9月 10月 11月 12月 1月 2月 3月 4月 5月 6月 8月
1-7-2001
下午先幫星星買左部手機, 又去中環又去城市花園, 勁麻煩, 不過見過Sarah, 阿ling都夠lu, 其他人下次再約啦, 我諗大家都唔介意架呵? 買完手機後, 阿爸阿媽先番屋企, 我一個人走上新時代行, 買番排骷髏,其實一個人既感覺真係幾好架, 好似呢一年黎真係俾人寵壞, 成日都想有人陪住, 其實..... 有咁既必要咩? 唔想又多一份執著係度, 夜晚Sarah 再上黎我屋企, 坐左一陣, 上網搵左呢邊既相俾佢睇, 好失策呀, 居然冇諗到應該執番d相俾Sarah 睇, 仲諗住下次先執果堆野.... 真係好笨. 好彩網上有. 之後夜晚打左個電話俾Ronnie 兄, 其實真係唔想打, 因為真係好攰, 呢兩日雖然唔係做左好多野, 但係來去匆匆, 都幾辛苦, 而且又要執野呢. 又係一個勁沈重既背包, 超大容量係佢既特點, 亦都係我當初花幾百蚊去買佢既原因, 又夠實淨. 掂呀.
2-7-2001
舟居勞頓..... 五點半到重慶機場, 娟同小筠之前已經講好話去上清寺接我, 無諗到星星會同佢地一齊lor, 但係唔知點解呢, 無咩感覺, 或者真係應該俾個終結佢, 做番朋友會比較好, 我唔可以忍受同一個我care佢, 而佢又俾唔到一種佢在乎我既感覺既人做我既男朋友. 其實果次落佢宿舍就應該好清楚咁了斷佢..... 退番一步應該對大家都有好處. 其實我一直都係一個好狠既人, 但係點解用普通話就硬係好似狠唔落去, 係因為冇左我用廣東話講野時果種寸人既口齒伶俐? 以前同林文海成日一齊玩時訓練出果種咄咄逼人既寸人口才, 雖然講真同其他人比實在係碎料, 但係再加埋自己本身果種刁蠻狠辣, 發起火上黎真係唔係人咁品, 我要去同人爭論都好少達唔到目的.... 定係因為我唔捨得?
我太任性啦, 要我去照顧人實在太辛苦, 太辛苦. 我要搵既男朋友應該係要細心得黎又大氣, 可以縱容我任性, 懂得去好好咁照顧我, 可以彌補我既既粗枝大意, 肯陪我顛, 陪我玩之餘, 亦會提醒我唔好掛住玩. 最起碼係我唔開心既時候, 佢會一眼就睇得出黎, 好好咁留係我身邊陪我....
3-7-2001
好耐未試過同星星一齊時咁舒服啦, 講清楚之後感覺好多啦, 做番朋友反而自然d, 都諗左好耐應該點講, 其實我諗根本無咁既需要既, 因為似乎早就應該咁做, 佢其實亦都想我咁講, 但係點解佢唔開口? 係覺得無必要去講清楚定係唔知點去講? 我唔知道, 但係我淨係知道我認為有需要講得清清楚楚, 擺係心入面, 唔清唔楚既感覺好唔自然, 好唔舒服. 其實返黎之前我已經覺得一定要同佢講清楚, 但係想考完試先, 但係今日問左佢聽日可能要早交卷去趕火車. 所以早d講左佢啦, 本來佢係話聽日中午, 但係反正都係要係考試前, 再早少少講左, 萬一我會喊既話, 訓醒一覺都可以話俾自己聽冇事呀咁, 所以今晚就了斷左佢. 講完之後成個人舒服晒. 我既初戀~ 維持左一個月多d啦. 黎快亦去得快. 但係已經去到呢個地步, 分手係遲早既問題, 拖落去對大家都冇好處, 佢會有壓力, 我會受傷害..... 既然佢唔可以學識去愛我既, 我唔離開都冇意思啦. 係咪? 其實好想問佢到底有冇鍾意過我架, 不過諗落又何必咁執著, 有又好冇又好, 都過左去. 淨係知道而家係我mind 佢多過佢在意我, 我鍾意佢多過佢鍾意我, 再咁落去, 我會好辛苦, 再咁落去, 我怕有一日連朋友都冇得做, 連對住佢都會覺得辛苦. 爽快d講清楚好似而家咁咪幾好, 關係其實冇變架喎. 依然係好朋友, 就好似五月廿三號之前咁, 其實早係個幾兩個星期前, 我地既關係就已經係係果種若即若離既咁, 外人睇好似冇咩, 但係自己心知肚明佢對我既態度唔同左, 冇再拖我既手, 唔會好似以前咁主動地去關心我, 錫我, 有時我甚至覺得佢好似只係做俾人地睇唔想係人地既興風作浪時令我難堪咁, 其實心入面好納悶, 唔知佢想點, 唔知佢諗乜, 亦唔知自己應該點做, 對於我黎講呢種關係比岩岩識既時候仲差.... 一直都唔夠勇氣去真真正正咁去面對呢件事. 但係好清楚假期之前有需要講清楚架, 因為佢仲係我男朋友既話, 我假期入面一定會成日掛住佢, 但係如果唔係既話掛還掛我唔會期待有回報, 亦唔會有失望呀嘛. 有期望既話換黎既多數都係會失望, 咁就冇謂啦.
