9月 10月 11月 12月 1月 2月 3月 5月 6月 7月 8月
1-4-2001
tar講左一句說話, 笑死我~~ 點會諗左去果度既? 我會鍾意佢?? 傻左呀你? 雖然我真係唔知道愛情同友情會係點分, 但係對佢我絕對肯定我當佢係好朋友lor, 其他人就好難講啦... 哈哈~~~
晨早九點, 漆老師打電話過黎約我三點去佢屋企坐, 指點指點我既畫, 諗落實在汗顏, 在美術課所畫的實在很馬虎, 一改我慢條斯理的作風, 只有速度而缺乏質量, 用一個小時完成的素描質量實在很丟沈平老師的面子... 慚愧之極, 還好漆老師沒有說甚麼...六點半同小筠,章曄出去食飯, 勁搞鬼, 半路上遇到一個大眼睛既小女孩拎住一個水樽, 向我地走過黎, 一直對住小筠重複地講兩個字, 讀音有少少似廣東話既"蕃薯"(不過實際上講咩就唔知啦), 小筠俾佢異常既行徑嚇親, 開始逃避, 點知個0靚妹死跟住佢, 小筠更加驚, 開始同佢玩捉迷藏, 使勁向前跑, 個細路女更加唔放過佢, 係咁追住佢喎, 個細路女既阿媽一臉無奈, 我同章曄兩個係咁係度笑, 小筠就一臉驚慌, 結果跑番住頭匿係章曄後面, 不斷咁講"我知錯了, 饒了我吧..." 好好笑~~~ 真係唔係好明個細路女做咩會追住小筠, 不過真係勁搞笑, 一個廿歲既女仔俾一個最多只有四五歲既女仔追住, 嚇成咁~~
2-4-2001
PcHome又Short左啦, 搞到呢兩日都load唔到野上去, 唔知趕唔趕得切呢? 勞師動眾要青檸妹妹同tar幫忙, 結果都係失敗左... load得一半上去, 得半份禮物, Karen 收唔收貨呀?
見到Emily online, 好耐冇見到佢online啦, 好掛住佢, 不過我諗唔會再主動同佢講野啦, Alien應該係佢既生活中淡化消失, 我唔想再講呢個大話, 雖然佢可能一早就發現我可能係女仔, 但係當初我的而且確係間接地欺騙左佢, 點解要答佢冇女朋友而唔係話俾佢知我係女仔呢? 好後悔~~ 讓Alien慢慢消失應該會係最好既結局..... 對唔住><
3-4-2001
今日美術課好有耐性呀.... 畫到d人差唔多走晒先至收檔, 而且仲要係係大量蟲仔既不斷襲擊下畫左接近兩個鐘, 真係好難得, 而且夜晚都有去上機, 不過上左一半就走人lu, 因為睇住課室入面大概只有一半的出席率, 一早就已經想走, 後來見到李博同傅劫蠢蠢欲動仲唔即刻執野閃... 同Karen傾左好耐電話, 講左差唔多半個鐘, 好爽呀, 好耐未試過講咁耐電話, 雖然中間斷仲兩次線~~ 呵呵, 生日快樂呀!!
4-4-2001
絕對係多事之秋, 章曄腸胃炎, 小筠心血來潮番屋企, 娟再一次收到警告信要佢交電話費.... 人心難測, 有時想單純d去睇呢個世界都唔得, 娟以前輕易相信朋友, 借身份證俾人, 結果所謂既好朋友用佢既身份證買左兩張電話卡, 欠落幾千蚊既電話費就人間蒸發, 害到娟雞毛鴨血, 唔見錢, 冇左朋友, 俾屋企人鬧左幾次, 點解d人咁無良心?? 幾千蚊係呢度分分鐘係人地幾年既年薪... 除左可以嘆息娟遇人不淑, 還能說甚麼嗎? 全心地去相信一個朋友, 而佢卻是存心地去欺騙你... 還好我d零用係係香港時預支, 可以私自挪用廿千零蚊借俾娟, 本來諗住黎緊既幾個月會有錢剩, 而家要慳d先得, 如果唔係就要屋企人寄錢先可以捱到放假啦, 唉~~
5-4-2001
諗住聽日運動會可以訓到日上三竿, 居然話俾我聽要七點四十分要去系館集合睇運動會既開幕禮>< 平時上堂我都係七點廿分先起身架喎, 仲諗住可以有一個非周未既日子可以訓晏少少....... 點解要咁殘忍
6-4-2001
晨早起身去睇開幕禮, 意義何在呢? 同呢度既人既審美觀可能真係有少少分歧, 佢地講既俊男美女我一d感覺到冇, 除左有幾個真係唔錯之外, 其他... 至於衣著打扮.... 佢地覺得靚, 對我來說是俗氣, 不過我地學院果d都ok啦, 不過見都d男同學著老西, 真係忍唔到笑. 睇完開幕禮後番宿舍再訓過, 訓到三點先起身, 唔知係訓得太多定係咩, 頭勁痛, 自從黎左呢度後都未試過咁既... 雖然以前勁常性都會痛到想死, 狀態其差, 雖然如此都出去行左街, 租左碟睇... 不過實在做唔掂今次既畫幾功課, 唯有聽日問人借黎抄, 實在冇心機做><
7-4-2001
十一點幾起身後幾乎都係不停咁係度做功課, 做模型, 但係唔係幾順利, 割錯野係習以為常, 但上學期做模型搞左兩個星期都未試過整𠝹親手, 今日居然一連兩次, 雖然並唔痛, 但係實在令人心煩氣燥, 唔係幾好mood. 夜晚對住青檸妹妹更加係無理取鬧, 講野九唔搭八.... 當係就下我啦, 今日唔係好掂呀嘛.... 聽日仲要繼續畫埋張圖..>< 不過零晨過後勁正呀, 換另一個isp既帳號上網, 終於開到geocities, 開到kimo~~ 太美好啦. 不過呢個帳號網速比用開既163慢, 而且好難撥得通. Anyway, 以後終於可以去睇我想睇既website 啦, 可以下載好多好多歌, 可以搵好多網站黎抄idea, 呵呵呵~~~~~~~~正~~~
呢幾日唔係好想online... 突然發現見到佢online係一件好討厭既事, 以前好鍾意見到佢online, 可以同佢傾偈, 但係而家真係唔想見到佢個名係個list到變做藍色, 好似有人曾幾何時話過以後見到我一定會hi我, 但係結果次次都係我hi佢既, 唔hi佢就唔同人講野喎, 不過重點唔係係呢度, 邊個hi人先根本就冇所謂, 但係每次我hi完你之後, 講得個幾句就話有事要走先... 有時真係懷疑到底真係次次都咁岩有事定係你唔想同我講野呢?? 你覺得我好煩or what? 點解唔可以再好似以前咁吹水? 問題到底係邊?? 我唔想睇住一個咁岩傾既朋友變得咁生疏.... 就好似以前好多段friendship 咁... 我唔想再有咁既情況, 對所有朋友都係.... 真係唔想.... 可唔可以話俾我知我地之間既friendship 係唔係真係forever?????? 可以嗎??? 我真係好懷疑........
