9月 10月 11月 12月 1月 2月 3月 4月 6月 7月 8月
1-5-2001
晨早起身去火車站賣車票, 事情比想像中容易好多, 好快就將四張去西安既車票賣左出去, 蝕左一百三十蚊, 其實應該講下價, 咁可能唔駛蝕咁多, 不過因為當時淨係想快d解決車票, 亦無諗咁多. 之後, 就去解放碑去. 去到時候大概只係八點, d舖頭一般都係十點先開, so食完早餐之後係麥記坐到夠鐘再落大都會, 除左章曄之外, 我地每人買左一對同款唔同色既涼鞋, 木屐人字拖果種, 其實唔慣著d種鞋, 不過有呢對鞋, 上P.E.游水會比較好. 行完街之後去溜冰, 影貼紙相. 然後就去朝天門搭車去武隆-小筠既屋企, 不過因為冇車去既關係, 我地後來係先去涪陵-娟既屋企, 然後再走. 係娟既屋企打麻將, 不過呢邊既麻將玩法有少少唔一樣, 少緊幾隻牌架, 係娟娟屋企食完飯之後, 佢爸爸搵人送我地去武隆, 黎到之後發現呢度幾個鐘之前先有塌山(山泥傾瀉), 將一個招待所壓,住都好大件事, 埋左百幾人, 唔佑救得番幾多個呢?武隆係一個小地方, 基本上成個地方好似就係得一條路咁, 好可愛既一個地方, 感覺好好, 而且係某程度上... 唔知點解呢. 感覺好有上環果一帶既feeling. 好正^^
小筠屋企同娟娟屋企都好大, 去過我屋企既應該都對我屋企既客廳印象深刻, 知道我屋企既廳有幾咁大, 而佢地屋企既客廳簡直係有過之而無不及, 另加比例正確, 其他房既Size都係好大. Can you imagine???
最近突然有個諗法, 假如有一日我可以好sure咁話俾自己聽我鍾意左一個人既時候, 我諗就係我停止load野上黎既時候.... 就算load.. 可能都會過濾左先load...
2-5-2001
今日去左芺蓉深洞, 玩速滑, 所謂既滑, 就係係兩座山之間吊左幾條大鋼纜, 從鋼纜上坐住用帆布做既好似兜兜咁既野, 滑過去, 兩隻腳半空吊, 睇落都幾恐怖, 之前都幾驚架... 不過開始之後發現原來感覺係好爽架, 好涼, 好舒服, 一d都唔恐怖, 連眼睛都唔駛合,埋就咁係半空之中, 睜大眼眼望住下面既芺蓉江, 望望附近既景, 真係好鬼爽, 好好玩, 簡真係一大享受, 不過都幾貴下, 之後仲一試俾人抬既滋味, 坐轎(唔係大紅花轎果種), 係有張椅, 由兩支竹支撐, 前後各一個人抬困,種左搖右擺, 好得意, 不過我覺得俾人抬都冇之前吊係半空咁有安全感...
芺蓉洞其實係鐘乳石洞, 入面好,大好,靚可能我同佢地唔同啦, 見識少, 我覺得入都幾正呀, 但係佢地就一直係度問人有冇捷徑可以快d出洞, 雖然真係幾攰, 但係唔至於咁誇張卦...
3-5-2001
玩完速滑, 今日玩漂流, 坐橡皮艇遊江(芺蓉江??? 唔清楚), 勉强算係激流果類野, 不過唔夠激, 幾好玩,搞到成身濕晒,係濕透困,種連最入面既都濕透, 好彩之前買左短褲換, plus今日唔係著白Tee&係著涼鞋去, 如果唔係就真係=p. 果度d風景好靚, 係好天然既大自然風景, 好舒服架, d水又清, 勁正,好過癮, 可惜因為唔方便帶相機既關係, 冇辦法影相, 下次番香港要買一個防水袋, 以備不時之需.... 好想今日就番宿舍, 因為三點幾四點番去小筠屋企已經係冇野做, 幾無聊下, 而且又無衫換, 不過... 要聽日先番到去lu, 越黎越擔心個model&圖到底搞唔搞得掂......
4-5-2001
覺得浪費左好多時間, 但係唔想掃佢地興... 有時都幾難做, 今日娟娟心情奇差, 其實都唔係今日既事, 好似自從上次話見到佢以前既男朋友, 岩岩新星上黎我宿舍果日開始, 娟d脾氣都唔係咁好... 尋日係oicq度同汪宇講野, 娟知道之後以為佢係新星, 幾嬲咁話要發個message去鬧佢變態, 還好我反應過黎即刻同佢講呢個唔係成都果個同學, 阻止左佢.... 唉... 果種感覺.... 點講呢... 我覺得對其他既成都人太唔公平... 其實我識得既成都人都好好, 我覺得就算娟既前男朋友對佢係幾咁唔好, 都無需要憎晒所有既成都人者, 最起碼新星又無得罪佢d咩, 雖然佢講野係比較口不擇言, 但係份人其實無咩野架, 諗起上次同新星食宵夜時佢話俾我聽佢唔敢打電話黎宿舍搵我, 話怕娟佢地, 所以次次都係打手機搵我... 諗落都搞笑, 佢話係第一次有女仔同佢玩唔埋, 佢又點會諗到真正既原因係咩.... 唉.... 其實聽完佢咁講.... 我都唔敢係娟面前打電話俾佢...
