新生活
舊生活~~ 9月
10月 11月
12月 1月 2月
4月
5月 6月
7月 8月
1-3-2001
最近好想寫d野, 不知為了什麼,
就是想寫... 因此, 最近日記長了,
亦很難得地一口氣回了兩封信, 並不為了什麼, 只是很想寫,
可能是在捕捉一些感覺吧, 可是不管如何, 想寫便盡情地去寫,
隨便寫什麼, 反正能滿足自己便是... 剛剛睇報紙時知道Dickson裁員,
雖然我只是在那做了三個星期的Temp. 但係聽到d個新聞心入面始終有d感慨,
唔知Ceci佢地同場度既妹妹仔Sales,Andy佢地有冇受影響呢?
雖然同佢地一d都唔熟, 但係希望佢地並冇受今次裁員影響啦.
講真, 九龍站果度邊度做得落去架, 交通雖然唔係話唔方便,
但係咁唔就腳, 邊有人會走去果度買野先得架.
伶伶仃仃一個商場, 入面又冇咩食, 裏面d野好多都係比成本價賣貴三倍,
又冇乜特別野睇, 開頭d人就話會貪新鮮, 去睇下所謂既hi-tech既,
睇完之後發現咪又係不外如是. 之後又點會再去喎.
正常既人都唔會視九龍站係一個好蒲點啦,
我係場度貼左兩三日label, 都冇乜見過職員以外既人, 買野既,
數埋都唔知有冇三個.... 之不過點講我都叫做係過度做過野,
都唔想見到佢咁快就收檔既....
心情甚佳, 同華峰叔叔, 文海,
文浩佢地用messenger講左幾句, 文浩把聲變左好多,
細佬好似大個仔左好多喎. 唔知佢地個樣又變左幾多呢?
好耐冇見過佢地, 好掛住佢地tim.
如果佢地真係今年暑假番黎就好啦, 好想見下佢地既樣,
好想搵番以前一齊玩既感覺, 不過大家都大左咁多...我諗感覺都冇乜可能一樣....但係冇所謂啦^^
噢.... 咁就打左半年日記啦喎...
2-3-2001
本來有P.E. 但係老師並無出現,
我地一班人企係度等左廿分鐘後, 開始有人離去,
基於我係科委員既關係, d人不斷叫我放人, 其實我都想走架,
不過我點話得事喎, 我只可以同佢地講話其實已經有人走左,
反正我又要等章曄出去買野喎, 費時返宿舍啦,
本來諗住去超市買完野再去操場搵章曄, 然後就番宿舍,
點知正門間超市偏偏就冇我要搵既野, 結果買左d餅之後,
都係要番去等章曄一齊出去掃貨為我地既星期六日儲糧...
宿舍換左一個管理員,
新管理員管得嚴左, 每日煮完飯都要收爐,
我諗以後可能會更懶煮飯, 唔係真係好餓可能都費事食lu...
可能咁都好既, 會瘦d... 只不過唔係好健康咁, 算啦,
順其自然啦... 今日心情突然有淡淡的哀傷, 也許不應該跟tar談起那話題...
正如我昨天跟Ronnie兄講既一樣, 我地係同一類人,
軟弱到不得了...唉.... 偏偏我仲要係果種唔想做溫婉嫻熟既人,
勉強自己去堅強, 係咪有少少搵苦黎辛呢?
或者應該將真正既自己坦白地show出黎,
但係真正既我到底係點既一個人? 難道多重性格,
天性矛盾既就係我真正既本性? 有誰能告訴我?
3-3-2001
經昨晚既搜索後,
實在累得不能再累, 所以毅然下定決心, 既然搵唔到合適feeling既留言板...
不如嘗試自己整, 抄人地放係網上既sample, 改左唔鐘意既地方,
勇敢地去試一試, 雖然我沒有學過此等高深的程式用語,
不過去抄襲人地既黎改, 應該難唔到我.
下個星期既時間應該亦比較多, 能夠下決心的,
我絕對夠耐性去做試驗, 加油!!
4-3-2001
Last night因為拖板出左問題,
而搞到跳掣, 煮唔到野食, 所以四個人十一點幾出去食宵夜,
食火鍋, 返到校門後幾秒鐘就有人黎鎖門, 差d就趕唔切番宿舍,
去到十二舍樓下, 門亦都鎖左, 不過樓下d位管理員好好相與既,
笑笑口咁幫我地開左門, 咁我地都好識做咁請佢食野既,
冇乜大問題, 不過感覺好似做賊咁, 好刺激... 之後番到宿舍,
章曄三個上網打麻雀, 坐同一張枱, 扮晒唔識咁, 同一個叫做pandox既人玩,
小筠仲用佢既溝仔技倆, 叫人鬆章俾佢,
結果就咁三個賭鬼就玩到三點幾四點,
我就係度睇佢地點樣調戲人地, 偶然幫佢地斟茶遞水,
一邊畫圖, 到今朝五點先訓, 唔知點解, 實在太過精神啦....一d睡意都冇....
今日終於搵到"愛情觀自在"啦,
原來已經有得租好耐, 不過俾人改左個好肉酸既名, 叫做"溝女和尚"....-_-"
簡直不知所謂, 完全冇左原來既味道...而且又冇廣東話版,
差少少feel. 不過都好過冇得睇呀, 但係我諗舞台上面,
會更加好睇^^ 唔知幾時會有呢個機會呢...