8-4-2001
本來諗住下午搞掂晒空間構成既野. 不過... out of plan, 到十點幾十一點先finish, 不過勁爽, 因為下午唔係不停地做做做, 而係一邊做, 一邊icq. 好開心, 見到Sarah online, 番到重慶後, 一直都冇佢既消息 今日終於見到佢啦. 真係好開心好開心~~~~~~而且佢六月份會番香港tim ar... 應該可以catch a chance 見到佢卦, 如果佢唔過黎探我既, 我最多低能少少, 番香港個幾星期以後番黎考幾日試再番去lor.... 既然有Ah Ling 同Sarah兩個, 已經有足夠既理由令我番香港. Anyway,到時再睇啦...^^ 好期待呀.... e.... 睇黎要刻意d地去減少少磅, 咁你又再肥多少少喎.... 咁我地既身形咪接近少少lor.... 咁係咪會兩個都靚d呢?^^ 真係好開心呀~~~~~~~~~~~~好想大聲咁嗌出黎, 好讓全世界都感受到我既開心~~~~~~~~
9-4-2001
呢排真係夠晒大起大跌, 話口未完, 今日又整單杰野, 真係全面陷入經濟危機啦. 無端端中國電信整封信黎話我欠三個月電話費, 諗黎諗起都唔係好明一條上網專線俾上網費, 座機費之外原來仲要另外交電話費, 而且之前又冇講清楚, 咁都算啦. 我真係計黎計起都唔係好明點解會有成千幾蚊既電話費lor. 仲要好離譜地淨係第一個月居然有成七百幾蚊?? 我地部電話淨係可以打入打出要另外用電話卡架喎, 換句話講七百蚊既電話費就係上網時間既電話費, 而該月既上網費用只不過係二百蚊, 電話費居然可以係差唔多四倍??? 條數點計都係冇可能咁貴lor, 簡直係無野好講, 如果係係香港, 我打死都唔會俾錢, 一定check晒數... 慢慢同佢計清楚. 但係中國嘛.... 呢一點一向都係最乞人憎既地方, 官大過天, 說甚麼都是多餘的..... 簡直係欲哭無淚... 不明不白唔見左七百幾蚊(另五百蚊章曄攤付), 仲諗住五一去第度玩喎.... 哈... 淨番既錢夠我用埋呢幾個月都偷笑啦.... 淨番三千一, 一千留黎番香港時做路費, 即係由今日起到七月頭, 淨係得二千一大元... 要諗盡辦法慳錢先得啦....... 咁大個女都未試過咁乾塘... 不過頂得住既... 慳d電, 做模型揀d平d既料lor...唉.... 真係赤貧lor, 仲諗住睇下六月番唔番到香港喎.... 不過得既.... 仲好tim... 番到香港就有人贊助架啦....
e.... 失敗呀... 公公入醫院我都唔知, 仲要係tar漏口風我先feel到有d唔對路, 好彩冇咩事者.... 嚇死我...
唔.... 係咁橋定係咩呢..... 骷髏今日俾同學整壞左... 每次骷髏壞都會有不幸來臨.....有時真係唔到我唔迷信. 正如CE oral時唔記得帶星沙伴我上路....呢一科成為我唯一一科成績最意料之外地差既一科....真係好邪.......
10-4-2001
唔駛去磁器口好彩, 唔係實凍死~ 尋日早上還在嗌熱,著住件紅噹噹既短袖衫走黎走去, 下午已經再著番灰色, 凍到係咁震, 是因為縮埋一舊畫速寫既樣太搞笑吧... 成為了同學們既目標, 仲要好可愛地將骷髏都畫埋落去, 老師既評語係邪教物體... 不應強調...