5-5-2001
開工做野, 但係實在冇咩mood, 做得勁慢, 而且做得唔好.....去系館走左趟, 還好都幾多人未做完, 放心少少, 係果度東逛西逛, 其實純粹唔想番去做野, 所以逗留左頗長既一段時間, 同人吹吹水, 之後娟佢地居然上左黎搵我去食pizza...
夜晚新星打手機問我再借"樹葉"用, 其實佢打黎之前幾個鐘我先岩岩拎番d樹葉走, 講好左話我用完之後再借俾佢, 點知後來佢又再打電話黎話係成都番黎時唔見左銀包, 千幾蚊既零用就咁唔見左, 俾阿媽鬧, 聽佢把聲好似好慘咁... 所以收左線之後我就先搞掂棵樹, 再打電話俾佢, 好搞笑, 我問佢佢自己上黎拎定係點, 佢居然先問左我宿舍有咩人係度先, 之後佢上黎拎樹葉時都唔敢入黎, 走左去後樓梯口度傾偈, 之後仲上左天台, 傾左好耐好耐, 佢話俾我知前日係成都巴士站有個鬼佬以為佢係gay, 係度調戲佢lor, 笑死我^0^ hehe.. 雖然佢睇落係有少少咩, 不過唔至於咁誇呀嘛, 居然會俾同性戀老外阿伯睇中, 當街摸佢膊頭, 講埋d咩野(唔記得左問佢到底果個鬼佬同佢講左d咩tim...) 諗落都好笑~~ 係天台傾偈原來好舒服架, 可惜d牆整得好高, 睇唔到風景~~~
6-5-2001
四點訓, 十點起身, 十一點落樓諗住買塊百潔布黎做模型既灌木, 點知樓下既超市居然冇呢樣野賣, 原來諗住偷懶唔出去搵, 諗住問新星有冇泡沬多可以俾我, 條友仔居然岩岩落左樓, 搞到好白痴咁兩個人隔住幾十米拎住部電話係度講野, 佢話d泡沫做出黎既效果好差, 於是結果都係要出學校去買百潔布, 之不過有人陪冇咩所謂啦, 但係踢住對拖行得好辛苦, 幾經辛苦買到要買既野之後, 仲要陪佢到銀行掛失提款卡, 然後我就拉左佢上系館, 本來諗住瀟華會係度, 睇下佢既模型做完未, 點知佢都唔係度既...
下午都幾墮落下, 依然進度奇慢, 完全唔想做啦, 但係唔做又唔得喎, 簡真想死, 今日又唔係好舒服.... 好似有少少腸胃炎既先兆>< 雖然我真係想再瘦多六七斤, 但係應該會有更好既選擇架, 我唔想再好似2000年既第一日咁.....
7-5-2001
又係一個通頂既日子, 不過今次比較好, 訓著既時間好短, 不過中間好長既一段時間係係汪宇房度望天打卦, 睇佢地整模型, 其實係果度都冇咩做, 佢地幾個人一齊係度做模型, 本來係拎塊百潔布落去俾汪宇(suppose 應該佢自己上黎拎lor, 不過佢打電話時佢係話叫黃新星上黎拎, 跟住聽到新星係後面大吵大嚷, 過左一陣汪宇居然話新星叫我落去玩lor, 真係俾佢地搞到哭笑不得), 不過落左去就唔想番上樓畫圖, 而且睇住汪宇同新星都仲係同個模型搏鬥緊, 連圖框都未打, 睇落自己都係比佢地快d, 就更加唔想開工, 於是就坐係果度睇佢地整模型(應該話係汪宇做模型, 新星都唔係係度做野既)同佢地吹水, 三點幾先上番去繼續開工, 八點幾時時候眼睛再次接近崩潰, 諗住落去搵汪宇佢地睇下佢地做左幾多, 順便落去借ｄ眼藥水(之前係佢果度用過, 勁有效, 雖然係一剎間幾痛), 點知佢地都係咁無用, 又話一齊通頂, 結果佢地四點幾就走左去訓, 本來諗住就咁算, 不過後來真係頂唔順, 所以打電話俾新星問佢有冇眼藥水, 可能我把聲真係好似就死咁啦, 佢好好咁話幫我問汪宇借, 不過汪宇宿舍d人仲訓緊, 借唔到, 佢就話叫我一齊落去食早餐, 然後陪我去買眼葯水, 不過我其實完全都唔想食野, 瀉左兩日, 食咩瀉咩.... 所以本來係諗住睇住佢食就算, 點知佢叫左兩隻荷包蛋, 人地用兩隻碗裝過黎, 新星問佢做咩用兩隻碗, 佢仲答兩個人呀嘛咁, 搞到我地哭笑不得, 亦因為咁俾人迫左我食左其中一隻蛋... 之後去買眼葯水時, 佢又好細心咁問埋個葯房老闆肚瀉應該食咩葯, 仲要當正我係妹妹仔咁, 睇完說明書之後千叮萬囑咁叫我記得食葯>< 都成廿歲, 居然俾人當係細路女咁... 係佢有問題定我有問題呢....
