同表姐, 阿ling去行街,
番黎其實幾怕阿爸會話我個頭剪得太過男仔架, 不過fine la,
個個都話剪得幾好, Esther果然厲害. 好耐冇見阿ling,
見到佢好開心. ^^夜晚online又見到阿正同Sarah喎, 好耐冇同Sarah傾偈,
勁開心, 本來我都諗住訓架啦, 點知見到佢online,
就傾到成三點幾, 佢又send左張相俾我喎, 依然係靚女一個,
如果而家真係再肥d既, 應該會仲靚tim ar^^
本來Karen話今日陪我番Paul Sec.
拎番張cert. 不過結果佢又有事都係自己一個人番去,
都唔可以話一個人既, 我搵左Cecilia先番去. 本來諗住搵d比較好既老師們傾幾句,
不過既然佢地都咁忙, 算啦, 對住個馬場吹左陣風就走lu.
本來我都唔係太過眷戀Paul Sec. 既. 不過番到屋企後都頗無聊,
打左陣機都覺得悶, 咪同阿媽出去行lor. 同埋阿妹買左兩件衫,
七點走去打肝炎針, 還好唔算好痛, 不過我真係好怕打針-_-"半年後又要再打喎...
討厭.... 希望聽日唔會發燒啦.
原來我O型血架喎, 咁係咪如Sarah個profile
所講, 我亦都應該係一個樂於助人既人呀?
17-1-2001 (11:00am)
好痛, 完全唔想郁隻手臂
17-1-2001
好耐冇打Squash la, 好爽^^ (註:可以打squash並唔代表隻手唔痛,
到而家都仲係好痛>.<) 本來諗住今晚download個icq2000俾部可愛既laptop,
點知居然一而再, 再而三咁出現問題. 算數, 下次再黎過.
今日都算幾好啦, 本來一直好擔心Wendy唔知係咪唔係幾開心,
唔係好想同我講野咁, 證實左不過係我太多心... 不過"多心"一向都係女性既本質,
我.... 雖然性格有時男仔頭d, 偶然會癲d, 好似好有個性咁(有人係咁話我架),
但係始終都係一個普通既女仔, 係會犯下d咁既毛病架啦.
唔, 之前做錯野, 講錯左野,
無論當事人介唔介意都好, 我都要係度講句"對唔住",
我無意架, 下次我會好小心, 唔會咁大意, 乜都衝口而出架啦.
Sorry!!
19-1-2001
嘩, Karen真係留左份聖誕禮物俾我喎,
而且仲整左紅豆糕俾我食呀, 好好味^^ 除左Karen黎探我,
尋日我仲去左文武廟還神.
發現左原來我係重慶個邊除左習慣個邊唔似香港咁燈火燦爛既晚上之外,
亦習慣左個邊比較通爽既空氣, 番到黎平時都冇乜點既,
不過落到地鐵站, 果種焗促既感覺簡直令人想窒息,
好耐都冇試過果種頭痛兼想嘔既感覺...
如果唔係之前已經買左飛睇"煙雨紅船",
我真係唔係好想再出街. 坦白講, 齣"煙雨紅船"唔係話特別好睇,
雖然都唔係差, 不過都幾普通者, 劇本冇乜特別, 再者陳寶珠做既角色同上次佢做"劍雪浮生"入面做任劍輝時既感覺基本上都冇分別既,
反而廖啟智真係好好戲, 將角色演得勁正,
梁家輝同劉嘉玲亦將佢地既角色既性格既感覺做到出黎.
今日終於食左Peach Pie,
但係真係好食得咁緊要咩? 愛華姐姐同青檸妹妹都話一定要試,
得我仲以為真係好食成咁, 雖然真係幾好味...
不過比起佢地所形容既就差d. 下午, Kate過黎我屋企玩, 所以Ada打電話叫我去唱k我都冇去到,
番左黎咁耐都仲未見過Ada, 其實都好想見下佢, 鬼叫佢最後果刻先問我呀, 雖然我話過好得閒, 可以隨時搵我,
都唔駛真係到最尾最尾果刻先call 我掛,
早一晚話俾我知唔得架咩?
之前我仲答應過Ronnie兄一定會抽時間去幫Ada裝部webcam,
我開始有少少懷疑佢會唔會有時間俾我去幫佢install webcam~~
終於download左icq2000,
但係一向都傻下傻下既我又犯左嚴重錯誤, 唔記得左backup下個list.
又要再搵番d人, 不過我諗搵唔番就算lor....
既然佢地都唔會同我講野, 有冇係個list度都唔再重要啦.
不過又要麻煩人一而再再而三咁authorize我就比較..... 唉...
希望你地唔會嫌我煩啦.