好開心呀, 講清楚左, 呢段關係舒服多,自然多啦. 初戀日記到此完滿結束~~~ 回復單身, 無需考慮佢既睇法, 唔駛諗咁多. 可能你地會覺得不可思議, 分手居然會開心, 但係係真lor, 咁樣好過拖落去啦, 我地好和平咁分手架. 除左開頭開始開口講正題時我眉頭係皺起之外, 之後我地都係笑住咁講既, 雖然心入面其實有少少難受, 但係難受過後, 唔可以否認我地係比較適合做朋友. 感覺舒服多啦. 之後仲一齊去買野, 買野返黎俾娟佢地食, 然後仲一齊鋤弟..... 噢..... 聽日既FoxPro..... 聽天由命啦. 冇乜把握合格咋..... 不過是但啦.
唔該黎首吳佩慈既"懷著笑意既決定"呀, 應景呀~~~
4-7-2001
今日既電腦監考勁嚴呀. 坐係趙洪隔離都冇用, 咩都睇唔到, 淨係抄到少少. 睇黎呢次都會幾多人炒下. 唔知我合唔合到格. 但係我就覺得萬一我唔合格既, 仲有大把人陪我, 最起碼星星都一定要補考. 除非真係個老師可憐我地要放人啦. 雖然電腦考得唔係幾好, 但係勁爽呀. 高數七十五分呀, 抄得好. 不過勁過份呀下, 星星居然抄左個九十三分出黎..... 簡直係唔公平. 不過是但啦, 其他人既野理得咁多, 總之我自己合格左就得啦, 不過鍾凱好倒楣呀.... 成為我地班唯一一個要補考高數既人.... 不過其他要補考既人都好多, 有幾個已經死左兩科, 張健忠呀, 胡通呀咁... 我都係淨番法律同電腦未知. 法律合唔合格就冇所謂啦. 電腦... 就算唔合格都係一科者..... 唔駛擔心咁多lu.... 星星其實英文都係低空飛過, 六十一分. 我七十七同趙洪一樣, 比瀟華低四分. 李敬輝開頭睇左話我冇考好... 其實我對呢個成績算係滿意. 因為將時間計算在內. 極速做完既卷算係唔錯lu. 唉, 一個二個走鬼晒.... 得番我一個...... 娟佢地又要畫圖... 悶呀
做返朋友之後最唔慣既係... 身邊既朋友們都仲係以為我地係係埋一齊, 講起時仲會係話星星咩呀星星乜呀咁..... 不過還好啦, 幾出乎意料之外, 又唔會覺得有d咩, 唔會話覺得唔舒服lor, 不過就覺得有少少唔知點咁, 唔知好唔好clarify我同佢已經分左手. 但係... 諗落, 算啦..... 由得佢.... 反正都冇咩所謂.