5-3-2001
天氣好, 老師心情好,
所以我既心情都好好, 今日打既分數奇高, 我既功課有優-,
可以拉番上次勁低既分數(中-),
希望呢個學期黎緊既設計課功課都可以有良或以上既成績啦.....
今日有幾個新同學呀, 唔知好唔好玩呢?
9-3-2001
好多日無打日記啦, d幾日忙於實現我既瘋狂計劃,
製造一個夢想中既留言板, 其實星期二晚已經改晒所有既參數,
花費左我好多既精神, 連Diary都無打到, 其實d幾日發生左唔少值得我係度用少少篇幅既事,
然而為左可以做一個屬於kps既guestbook, d幾日係專注於上網搵野,
但係真係好受打擊, 之前搵到既素材網站大多屬於kimo, 居然d幾日完全開唔到kimo既網站,
連我自己之前另外register既到開唔到,
整呢個網頁係一個好唔理智既決定? 點解用邊個server, 邊個server就有問題.
咁鍾意無端端ban 左D網站, 唔好俾人上網, 唔好開放D個市場lor,
其實D十幾年黎, 你係不斷有進步, 不斷對外開放,
我明白轉變係唔可以黎得太突然,
係需要時間俾你去接受新既方式,
所以我會明白有一ｄ野係有需要避忌,
有ｄ野始終係唔可以太開放,
但係我唔明白普通既網頁伺服器會有ｄ咩野會令你有需要forbid
佢呀? 一開始, 我黎到既時候, 你已經ban 左geocities同一系列xx.to
(come.to, fly.to, etc)既網站, 開頭我以為geocities有問題,
咒罵過佢幾百次, 後來終於明白問題不在geocites. Ok, fine, 我換server
lor, 為Karen同Sarah帶黎不便者, 睇唔到自己班既網頁&有ｄ朋友既網頁,
so far, 唔駛死喎. pchome超慢, d個未必關你事, 我唔會算埋你帳,
但係Uhome入面無端端又同我ban幾個, 呢ｄ網頁又有咩問題呀,
Leo既網頁我睇咁耐, 入面好似冇咩係同政治有關喎, ban乜叉呀?
好地地一個星期前, Kimo暢通無阻, 我load左ｄ野上去後唔夠一個星期,
你同我ban 左佢? 下一個, 你又想ban咩呀? ban埋hotmail 駛唔駛呀?
死PK, 我真係完全理解唔到到底你地ban網站係用咩根據,
如果以政治因素為根據,
我地呢ｄ渺小既私人網站有ｄ咩咁值得你為我地大費周章?
我真係唔明喎, 毫無規律可言, 你想我點?
我已經被你折磨到疲憊不堪,
但係我可以好肯定你地想要達到既目的一定做唔到,
我唔知你地想封鎖既係咩消息, 但係ｄ個咁既年代,
有咩消息係可以封鎖到? 未免太過多此一舉了吧.
我唔信你可以永遠封鎖晒所有你地唔想聽既野,
我放長雙眼睇下你仲可以封鎖幾耐!!
用左幾日同網速玩拉鋸戰,
我知好難玩得嬴佢, 但係我唔信我一直都搞佢唔掂,
更加唔上花幾日時間整既野胎死腹中, 我唔忿氣,
我連整出黎之後會係點既樣都唔知, 我唔會甘心,
最多咪五點幾起身load野, 無論如何我一定要試到得為止,
就算我真係用其他guestbook, 我都要load到佢上去,
我唔信永遠都搞佢唔掂, 我抖夠再同你玩過
D幾日真係很疲倦,
感冒菌又黎探我, 網上既野又找我麻煩......
不過同同學之間既關係令我覺得好自在,
似乎男同學們比以前好玩左ｄ, 相處好似比較自然,
莫非佢地以前真係覺得我咁生人勿近, 怕我唔好相與?
但係我一直都係傻下傻下咁咋喎, 亦從來冇扮過Cool,
而且人地同我講野, 我都好樂於答佢地既(除左有次牙肉腫痛,答既時候滿臉痛苦之外),
只不過甚少主動同佢地講野就真,
始終講普通話對我黎講係有壓力, 唔似講廣東話咁自然,
對住男同學女同學我都係甚少主動搵話題講,
而到依家我依然都係咁... 好奇怪最近會突然有咁既轉變,
開始會主動地同我講野, 同我開玩笑,
係因為佢地發現我唔多野講唔代表我cool,
還是發現我以前讀既係女校, 對我又多一分好奇?點都好,
係一個好既轉變黎既, 咁樣先至好玩架嘛^^咁先至似同學架嘛...
12-3-2001
昨晚好難得地九點幾就搞掂張圖,
唔駛捱夜兼有時間上網, 本來應該好有快感,
點知娟佢地反常地九點鐘上床睇書訓覺,
淨得我一個係下面孤軍作戰,
感覺有如我地平常既三點鐘我要熬夜畫圖咁, 差透了.
不過今次既功課真係做得好肉酸, 真係有如題目一樣, 勁垃圾...
唉, 其實勁驚會唔合格, 不過一來佢地上晒床,
令到我完全無心戀戰, 二來因為之前已經有d個idea,
雖然效果不如理想, 但係要我係短時間之內再重頭諗過,
重新再做一次, 簡直係冇可能, 唔係時間上既問題, 係實在冇mood,
冇耐性. 不過還好拎到入班房唔至於劣評如潮, 甚至有人話"很好看,
是誰的?" 不過我諗佢話好睇既係另外個張卦,
但最起碼冇話醜呀, 成績都有良, 都幾好彩-_-"
之前幾驚會肥佬呀... 好彩有驚無險....