噢, 今日見到一d形容唔同日期生日既女性既性格... 唔知各位有冇發現KPS入面邊個係異類呢? 其實上次我生日既時候諗到要為Karen做份生日禮時已經發現啦, 不過異得黎呢, 都唔會太另類啦, 2+1都係等於3....KPS可是有三條三哦... 不明白嗎? 証明你冇我地三個心(^-^)~~ 慢慢諗啦, 諗到之後要好好記住"三"呢個字啊~~~ 呵~~ Karen, Sarah ------>click<-----入黎睇睇你地係點樣既女性啦. 我沒有做任何修改,照paste 咋... 所以好多錯^^" 我自己果段都paste左, 入面有教點追呢兩種人tim ar. Sarah好靚女架, 各方好友可以參考下喎... 呵呵呵.....
11-4-2001
做調研報告, 本來以為好快可以搞掂, 點知係系館做到十一點幾都未搞掂, 結果就搬d野番宿舍做. 我同黃新星係奕葦房到做, 李玉娟就拎去佢自己宿舍做, 其實本來個幾鐘就可以完成, 但係一番到宿舍一熱鬧進度就會慢好多... 做到仲差最後少少既時候, 奕葦既同房都訓左, 為免嘈到人訓, 我地就搬左去我宿舍做, 但係去到我地房進度就更慢, 本來十幾分鐘就可以搞掂既野, 因為電腦既吸引力太大, 結果..... 到左差唔多四點先完成. 不過我倒是沒有甚麼關係, 因為之前章曄已經話要上通宵網, 我已經決定奉陪, 因為叫我訓幾個鐘然後爬起身去番學, 不如通頂, 聽日落堂之後番黎訓仲好過啦. 雖然而家真係有D眼訓, 不過唔想上床訓, 因為太清楚上左去就好難落番黎...所以堅持~~ 不過如果黃新星唔落番去or奕葦唔番宿舍既, 有人陪我就好d啦..... 一個人多多少少比較悶.... 睇報紙都唔駛咁耐啦.... 話時話.... 咁做野都幾好玩.... 之前係奕葦房管理員敲過門, 嚇死人.... 好彩佢冇開大個門... 如果唔係俾佢發現黃新星係度就大鑊... 結果第二次有人敲門時我地就先趕左位男士出露台... 原來係李玉娟... 勁搞笑...
12-4-2001
一直唔訓可能係一個錯誤既決定, 今朝完全係一坐低就想訓.... 不過企係度或者同人講野時就幾精神lor, 比黃新星同奕葦兩個訓左三個幾鐘既仲精神... 不過下午一睡不醒... 本來諗住沖完涼先訓, 但係等唔切d水熱就訓lu... 一訓訓到七點... 仲諗住訓醒之後沖完涼去上堂. 點知鬧鐘都叫唔醒我, 六點半醒過一次反正都黎唔切... 就繼續訓... 到七點章曄唔准我再訓.... 叫左我起身....其實.... 起身之後好快又過得眼訓.... 等青檸妹妹講完佢要講既野我就上床訓也...
13-4-2001
體育老師又失蹤, 本來應該好好練習一下排球. 但係唔係幾舒服, 一直覺得少少想嘔咁. 所以就企係度等落堂, 當然亦有盡到少少體育委員既責任既, 隨便點下名呀, 數下排球數目岩唔岩呀咁. 不過唔係鍾凱過黎問我有冇排球多可能都唔會點數住. 結果我係附近隨便執多兩個湊夠數. 過左好耐之後發現幾個男生仍然企係果度同佢地個老師係度講緊野, 忍唔住都係走過去問佢地仲差幾個, 然後幫佢地諗下辦法可唔可以係隔離偷多個, 不過因為人地都差唔多開始執野, 唔係咁好就咁執走人地既排球, 所以要問人... 然後先發現原來我地班有人借左一個排球俾人, 所以好容易就係人地度拎番一個走, 俾鍾凱佢地番去交收.... 不過果班之前問我地借既就慘lor,好似後尾搵唔夠數去還器材... 因為我之前其實應該已經拎番我地借俾佢地果個排球.... 不過話之佢啦. 我又唔識佢地既. 算佢地唔好彩la, 咁岩遇著我今日咁好心情幫我地班既男生...
番到宿舍之後勁無聊, 又無熱水沖涼, 因為小筠兩位朋友係度既關係又唔係好想上網喎, 講開佢呢兩位朋友唔知解俾我既感覺唔係太好, 特別係男果個, 我從來未見過一個男可以似女仔成咁. 問題仲要係佢唔係話想去似女仔果種, 但係舉手投足都俾都呢種感覺俾我, 都係第一次會咁咋. 我一向甚少會分唔清男女, 因為似男仔似都十足既女仔我見得多, 所以基本上一眼望過去都基本上係好直覺地能分得出男女, 而好似呢位男士咁係我清楚地知道佢係男士既情況下會突然會覺得佢係一個女仔都係第一次.... 佢好鬼似Dior(曾經係TB, 青檸妹妹既朋友)...係百無聊賴既情況下, 小筠提議用肥皂水吹泡泡, 結果用洗潔精洗頭水咁整左兩杯梘水黎玩. 引起左樓下宿舍既注意, 叫我地唔好再吹, 跟住小筠同佢果位朋友就拎蜜棗掟佢地, 跟住樓下居然拎水潑上黎, 我走唔切俾人潑中>< 本來諗住搵水袋掟佢地架... 點知居然掟唔中, 過份.... 喧嘩左一輪後, 結果都係繼續係度吹泡泡, 雖然有d無聊, 但係小朋友時玩既其實都好有意思, d泡泡真係好靚架, 感覺真係好正~~~ 本來見到黃新星係樓下行過好想用蜜棗掟佢架啦(因為真係好無聊, 無聊到連網都唔想上,寧願好似之前做野做到咁夜), 不過太多人, 而我既眼界一向好差, 費時掟到其他人, 所以結果都冇掟到....