5-7-2001
破財啦, 居然買唔到學生票. 好辛苦先買到張九折票.仲要成十點幾先到廣州, 麻鬼煩.... 不過九折都好呀, 百一蚊可以食幾餐飯啦.... 反正都係諗住去Wendy 果度訓一晚既, 夜D就夜D la... 話知佢. 今日本來諗住去教辦睇下有冇法成績. 點知成績就冇, 但係就好意外地周老師俾左張証書我, 上次既英語競賽居然俾我拎左個二等獎.... 哈..... 冇野好講呀...只係一句好神奇呀
6-7-2001
尋晚本來係諗住慢慢咁執野, 一來係今日要走啦, 二來係如果我冇野做既話, 小卷一定會叫我幫佢畫圖, 所以一直都係好懶懶閒咁係度慢慢執野, 後來吳晨打電話過黎又重提研究生們既問題. 我同佢講話我未食飯, so 佢就話同我去食飯啦. 食完飯之後就去搵佢講既研究生, 其實我覺得真係幾麻煩lor, 我又唔識佢地喎, 佢地黎香港搵我帶路.... 到時我都唔知點好, 如果係同學既就話好玩者. 同佢地我都唔知有冇野好講. 真係無奈. 不過點都好啦. 得既話咪做下好人lor. 番到宿舍之後幫小筠畫表現圖. 畫水彩, 好大壓力呀, 勁耐冇畫過水彩, 而且因為已經冇時間, 唔可以有失誤. 如果唔係..... 其實都淨係幫畫樹者. 因為後來我話建築物好難畫, 我唔想畫啦咁, 咁之後小筠就話淨係畫樹啦咁. 因為佢其實淨係怕畫樹. 我自己其實覺得畫得好肉酸. 不過佢地話畫得幾好喎. -_-" 都唔知係咪淨係安慰我既... 跟住就幫小卷拷字. 結果又搞到三點幾先訓, 然後今日係點幾鐘先起身既, 雖然中間起過身.... 五點過就出門, 因為機場巴士最後一班六點就係上清寺走. 所以六點前就要去到果邊. 今日都算倒楣啦. 上到機場巴上等既時候. 話咩冷氣壞左喎, 又要換車. 小筠佢地又走左. 得我一個都幾狼狽下, 之後去到機場勁無聊, 等到後來頂唔順連手機遊戲都唔想再玩, 發短訊俾章曄同星星, 後來星星仲要打電話過黎陪我講左兩句. 依然都係勁無聊, 所以索性坐係地下度開電腦打dairy. 引起唔少人既注目. 不過唔理得咁多lu, 之後好辛苦等到上機, 諗住十點幾可以到廣州食飯啦. 點知上到飛機之後話唔知要換咩燈. 一直係飛機上面等仲慘過係候機室度, 上面又熱又悶, 因為心入面諗住好快就可以起飛啦嘛, 就關手機呀咁啦, 點知足足等左成個鐘. delay左成個鐘呀, 勁慘, 到後來我都頂唔順, 開手機發短訊.... 唯一既安慰係上面有一位勁靚既空姐. 後來起飛之後就同隔離果個女仔傾偈, 原來係校友黎架, 不過係A區既人,大三既, 都幾nice呀. 之後到左機場之後打的去wendy果度. 死人的士佬. 勁討厭lor, 係度話咩咁近呀乜乜乜咁.... 其實我已經好頂唔順架啦, 所以一落車就鬧佢..... 頂佢, 係重慶就話鬧唔到人者, 呢度係廣州, 我唔鬧佢對得我自己住既. PK
7-7-2001
留係廣州既時間勁短, 乜都冇做到, 連Wendy既大學都冇好好參觀, 不過我會覺得幾有意思lor, 見左幾位Wendy既朋友, 雖然連佢地咩名都搞唔清, 但係覺得都幾好玩呀, 感覺就好似去旅行時途中認識幾位朋友, 萍水相逢咁, 第日又乜咩機會再見面咁, 幾開心架, 因為發現原來而家對住岩岩識既男生都可以好自然咁去同佢地傾偈, 自己似乎真係長大左, 唔再係以前識得既男仔十隻手指都數得晒既細路女, 好似唔再似以前咁介意人地點睇咁, 覺得去重慶讀書呢整整一個學年, 真係學識左好多野, 有好多得著...
普通話既進步, 學識聽少少四川話(甚至識講少少唔鹹唔淡既川普), 可以適應到重慶既生活, 雖然可能係人地眼中都係好嬌生慣養, 唔曉得完全融入佢地既社會, 但係好坦白講我真係覺得自己學得好快架啦, 比我自己想像中好好多, 發現原來真係冇咩係做唔到架, 都係事在人為架咋, 睇你自己點睇lor, 係重慶呢一個學年識左好多黎自唔同地方既同學, 雖然唔係話同全部人都咁熟, 但係基本上同每一個人關係都算係唔錯呀, 有d咩事時, 每一個人都會好幫我, 對我好好, 無論男同學女同學都好, 果種感覺真係好正架, 被愛惜被保護既感覺, 大家守望相助咁, 真係好開心識到咁多人, 好慶幸我選擇左去重慶, 我知道我而家去重慶讀書所學到, 見識到, 體驗到既會係好多我呢個年齡既香港人無機會去試架lor. 如果當初我留係香港係城大讀既話會係點呢? 我諗多數無依家咁開心, 無依家學到咁多既. 離開重慶, 發現原來我係重慶已經搵到自己既圈子, 一個幾月見唔到娟佢地, 見唔到奕葦佢地, 見唔到星星, 好唔捨得, 我會好掛住佢地架. 重慶呢個地方可能真係好似佢地講既咁無樣好, 但係有一大班好好既朋友係度, 足夠令我為佢有所牽掛
返到屋企華峰叔叔佢地早就已經到齊, 林文浩高左好多, 意料之內啦, 後來溫瑞聰都到左, 好多年無見啦. 可惜呀, 林文海未返, 邊一帆又要係機場等飛機, 鄧文林亦都唔係度.... 好懷念以前一齊玩既日子. 好開心
8-7-2001
又訓到中午先起身啦, 之後就打電話報到, 一個令人疲倦既工作... 唔知點解呢. 唔似上次寒假時咁有興奮既感覺, 甚至覺得有少少悶tim, 好似無咩好做, 唔係好充實咁, 成個幾月咁溜溜長, 有咩搞作呢... 我諗大家都冇咩時間陪我, 點講大家都有好多新朋友仔架嘛, 但係我既新朋友仔又係咁遠喎, 真係好想同Wendy孭住個背囊番大陸玩, 但係兩個女仔好似又唔係咁好, 要玩得又平又安全, 實在好難諗得掂. 想搵多個伴, 但係邊個好呢? 又去邊度好呢? 不過唔好自尋煩惱lu, 聽日先見左Heidi, 睇下到底佢發生左咩事, 真係幾擔心佢架, 不過而家冇lu, 雖然我feel到一定有好大件事發生左, 不過既然佢而家無事, 證明佢熬得住, 咁我都放心d...