呢兩日上網見到Wendy,
知道佢好唔開心, 雖然唔清楚到底係點樣既一回事, 但係大概get到佢為d咩而唔開心,
只想告訴她永遠都不會一無所有, 雖然對於Wendy某性待人處事方式不敢恭維,
甚至對於六月份海洋公園既風波仍印象猶新,
但係永遠我地都會係好朋友, 沒有了KLLY, 也不會有什麼分別,
看見了Wendy昨日的失落... 好想結束了kps, 讓klly來延續kps既精神....
我知道一切都會過去的, 我認識的Wendy一向都好叻女,
只是比較細路女, 人會慢慢長大, 我知道你會熬得過去,
一切都會回復正常的
前幾日同Kanae係icq度傾左好耐,
好耐未試過咁爽啦, 好耐未試過係icq度有應付不來既快感,
Kanae既打字速度實在厲害.
13-3-2001
今日小筠生日, 中午拎左隻"黑白雙煞"番黎,
係人地送俾佢既生日禮物-- 一隻好醜樣既兔仔(雖然咁講好傷佢自尊,
不過呢個係事實...) 一拎到入門口, 引起一陣哄動,
章曄馬上話宿舍唔可以養小動物, 因為佢最怕呢d野,
娟以及佢既朋友仔話隻兔仔好肉酸, 我無出聲,
不過意見同章曄一樣, 養小動物一d都唔好玩, 都唔知邊個整d咁既野過黎,
坦白講養寵物絕對唔岩我d種人, 連仙人掌都種得死, 養寵物喎,
實養死都得啦, 我唔想危害小生命, 所以嘛, 千祈唔好叫我養.
全宿舍基本上只有娟有咁既耐性照顧佢,
所以章曄話只俾小筠收養佢兩日咁多. 水電費終於結算,
兩個月用左四百幾蚊, 娟同小筠一知道張帳單貼左係樓下,
馬上採取行動, 落樓刪左個數目佢,
實在唔可以俾人睇到我地既水電費, 我同章曄落堂後係樓下人群中睇視察情況,
聽到有幾個男生係度話"嘩, d個房咁離譜架, 用左百一蚊, d個仲過份百七tim..."
我同章曄對望左一眼, 馬上閃開, 好彩我地夠快手,
趁未揚開之前先搞掂左佢,
如果唔係俾人知道我地比起佢地心目中既"過份"多成三四倍,
我地實成為眾矢之的, 實俾人係後面批鬥....
娟向收費既管理員哀求過後,
我地以後都唔駛再為水電費單既擔憂,
以後我地既水電費將個別地自己去學生服務中心交,
唔需要好似其他宿舍咁公諸於世...
雖然過黎之後都習慣地成為人地眼中既異類,
但係唔係真係話全部人都知我係香港黎架嘛,
如果真係通晒天既, 咁仲得掂既... 咪搞我.
14-3-2001
kanae, 生日快樂呀!
雖則心入面好清楚呢句話打係呢度係無謂既, 因為kimo一日開唔度,
我一日都冇可能load到野上去, 不過習慣左啦,
或者應該再搵過另一個server, 用番pchome? pchome呢排又快番啦,
但係.... 煩死啦, 一諗到呢個問題, 憎死呢度既ISP,
但係別無選擇, 再者可以係宿舍用專線上網已經好幸福...
始終又係特別照顧黎既, 或者我唔應該要求咁多啦.... 唉~~
留言板既問題依然未能解決.... 其實純粹係自己既執著, kps某程度已經成為我既個人遊樂場,
留言板既問題唔理都冇乜大問題啦...
今日Ronnie兄食左火藥, 燥死,
不過好耐無同人抬槓, 好玩死啦... 呵呵^0^ 話時話,
天氣唔再凍啦, 聽佢地講今年既重慶似乎熱得特別快...
中國三大火爐之一... 五年都要係度過lu, 一向天氣一熱,
我就會好燥, 或者重慶會為我帶黎改變~~~
15-3-2001
Vivian send 左個類似占卜既URL過黎,
結果基本上應該幾準卦, 因為係關於愛情既, 我未經過實踐,
唔係好肯定, 但係同我諗既差唔多.
不過最令我感興趣既唔係結果準唔準,而係佢用黎形容我呢種人既糖果---泡泡糖.
泡泡糖, 與口香糖雖然有少少分別, 但係基本上係同一類既,
莫非香口膠同我真係咁夾?
我同口香糖既關係似乎去到不可分割既地步,
連聽中既其中一首歌都係叫口香糖, 一首梁詠琪既舊歌, 或者...