九點鐘番課室開班會, 學生辦居然孤寒到唔肯出錢請人打掃, 要我地自己做清潔, 所以以後要輪流執課室啦. 六人一組, 每組做一個星期, 本來諗住同瀟華, 奕葦一組, 點知佢地話唔可以全部女仔都一組, 一組最多兩個女仔, 結果奕葦俾分左去另一組... 其實會有分別咩, 原來一組入面冇女仔, d男仔就會偷懶唔做架.... 我真係唔知喎...唔制呀~~~~
14-4-2001
今日好唔健康呀, 足不出戶, 訓到十二點幾先醒, 然後睇左兩齣舊片, 章曄同小筠四點幾五點先起身. 本來諗住六點出去食飯走走. 點知奕葦同瀟華過左黎, 所以後來都係叫外賣算... e.... 之前貪得意參加咩英語競賽, 八點半要過重大考試.... 早知要咁死早起身去咁遠考, 我就唔玩啦.....e~~~~~~
15-4-2001
全國既比賽果然係唔同d, 超難呀, 都做唔晒, 一定入唔到決賽. 不過本來都係抱住玩玩既心態, so幾好玩既. 本來諗住做完畫幾功課... 但係實在搞唔掂... 都係等聽日先啦...
又再企係露台吹泡泡~~ 我發現果種感覺真係好舒服. 開始愛上呢種感覺, 唔想再係網上等所謂既朋友. 出面既空氣好好, 呢個世界好大, 你地唔在乎但總會有人在乎. 我知我會搵到真係在乎既人... 呵~~ 係露台搞緊d泡泡既時候, 黃新星又係樓下行過, 咁岩望上黎(定係諗起我之前講過話上次見到佢想搵野掟佢所以好自然地望上黎呢?), 個死仔居然係下面大嗌叫我打佢喎. 小妹一向心地好架嘛, 人地叫到喎, 點可以負人所望呢, 仲唔拎野掟佢... 呵呵~~ 佢真係幾搞鬼, 一直以黎, 好似得佢會咁死直接彈我d普通話差, 成日都俾佢嘲笑, 不過睇佢果種嬉皮笑臉既樣, 種感覺好似以前俾林文海寸咁, 哈哈... 勁好玩呀
16-4-2001
夜晚好乖呀, 去左法律課, 不過本來既計劃係上一堂然後去library睇書, 不過個老師一直咁講冇放到小息, 所以結果就係果度坐到落堂然後等章曄放學一齊去還碟, 番到宿舍後就做畫幾, 做到兩點呀, 不過都係做唔完. 唔.... 無端端當值打掃果度俾人調左去另一組, 唔同瀟華一組, 同奕葦一組, 本來冇咩所謂既.... 但係點解會同咸江一組架, 雖則佢份人無咩點, 但係佢真係懶到.... 仲懶過我. 經常都唔見人... 同佢一組真係.... 唉.....
17-4-2001
英文堂黃新星做report. 頂佢呀, 評今次王偉事件者, 唔理誰是誰非, 都唔駛咁激一大句Fuck作結尾呀嘛... 老師既面色係一變, 但係並冇講到d咩, 佢果一句實在太過震撼...點講都係上緊堂, 實在略嫌過份, 不過作為旁觀者, 我倒是沒有什麼所謂. 運氣唔係幾好. 難得想去library, 走兩次都去唔成, 朝早奕葦冇帶學生證, 諗住借人地既都冇問題啦, 因為上次做調研, 黃新星都係拎瀟華既學生證入去既, 借左陳平鋒既學生證去, 點知今日管理員居然有心機檢查, 問左一句:"你是男的嗎?", 然後就趕左我地出黎, 夜晚再去, 卻人滿為患...><
19-4-2001(4:30a.m.)
唔掂啦, 真係諗唔到果英語角可以點做, 果草模整得勁肉酸, 又冇idea喎, 幾個鍾之後點死好呢...... 不過尋日都唔係咩都冇做到架, 起碼諗到點樣整番個骷髏, 只要d模型膠黏得夠實, 承托到d力既, 咁就ok, 下午亦都去左交上網費, 買飲水機咁, 只不過真係諗唔到點做呢個方案, 算啦, 都係訓先啦, 最多咪俾人話幾句><
19-4-2001(11:00p.m.)
今日做老師呀, 教同學講廣東話, 好搞笑, 繼上次既靚仔靚女之後, 今日教既係"我愛你"(不過我係教佢地講"我鍾意你") 唔好以為我揀埋d咁既野黎教呀, 係佢地自己提出要學呢句架咋, 勁搞, 講黎講去硬係差梗d, 似講"我鍾意女"多d.... 語言其實真係一樣好奧妙既野, 可以簡單到脫口而出, 亦可以遠學唔識, 佢地學黎學去都學唔到果種味道, 就算望住佢地, 俾佢地睇清楚d口型, 讀唔出果種感覺就係讀唔出, 不斷地慢動作地讀果幾隻字, 都搞到我好似唔知點咁, 平時講係脫口而出, 要講究地點發音, 就真係考起我. 正如我學唔到佢地既重慶話, 成都話咁...