下午係天昏地暗, 對住塊圖板, 由係書桌上畫到最後因為腰痛, 而放棄書枱, 就咁坐係小櫈仔上用手&櫈托住塊圖板畫, 畫到後來最後兩個幾鐘, 手已經係不受控制咁不斷地震(原因不明).... 唔知點解我會以為係七點交, 搞掂左之後即刻返系館交圖, 點知返到去先發現唔係好對路, 八點半先收作業, 因為冇野好做, 就趴係自己張枱上番, 等其他人返黎... 九點幾先至交完功課, 之後瀟華要留低打掃, 我諗起宿舍裏既一片混亂, 再加上欠新星一個人情, 所以就主動留低幫佢地手, 等瀟華搞掂之後一齊走, 因為我仲未食飯既關係(其實依然唔想食野, 不過要食葯所以先食咋)就叫瀟華同新星陪我去食d野, 居然係途中見到我地既班頭李敬輝, 陳平鋒同熊小飛, 佢地都係同我一樣之前畫圖畫到連飯到未食, 於是我地結果就變左係六個人一齊食飯, 好搞笑, 本來班頭佢地係諗住去飲酒, 話要搵個開揚d既空間(好明顯做方案做上腦^^") 話不如去食火鍋, 我都未反應過黎, 新星即刻就話我瀉左兩日唔可以食火鍋, 跟住居然先見到咸江同佢女朋友&崔凱同另一個人食飯, 然後再係隔離見到葛貴武, 李博, 李可&..(另一個唔記得左係邊個tim)四個人係度飲酒食飯(不過佢地已經差唔多食完), 原來咁多人都係為圖而癈寢忘餐...跟住我地就搵左個比較開揚既位坐底食飯, 唔知係唔係因為我同瀟華係度既關係所以唔好意思飲酒呢.... 一邊係度食一邊係度吹水, 不過我就食得好少亦講得唔多, 少少有氣冇力..... 不過好開心呀, 感覺好好, 後來差唔多十一點先番去, 如果唔係佢地八舍同九舍十一點關門既, 可能我地仲有排坐^^
番到宿舍後諗住沖完涼做埋功課就訓, 點知章曄佢地話聽日唔可以上網, 於是我就決定先上完網再算, 居然愛華姐姐同媽咪都係度, 成點半先走得甩.... 三點先有得訓..><
8-5-2001
上完英文堂之後自己一個人去重百買左大概一斤牛肉乾寄去廣州俾Wendy連同一封英文堂時寫既一封"信", 勁短兼d字奇醜, 不過隻手實在無力寫, 行出去時亦都係慢慢行出去, 真係一d力都冇, 勁唔掂當. 搞掂之後本來諗住番宿舍即係訓覺, 不過上到床之後發現, 已經去到連訓係度都覺得無力既地步, 需要食野多過訓覺, 於是好難得地自己煮麵同整左個苦瓜炒蛋食, d苦瓜整得好難食><不過小筠都幫我食清光...
下午美術, 可能因為上次用晒我既耐性, 今日完全冇mood畫, 淨係想訓, 所以係揀左一個可以坐得好舒服既位坐, 對住一堆唔知點落筆既野係度隨便畫下, 新星係中途出現左一陣, 同我講話今日到佢肚瀉, 然後仲話俾我聽佢宿舍既老大今日見到我自己一個出學校, 我話俾佢聽我係出左去寄包裹, 佢居然話佢聽佢老大講之後都估到, 話我應該叫埋佢一齊去, 因為佢都要寄野番屋企, cher, 我鬼知佢都要去, 邊個叫佢朝早逃課, 我夠想有人陪我去啦..... 落堂之後番宿舍執野.... 死啦, 仲未搵到筒菲林, 今次慘啦><
9-5-2001
似乎真係唔見左筒菲林.... 點解會咁失敗>< 激死啦
10-5-2001
今日番去評圖, 好好運呀, 咁都有良-, 的確如新星咁講, 陳綱係睇人打分, 佢對我既印象好, 分數先會咁高, 其實佢地好多人既Design比我好, 圖亦唔見得畫得真係咁差, 好似蘇璞咁, 真係唔應該唔合格...至於新星同汪宇佢地圖未畫完整, 淨係得合格都還比較合理( See, 呢d就係講好左話一齊通宵又冇做到, 遺留我一個孤軍作戰既報應啦), 不過補番差左既果一少部份既話, 應該可以加番分. 下次既功課自由度好大, 反而好似好難落到手, 不過呢兩日休息下先啦, 要補番鐘, 如果唔係咁落去真係會頂唔順>< 今日終於收到信, 等到腸穿肚爛.... 係澳洲寄過黎足足一個幾月, 而家仲差Sarah 果封, 好心急呀^^
收到一個消息, 尚未證實, 如果係真既, 應該開心定煩呢??實在太不可思議, 冇乜可能, 應該唔係真卦... 好矛盾tim
11-5-2001
兩年冇落過水, 浸係水入面既感覺真好. 不過呢度d水真係夠晒污糟, 所以始終都係差d, 今年番香港多d游水先, 之前兩年其實係唔敢著泳衣所以都冇去游水, 不過而家瘦番d, 冇咩好怕lu ^^ 見到Sarah online, 又同佢傾左一輪, 好開心呀, 有一個計劃, 只要等Karen 點頭, 我六月十六號之後就開始進行呢個計劃.....