應該考慮將個nickname改做口香糖....呵呵^0^
青檸妹妹終於放普查假啦,
留言板就旨意佢啦, 希望佢load到個file啦... 好期望呀
16-3-2001
終於送走左黑白雙煞啦,
養兔仔真係好臭架, 送走佢可以為我地減少好多麻煩... 尋晚skip左半堂maths....
d個semester第一次skip maths, 本來都冇諗住skip,
不過受唔住人地既誘惑. 隔離班係上學期成日同我一齊係maths堂抄同做畫法幾何既崔凱d個學期第一次去上高數,
我照舊例遲去到課室, 諗住揀個附近無人既位坐,
不過俾佢見到我, 話佢隔離無人坐, 示意我可以坐果度,
不斷咁同我講野, 講到後來唔知點解會講到果度呢,
佢話有少少後悔黎重慶讀書, 話呢度空氣又唔好, 又污糟, d女仔又惡死又粗魯,
佢係廣西黎既, 唔知廣西d女仔係咪真係好似佢講得咁溫柔呢?
不過事實上, 重慶人講野真係令人聽得好唔舒服,
好似今日既女的士司機咁, 好難聽呀,
重慶人講野就好似嗌交咁, 感覺好嘈,
而且同潮州話一樣勁多粗口係入面, 雖然我仲未識聽,
但係章曄佢地都話入面好多粗口, 雖然我由細都習慣聽粗口,
亦唔介意人地會講粗口, 甚至有時我都會講tim,
不過真係唔係佢地講野好似嗌交咁lor...
後來崔凱既同學要走堂, 佢問我走唔走, 我本來諗住寫完字,
訓到落堂架嘛, 但係諗起宿舍d湯差唔多飲得,
真係好鬼死想番去, 咪同佢講寫完字可能會番去lor,
點知佢居然留係度等埋我先走, 唔同佢同學走喎...
佢仲要睇睇下雜誌想同我講野, 見到我差兩個字就寫完就唔講,
話等我寫完先喎.... 無理由要人白等我架嘛,
所以寫完之後就同佢一齊走人, 然後我就番宿舍飲靚湯, 好味^^
本來以為今日可以唔駛上P.E.,
點知下午無落雨tim, 不過勁搞笑, 要收咩游泳證既錢呀嘛,
十張一百蚊紙入面有一張顏色比較鮮艷, 老師問我有冇check 下d錢係唔係真鈔...
基本上黎到重慶之後已經冇呢個概念,
呢邊唔似廣州深圳咁多假銀紙,
跟住老師好細聲咁同我講叫我拎張一百蚊去操場士多買汽水,
咩都唔駛講, 淨係同佢話無散銀, 叫佢找,
如果係假既佢會同我講, 點知士多入面無咁多錢找,
連賣都唔肯賣... 計劃失敗左,
跟住老師拎住張錢去問章曄班既老師, 我諗唔會真係係假鈔卦...
落堂既時候, 老師指定左我地班幾個人留低還器材,
開頭我仲以為佢要我留低繼續練排球,
點知原來佢叫我地留低係想請我地去食麵^^ 不過可惜呀,
要同章曄,小筠去買地拖, 交上網費, 所以無跟佢地一齊去食麵
好開心見到Per同以前有少少唔同,
似乎比以前睇開左好多, 雖然佢話考試考得唔好,
但係講左幾句之後佢會話算, 由得佢過去.... 嗯,
本來就應該向前睇架啦...
17-3-2001
宿舍好靜, 得我同章曄兩個,
娟一早就番屋企睇佢媽媽,
小筠尋晚已經去朋友度玩到依家都未番,
唔知聽日咩時候先番黎... 得我同章曄兩個人宿舍顯得好冷清,
中午食完飯後, 就同章曄兩個人去處理左上網費用既問題,
一拖拖左成個星期, 始終呢度D野係特別麻煩, D人永遠唔講清楚,
一時一樣, 搞到我地要行幾趟, 而且仲未完全解決tim><
因為呢個weekend好空閒既關係, 我地兩個人好好閒情咁逛左逛,
不過冇買到d咩, 想搵張似樣既生日卡都搵唔到,
買左幾條橡筋然後就番去租碟, 本來諗住冇新碟睇, 諗住租d舊碟睇,
點知發現左"偷聽女人心"同吳奇隆既一齣新戲, 就租左d兩隻番去,
跟住仲租左我想睇好耐既"十二夜",
吳奇隆果齣睇左十幾分鐘就冇再睇落去, "偷聽女人心"同"十二夜"都好搞,
我諗如果我有果種可以聽到人地心事既能力, 我一定會死,
咁鬼煩, 我寧要耳根清靜都唔要可以聽晒人地心事既本領...
雖然真係好有用, 但係要聽晒人地諗咩, 然後滿足佢地喎,
都好辛苦者, 盞自己搵黎煩, 邊有可能照顧到所有人既需要呀,
但係明知人地有需要唔去幫又好衰仔喎... 所以唔知係最好,
有時見到d朋友唔開心幫唔到佢地比起自己唔開心仲煩....
"十二夜" 睇完既結論係女人好煩, 好冇用, 話變就變.....
女人.... 男士小心啦, 不過最令人心寒既都係"不知不覺愛上你"入面既美琪賴恩,
千祈唔好得罪女人...