20-4-2001
呢個星期真係好乖呀, 一節課都冇逃到, 連一向都唔去既法律, 上機同高數都去左, 真係唔係好正常, 連同學都好稀奇地問我係唔係唔係好正常. 嘻, 今朝收到我有生以黎第一封情信呀, 不過絕對係玩笑一個, 係瀟華寫既, 附中英文版本, 仲要係之前佢寫左封俾奕葦睇, 然後我話點解我冇架, 然後佢再寫一封俾我... 哈哈, 勁搞笑, 黃新星見到之後仲要拎左去幫佢改英文, 然後同我係度研究點樣寫會好d, 有聊到真係. 今日電腦堂好難得地有頗高既出席率, 亦令課室紙飛機到處飛, 因為好多好似我咁唔聽書既人去左, 去到冇野做咪搵野玩lor, 係d紙飛機度寫左d類似徵友熱線咁既野, 然後寫左其他d同學既名同電話咁周圍飛, 擺明係玩佢地. 不過當然係冇人敢玩我既... 哈哈.... 鬼叫我身份特殊呀, 最近黃新星同吳晨仲偶然會用一個頗令我討厭既名黎稱呼我, 叫我做"港姐"-_-...... 救命~~ 係我心目中呢個稱號簡真係美麗與智慧都缺乏既代號, 每次聽到佢地咁叫我都想話佢地架啦, 不過次次都俾其他野打斷左, 過份>< 搞到我幾次都要吞番叫話落肚..... EEE... 噢.... 順帶一提之前俾人整壞左既骷髏經過我既耐心照顧, 終於痊癒啦, 雖然d聲音變左少少, 但係冇所謂啦, 以為冇得整都俾我整得番喎, 好有滿足感呀^^, 連d男同學都要寫個服字俾我呀....keke..
呵~~~ 終於著左條板褲出街啦, 勁爽呀, 不過其實今日一d都唔熱, 好舒服呀~~~~的而且確係急不及待要換上夏季既色彩, 唔想成日做灰衣人, colourful d 好, 趁而家仲可以扮細路, 唔著浪費呀, 因為一條板褲既關係, 令唔少人側目, 始終著短褲既女生係呢個天氣還是比較罕有, 連男生都未必會咁勇, 結果今日落到操場, 俾瀟華佢地話我cool呀~~^^ Well, 今日既p.e.簡直係要命, 我地既老師依然冇出現, 但係考試既時間已經唔多, 所以由我負責考試, 結果基本上大家都想像得到啦. 只不過當中既混亂實在難以想像, 因為大家既諗法都唔一樣, 好難滿足到所有人, 開頭都幾順利, 但去到後面簡直係頭昏腦脹, 腦中一片空白, 完全失控, 我自己都係考左一part咋...岩岩pass. 不過已經好滿足啦, 都預左volleyball 肥架啦, 唔錯架啦. 經過一片混戰之後, 番宿舍拎左封信又落番樓去寄, 順便去睇睇包裹到左未, 原來十六號時已經到左架啦, 不過外事辦既人冇通知我..... 唉..... 跟住捧住一大個盒番宿舍.... 重到死><仲要行咁遠. 不過好正呀... 好多新Tee呀... 而且多左兩條板褲, 正呀~~
夜晚見到emily, 本唔想同佢講野架, 不過佢同我講野.... 結果今日終於同佢講左我係女仔, 佢似乎唔係太過嬲, 淨係問我點解要呃佢, 之後都冇咩.... 終於放下心頭大石, 舒服晒~~ 太好啦
21-4-2001
好難得地咁好心情拎係針線做我一向都唔會做既野. 補番個袋袋既內籠, 咁耐冇用針線居然冇退步喎, 不過本來我既技術都已經差唔多退無好退架啦. 哈哈^0^ 夜晚同學請食飯, 勁正呀, 佢地兩個有獎學金, 於是我地就有口福啦, 有人請食飯
23-4-2001(4:00p.m.)
五點半先訓, 淨係訓得個半鐘, 但可以算得上係異常精神, 其實本來係唔駛搞到咁夜既. 但係小筠佢地失驚無神話五一都係要出去玩, 唔好留係度, 而且講得非常認真, 馬上就開始執野, 準備行裝, 搞到好似即刻就要走咁...目的地係西安, 本來係諗住三十號走既, 不過因為火車票既關係, 要五月一號先走. 所以要六號先番到黎.... 本來好開心架.. 有得去玩喎, 不過七號晚交英語角既圖同模型, 呢個星期又冇星期六日, 睇怕都有排捱lor. 不過頂得順既, 我要做超級鐵人, 又要玩, 又要做功課. 兩樣都要做得好, 不過一定要有所放棄, 上少d網, 少睇d報紙啦. 嘻, 今日中午跟汪宇同黃新星出去買模型材料, 勁正呀, 因為係同男士同行既關係, 唔駛自己拎KT板, 黃新星一個人幫我地拎晒. 食飯又係佢請喎, 幾正呀~~ 噢, 今日研究班內同學既出生日期, 大個我既真係比較少... 唉. 不過理得佢, 反正個個都話我唔似咁大, 所以可以繼續扮細路女^^