Sigh, 死人黃新星居然破左我玩貪食蛇既紀錄, 仲要專門打電話過黎同我講, 哼, 我一定要再玩得高分過佢~~
12-5-2001
本來諗住尋晚早d訓, 不過結果都係搞到好夜, 同新星既老大係度oicq, 好搞笑... 不過後來一而再再而三地發生網絡問題, 搞到我地(奕葦,玉娟&me)都好無癮, 之後仲要連唔上去, 所以大家就番房訓覺...
今日努力咁做畫幾. 勁麻煩呀, 不過主要原因都係因為自己差者, 借左新星果份黎參考. 而且仲要係佢之前教左都幾耐下, 但係結果好似都仲係做錯左, 不過唔理咁多啦... 我先無心機再從新做過呀. 仲要補番之前無做果份畫幾功課... 煩呀... 死啦... 考試點算呢...
搵番筒菲林, 原來漏左係小筠屋企><
13-5-2001
尋晚奕葦又係我宿舍上網, 又見到新星係度, 後來佢同奕葦講左一d野話係唔可以俾我知. 跟住奕葦同我講左之後, 我梗係要問到底係咩啦. 奕葦話佢答應左話唔同我講, 我亦費事為難佢, 於是就轉移目標問新星佢自己到底講左我d咩, 其實我唔係真係笨到咁既地步, 睇奕葦既樣加上之前老大講過既一句說話, 我都大概估到係咩一回事, 不過都係扮唔明好d. 係度問佢既同時亦係geocities度申請一個dreamingalien 既帳號, 點知唔小心打錯生日日期, 1981變左1998, 然後俾人話唔夠年齡, 唔可以用webpage server. 激死我, 搞到冇mood同新星再爭論落去, 於是打左句唔再理佢俾佢, 然後就真係唔理佢, 後來佢一連發左幾個message叫我唔好嬲, 見佢咁緊張, 都唔忍心再玩佢.
早上終於整理左個衣櫃, 搞左一大輪, 煩死人. 然後下午去買洗衣機. 本來淨係諗住買洗衣機架. 不過今日實在好熱, 所以睇見d冷氣機實在忍唔住, 順便買埋. 結果我銀行而家剩番八十七蚊咁大把...番到宿舍既時候攰到死. 但係都幾乎冇休息又要落樓住送冷氣機既人, 係樓梯見到新星岩岩上去搵我睇洗衣機..... 之後上到番去又係仲未抖夠, 奕葦又過黎問我去唔去調研, 於是換左條褲之後, 就同新星落去, 搵埋汪宇去九舍meet瀟華佢地一齊去調研, 本來都冇咩, 不過越行越唔掂. 一定係之前曬親, 頭勁痛, 完全都唔想再做任何野......
打左電話番屋企, 俾婆婆, 本來後來係諗住打電話俾Wendy, 不過先打左一半, 新星就打電話上黎, 話同佢老大同佢寢室既另一個人上黎搬洗衣機, 又搞左一大輪.... 頭好痛, 其實好想叫佢幫我整幾野架. 不過.... 算啦.. 咁多人係度, 唔好意思既..... 都係今晚早d訓....
14-5-2001
今日做場地測繪, 因為我想做六舍前面果塊地, 所以冇同奕葦佢地一組, 同蘇璞, 鍾凱, 鄧陳, 李可, 顏揚旭同新星七個人一組. 陳綱話十一點半落黎check我地, 不過十點半我地已經搞掂左. 係樓下熱到死又無野好做喎, 跟住我地就全部走左去新星宿舍, 因為果度有冷氣機. 本來冇諗住上樓, 不過後來見新星係度食感冒葯, 諗落自己都應該食d, 又冇咩好做. 就搵埋鄧陳陪我上去, 順便拎d過期雜誌同雪糕落去俾佢地.