21-1-2001
本來今日同阿ling, Snooky姐&丁去飲茶行街街都幾開心,
雖然陪佢地睇既係勁lady既衫, 一d都唔岩我style, 所以都幾悶,
不過難得同佢地一齊, 所以無聊d都無乜所謂. 不過夜晚就慘啦,
去公公屋企食飯時都好地地, 細舅父仲話幫我拎部mobile去整,
因為佢識d舖喎, 咁我就唔駛麻煩阿正啦. 點知番到屋企, 為左d小事,
阿妹同阿爸阿媽炒大鑊. 我唔知我可以講咩lor,
其實大家都唔係好岩, 我真係唔知可以做到d咩,
我之前三個月唔係屋企, 番到黎, 佢地一日最起碼有一次磨擦,
我唔敢想像我唔係度既時候會係點,
但係我咁耐先可以番一次屋企, 我淨係想可以安靜些少,
唔好搞到咁, 人總係有心情唔靚既時候架啦, 我都有架.
但係可以忍既咪忍下lor, 點解一定要搞到咁大件事喎?
我努力改緊我既臭脾氣,
但係同時卻發現我屋企人既脾氣個個都係越黎越差....
爆粗其實冇咩野, 但係能做到收放自如會比較好lor,
我都經常爆粗架啦, 但係都要睇情況, 睇對住咩人架,
唔係話永遠都係自己想點就點, 世界就係咁,
好多野都唔係話到自己揀. 有得揀既話,
我都想可以留係香港讀Archi. 不過事實唔係咁呀麻,
要係呢個世界生存, 就應該學曉適應呢個世界
22-1-2001
細舅父識既舖頭話部電話如果依家拎去整,
唔到二月四五號都拎唔番黎喎, 睇黎想唔麻煩阿正都唔得lu...
23-1-2001
番黎咁耐, 終於見到Ada啦, Ada,
Cindy同我--- form4, form 5既三人行組合係伊館打左兩個鐘既羽毛球,
本來諗住可以搵到好多人去架麻, 點知又會得我地三個咁少既,
早知係咁就唔book 咁耐啦. 睇黎我地三個都仲係冇變,
一樣咁傻, 死人Ada經常無緣無故係度唔知笑d乜,
搞到我又跟埋佢笑, 仲要係笑到企都企唔穩果種, Cindy就依然講大話唔眨眼,
講笑都講得咁認真, 不過都唔係第一日識佢,
仲點會咁易信佢講野喎, 哈哈哈. 不過三個月,
唔係所有野都冇變, 最起碼約人難左好多,
以前我地十幾個人好似比較有共識, 有人提議左話去邊,
之後就好少會有其他提議, 只要搞掂d時間就冇乜大問題.
但係今次大家既意見似乎有d分化, 個個都唔同意見咁滯,
搞到我都唔知點好, 其實如果俾我揀既, 我又要學踩單車,
又要去燒野食, 又要去行山, 又要去打波, 最好日日都有得玩.
不過冇乜可能呀, 個個都咁忙. 我都話過架啦,
上次石澳燒野食, 好有可能係最後一次可以搵到咁多人架麻,
又唔信我講, 終於明白點解上次Heidi唔去我咁不滿啦?!
其實上次係Heidi 自己提議去BBQ, 點知咁難得我搵齊咁多人,
佢自己居然又唔去... 不過算啦,都過左去, 搵唔齊人都無辦法.
無乜所謂. 係有少少遺憾咁lor, 不過或者過多幾年,
大家都會忘記左我地曾經咁樣一齊玩過,
然後忘記曾經有過既遺憾........
噢, 拉遠左話題tim,
到底點約好呀? 不如咁啦, 搵幾位好鐘意踩單車,而且一直暗地裏埋怨我唔識踩單車又唔肯學而間接累佢地冇得去既人去陪我學,
然後睇下有邊位願意成全Heidi去燒燒野,
邊幾位唔想太浪費時間既, only打算食食lunch, or
去我屋企無無聊聊咁坐下, 邊個想搞搞新意思去行行山,
同我講聲, 我奉陪到底啦, 好唔好? 反正係玩, 我頂得順,
但係你地d 思想比以前複雜左咁多, 大家既timetable又散喎,
我諗我無冇能力可以好似以前咁約齊咁多人啦. 邊個得閒,
邊個有聊咪邊個去, 唔駛下下搵齊人啦, 等到搵齊人個日,
我諗等到我地死左, 都未必等到, 就到時間, 又未必夾岩地點,
就算有天時地利, 又未必有人和, 點知幾時又有人心病發作喎,
so我諗我以後都可能會放棄嘗試搵齊人聚舊, 請原諒..........
24-1-2001(6:00a.m.)
剛剛去完花市番黎,
今年既花市同以前一樣, 都係冇乜特別, 不過係因為肚餓,
想落街買野食, 所以都順便行下.
今年天后個邊比上年少左野食買,
唔知係咪因為今年我同阿妹比上年遲左一個鐘先出黎呢,
剛剛買左雞蛋仔同碗仔翅食, 但係唔係咁好食lor,
碗碗仔翅都冇粉絲既, 用麵都有既, 不過肚餓, 冇辦法啦. 樓下d車今日泊得勁有型,
泊正係路中心, 一排過, 好鬼可愛^^ 食完碗仔翅就去訓啦,
訓醒先去拜年.
