私人重地,
非請勿進!!
9月
想睇我十月既diary?
12月 1月
2月 3月
4月 5月
6月 7月
8月
4-11-2000
用電話卡上網原來係一門好高深既學問黎架.
試左好耐都未得, 不過都預左架啦. 唉...
呢幾日趕圖搞到唔夠訓, 虛火盛以致牙肉腫痛(但係結果到係交唔到貨=p),
講普通話講到更加唔清唔楚, 買野都唔係好敢一個人去,
不過最慘都係d痛楚程度達到可以令我半夜痛到扎醒,
痛到唔想食野, d牙好似要甩晒出黎咁., 好痛苦>.<
而且我仲要好失敗咁洗衫洗到整損隻手...都怪自己將d衫堆積左咁多日先洗,
一洗要洗成堆衫, 咁洗法唔卒到手損就奇啦 >.<
都係要每日洗先得
星期三下午,
同房煮左一餐好豐盛既晚餐, 有薯仔炆豬肉, 涼拌皮蛋&青瓜,
番茄蛋花湯, 最重要既係有白雪雪既米飯食,
我黎到重慶咁耐第一次食到白色既飯咋^^ 好正斗呀
尋日去網吧, 發現我既好契妹既網頁面世啦,
好靚架, 得閒去睇下啦^^. Kanae呀, 你既page越整越靚啦, 咁有style,
我地既kps 顯得有d相形見拙tim^^ Anyway, 大家一齊努力啦,
不過要等到我諗到辦法用自己部 laptop 上網先掂...唔知仲要等幾耐呢?
申請既時候佢地話過兩個星期就得, 而家巳經踏入第三個星期~~
我就黎想爆粗架啦-_-
7-11-2000
呵=^^=. 星期日終於可以用到Dorm既電腦上網啦,
又可以再見到我可愛既icq. 雖然見到好多我好掛住既人online,
不過係一片混亂中到無機會同佢地傾.
混亂過後依然係一片混亂, 忙於幫同房查看佢地既oicq, email and
etc etc. 然後係忙於用webcam影相, send 俾青檸妹妹. 連Geocities個度到底點回事都冇時間研究....>.<
我地既KPS點算呀? 想睇下我成個月冇睇既新聞又冇時間喎.
不過既然可以係dorm 上網, 遲早都做到既. 呵呵呵^0^
尋日Per 生日,
諗住用電話卡係宿舍打個電話過去,
點知駁黎駁去都駁唔到電話卡條線. 惟有用mobile 打,
就咁打左幾十蚊>.< 先講得個一陣間... 貴死啦, 不過算啦,
你生日呀麻, 不過唔洗旨意我會買生日禮物俾你啦. d錢全部都用黎打電話lu
^^;
今晚同宿舍既人出去時買左個微波爐,
加上尋日高露搬黎既電視, 依家只差部洗衣機, 冷氣機 &
小雪櫃. 咁我地既宿舍就... 呵呵呵^0^ 聽日要努力畫圖,
加油!!!
14-11-2000
好耐無打diary啦, 可以上網之後,
一有時間就走上去睇下, 不過一部電腦四個人用,
要做既野太多, 都仲未有時間搞掂個網頁. 呢幾日夜晚停電,
每次停電後, 我地就用我部可愛既laptop上網, 用到無電為止,
所以當其他宿舍既人因停電而被迫早訓既時候,
我地既房可以繼續玩^^ 不過上次上到去後都冇乜人lu.
呢幾日好凍好凍, 再凍落去,
我實凍死>.< 香港個邊一定仲好暖啦,
悉尼依家係夏天更加唔會凍...
不過重慶呢度巳經可以去到五六度.......凍(><) Anyway,
呢幾日一定會搞掂個網頁, 雖則今日deadline交唔到圖,
不過算啦, 反正得個幾個男仔交到咋麻, 交唔到好正常者.
17-11-2000
今日終於交左張圖啦,
本來諗住今晚難得抖下, 可以盡情上網, 點知Internet 卡既 time
quota 又用晒, 我專門申請黎上網既電話線雖然終於通左,
不過賬號又未用得住喎... 冇得上網>< But, somehow
唔駛為趕圖而努力, 爽!!
基本上呢幾日既心情都算係好好.
因為阿媽話俾我知早前Dickson有人打過電話黎問我有冇興趣再去個度做野(可見我既工作能力唔差架).
星期四P.E. 考八百米, 本來預左一定要補考, 點知居然俾我pass到(其實用左四分十一秒,
仲差兩秒先合格架, 不過Miss話見我個樣咁痛苦, 當我合格^^)
其實我跑到最後個一百米既時候巳經虛脫, 隨時躂落地...
係一個巳經考完既同學扯住我跑過去,
根本我巳經連企到企唔穩, 又抖唔到氣. 跑完後,
我抱住個同學, 成個身體都係靠佢支撐住,
伏左係佢度不斷咁喘氣... 我諗我個一刻既面色一定好差好差....
不過下堂唔駛再考, 謝天謝地=) 然後我又upload 番個page 喎.
More, 今日周筠媽媽又將部洗衣機搬左黎喎, 洗乾淨左之後,
我地就唔駛在係再用手洗衫, 唔駛凍到隻手僵晒喇^^
不過下個月我地房既水電費就會更加嚇人,
雖則係我地既預算之內,
不過當發現全楝樓第二至四名既水電費加埋到係俾我地多幾蚊.
然後每次行過交費通告都會聽到:"嘩,
乜呢間房既水電費咁貴既, 係咪打錯呀? 住係個度既係咩人呀?"
之如此類既說話既時候, 我地惟有悄悄咁行開.....