做模型既時候割親隻手, 仲要係同一種方法係兩個鐘頭之內割到既, 先係左手既食指,然係同一隻手既中指, 因為傷口係同一種方法做成既, 都係係手指頭, 貼膠布唔係咁好貼, 結果就形成好搞笑既情況, 係課室俾n個人問我隻手做咩, 然係俾人笑左n次, 鬼叫自己咁死無用>< 不過都開始慣lor, 有時笨笨都好既, 人地會照住我嘛^^
24-4-2001
冇天份做超級鐵人, 十點幾十一點又再訓過訓到兩點鐘起身, 然後匆忙地同章曄整左兩件三文治, 邊食邊行... 今日畫得好慢呀, 全部人都走晒我都未搞得掂, 剩番我一個坐係度畫, 除左黃新星陪我, 其他人全部都走晒, 連老師都走埋. 好彩佢真係肯係度陪我咋, 因為今日寫生既地方勁多蚊, 佢同青檸妹妹一樣都係果種惹蚊既人, 佢坐係隔離冇蚊咬我, 所以當其他人係隔離係咁拍蚊既時候我一d感覺都冇, 後來黃新星行開左之後就發現真係好鬼多蚊, 所以後來之後佢番過黎繼續畫既時候我就同佢講叫佢唔好走開^^" 果死仔尋日自從睇左我地班d人既生日日期後就不斷咁同奕葦講要叫佢做哥哥, 跟住我唔抵得就同奕葦講話要等佢先叫左我做姐姐先, 點知今日再提起時, 佢真係叫得出口, 叫左我一聲姐姐, 然後嬉皮笑臉地走去叫奕葦叫佢做哥哥, 結果係無可奈何既情況下, 奕葦就叫左一次. 夜晚上機之後去要課室打掃, 本來係我同咸江打掃既, 不過佢叫左我去之後自己又無出現, 我自己開始掃先, 黃新星借左我既學生證跟葦奕佢地去圖書館, 點知俾人趕番出黎, 就上黎搵我, 無無聊聊咁自告奮勇幫我手, 搞掂之後咸江先出現, 然後我地三個就一齊番宿舍. 半路上突然心血來潮去英語角視察環境, 一坐就坐左差唔多兩個鐘. 走既時候諗住去睇下人地點講英文去插幾句嘴然後走人, 點知意外地見到趙洪, 跟住變左我地四個係度講英文, 當中當然加插左好多普通話. 到左差唔多十一點先番宿舍, 係宿舍樓下見到奕葦要抬圖板, 於是就幫佢手, 本來係諗住我幫佢就得, 但係黃新星同咸江話幫佢拎到上六樓, 所以就咁四個人全部上晒去, 咸江去搵佢女朋友, 黃新星無無聊聊咁走黎我宿舍等咸江, 本來我就無咩所謂, 不過娟娟就好唔鐘意, 某程度上係因為娟既前度男友係成都人, 所以佢好憎成都人, 而新星又係成都人啦. 娟既前男友傷佢傷得好重, 但係其實我好懷疑有冇需要咁... 地方主義其實係中國任何地方都好濃厚, 不過我真係唔係好明, 或者亦無呢個需要.... 新星走左之後, 娟同章曄佢地都話佢對我一定有企圖..... 不過我唔認為, 因為基本上佢既性格就係咁架啦, 一天都晚唔停咁講, 同所有人都好似好好咁既, 又唔係淨係對我特別好,不過點都好啦, 我唔想諗咁多, 寧願大學生涯同中學生涯一樣都係白過, 都唔想玩弄感情....
26-4-2001
又一次失敗啦,本來諗住通頂架嘛, 點知畫左一半就訓著左, 仲要係拎住支筆, 伏係圖板度訓, 偶然清醒一陣, 但幾分鐘後又再訓著.... 結果仲差個透視圖先畫完, 而且張圖畫同個模型都勁肉酸, 不過還好啦, 好多人都做唔完, 時間實在太少啦, 基本上尋日我地係全班集體熬夜, 好似我咁叫做有訓過既已經係好好, 而且我既方案陳綱肯改, 唔至於被完全推翻, 都算係萬幸, 好似黃新星果個咁就被完全推翻, 要重新諗過, 好彩尋晚佢話要直接做正模既時候我提醒佢話陳綱如果唔批既話就會白費心機咋, 如果唔係就肉痛lor. 今日上堂大家都係處於半迷糊狀態, 已經被呢個方案折磨都不似人形, 十之八九都係plan左落堂就番去訓餐飽, 不過今日係我當值, 兩點半又要番去打掃, 所以番到去都唔敢訓住(怕訓左起唔到身) 結果下午都冇訓, 不過應該可以捱到數學堂完卦, 其實尋日唔係真係訓得咁少, 因為已經訓左兩堂畫幾, 兩堂英文, 半入睡狀態地渡過兩堂計算機. 為夜晚既通頂可是作好準備, 不過如果唔係唔敢逃計算機既話(再被發現逃課多過兩次就肥佬), 我同黃新星兩個睇怕都一定唔會去上堂, 不過為免浪費時間, 已經協議好下次上機輪流去, 要點名就通風報信, 大家都有好處. 不過好似同佢既關係太過好, 我覺得似乎有d人有所誤會lor... 或者應該保持番d距離啦, 不過我諗冇咩所謂既, 難得有個咁好玩既人成日陪我一齊喎, 唔理咁多lu... 不過直係好搞笑lor, 畫幾佢唔去上堂, d人居然走黎問我, 我問番佢地轉頭點解要問我, 佢地居然話因為我應該會知lor, 雖然事實上我真係知道(之前佢講左話唔去, 叫我幫佢交功課, 點名既話先打電話call佢), 但係佢地既表情實在....感覺好似返番去小學時代, 不過人長大左lu, 睇法同以前完全唔一樣^^