下午去上音樂堂, 個老師又甩底. 跟住就出去提款, 嚇死人, 連續兩次密碼錯誤, 我仲以為自己搞錯左, 打電話番屋企問阿媽, 點知咩都問唔出, 結果卻發現問題係係銀行度, 我上次明明改左密碼架嘛. 居然仲係舊密碼既>< 同密碼搏鬥時, 新星打電話過黎問冷氣機d野, 跟住我話我係銀行, 知道佢係步行街時, 好直覺覺得佢之後會過黎搵我, 之不過冇諗到會咁快同埋咁搞笑lor, 係岩岩拎到錢時, 聽到佢把聲大叫大嚷, 唔知做咩, 佢仲話本來諗住嚇我喎, 傻傻地. 之後同佢同老大一齊走, 一路上又唔知俾佢話左我幾多次笨... 不過冇辦法啦, 真係好多時聽唔清楚人地講野呀嘛... 夜晚同娟佢地一齊既時候又咁岩見到佢, 又俾佢地笑左一輪.... 過份啦, 次次同其他人一齊就會見到佢, 唔係就係同佢一齊時成日見到識既人, 真係搞到好似成日都同佢一齊咁....
夜晚同wendy煲左成個幾鐘既電話.... 仲諗住早d訓喎... ><
15-5-2001
中午裝冷氣, 搞左一大輪都係搞唔掂, 實質到底係點樣一回事我都搞唔清楚, 因為我一直掛住同wendy傾電話, 反而新星會比我更清楚lor, 因為基本上果d上黎裝冷氣既人一個人係搞唔掂既, 跟住中午既時候我係同老婆仔同新星一齊食飯架嘛, 跟住娟打電話黎, 知道佢同我一齊之後就叫佢聽, 同佢話我地需要勞動力, 結果成個中午, 新星都係係我宿舍都幫手, 反而我自己就坐左係地下度好悠閒咁係度講電話, 仲要人地幫我拎雪條食=p 好似有少少過份tim... 講開同老婆仔食飯, 其實今日朝早係去一齊去畫畫既(因為要交功課), 點知畫左一半, 有個我唔想見到既人出現左. 好煩呀佢, 打完招呼咪算lor, 仲要講咁多野, 佢都好多時間jei, 企係度同我講咁多野, 仲要又唔講普通話喎, 明知我有同學係隔離架嘛, 佢唔會覺得唔係幾好架咩, 跟住中間有段時間新星行開左, 佢居然同我講話佢係唔係對我有意思喎, 喂, 關佢鬼事呀, 係唔係都唔駛佢黎過問啦, 唔知點解覺得佢問得好無禮貌, 好唔尊重lor, 不過之後勁搞, 我唔知係新星故意既定係真係講得我d普通話聽慣左反而易明d, 果個李權杰同佢講野時講起句唔知咩"巴....."(係關於四川人既講法咁既野), 新星聽唔到佢講咩, 跟住同佢講話叫佢用廣東話同我講, 然後我做翻譯喎, 我當時冇講到d咩, 不過心入面係度暗笑, 佢咁講咩即係話李權杰d普通話比我仲差jei, 當時李權杰有少少愕然, 不過堅持地再用普通話同佢講, 冇用廣東話講lor, 我唔知果句說話係咩意思, 亦聽唔清到底佢講既係咩, 不過我feel到果句說話係對成都人有少少不敬lor, 真係唔知佢學咩人做生意喎, 仲話要訓練口才喎, 頂佢呀, 我d畫畫得唔係好都唔應該咁講野啦, 仲話我d普通話都仲係唔係幾好呀咁, 所以新星當時叫佢講廣東話, 話我會譯番俾叫聽時, 我真係覺得好抵死... 好開心lor....