9-7-2001
差唔多成年冇見過Heidi, 呢一年發生既事的確好多, 突然覺得其實大家都變左好多, 唔敢諗太多, 只希望大家都過得好好, 咁樣其他既到冇咩所謂啦. 其實好多野都係睇自己點睇架者, 今日對住Heidi, 發現原來自己真係唔識點樣去安慰佢, 點樣可以幫到佢, 但係章曄講得岩, 好多野唔到自己去控制, 我又唔係邊個, 又點可以妄想去改變人地, 改變世界? 好好咁做好自己既本份, 佢既路應該係佢自己去行, 我最多都只係可以俾到少少意見者. 送Heidi 去見工之後返左去聖米迦勒, 探當年既岩岩出黎做老師既班主任, 今日既副校長, 時間過得好快架, 咁就畢業左成八年, 佢地都好忙, 不過都抽空陪我講幾句, 大家都好意外, 居然會去左重慶讀書, 始終係一個好奇怪既決定卦. 正常既人都會覺得好不可思議. 不過, 嗯, 就係因為呢份特別, 我可以好似而家咁好傲然咁笑住去睇生活. 睇人生.
嘻, 唔可以忘記係度恭喜Karen 入到City. 唔理你既決定會係咩, 我都會好支持你架, Somehow, 兩個選擇都係好既. 其實呢, 會唔會有少少體會到我上年暑假對住果d offers 時既感覺呀, 帶有少少自豪, 但係... 勁煩, 聽多d人既意見可能會好d, 但係.... 越聽越煩. 我會話, 信自己既直覺呀. 最起碼係自己既選擇時, 先至最無悔呀嘛.... 係好定唔好, 自己揀既無得怨, 死到死得心甘情願呀嘛.
10-7-2001
買左條裙呀, 好lady架, 我著既話一定會令人目瞪口呆, 因為真係not my style, 仲有三件背心, 一對迷彩Vans. 不過就仲未買到泳衣. 本來今日諗住問阿Ling要d Agents 既資料搵工架, 不過睇黎都搵唔到lu, 算啦, 反正今日有一個好大既收獲, 就係可能可以去山東玩啦. 不過要聽日先可以落實到有冇得去. 據阿華講都有九成機會ok ^^
11-7-2001
本來諗住落城大睇下仲有冇好似上年咁有d請人幫手打字既街招, 不過隧道既牆上乾凈到不得了, 一張街招都冇. 仲諗住賺少少路費tim, 冇行lu, 不過千五蚊咁抵, 算啦. 夜晚本來係諗住同阿Ling同陳嘉嘉一齊出去架, 不過陳嘉嘉有事做, 得番我地兩個, 去左三越食飯. 之後就陪佢去買衫, 好攰呀, 可能新鞋著唔慣啦.