24-1-2001
年初一都係例行公事,
先去阿爺屋企, 然後去表舅父屋企, 之後就去公公婆婆度,
不過今年夜晚就仲去睇左"麗花皇宮"tim.
因為本來都抱住係去聽歌既心去睇,
所以演技好唔好都唔係太介意, 不過肥肥就真係好搞笑,
居然可以咁大聲咁嗌左葉麗儀既名出黎, 咁都有既?! 好想睇"愛情觀自在",
恨左好耐啦, 雖然唔係on stage, movie都好過冇得睇呀,
不過要等到2 月15號先正式上映,
如果要係走之前睇就一定要去藝術中心睇優先場, d時間又有少少咩喎,
唉~~呢d算唔算係我要為任性所付出既代價之一呢?
25-1-2001
預我所料,
無所事事咁又過左一日, 既然冇乜好寫,
容許我係呢度講講我對每年年初二煙花的評價,
其實我要去睇煙花好方便架, 唔駛出去同人逼,
我屋企樓下就有得睇既, 好多時年初二都會有人黎我屋企食飯,
之後就落樓睇煙花咁. 有唔少人都覺得我住呢度幾好架,
去睇煙花方便呀麻, 不過係呢頭住左十幾年,
可能想睇既話實在太方便, 所以我唔係好識珍惜呢個優點,
好少真係有mood落樓睇既, 我只覺得煙花匯演係製造緊噪音,
製造緊空氣污染, 放煙花既時候, 就算我關晒屋企既窗,
我都可以清清楚楚聽到個d震耳欲聾既聲音, 誇張點來講,
簡直係feel到d窗既震動. 然後每次放煙花之後好一段時間,
係屋企望出窗外面都係煙霧彌漫,
基本上放煙花對於我屋企黎講, 其實都幾擾民,
不過對於好多人黎講, 睇煙花係一個好好既慶祝活動黎既.
只不過住係可以好放便咁睇到煙花既地方既人其實未必如其他人眼中般幸福.
住得近年宵市場其實都係咁, 雖然因為住得近既關係,
我可以隨心所欲想幾時去都得, 凌晨四點幾六點都好方便,
不過都為我製造左唔少麻煩架,
最起碼落銅鑼灣我就要另外搵另一條路啦,
所以話世事邊有咁完美呀, 開唔開心,
幸唔幸福其實係睇你自己點睇.
26-1-2001
有少少怒意,
甚至有點想哭的感覺, 我希望可以處之泰然,
不過實在有點按捺不住, 是誰說把27日留給我?
現在卻沒有一個能兌現當日的承諾. 是誰說難得我回來,
gathering的事不用我操心? 現在卻是為我徒添麻煩. 早知如此,
我應該不改我的作風, 用我一貫不講道理,
刁蠻任性的態度去作決定, 不管你們的意願是否最好的方法?
想盡可能令大家都滿意, 然而大家各懷心事,
不直接說出自己的想法, 卻要我這個做甚麼都沒關係,
每天都空閒的去猜你們甚麼時候有空, 猜你們到底想怎樣.
實在累了, 我不想再玩這猜謎遊戲....
27-1-2001
勉強叫做識踩單車啦,
希望真係學左之後唔會再忘記.
Non-JUPAS?? 有可能嗎? 可以考慮嗎??
再次迷惑, 如果當初我選擇城大既finance, 我便不用再次受困擾,
不過卻沒有可能讀建築, 如果不能修讀建築, 那又會如何呢?
我只會說至今我都沒有後悔選擇建築系, 只是過了三個月,
發現我失去了不少本來該是屬於我的東西........但是也學會了不少吧
28-1-2001
頗無聊的一天,
打算繼續學騎單車, 卻因下雨而變成遊車河,
去元朗食涼粉同老婆餅.
29-1-2001
好Yeah呀, 晨早去大尾篤燒野食當早餐,
踩單車.
原來踩住架單車,
任由d風吹向自己.
果種感覺好舒服~~不過條路冇人先係咋,
皆因我而家係處於見人(車)就剷埋去既狀況.
所以願主保祐你地係我未完全掌握踩單車技術前唔好見到踩緊單車既我!!
29-1-2001(10:30p.m.)
最新消息,
高數如我所料五十多分, 差六分方能合格.
幹麼不給多六分給我, 就看在我是唯一一個"留學生"的份上,
多給六分也沒什麼關係吧,
反正在國內走後門根本不是什麼稀奇事. 算吧,
反正早幾天回去也好, 在香港也沒有什麼特別的事,
早點回去有娟她們陪我可能更好玩
30-1-2001
有需要報Non-JUPAS嗎??
其實在重慶真的過得挺開心, 學了不少在香港我學不會的東西,
有並非一般香港人有的生活體驗, 或許我根本無需要想這麼多,
反正申請了也多半不會被錄取, 不過我實在不得不想清想楚...
因為申請的話免不了要驚動到重慶那裏的人, 這是我不想做的......
31-1-2001
今天一整天都是在逛街,
收獲總算不錯吧, 必要買的都買了. 最爽的是去了宜家家俬,
最喜歡到那裡逛的感覺, 像在家那般, 很舒服~~