18-3-2001
好難得係星期日十點幾就起身,
將d衫放落洗衣機後就開始上網, 除左中間偶然斷線, hang
機以外, 幾乎係冇間斷, 一直到五點幾,
中間偶然一邊去搞搞部洗衣機, 熱d飯食, 一邊world wide wait. 將d
link 改完再load 上去, 今次係用doramail入面既homepage 功能,
雖然一直都覺得呢d係email server內部既功能唔係咁好,
但係冇可否認doramail.com 係重慶呢度平均黎講係比較steady,
最近甚至係我所有慣常留連既網站中load得最快,
所以決定試一試, 不過Ronnie兄既評語係"HO X SLOW",
不過短期內我諗短期內我都唔會換啦, 仲可以搬去邊呀?
geocities, xoom, angelfire, kimo 係屬於重慶呢度開唔到既網頁, 連server都開唔度,
pchome雖然最近狀態甚佳, 但係有少少陰影,
而且亦懶得搬番轉頭, 將我果part執出黎, 對於Sarah
佢地可能會方便d, 檔案管理度會有條理d嘛. heha有廣告,
兼且係台灣既地頭, 難保發生係kimo既事唔會發生係佢身上, 而d個基本上既係我唔想用番pchome既其中一個原因,
萬一有事, 最多都係唔up main page(再者main page
除左第一個版本之外, 一直以黎都係由我up, 都好應該到Karen
同Sarah照顧番...), uhome嘛, 自從我地九月一開始搵server,
睇住佢由可以申請到暫停申請,
半年以黎都仲未開始回復接受申請,
我已經諗唔到仲有咩可以容納我而重慶又可以容納佢既server,
換server... 我諗除非uhome再接受new application or kimo 回復正常,
如果唔係就等到我好無聊, 好得閒, 而dormail又發生左d令我忍受唔到既事啦...如果為你地構成不便既....
我都冇辦法啦.... 對唔住.
其實今日都好墮落,
上網上左咁耐, 其實又冇做到d乜, 不過走左去睇一地寫既野,
一d生活點滴既野, 不過我好鍾意睇d類野既, 而d個基本上都可以係最開始同Sarah提出想整一個咁既website既既動機,
滿足自己偶然既寫作慾望,
不過實在冇諗過可以堅持咁耐而且越黎越有心機寫就真,
因為以前細過試過寫日記,
但係次次都係寫左一兩次之後就唔想再寫,
然後仲要好狠咁毀屍滅跡, 因為覺得完全無私隱可言,
冇諗到而家擺係網上任何人都可以睇, 更加冇私隱可言,
我居然可以寫咁耐, 而且最開始係認為會好似tar所講冇可能可以寫d好personal
既野同埋好似batis結束"隨口up"時曾寫話打之前成日要諗人地睇完會點諗咁,
我以為自己係呢度打既會超行貨, 更冇諗過會將自己一d好內裏既感覺赤裸裸咁係呢度show俾人睇,
但係結果好出乎意料之外, 我會寫左咁多好內心既感受出黎,
連對朋友既不滿都打左出黎(可能係覺得(應該話肯定)當事人唔會notice到所以好放心咁打出黎啦,
somehow, 冇乜邊個上黎而且有心機睇),
真係好意外我居然可以一直咁打落去, 亦都好享受d種咁暢所欲言既感覺,
某程度當左佢係之前經常聽我講心事既朋友既代替品,
似係係度同朋友閒話家常多過係度打日記...
See, 一打打左咁耐, 聽日要交既design草圖都仲未畫,
不過上網搵idea抄係一個絕妙既方法, 最起碼今日下午已經get到一個idea,
仲差兩個, 萬一趕唔切既, 照抄可也, 始終d同學都只會去library搵書抄,
冇人會好似我咁有得(諗到)上網抄既, 唔好以為我抄idea係一個好卑劣既行為,
過左咁多個世紀, 人既創意差唔多江郎才盡, 邊度諗到咁多新idea,
更何況我只係一個剛起步既freshman, 抄得好都係一個技巧黎架,
最起碼我上次抄既野冇人知道我係抄呀,
更加唔會好似上次我地班既同學交既功課咁幾乎一模一樣(因為佢地抄既係同一張圖,
一個改左少少, 一個一d都冇改...)我真係覺得自己抄野幾叻架,
好似以前physic抄功課咁, 我從來都未俾Sigh婆發現過既,
一直都唔理解佢地讀A班既應該好聰明,
點解連咁基本既抄功課知識都冇, 成日都俾Sigh婆發現,
而我呢個C班人差唔多次次都係抄都未試過有事... 不過都係Christina最勁,
到而家我都記得佢F.3時抄既果張"廣告", 夠絕.
19-3-2001
娟唔係度,
我地幾個好似孤兒仔咁, 冇人煮飯, 要出去食飯,
今日仍然好悠閒, 雖然陳綱(設計課既老師)話星期四要交八份草圖,
但係星期三有的是時間, 可以慢慢做,
而且今日勉強都叫做做左兩張既^^
再者已經放左兩個星期假既音樂素養本來今日要上堂既,
不過老師放左我地飛機, 所以又番黎上網, 本來唔係好敢上黎,
因為講左一d令人唔開心既野, 實在唔識處理,
不過諗住上黎陪青檸妹妹先頂硬上咋, 皆因佢真係好鬼無聊,
無野好做, 悠悠長既十幾日假期, paul's Sec.既朋友們又冇假放,
得佢一個都冇咩搞作, 都叫佢過黎陪我架啦,
順便叫阿媽買部冷氣機呀嘛.... 又唔肯喎, 抵佢死啦...
不過正因為佢咁無聊, 先有時間應酬我, 幫我save左d我呢度睇唔到既網頁send俾我睇,
幫我睇睇d網頁有咩料到,
好過全部都要等到七月中番香港先有得睇呀...
而且我都唔想又好似上次番去咁, 一番去就睇成四五個鐘,
搞到四點幾先訓...