夜晚同瀟華, 齊菲, 少萍, 老婆, 鄧陳仲有新星去水吧調研, 寄工作於娛樂, 本來其實佢地有d唔係好想去架, 因為始終要用錢架嘛, 不過後來我話我請客, 所以先去, 今次請客係出師有名架, 因為尋日證實左小筠之前收到既消息, 我入左全國英語競賽既決賽, 成個學院得我一個, 尋日d人知道之後, 有d人即刻話我要請食飯, 所以當今日本來新星叫瀟華佢地去水吧, 瀟華佢地話冇錢, 然後新星話入佢數既時候, 我即刻截左佢話我請, 以呢一個為藉口, 結果後來新星話同我兩份出錢, 不過我死都唔要, 傻啦, 七十幾蚊對於我黎講咪當係係香港食餐好架者, 以前同Heidi出去既時候, 好多時我都係同ada夾錢請佢架啦, 對於我黎講係小數目者. 但係係呢邊佢地可以食好多餐飯架嘛, 再講佢之前先唔見左成個月既零用錢, 無謂要佢陪我請客啦
17-5-2001
又通左一個頂, 不過本來都唔駛搞成咁既, 但係搵唔到數據, 搵唔到鄧陳, 結果十一點幾新星先拎到d數據, 十二點番到宿舍開始畫圖, 然後先發現差太多既數據, 然而又唔可以出去再測量, 對住果堆數都煩, 好彩唔駛我黎計數, 唔駛我畫, 因為本來就係一組畫一份就ok, 計比例一向都係我既弱項黎既, 所以咪叫新星話lor, 雖然我咩都冇做到, 但係都算唔話得啦, 一組七個人, 尋晚得我地兩個係度做, 我咩都幫唔到手, 淨係坐係度睇住佢畫, 偶然幫佢斟少少水, 同佢講下野, 雖然後來都係靠住張枱訓著左一陣, 但係總好過理都唔理, 要佢一個人捱夜呀, 而且前前後後都落左幾次樓去研究環境, 亦有去喬國婧果度抄左幾個數據, 後來畫都四點幾, 仲差一大堆unknown, 佢怕佢係度會搞到娟佢地唔好意思訓, 所以係亦都冇可能再做落去既情況下, 佢就番去繼續做其他部份, 到左六點半我搞掂自己果d, 再打電話俾佢, 再落去測量番果d漏左既數據, 然後再番課室改圖, 總算趕得切啦, 雖然份報告真係做得好差... 哈哈... 今日拎左部相機番去, 將剩番既菲林影埋佢, 本來最好係可以黎張全班既大合照, 不過我拎部野出黎玩既時候, 好多人唔知走左去邊, 所以全班大合照就冇, 不過我地班既女生既全體合照就有^^
18-5-2001
第一次游水抽筋, 不過基本上咩事都冇, 不過斷斷續續咁偶然痛下, 好討厭>< 今日新星幾乎全日都係同我一齊, 中午係同我地宿舍一齊食飯, 黃昏時候黎我宿舍借電腦, 之後一齊去開班會, 之後又過黎借電腦, 搞到三點幾先走... 佢居然襯我行開左, 用我部電腦同佢朋友講話我係佢既.... 到底呢d算係咩關係??? 我都講唔清楚..... 亦唔想去諗, 怕諗得太多....
19-5-2001
起身之後冇耐就收到新星電話, 本來係玉娟話要去網吧scan相, 佢上黎之後就搵玉娟同我一齊去, 點知佢地一個二個居然都話唔去, 就咁放左d相係我地度, 叫我地訂埋蛋糕準備幫瀟華慶祝生日, 所以結果又係得番我同佢兩個四圍去, 搞掂所有野之後番到宿舍, 本來係諗住做完畫幾就一齊去library 抄方案, 點知一做就做到五點幾, 原本係講好左話七點鐘就去拎蛋糕去系館, 諗落得個少少時間, 都抄唔到d咩, 所以就留係度睇電視等玉娟同奕葦黎搵我地, 然後仲上載左d相上校友錄, 不過有少少問題....大概八點既時候去系館食蛋糕, 玩得好顛呀, 勁過癮, 玩忌廉戰, 搞到頭髮呀咩都中招, 真係好開心lor, 不過唔小心扭親隻腳.... 事緣我同新星諗住上樓去嚇葛貴武, 上到天台見唔到佢, 但係好多星星呀, 好正.... 走既時候因為黑又無燈既關係, 冇睇清楚就咁差錯腳, 又俾佢話我笨, 叫我小心d都唔聽....番到落去既時候, 佢地都唔知我扭親, 仲繼續追逐, 係新星知道, 成日係度提醒我唔好行咁快... 其實一直都冇咩, 唔係話痛得咁緊要, 只不過落樓梯實在好難頂, 好笑, 同佢地講佢地居然以為我講笑, 直到散band時, 見到新星扶住我慢慢咁行先至信....
係系館玩到十一點幾先走, 娟佢地又打電話黎叫我同新星去買花生然後番去鋤弟, 佢地都得架啦, 居然真係走去買左對拖鞋放係宿舍俾新星, 當正佢係我既男朋友咁..番到去之後, 佢地鋤弟, 我就沖涼, 然後睇佢地玩, 做一個旁觀者, 睇住新星俾佢地畫到成隻花面貓咁, 勁搞笑, 兩點鐘就俾佢地趕左去訓, 話我聽朝仲要比賽.... 佢地就玩到三點幾, 新星留左係我宿舍度訓, 訓我張床, 我就走去娟度訓, 娟同小筠孖舖....
20-5-2001
好耐未試過俾人揹既感覺... 今朝晨早去考英文, 新星之前講好左話陪我過去A區考, 佢自己就去打網球, 所以七點半我地就起身, 佢送我過去, 本來行平路我都已經要行得好慢慢, 去到樓梯時先發現落樓梯係有幾咁痛苦... 所以結果係佢揹我落樓... 一路上時不時都問我有冇事, 陪我搵試場, 搵我座既位, 考完之後黎接我送我番宿舍..... 果種受保護既感覺好好......