今晚同阿ling講關於佢既野, 好掛住佢tim. 成晚時不時諗起佢, 係度傻笑... 我... 真係好笨呀呵
12-7-2001
呵呵, 呢個semester 既目標達成左一半, 唔駛補考, 雖然唔係靠我自己, 但係唔理咁多lu, 唔駛補考, 發達啦. 不過唔知到底計算機同法律係幾多分, 因為關於補考既資料係趙洪放上校友錄既, 計算機有七個人補考, 當中包括星星同汪宇. 我就順利渡過, 係岩岩過定係有好多分剩就唔清楚. 不過總之係合格左啦. 本來仲諗住叫娟去幫我睇成績, 不過既然知道左合唔合格, 其他都冇乜所謂啦. 六點幾時, Per 同Selina 過左黎, Per 話星期六約埋一齊黎我屋企喎, 聽日先打電話啦, 反正早打遲打, 要黎既始終會黎, 唔黎既, 早一個月book 定都冇用啦. 唔, 聽日宣佈申奧結果, 希望唔會再令我地中國人失望啦. 支持北京!! 加油~~~~
13-7-2001
北京申奧成功呀, 好開心. 不過如果我而家係係重慶既話, 一定仲開心者, 我想像到如果係宿舍既話, 一定又會係一陣哄動, 我可以想像到佢地既笑臉, 佢地既歡呼聲, 果份熱情足以令人感動, 真係好動人, 好動人架. 中國既可愛之處就在於此. 係宿舍第一次聽到男生們起哄, 覺得莫名其妙, 後來知道係因為中國足球贏左, 然後慢慢開始習慣偶然聽見同學們為中國球隊既勝利既起哄, 歡呼, 聽到人地起哄時就會知道果晚又有球賽, 好好玩架^^
不過今晚發生左d意外, 呢幾個月既心血冇晒啦, 六百幾首歌全部冇晒, 不過係自己既失誤.... 冇得怪, 心痛死人啦, 成幾GB, download既話..... 我諗要用上幾日時間, 而且有d係極難搵到, 甚至冇可能係一般網頁搵到...... 唯有等到返去重慶既時候再係佢地果度搵番過黎啦..... 唉.... 幾個月既心血, 就此毀於一旦..... 請為佢地默哀, Amen.
14-7-2001
本來話黎我屋企玩. 之後一如所料, gathering最後都搞唔成, 不過Per 同 Karen最後都黎左我度玩...
15-7-2001
返左黎咁多日, 終於有運動啦, 好耐冇係維園游水啦, 維園既泳池比起我地學校果度正得多啦, 不過唔知點解游起黎冇以前咁爽, 好似上次游水抽筋有少少陰影, 加上上次扭傷腳雖然早就已經冇事, 但係好似始終感覺唔係幾好, 特別係浸係水入面同壓住果個地方既時候, 唔敢游得太快. 其實係心理作用吧... 我都唔知.
16-7-2001
唔知點解今日下午突然想保持沉默, 唔想講野... 又再去剪頭髮, 依然係覺得唔係好掂.....
17-7-2001
好耐冇打Squash啦, 亦好耐冇拎過球拍, 打得唔係幾好tim. 不過好亨受打波時既感覺. 玩得好開心呀, 而且今日終於見到Amy既廬山真面目, 有d野做下, 終於唔會覺得好似終日無所事事咁, 之後返屋企沖涼後, 同阿Per&青檸妹妹諗住BarnV食少少野, 點知入面居然無人既, 結果就去左七重天, 返到屋企之後突然諗係肝炎針既問題, 好即興咁落去打針, 痛><
嘻, 發現Selina既info 入面用左我之前係度打既幾句(信自己既直覺呀. 最起碼係自己既選擇時, 先至最無悔呀嘛.... 係好定唔好, 自己揀既無得怨, 死到死得心甘情願呀嘛.), 好開心呀, 多謝Selina認同之餘, 仲將佢放埋上info咁俾面^^
18-7-2001
今日下午突然情緒低落, 懶懶的, 不想動, 也不想說話...很納悶, 覺得很煩人, 是為了什麼卻說不上來, 只是突如其來的心情不爽, 與Per & Qling 回到家中後, 慢慢才好過來. 七點去briefing, 係去西安同上海既briefing, 本來係去青島大連架嘛, 點知到最後都係要去西安果邊, 仲要為阿華佢地添左咁多麻煩, 勁唔好意思. 講返今日既briefing, 冇諗到會係咁鬼學術性lor, 真係睇當地名勝既時間好少, 左成日要去講座咁果d, 之後仲要做專題報告, 而且唔係自己分組, 同Wendy分左去唔同既組, 我還好啦, 我果組入面有兩個阿華既friends, 其中一個今日冇去, 係點既人我就唔知, 不過另外果個俾我既感覺都好nice, 其實應該話阿華果幾個朋友俾我既感覺都幾好, 好friendly, 不過可能一開始大家都唔識, 好似唔多唔少有d尷尬咁, 至於其他同團既人, 相處時間尚短, 先不予評語.
Briefing 之後同阿華佢地去左肯德基食dinner, 見到阿正, 本來我只係覺得呢個人好似似曾相識, 然後覺得佢好似阿正, 但係我唔係好Sure, 第一, 佢似乎冇咩反應, 第二, 始終我只係見過佢一次, 而且係差唔多成年之前既事, 我唔肯定果個係佢. 不過我而家好肯定果個係佢... 不過係唔係都好啦, 好明顯佢都唔認我, 可能根本就忘記左有我呢一個人tim...... 公公又入左醫院啦, 不過還好, 去到醫院睇佢, 精神都幾好, 反而小舅父好明顯老左好多....