本來今日d同學話過黎睇VCD,
睇好陳年既"東方不敗", 係陳綱借既,
不過午睡勝於一切, 結果個個都訓到唔肯起身, 冇過黎睇,
所以我就好安心咁同青檸妹妹雞啄唔斷, 講埋ｄ無謂野,
嘩而家唱K八蚊都有得唱?入去淨食lunch抵到爛喎,
不過我又唔係香港關我鬼事咩...
><唔好問我意見,
讓我置身事外, 係我ｄ個位置實在唔應該再講任何野,
我亦都唔知我仲可以講咩, 好難做........我只希望我既朋友們都開開心心
20-3-2001
今日終於去左磁器口既古鎮,
好正呀, 好有古樸既味道, 對比內地既旅遊景點,
商業味亦唔至於太濃,
可能這地方還不至於有價值到可以吸引大量遊客吧,
走在那石板小街上感覺很好, 唯獨是人太多,
重慶人的確很空閒, 即使不是假期也是人山人海的.
我想如果沈平來到這裏肯定可以待上好幾天的,
這裏可以畫的太多了, 那種民居的感覺真的很舒服,
古鎮裏面很多都是住宅, 當中也有一些是已是危樓,
裏面有人住否則不得而知, 老師帶我們去到一個小巷裏,
裏面是一幢很老的房子, 簡略地介紹了一下那個地方,
同學們一陣嘩然, 我不太明白是為了什麼,
我想可能這地方是很有名的吧,
後來他們說據講這老房子很久以前是一個寺廟,
曾經有一個皇帝在此出家當和尚, 怪不得他們有這樣的反應...
那地方一點都不像寺廟. 今天實在沒有甚麼耐性寫生,
四時多大概畫了一個小時, 我已經按捺不住了,
我坐的那個位置剛好在太陽低下, 熱得要命,
看了看同學畫的畫後, 就跟另一個同樣已不想再畫的新同學(鄧陳)出去閒逛了,
離開了陽光, 感覺清爽多了,
走在街上才發現其實已經有不少同學已經到處逛了一圈,
買東西吃, 那地方有很多吃的, 有那種中看不中吃的糖畫,
有重慶著名的毛血旺, 有古老的土豆泥, 有我不感興趣的炸魚,
還有很美味的炒花生米... 在街上看見李博及其餘幾個男生,
他們拿了一袋花生米請我們吃, 我試了後隨即問他們在那裡買,
因為真的很香脆, 是上佳的看電影食品,
誰知他們竟然把剩下的全都給了我, 推也推不掉,
之後見到了蘇璞他們在吃那些很漂亮的糖畫, 看人家畫水彩,
然後我便做了個順水人情, 把花生米給了他們,
之後另外買了一袋回宿舍,
本來我們其中幾個女生是想在那吃了晚飯才走,
因為六時半還有課, 吃飯的時間其實不多,
我們隨便進了一間餐館, 豈料價錢卻貴得令人咋舌,
於是我們便離開了(所謂貴其實只是十多塊錢一個小炒,
在香港, 這絕對是超值, 不過對比在重慶,
特別在我們學校附近一般葷菜最多也只是八塊, 真的是很貴)
結果還是折返學校, 各自吃晚飯,
回宿舍吃了幾個肉包便當是晚餐.
夜晚落堂後番宿舍大掃除,
真的是大掃除, 連露台既"小廚房"都整理左,
真係好污糟, 搞左一大輪真係有虛脫既感覺,
不過執完真係舒服好多, 亦決定將部份多餘既物品搵人認投,
如果冇人要既... 唯有就咁掟左佢lor,
因為對於我地黎講已經係毫冇用處... 宿舍太多野啦.
今日有黃新星(轉系過黎既新同學)問我點解成日都笑笑口,
好似好開心咁... 雖然俾佢咁問好怪, 不過幾開心lor,
因為可以俾到一種開心既感覺俾人,
我知道以前係香港我一定唔會俾人d種印象既,
唔知係因為自己變左定係真係係度過得幾開心,
總之覺得依家好似可以好容易地搵到一d野去令自己開心享受,
偶然隨便望出窗, 見到d雀仔可以感很開心,
夜晚放學番宿舍見到d星星又可以覺得好舒服喎, 或者d度所有既野對我都有新鮮感啦,
更重要既係覺得其實生活上好多好多野係值得欣賞,
可以令人回味, 識唔識得捉住d種感覺, 人生都係咁過,
點解唔好好享受一下喎, 做一個開心快活人唔好?
諗咁多好易老架, 唔係笑多d, 人都靚d架咩?^^
21-3-2001
畫幾點名, 好多人都冇去到,有d未落堂就走人,
我例牌坐到最後面去, 汪宇同黃新星坐係我後面,
幫幾個無到既點左名, 不過因為我地後面本身好少人,唔可以話幫全部人叫到,
始終老師唔係傻既,
諗都諗到無理由全部聲都係係一個方向過黎架嘛,
可惜我唔係男仔, 如果唔係都可以幫幫忙呀, ><今次既畫幾功課好煩,
有少少失預算, d幾日會幾忙tim. 娟中午番左黎, 帶左好多野食,
勁正!