為左西安之旅可以玩得無太多既後顧之憂, 呢幾日要努力加油~~~~~~~ Yes~~
27-4-2001
排球考試, 狀態奇好, 不過都係得三十三分, 聽日要再考, 希望有四十幾分啦, 因為我諗游水要合格係絕對冇問題, 或者可以搏下拎個滿分tim, 咁overall合格應該係冇問題, 手都打到腫腫地, 不過fine 啦, 唔係痛得咁緊要者, 不過今日真係有d失敗, 一腳踩左落過坑度, 擦損左隻腳, 不過還好啦, 冇人睇到, 如果唔係..... 無臉死啦.(不過其實早就無啦. 哈哈)
呵呵, 今日搵左個老婆仔, 唔知搞咩.... 同龍瀟華, 奕葦, 玉娟四個人講講下, 就認左玉娟做我老婆仔啦, 不過我只係佢既小老公, 仲有大老公同二老公.... 黃新星睇住我地四個人咁搞簡直係無話可說.. 哈哈.... 唔, 講開尋晚數學堂之後叫佢陪我去食飯(其實係食雲吞, 因為已經九點幾, 佢又食左飯), 本來諗住請佢架嘛, 點知結果又係佢請, 話咩唔慣要女仔請喎, 同女仔出去應該幫女仔出錢, 其實咁算唔算大男人主義呢? 還是我讀女校習慣左女權主義, 不過無所謂啦, 由得佢啦, 下次佢去香港先請番佢啦. 呵, 個死仔今朝起唔到身無去上英文堂, 仲諗住佢實唔會去計算機, 點知佢居然去左喎, 話覺得佢會點名.... 其實佢都幾蠢, 如果點名, 我實會call 佢啦, 不過今日真係點左名.... 都抵番
見到Sarah online, 好開心呀, 不過仲未收到佢封信.... 就快三個星期啦, 點解咁耐既?? 話時話, 佳苗封信都未收到><
28-4-2001
奇蹟居然發生係我身上, 勁開心呀, 排球居然合格, 雖然實質應該係只有五十九分(差一分先合格, 係老師送多分俾我幫我打合格), 不過真係好意料之外lor, 最主要係係發球果度, 真係想像唔到尋日打咁多個一個都過唔到, 之前練習時廿個過三個, 考試既時候居然十個過左六七個, 全部人都勁意外lor, 連我自己都唔敢相信我居然可以打左咁多個過網, 基本上第一個過左網時, 我已經係勁開心勁開心, 連d同學們都為我高興, 跟住居然仲過左咁多個, 簡直係唔可以相信, 知道嗎? 當時簡直係興奮都不得了, 完全平伏唔到, 睇住d排球一個個咁過去, 身體好似係發抖咁, 真係好鬼興奮架, 開完晒十個之後, 其實都唔知自己到底打左幾多個, 只知道呢part居然pass 左, 真係好爽呀, 因為真係冇諗過可以pass 呢一part lor, 諗住打到一個過去已經好好, 但成績居然咁好, 好到係無人相信, 全部人都為我開心咁, 雖然興奮到有少少失控, 但係我記得架, 第一球打左過去之後, 玉娟佢地同隔離場黃新星佢地都為我喝采, 為我加油, 好幸福呀, 全部人都對我咁好, 之後打完晒之後我真係開心都跳起, 係度大叫大嗌, 仲撲左落一個同學度, 摟住左佢, 不過果個被我嚇親既同學叫咩名我都唔知....想像到我當時有幾開心嗎??? 雖然當時總分都係得五十七, 仲係唔合格, 但係我已經係好開心好開心, 一直係度笑, 真係好瘋癲, 我諗我地班d男同學係隔離場見到我咁既樣一定覺得好好笑, 以為我傻左, 不過我真係唔會理咁多, 太開心啦, 完全係失控, 可惜你地見唔到我當時係球場上亂跳亂跑, 亂叫亂笑, 然後一同人地有眼神接觸時更加變本加厲, 如果唔係你地一定會感受到我係有幾開心, 真架, 我開心到想摟住全部人, 簡直連自己都唔信我居然可以打得過呀, 真係諗起都好興奮....好興奮^^ 我諗d男生可能會覺得我好神經, 仲差一分先合格都可以咁開心, 而且係開心到顛左果種, 佢地又點會明白由三十三分變五十九分對於我黎講係幾咁不可思議, 太過不可思議啦, 而家手雖然好痛, 身體雖然好疲累, 但係一諗起, 都仲係覺得好開心, 不過今日唔見左一個排球要賠lu, 可能係報應啦, 上次拎左人地果波走, 今次俾人拎番轉頭, 但係算啦, 今日實在係太開心啦^^
唔想畫圖, 唔想做模型, 今晚唔熬夜, 聽日唔交足功課得唔得呢?? 相信d男生們都唔會交, 我都偷偷懶啦.
今日黃新星又唔知醒, 本來諗住做下好人, 打個電話嘈醒佢, 但係英文堂既課室實在唔可以用手機, 我一撥號, 前前後後左左右右既耳機都勁大聲既雜音, 唯有馬上掛線, 果白痴過左幾十分鐘知醒既時候居然打番過黎, 又惹黎一陣雜音, 希望只係我地幾個同學聽到果d雜音啦, 俾老師聽到就唔得掂lor..