連收費既人都特別留意我地, 章曄去交錢既時候, 佢地話:"你就係個間房架,
你地好出名喎, 好多人好崇拜你地"~~~~
前幾日出去拎番早前拎去晒既相,
原來係不知不覺中, 我既臉真係削左...係一件幾值得開心既事黎架,
不過番到宿舍時發現我擺係門口鞋架既拖鞋唔見左(應該話俾人偷左...)
我只可以話我真係覺得好無奈lor~
18-11-2000
今日下午係勞動既下午, 田娟,
章曄同我三個人幾乎出動全宿舍所有可以用來清潔既工具,
用左一個下午既時間將原本極度污糟兼有d發霉既洗衣機洗到有七成新,
令人好有成就感^^
不過今晚出街時跌左掛係袋仔度既南瓜頭公仔, 唔制>.<
22-11-2000
呢排心情好好,
終於係網上見到好多好多朋友,
感覺有少少似番到以前係香港個種感覺,
不過似乎朋友們最近並非咁如意, 唔係咁開心,
我唔知可以做到d乜, 講d乜可以令你地開心d, 舒服d.
我一向都唔係好識點樣安慰人, 點樣令人開心...
我淨係希望下次再見到你地既時候, 你地淨係有開心既野講,
諗唔到任何令到你地有一丁點兒唔開心既事...
上星期日買左兩隻手錶,
一百五十蚊兩隻, 講唔上係好靚. 不過幾好玩既^^, Devil --
完全岩feel~~
24-11-2000
到底自己係度做緊乜...
前日夜晚明明冇乜做架, 但係咁夜仲留係icq度...
無無聊聊咁搵番一個我唔應該再搵既人傾偈.... 我係咪傻左?!
到底係度做乜....
25-11-2000
今日去左一個叫磁器口既地方度燒烤,
重慶人BBQ既方法同香港既好唔同, 唔用燒烤叉, 而用竹簽拮住d野食黎燒,
無人用蜜糖, 而用各種各樣既調味料, 基本上好似玩鐵板燒咁.
磁器口有幾大我唔係好清楚,
不過據聞呢度係有一個好古色古香既古鎮,
本來佢係我地今次既目的地之一(亦係我好期待去既目的地),
不過後來因為過於疲倦而無去到.
我地去燒烤既地方基本上係一個石灘, 一個好大既鵝卵石灘,
聽聞有水漲既時候(並非一般既水漲,係可以淹沒幾層樓個種,經常會有),
整個石灘都係淹沒係水度. 因此石灘既地係好濕潤,
再加上鵝卵石既圓潤, 路一d都唔好行...
由於該處並無燒烤爐租,
我地用既爐係章曄既同學用鵝卵石砌既, 坐既"凳"既係鵝卵石,
基本上舉目所見既都係鵝卵石...
磁器口既房屋比較舊,
俾人一種好舒服既感覺, 可惜去唔到古鎮, 我諗個度一定仲正.^^
今晚係搞清潔既夜晚, 拖地,
洗衫(起碼洗左三機). 不過最激既到係換床單,
換床單既時候順便搞掂咪床褥套, 點知一搞就翻天覆地...
一大堆灰塵好似落雨咁... 手尾由田娟同章曄搞掂,
我就因為鼻敏感既關係被人趕左出去露台避難...
同時今晚發現我既email account 出現左好大既問題... 希望只係server出左短暫既問題啦...如果唔係...唉...
26-11-2000
今日係零晨五點半訓,
訓到中午點幾先起身. 係刻意咁令到自己訓到點幾先醒,
目的係方便自己詐病, 逃避今日既課外活動---掃墓,
唔好問我掃咩墓, 因為我都唔係好清楚到底係做乜,
只知呢項活動與政治有關. 我唔明白呢樣野, 亦唔想去理解.
但係是項活動既政治成份並非我逃避佢既主因,
主要原因係出席既時候係須要穿著軍裝,
基本上全校既新生都有軍裝因為新生係須要參加為時一個月既軍訓.
但係由於我並冇參加軍訓, 亦都冇呢套衫.
我可以想像到我穿著便服出席今日既活動係會有幾咁礙眼,
我可以想像到全部既老師, 學生對我既指指點點,
雖然我黎得呢度, 預左係會俾人用唔同既眼光黎睇我,
但係要我係明知去到會俾人當怪物咁睇都仍然若無其事咁出席.
我做唔到. 倒不如詐病唔去,
反正係佢地心目中我既健康都係唔係幾好,
第一個月巳經發過兩次燒... 再病下都好正常呀.
27-11-2000
見識到重慶既陰天...
五點未夠, 天巳經黑晒...果真係中國既霧都.
30-11-2000
體育堂考立定跳遠又合格到啦,
雖則要到第三次(即 last chance)先至跳到合格既距離,
但係總算合格, 淨係差最後既實心球, 就算最後呢樣pass 唔到,
overall result 到一定合格^^ 其實我地既體育老師真係好好人架,
跳最後一次之前, 我地totally 仲有三個人未合格,
佢好好人咁話:"今日最後一次, 你地三個邊個合格到,
我就請佢食飯"
結果中午就要老師破費請我地三個以及另外一個同學食飯.
佢真係好nice ^^ 又叫我地得閒去佢屋企玩, 可以去佢個度沖涼,
洗衫. 不過我宿舍乜都有, 都無需要麻煩佢呀.
但係對於其他同學黎講, 呢個真係一個好好既offer, 出去沖涼,
每次要兩蚊, 慳一次就可以食多一餐飯喎.
還好我既體育老師係佢, 如果唔係....