19-7-2001
好耐冇食過叉燒炒飯啦, 今日食完中午飯之後幾乎都係煲住個網, 咁難得先後見到小筠, 衛欣, 娟娟. 聊了一個下午, 雖然很冷落左係我屋企住左兩日既Per, 不過實在唔可以再唔上網啦, 要處理既事太多. 要搵番d歌(特別係兒歌&舊得黎又未算夠經典既歌), 要搵素材黎重整我既網頁.... 夜晚同阿ling, snooky姐出去, 正呀, 有手信, 好可愛既罐罐=^0^=
呢幾日突然好似好多野做咁, 之前明明冇野做lor, 係唔係我真係果種要係人地有事要我幫忙先會諗起既果種人呢? 天生係一道好橋樑, 不過唔係好堅固架咋喎, 用完將塊板一抽就可以踢開架啦. 好方便架~~ 而且我本身又比較有份量, 承托力比較大, 可以背負各種責任, 所以又好理所當然地應該背起做聯絡人既責任, 做我地呢個小圈子既中間人, 我從來都不知道我的地位在這小圈子中是如此的"超然"!!! 沒有我便沒有號召力, 搞唔到gathering!! 所以我應該犧牲小我, 完成大我, 唔應該咁自私為一己之樂趣而去重慶搵新生活, 應該為左大家放棄夢想留係香港讀U, 然後做一個普普通通既OL, 然後搵一個地道香港人拍拖結婚. 或許我甚至應該浪費這一年既努力, 也應為了你們之間的友誼永固而返黎香港做全職聯絡人, 是嗎?? 我亦應該有辦法滿足各人既所需, 順得哥情又不失嫂意, 將某d人之間既心病問題徹底解決, 100%做到皆大歡喜, 係咪? 嘩, 我係超人黎架喎, 我應該搞得掂晒所有問題, 一句號令, 可以請出各位大忙人出來一聚, 有任何問題??? 傻啦, 有我又點會有問題呀, 係咪?
別把責任推到我頭上, 一段關係是雙方面的, 我回到香港打電話報到, 之後呢? 喂, 邊個得閒應酬我先? 有d連電話都冇個, 有事既就會黎搵我. 就算我全職做聯絡人, 結果還不是會一樣? 不對嗎? 如果我說錯, 可以反駁我, 話到俾我聽我錯既, 我會好開心架, 真架. 證明你會Care呀嘛. 知道為什麼我喜歡重慶嗎? 因為在那兒, 除左星星同一D唔識既人會偶然係咁之外, 其他既人從來唔會咁做...從來都唔會!!!!!
20-7-2001
繼續打仗, 呢幾日都好似係度衝鋒陷陣咁, 好似打針之後呢幾日都未曾好好休息過, 今晚既思想教育課比想像中好過得多, 猶記得上次去重慶之前既思想教育課..... 都係唔好提啦. 今晚九點幾就覺眼訓啦, 不過仲有好多事要處理....
21-7-2001
今日好full, 匆匆忙忙... 不過到左夜晚居然都仲係有閒情諗咁多野. 今晚約左Ivy, 差唔多成年冇見過佢啦, 不過佢都仲係冇變, 樣冇變, 性格都冇變, 依然係咁大頭蝦^^ 嘻, 又多一個老婆仔啦, 不過佢好似同星星一樣咁高喎, 唔係好合邏輯tim. 送左佢去巴士站之後, 發現自己已經係去到灣仔油站果頭, 諗落好似去會考教室樓下果度搭巴士係最方便.... 諗起以前補習之後自己一個人等巴士既情況, 諗起果位叫做Paul既人兄... 諗落都幾搞, 其實如果唔係果陣時佢講左句咁既野, 我會唔會俾機會佢呢呵?
係巴士上無無聊聊咁又諗起星星. 赫然發現同佢一齊買既手錶爛左, 好似要話俾我聽 "傻瓜,唔好再諗咁多, 你地之間既緣份已經去到盡頭..."咁, 其實冇咩既, 爛左可以整番既, 不過整番又點? 始終會有裂縫係度. 突然覺得好失落, 發現自己其實一直都放唔低, 仲係好掛住佢, 成日諗起佢, 提起佢. 甚至希望可以再同佢一齊, 希望佢有一日會話掛住我, 鍾意我... 好想喊, 根本我就放唔低, 好似好灑脫, 但係始終我都仲未放得低, 始終都係咁執著... 發現自己好傻好傻.... 老大話我smart, Karen話我灑脫, 娟佢地話我理智..... 但係... 我... 好似辜負左佢地對我既期望... 理論上我係既, 我無後悔過當晚同佢講話做返朋友, 但實際上, 情緒上, 我做唔到佢地想像中既灑脫, 依然很想很想他, 還是很喜歡他, 期望他也會想起我, 會嗎??? 差點就為他哭了出來, 就差那麼一點點..... 我什麼時候灑脫過了??? 從來都沒有..... 從來...