下午一個人係宿舍諗方案, 娟佢地去游水, 番黎既時候居然走去叫新星夜晚上黎一齊通頂, 所以連續兩晚佢都係係我宿舍度過.... 雖然下午已經開始係度諗要點做, 但係實際上正式開工時已經係一點, 後來到左兩點幾既時候奕葦俾佢宿舍d人趕左出黎, 於是亦過左黎我房度做模型, 做完先番房訓.... 原來做通宵有人陪真係精神好多架, 而且有咩問題又可以即刻問, 一齊研究, 而且大家互相嘲笑下, 做起黎有趣好多, 雖然果個所謂既模型實在夠爛, 不過居然叫做做得完, 簡直係奇蹟...
21-5-2001
過份呀, 居然新星比我仲清楚娟佢地, 事緣中午我同佢食飯既時候, 佢話娟佢地一定仲係度訓緊覺, 我就話唔會既, 佢地要上堂架嘛, 點知番到去佢地真係仲訓緊.... 真係呀?! 過份呀.... 下午上音樂堂去到既時候已經開始考試, 我去到時都唔知道今日就考final.... 結果一大半都係抄瀟華既, 迷迷糊糊咁就考完左一科....
夜晚同娟佢地食飯, 去到之後, 章曄心血來潮叫我打電話叫新星一齊, 果白痴唔知係咪搞掂左一草開心得滯, 好心血來潮咁問話鋤唔鋤弟, 章曄佢地一聽到開心到不得了, 即刻話要買酒買花生, 上完法律之後番去鋤弟.... 上法律既時候, 我因為下午未訓夠加上亦唔想聽得咁辛苦, 將本書塞左俾新星抄筆記就繼續訓, 不過5101實在唔係一個適合訓覺既地方, 訓得好唔舒服, 中間醒過好多次, 次次睜開眼都見到佢望住我, 後來過得伏係張枱度訓實在唔舒服, 乾脆就借佢既膊頭黎用... 其實我地同拍緊拖有咩分別呢?? 我都...講唔清楚... 落堂之後見到瀟華, 講起畫幾, 死白痴終於識得擔心考試, 後悔話今晚鋤弟, 再加上我落堂之後仍然係未訓醒咁, 於是佢就話唔去鋤弟, 本來以為咁就可以安安靜靜咁溫書, 點知章曄同小筠落堂之後都買左一大堆野食, 買左五人份以上既野食, 番黎之後知道佢唔黎係度鬼咁嘈, 要我打電話叫佢上黎玩一陣都好.... 結果我地又墮落左一個晚上, 開頭新星輸左勁多(其實中間有兩三次都係我頂替佢既時候輸既), 被灌左勁多水, 不過之後連續嬴左好多次.... 諗落都搞笑, 成個細路咁=p
今日基本上行樓梯都已經冇問題, 但係夜晚一睇實在係嚇左一跳, 勁大片瘀血, 而且輕輕一掂都勁痛, 我見行路時唔痛仲以為冇事tim, 點知坐係地下鋤弟時, 被新星隻腳輕輕碰到時勁痛, 連佢到嚇左一跳, 話聽日去醫院睇下好d喎...
22-5-2001
娟佢地過份呀, 趁我去搵小妹妹, 居然拎我部手機打電話叫新星上黎一齊溫書, 後來我陪小妹妹落樓問佢借野, 佢跟住上樓, 我問佢去邊先知道佢地做左d咩好事lor, -_-其實上得黎仲駛溫書既, 每次黎親我房既都只會墮落, 溫書喎... 結果半玩半溫書, 成五點先訓呀, 但係.... 依然唔知溫左d咩...
23-5-2001
畫幾又唔知合唔合到格啦, 不過考都考完, 唔諗咁多啦. 考完之後先陪新星去捐血(呢度幾奇怪架, 大學生涯一定要捐一次架, 我亦都應該要去既, 不過答應過karen第一次要叫埋佢一齊去, 所以要先係香港捐一次先), 然後佢再同我去西南醫院睇下上次扭親果度有冇事, 諗都冇諗過呢一行會發生咁多事....
搭的士過去時佢跌左部手機係車上, 過左半個幾鐘先發現... 本來五一番黎時佢先唔見左千幾蚊, 今次又唔見手機, 真係好黑仔, 睇住佢果個心急, 欲哭無淚既樣, 覺得好唔舒服, 如果唔係陪我去醫院既, 佢就唔會唔見手機... 我都唔知可以講咩安慰佢好, 因為心入面好明白講咩都冇用, 所以亦都冇講到d咩, 握住佢既手腕, 就好似我安慰其他好朋友時咁, 佢卻好似好自然咁將佢既手向上挪動, 拖住我既手, 一切好似好自自然咁... 以前一直唔明手扣手咁拖手有咩好, 覺得咁樣拖手其實好唔舒服, 但係今日咁樣被佢拖住又覺得原來果種感覺都唔錯...之後睇完醫生, 係的士上面佢都係hold住我隻手...原來有時有d野真係唔駛講得好清楚, 唔需要話我地拍拖啦咁, 唔需要講任何野好自然咁就係埋一齊... 番到宿舍都冇mood去上堂, 乾脆逃課訓覺, 到四點幾落諗住去搵新星去上計算機, 點知佢話唔想去上堂, 要去買電話, 結果就再逃多一堂陪佢, 同埋佢老大三個人出去睇手機, 番黎之後再搵娟佢地一齊食飯...