真係好墮落, 草圖仲未做好,
卻走去睇vcd -- Never Been Kissed,
女主角係差唔多結局時講佢兩次高中經驗既遺憾,
諗落中學時代其實都有唔少遺憾, 還好都唔算係好嚴重,
遺憾多多少少都實會有d, 但係永遠都冇得番轉頭,
中學既時候冇好好享受, 冇識多d朋友真係幾可惜,
但係都算係咁呀, 我都唔算係死讀書果種人,
不過真係後悔以前玩得唔夠盡, 唔夠放.... 而家已經讀大學,
唔可以話番轉頭去玩盡d, 不過會努力將中學時既遺憾彌補番,
要好好享受, 嘗試大學生涯既每一點一滴,
雖然我冇你地有既莊, GPA, etc, etc. 但係係重慶我亦有一d你地冇既經驗,
算係扯平啦
22-3-2001
雖然有一大堆野要做,
但係下午都係沉醉於網上, 好墮落>< 不過最近幾開心, 同d同學好似更加熟絡,
感覺很好...
23-3-2001
本來最近同同學之間既關係越黎越好,
亦令我對於Ivy曾經對我提出過可能會發生既問題既隱憂消除,
已然今日卻來了個一百八十度既轉變,
我最擔心的事情似乎一直在醞釀, 只不過我意識唔到...人言可畏,
實在好唔開心
學生服務中心(即管學生宿舍既department)既人黎檢查,
話有人向佢地投訴我地宿舍, 話無理由大家都交咁多錢,
我地宿舍會咩都有, 果兩個人又話我地d電腦, 話咩我地依家先year
1, 又唔駛用電腦畫圖, 做咩要買電腦,
甚至話如果係好似我ｄ咁既特殊情況應該由外事辦係外面幫我租地方住,
依家咁會令佢地好難管理, 仲話我地有錢應該搬出去住,
想點都得... 好過份Lor, 咁算係咩意思呀?我唔明ｄ人投訴咩lor,
依家ｄ野又唔係學校俾我地既, 全部都係我地真金白銀買番黎,
唔係去偷去搶, 亦唔係人地送, 咩叫大家都俾咁多錢?
我地一個月交幾多電費, 佢地交幾多? 佢地鍾意咪自己去買lor,
唔抵得我地可以自己去買架. 依家邊個話電腦一定要用黎畫圖?
唔畫圖唔可以買電腦架咩? 我地鍾意用鍾意買唔得咩?
覺得我唔應該住係度, 去同外事辦講lor, 同我講做咩呀?
唔敢惹外事辦既人就黎俾說話我聽? 我地鍾意係學校住喎?
點解要搬出去呀?我地有權利用宿舍既電架喎？
點用關佢地鬼事呀?
我真係唔係好明點解要投訴我地lor,
我地已經好低調去處理, 亦無得罪人, d人咁八做咩呀?
依家係唔係我係係香港黎既好恰d?
係因為唔想玩寸所以唔出聲,
但唔代表我可以無緣無故任人指責,
唔好迫到我忍唔落去... 我仍然係情緒化既我, 唔知會做d咩出黎架...
24-3-2001
雨天出學校買野又唔記得整高d個褲腳,
結果褲腳濕到離晒譜, 番到宿舍就換左短褲,
其實今日都仲幾凍, 著短褲出去實凍死,
不過我地宿舍入面一向比較悶熱,
每次行六層樓上黎後都會有換短袖既衝動,呢兩日係宿舍甚至係不顧形象(雖然一向都冇形象可言),
將前面唔長唔短既瀏海解決, 個樣極其搞笑, 不過無所謂啦,
都係自己人.
宿舍多左五個小生命,
三隻小蚚蝪同兩隻烏龜, 我地用小魚缸養,
但係曾經有兩次有蚚蝪逃離魚缸,
害我同小筠要到處尋覓佢地既踪影,
本來我係真係唔會去搵手去搞佢地架,
但係經尋日既尋蚚蝪事件後,
要我用手拎係佢地已經完全冇問題, 佢地咁嬌小玲瓏,
摸落都幾得意呀, 不過顏色比較肉酸... 至於烏龜,
有一隻我地以為佢死左tim呀, 郁都唔郁,
點知從再次由某高度下墮後又有反應啦喎...
之前小筠仲話要做解剖, 要留低個龜殼....
25-3-2001
失左預算,
原本以為下午可以做完色彩構成功課, 但係調色手氣唔好,
搵唔到感覺, 搞到十一點先做得完... 失策>< 不過好奇怪,
我d同學甚少去我宿舍, 但係d兩日都有人黎我宿舍睇我既圖畫成點...
怪事, 不過點都好, 只要唔好俾小筠講中就得...
晚餐去食火鍋(當然係麻辣火鍋啦),
飲左少少啤酒, 真係好少咋, 半罐都唔夠, 不過好似有少少醉,
番宿舍時有時時頭暈既感覺, 但係照理應該係唔會醉架....
咁少, 以前都試過飲成罐, 一d事都冇架喎, 做乜會咁奇怪既??
唔通又玩情緒?? 要準備進入狀態, 為網頁換個main page, 唔好d個時候搞d咁既野喎...
26-3-2001(1:00p.m.sth.)
真係萬事不順...骷髏斷頸,
準備洗衫就冇水... 本來今日起身時感覺已經唔係咁好,
開頭諗住過一陣會好d, 但係似乎是越來越糟糕, 身心疲累,
突然好想喊, 覺得好辛苦... 有人可以借個肩膀給我依靠嗎?