22-7-2001
收獲總算唔錯, 基本上該買既都差唔多買齊... 好慶幸居然近視冇深到.
23-7-2001
返左黎咁耐第一次見到Cindy同Ada. 不過興奮唔起, 呢排既心情實在太差, 太起伏. 有少少有氣無力既感覺, 咩都唔想理, 咩都唔想做, 如果可以搵到一個避難所既, 我諗我可能會諗都唔諗咁衝埋去... 好想知道到底係度做緊咩. 早d離開香港會唔會好d呢? 或者重慶就係我呢一段人生旅程既避難所, 呢一段人生旅程既尋夢園. 或者...
今日去書展, 收獲甚豐, 【交換日記4】, 妙如既卡片書, 凱西插圖既【心靈雞湯】, 兩年前既書展我就尋覓緊既【昨天孩子•色】以及N多支筆, 只不過今年再沒有像上年搜掠得大量既贈品, 然而感覺甚佳, 比之上年一大堆贈品, 今年真金白銀買返黎既感覺更物有所值, 下年既書展.... 唔知同我仲有冇關連呢?
24-7-2001
聽日就去西安啦, 但係感覺卻是如此的不真實. 唔知點解, 就係覺得好唔實在. 掙扎左好耐, 決定帶同可愛既laptop同行, 雖然要佢陪我舟居勞頓會比較疲倦, 而且會較冒險, 但係經過深思熟慮, 應該俾佢好好習慣一下, 嘗試一下旅行既滋味, 今次算係小試牛刀, 當係一個小小既實習. 下年既暑假仲要佢陪我一齊去寫生呢, 到時會係一個更具挑戰性既旅程^^
at 2:00am
好有興致咁為網頁而工作, 然而...... 久未試過死機既情況下..... 疏忽了, 一切又要重新開始......
25-7-2001
好耐無試過係香港機場搭飛機啦. 兩年~~ 時間過得好快, 呢段時間發生既事太多, 或者我諗得太多啦.
到左西安, 落機既時候就好似上次我係重慶上機既時候既天色一樣. 只不過上次係重慶見到好多星星, 今次只有矇矓既月色... 入住既酒店叫萬年酒店, 係三星級既, 比我想像中既好好多. 早知係咁就唔駛帶咁多野啦, 不過有備無患, 太多總好過帶少既. 夜晚食左羊肉泡饃, 唔, 幾有特色既. 久違既普通話感覺, 我鍾意.
26-7-2001
係西安交通大學識左幾位新朋友, 其中有一位係來自重慶架, 果種感覺居然有如他鄉遇故知咁, 好興奮, 不過唔係同佢講左好多野lor, 應該話其實係冇咩機會同佢傾偈. 夜晚去行左一下西安既夜市. 第一眼感覺似乎熱鬧過重慶, 不過同時亦覺得呢度亂過重慶lor, 有可能係因為重慶點講我都比較熟, 有安全感d既. 返到酒店之後嘗試上網, 勁爽呀, 老大都係網上, 同佢傾左幾句, 好開心呀, 居然可以係西安上網lor, 而且仲要有人陪我傾偈咁正, 同老大傾偈其實好開心架, 唔知點解幾次我好唔開心都咁岩佢會係網上, 然後同佢傾偈居然係可以為我解開煩惱, 可能因為佢係星星既老大啦, 係重慶入面, 相信佢係最清楚星星既野, 明白星星既心事, 睇法. 所以對於我地兩個之間既野, 佢會俾到最客觀既意見, 而且會覺得佢講既野好有point, 對事物既睇法都會比較接近, 或者佢講得岩, 我同星星其實...係兩個極端既人...
27-7-2001
晨早開一個超嚴肅既會, 勁眼訓又唔訓得. 突然之間手機作動, 嚇左我一跳, 亦驚動左各方人士-_-" 不過精神係為之一振, 係小筠發既一句"good morning", 之後我關晒手機既聲音, 然後同小筠發短訊, 好好玩啊. 還好官式訪問都好快完結. 下午又係另一個官式訪問, 好悶. 今日係咪太過沈默呢? 莫名其妙地被Wendy問左我幾個問題, 原來我有自閉傾向咩? 我自己又唔係好覺喎, 其實反而係驚Wendy悶, 又驚佢覺得我冷落佢, 仲諗住儘量陪佢多d, 點知反而會搞成咁, 睇黎我真係諗得太多野, 庸人自擾就係咁啦, 係咪真係做人做得太認真呢? 我想做到遊戲人間咁, 亦都好努力去咁做, 或者做人一d責任感都冇既係咪會好d呢=p 莫名其妙地胃痛..... 睇黎下學期都係乖乖地準時食飯先得啦.