29-4-2001
其實已經過左十二點, 係30-4-2001 先岩, 太多野值得講, 但係太少時間, 首先要搞掂張圖, 不過實在好辛苦, 上黎留兩句野, 其他既聽日( should be after noon)先補番打
29-4-2001(type on 30-4-2001)
呢個星期日係上星期一既堂, 一早就上設計課, 陳綱唔係度, 由佢老婆代課, 大家理所當然係懶懶閒啦, 本來之前果日兩點幾就訓, 精神應該幾好, 不過膊頭位同頸位好痛, 其實前幾日已經係咁, 可能係因為係課室度訓得唔係幾好, 又加上唔夠訓, 有d作感冒, 加上昨日打排球用盡力氣創造左奇蹟, 上設計課既時候見老婆仔都係度話痛, 諗住幫佢按摩, 點知一落手佢就嗌痛, 本來呢d係夠大力先好架嘛, 不過佢話痛冇理由再繼續按, 另一頭黃新星指住自己既膊頭話大力好, 叫我幫佢按, 如果係女生既話, 我諗我會一口答應, 不過始終... 有d避忌好少少, 同佢講話我幫佢, 咁邊個幫我, 跟住佢話佢之後幫我按, 結果就咁成交, 我幫佢按完之後, 佢幫我.... 嘩, 無諗過佢d手勢咁鬼好, 勁舒服, 仲正過出面洗頭果d.... 好舒服, 同我一樣都係係屋企幫阿媽按摩慣, 不過佢比我強, 真係好舒服^^
中午同老婆仔同黃新星一齊食飯, 之後番宿舍, 同阿媽講左一陣電話, 本來諗住開工, 但係唔係好掂, 結果決定先訓番一個鐘先開始做, 點知訓左半個鐘之後, 就聽到章曄講電話, 話買唔到由西安番重慶既火車票, 問左好耐好耐, 唯一既辦法就係到時係西安坐硬座去成都然後再番重慶, 之後決定投票決定仲去唔去西安, 章曄話唔想咁奔波, 而我實在唔敢冒呢個險, 萬一係火車上真係訓唔到既, 番黎仲要通頂既話, 我怕真係捱唔住, 所以既投左唔去, 其實我feel到娟係最想去lor, 不過佢卻投棄權票, 結果二比一否決左去西安, 跟住下一步就係諗辦法退番之前買左既火車票, 不過都幾難退到... 其實真係好想去玩, 不過冇膽去搏... 去上音樂既時候, 訓得好舒服.
然後夜晚捉左黃新星去法律堂, 陪我做畫幾, 本來唔想俾娟娟佢地知道, 因為佢同章曄都好唔鍾意佢, 但係結果佢地問多幾問, 都係要俾佢地知.... 結果.... 唉.... 俾佢地話我去dating lor... 無野好講, 佢呢個緋聞男友睇怕都係做硬, 尋日法律好早就落左堂, 之後同瀟華去課室睇人地既圖, 繼續改自己既方案, 黃新星去library抄方案, 後來瀟華自己先走, 我係課室諗左一大輪之後實在唔想再諗, 落去搵新星, 陪佢食左宵夜再番宿舍(surely係佢請, coz'佢夜晚淨係食左公仔麵, 話要再食野喎), 越黎越習慣同佢一齊, 覺得佢真係好好玩lor, 因為大家都係果種懶得就懶既人, 經濟條件相若, 玩起黎比較好玩, 而且最重要既係佢唔會好似其他男同學咁因為我係女仔而處處小心翼翼咁, 同時亦唔會忘記係適當既時候拎佢應有既風度出黎, 對於我呢種人黎講, 咁樣會容易熟稔d lor... 坦白地講, 如果其他男同學會好似佢咁多野講既話, 我都會同佢地咁熟架者, 其實係冇咩分別, 番到宿舍十點幾先開始正式上板畫圖．通左一個宵
30-4-2001
朝早匆忙趕番課室繼續改圖, 其實都幾怕唔合格, 不過好彩無事, 尋日夜晚因為洗完頭之後太熱, D頭髮係後頸度唔舒服, 所以不顧後果地將髮尾束起, 結果早上出去放番落黎之後太恐怖, 所以都係將髮尾束起成一個小辮子咁番學, 有人仲以為我剪左頭髮... 都俾人笑左一輪lor. 不過唔係果種嘲笑果種, 佢地係覺得搞笑兼可愛lor, 通左一日頂之後, 膊頭唔駛講勁難頂, 於是當隻死星星係身邊搞搞震, 打我既時候就叫佢要打就揼膊頭果度, 到落堂ｄ人差唔多走到七七八八既時候, 就更加忍唔住, 乾脆叫佢幫我再按摩好過, 因為咁欠佢一餐飯, 跟住我同佢講話我今日要番宿舍食, 娟佢地住左飯, 我話你敢膽就上黎食, 佢即刻無聲出, 過左好耐之後話不如我拎裝少少飯菜落去俾佢食, 其實好清楚佢係唔敢再上黎, 因為尋日去食宵夜既時候, 我先話佢專門打手機, 晒我電話錢, 又唔打宿舍既電話, 佢居然話俾我聽話怕我宿舍既人, 唔敢打宿舍既電話, 其實... 佢打手機, 娟佢地就知道係佢啦, 係佢先會打我手機咋嘛... 番到宿舍之後兩點就上床訓, 下午章曄佢地話去賣車票, 我一個人繼續訓(實在頂唔順）不過後來佢地居然去左行街，六點幾先番，而我就佢地番黎先起身(五點既時候曾經小腿抽筋痛醒左, 起左身一陣), 沖完涼之後曾經諗過要唔要去上法律, 不過因為娟佢地既關係, 最後都係決定唔去, 如果萬一點左名既, 就算新星唔好彩(因為佢話過如果我去就叫佢一齊, 換叫話講即係如果我唔去佢就唔去) 七點幾出去食飯買酒, 然後落左間pub食香蕉船, 亦終於學左鋤D, 之後番到宿舍同佢地鋤D隊酒, 因為岩岩學識既關係勁輸, 都飲左唔少, 而且俾佢地係臉到畫左幾次....聽日又要一早起身去賣牛黃飛, 然後去解放碑踩冰, 然後去小筠屋企玩兩日, 跟住就要番黎開工, 希望控制到ｄtiming 啦