突然覺得好無助... 發生咩事?
26-3-2001(6:00p.m.sth.)
係情緒超低落既情況下上網搵野,
本來預左咩都搵唔到, 好意外地搵到一個有好靚既素材網頁,
入面有好多好靚好靚既海豚海洋feel既素材,
諗起之前做既色彩構成設計, 心情好好多, 感覺好舒服,
再加上見到Batis info入面寫既野,
發現自己做既野原來係會有人appreciate, 好開心. 舒服好多啦 .
還好剛剛還能控制到淚水...
不過下次連俾佢係眼眶內滾動既機會都唔會俾....
我唔想再為唔開心既野流淚...
27-3-2001
終於解決左一個可預見既財政問題,
付出八百幾蚊(足夠我係度用個幾兩個月,如果唔駛交上網費既話),
將宿舍四部電腦連線, 長痛不如短痛, 一次過俾八百幾蚊,
以後每個月可以慳二百幾蚊, 抵啦, 而且又方便d喎,
我同章曄可以一齊上網, 又可以去佢地d電腦度偷野, 唔駛用floppy,
而且可以騰空一條電話線, 人地唔鍾意打mobile都可以搵到我地嘛,
絕對係百利而無一害... 不過如果唔係d無理ISP無緣無故加價超過百分之一百五十,
無通知不單止仲要d網速越黎越慢,
令本來已經佔左我地每月零用好大一部份既上網費既二百幾蚊變成五百幾蚊,
我地係唔會狠下心腸, 拎八百幾蚊黎聯網...下一步會係換ISP
我發現去磁器口既主要目的唔係寫生,
而係行街食野, 同上次一樣畫左一個鐘咁上下就去行街街,
去買野食, 買花生之外, 今次仲買左隻叫化雞, 本來係廿蚊隻,
不過我同學叫我唔好出聲, 然後佢黎問價講價,
結果十五蚊就有交易, 厲害!! 五蚊係呢度...
需知可以夠食五兩雲吞, 足夠滿足一日既食量...
番到學校腳都軟晒, 冇去上堂... 墮落下先啦, 身心依然疲倦,
沒有骷髏陪伴好運滯, 少出門為妙... 好似今朝咁,
企係度等人都無端端俾個行路唔帶眼既男生撞埋黎,
撞到嘴角同下巴痛左好耐, 仲要連對唔住都冇講,
同佢幾個同學係度眼望望咁企係度笑, 頂佢#@!$%...
如果係係香港既話, 我唔鬧佢既話就實在太對唔住自己,
對唔住曾經俾我鬧過既人... 身為大學生連最基本既禮貌都冇,
仲要擺出果種好似自己無錯, 係我撞埋去既態度喎...如果唔係我d普通話仲未好到可以用黎同人爭論....我先唔會就咁算
28-3-2001
連網之後幾乎係全日都online,
感覺實在過份頹廢, 做甚麼都依然係冇動力,
空間構成既小模型完全冇idea應該點做...夜晚因為之前同阿媽係messenger講左句最近唔係幾好,
令佢擔心而打電話黎安慰我, 講左好耐....
好耐未試過咁樣傾電話啦, 亦好耐未試過有人打電話俾我
29-3-2001
今日下午本來應該好悠閒咁留係宿舍上網,
偏偏要考試, 仲要係考d勁無聊既野, 有幾無聊?
考學校既學生手冊呀, 夠晒無聊低能... 都唔知考黎做乜.
之後做體檢(即Bodycheck), 更加無聊,用左個幾鐘, 所謂既體,檢就係量血壓及極隨便地聽聽肺,
整個過程只需兩三分鐘, 但用於排隊既時間...
簡直是沒有語言(in 普通話)
30-3-2001
唔駛考排球住, 天下太平~~
有多少少時間, 唔會肥得咁難睇呀嘛... 對, 預左肥佬架啦.
只可以寄望游水可以滿分
31-3-2001
以為自己可以control到,
但係原來我根本就沒有長大, 依然係喊包一個,
只是將眼淚強忍了幾天, 以食野上網麻醉自己,
以為唔去諗會頂得順, 但係最㚵還不是哭了出來,
以後我諗唔會再勉強自己去忍, 結果既是一樣,
又何必加插這樣的過程, 食咁多花生搞到勁熱氣, 令到"青春"回歸到臉上,
想喊就喊應該會比較健康... 我又唔係男人大丈夫,
流流淚又何妨, 活得開心應該係想做就去做, 該笑就笑,
想哭便哭, 大哭大笑比起努力掩飾悲傷強顏歡笑更有益身心
突然有所醒悟,
我居然忘記自己在網頁paste過既一遍文章,
我應該為損失制定一個停止點. 足足一個星期我才想起...
很失敗, 一個星期很足夠了, 再見sadness. 我要去搵番開心啦,
我知道係邊度會搵到佢架啦~~Bye
呵呵, 換版啦,
決定左以後三個月換一次, 一年四個version, Yeah!! 下期預告:
藍色既海洋感覺~~ 好唔好? 反對? Sorry, 反對冇效喎,
唔好忘記我一向都好橫蠻, 我決定左點會咁易話改就改呀~~ 呵呵呵~~~~~~~~~~
好爽呀~~ 去章曄部機搶左好多MP3, Jukebox有成四百五十五個音軌,
史上最強... 下一步就係侵入小筠既領地, Yes!