晚上去夜市, 本來係諗住同Wendy同佢既阿毛哥哥三個人去, 始終人多左就成日要左等右等咩都做唔到, 不過結果都係成大棚人一齊去, 途中發生左段小插曲, 去食羊肉串時遇到兩個廣東人搭訕, 一睇果兩個人飲左咁多酒, 心入面已經覺得少少唔對路, 後來仲叫我地飲酒, 又話係收數呀咁, 講真我就唔係太驚, 但係會有所提防lor. 我唔知如果阿毛唔同佢地講既話, 其他人會唔會諗過會有危機呢, 不過我倒覺得阿Ben哥哥唔會犯咩好嚴重既錯誤既. 我亦到相信唔會有咩事, 小心d就係啦. 其實唔好講得咁大聲, 唔好話俾人知我地香港黎既咁, 唔會有咩大問題架者.
28-7-2001
今日終於係去觀光, 而且終於買到我要買既野啦. 呵呵, 正呀, 不過好明顯已經虧蝕左十幾蚊, 太少時間去格價講價, 講價講得唔夠盡, 如果時間夠既, 應該可以慳多少少錢架, 單單係皮影, 就應該可以平多十蚊. 然後袋仔應該又可以平多六七蚊. 加加埋埋都夠食幾餐飯, 不過冇所謂啦, 岩眼緣咪好lor. 諗起上次買既紫砂=^^= 我覺得今日收獲都算唔錯.
去左半坡博物館, 兵馬俑, 華清池. 華清池就冇咩睇, 不過半坡同兵馬俑都勁正, 好多野睇, 不過時間就好少lor. 係兵馬俑度既導遊講得好好架, 不過好多人, 好嘈. 而且佢D普通話講得好快. 聽得有d辛苦. 夜晚去睇仿唐既歌舞表現. D女仔勁靚呀, 阿華話中國果然地大物博, 令我諗起星星之前講過話佢媽媽話香港ｄ女仔冇個靚喎. 今晚飲左杯半啤酒, 唔係好掂, 雖然唔會話醉, 但係覺得好大既酒味... 夜晚鋤弟, 我玩左一鋪就閃啦, 自問我又唔夠佢地玩得. 都係唔好亂黎=p
30-7-2001
尋日係一直落雨, 搞到睇大雁塔果d地方時勁唔方便. 我諗我一定會再黎西安一次, 玩得都唔夠喉既. 下午四點幾就食lunch, 終於一嘗哨子麵既滋味. 雖然上次都食過, 但係因為係唔辣既, 味道完全係兩回事, 真係係幾好味架^^ 今次搭既火車係硬卧, 之前聽章曄佢地講過話呢d床位係無可能訓得著. 但係都唔係呀, 可能因為有人幫我地睇住, 可以訓得好安心, 基本上我係訓得幾好lor, 而且訓得仲足過平時, 只係起身之後有少少腰酸背痛,
上海人始終比較傲氣, 上海交大既人唔及西安果邊既人容易接近. 唔係好主動咁同我地講野, 比較喜歡西安果邊既人^^ 夜晚跟上海交大既人去南京路, 影左好多相, 呵呵~~ 不過最特別既係同一個係街賣唱既結他手影左張相, 幾好樣架, 唱歌唱得好好架.
不過冇可否認, 上海真係一個好靚既地方, 同三年前比真係靚好多. 好正呀, 見到d建築物簡直係發左顛咁, 影左好多相呀. 係東方明珠塔上左最高果層, 感覺好爽呀. 有種不枉此行既感覺, 五十蚊豪一次都唔算過份呀, 好開心好開心呀~~ 夜晚出去上網收到星星手機上發過黎既短訊, 話左佢既新手機號碼俾我知, 又同老大傾偈, 之後發左一輪短訊後, 乾脆打電話同佢傾, 好鬼開心呀~~ 夜晚又搞到夜一夜先訓.
今日夜晚去黃浦江遊船客, 好靚呀, 真係好開心好開心, 好爽呀. 好鍾意上海tim, 之後直情係Send message 同小筠星星講, 夜晚又再去網吧玩. 之後番到宿舍同星星煲粥, Wendy 佢地係度講愛情史... 不過我就一於少理, 煲我既長粥.
發現同團有同一間小學既人呀. 有師兄師姊.... 世界真係好奇妙