25-5-2001
星期四下午去大坪交上網費, 娟話果邊既二手手機平, 所以叫埋新星一齊去, 不過佢話決定左唔買住, 但係就陪我地去大坪, 去完大坪番黎之後, 再叫小筠一齊出黎食火鍋, 之後佢地三個番宿舍, 我地就去上高數, 不過實質去到果度咩都冇做到... 夜晚新星同佢老大一齊上黎玩, 之後佢老大先走, 佢就繼續留係度, 結果睇vcd睇左一個通宵, 其實我勁想訓覺, 雖然佢都叫我訓先, 但係總不能留佢一個係度睇碟, 我地四個上床訓架嘛, 所以我就冇訓到陪佢睇, 但係睇到後來我都係係佢懷抱入面訓著左, 模模糊糊之中, 佢好似輕輕錫左我既嘴一啖, 當時想問佢, 但係望住佢又問唔出, 到左今晚終於忍唔到問佢係咪親左我既嘴....原來真係唔係幻覺, 居然初吻會係係咁唔清醒既狀態下冇左, 講真有少少不滿, 但係... 算啦....佢...唔知呢...我覺得似乎太過快...但係被佢攬住, 輕輕咁摸我, 鍚我, 咬我既感覺好舒服, 算唔算係挑逗呢??其實佢係咪真係鍾意我, 定係視我為一個挑戰?? 或者我諗得太多啦, 本來係呢個年代, 呢d野都係easy come easy go, 不過我做唔到, 我希望佢真係認認真真咁鍾意我, 希望佢愛我多過我愛佢, 好自私既諗法, 但係我真係怕受傷害, 我諗我唔係佢第一個鍾意既人, 最起碼佢應該鍾意過casper, 雖然佢話過casper唔係佢女朋友, 但係... 嗯... 我寧願佢鍾意過casper, 如果唔係佢可以咁隨便去鍚一個佢冇感覺既女仔既嘴既話, 佢對我都未必係認真... 佢以前有冇鍾意過人其實都冇咩所謂, 只要佢依家佢真係鍾意我就夠.... 其實唔知呢, 硬係覺得佢介意係好多同學面前同我太好, 唔敢係佢地面前拖我手, 冇人既時候或者係好好既朋友同學面前先會主動咁去拖我隻手...
26-5-2001
生理時鐘又再搞亂啦, 十二點幾起身, 三點幾食lunch, 九點幾食dinner, 然後打麻將, 三點幾先訓....><
27-5-2001
八年以黎第一次冇陪阿ling過生日...想打電話俾佢講聲生日快樂, 但係打左好耐都打唔到...激死人啦
哈, 居然新星要通頂, 而我唔駛喎, 訓左半個鐘....
其實可以訓多好多先岩架.... 不過東搞西搞...
浪費左好多時間, 而且好遲先開始畫, 之前做左d咩都諗唔起黎,
不過記得佢問過我我地可唔可以kiss,
我以為佢講既係輕輕普通既kiss, 心諗反正都試過啦,
冇咩所謂, 所以點頭, 點知佢講既原來係french kiss,
結果佢既嘴唇掂到我既時候, 我就彈開左, 不過還好啦,
佢冇講到d咩, 淨係笑左笑, 話我果然係仲細, 唔識kiss,
唔教我住啦咁... 我淨係覺得好似一切黎得太快...
31-5-2001
好多日冇打diary tim... 開始覺得有少少心有餘而力不足... 前幾日同新星去買左一對情侶表, 男裝果隻小筠都有一隻架, 不過其他實在又冇呢對既顏色靚, 所以結果都係揀左呢對^^ 尋日係咁耐以黎第一次係假期以外既full day off, 勁正呀, 訓到十一點幾先起身, 好耐未試過訓得咁舒服, 好爽~~ 不過之後又通左一晚頂, 南充果邊既殺大學生既黑幫據聞殺到黎重慶, 嚇到小妹妹們尋晚都唔係好敢係一個人係系館番宿舍, 其實我個人就覺得冇咁嚴重lor, 所以唔會覺得驚, 就算好似以前自己一個人番去既, 我都唔會怕lor, 反而會怕悶就真, 不過的確好明顯學校既保安係比之前加強左~~
今日設計課之後, 新星一直都冇笑過, 冇咩點講野, 好似唔係好開心咁, 不過因為同瀟華佢地一齊, 唔知點問佢好... 上高數既時候, 本來想去搵佢一齊去, 後來諗落佢可能已經走左, 加上成日去佢宿舍搵佢好似唔係幾好咁就冇去到, 後來佢係第二節課先去, 依然係面無表情, 實在忍唔住要問佢到底發生咩事, 還好只是純粹因為攰得滯, 擔心死人...
Oh..畫幾有七十九分呀....勁正... 不過佢地仲高分, full mark 都有兩個.... 比上不足比下有餘啦