私人重地,
非請勿進!!
9月
10月
十一月之日記
1月
2月 3月
4月 5月
6月 7月
8月
1-12-2000
好耐無食過麥記,
估唔到咁耐無去, 我只係食左一個cone, 無要到其他既野.
重慶只有一間老麥, 位於解放碑--重慶最繁榮既區(今日我地參觀活動既其中一個目的地)
坦白講, 解放碑對於我黎講實在係一個普通不過既地方,
根本無咩值得欣賞, 論建築,
佢比唔上銅鑼灣以及香港好多地方. 論購物,
價錢與香港相差唔大, 但質量卻相差十萬八千里,
去解放碑既唯一收獲應該係係個度既屈臣氏搵到部份久遺左既香港product,
搵到少少既親切感吧, 不過回程既時候簡直係不知所謂,
老師之前講到明車會係六點半走, 絕不等人.
叫我地早少少去到, 但係結果六點五十分, 老師並未出現,
司機死都唔肯開車,
結果我地一大班人於停車場內無聊左接近半小時,
終於我同部份人頂唔順, 自己搭車走.
除左解放碑之外,
我地今日亦參觀左一個叫龍湖花園既地方,
一個類似碧桂園之類既地方.
個度既建築設計其實算不上是一流的吧?!
最起碼我會諗到好幾個佢既不足之處,
不過其中別墅式房子既透明屋頂(玻璃??)既感覺似乎頗舒服,
雖然唔係咩稀奇既設計,
但係我一直都覺得夜晚躺在星空下面安安穩穩咁發下夢係一件好愜意既事=^-^=
今晚食得太多野啦,
但係既然今日係章曄生日既大日子, 又點可以食得隨隨便便喎,
right? 飽死都要俾面--食多d.
3-12-2000(清晨兩點)
Sarah, 生日快樂!
花左我唔少心機去upload個page 上去架. 雖然無咩特別,
但係希望你鐘意啦.
我黎左重慶咁耐,
今日係第一次開到係geocities既homepage. 雖然開到既唔係前kps既url(而係7B既page),
不過個份驚喜, 實在太令我值得為佢係度留句說話.
今晚某某又send左兩個message 過黎,
其實又為咩? 我唔會相信佢講既野係真, 對佢無乜感覺,
亦到唔會因為咁而受傷害, 但係唔代表我唔介意佢無聊時就send
句野黎消遣我, 雖然被人{乙水}既感覺係幾好,
但係唔係認真既有咩意義?
我諗我並唔喜歡聽只有表面既甜言蜜語... 覺得好煩,
需要有人聽我訴說, 但係可以為我做解說既人最近都似乎好忙,
唔見佢地online>_<
3-12-2000(11:20p.m.)
終於交左張水墨渲染,
好彩趕得切交. 雖然後面個d真係畫得好醜.
不過總好過遲交要降等.
今日全日處於忙碌與混亂之中都係為左佢(其實係因為自己之前過於淡定,
成日上網=P) 犧牲最大既都係對手lu, 雖然乾燥到龜裂,
但係都唔敢塗lotion, 因為唔可以係張圖紙上留下一丁點兒既油,
如果唔係畫到一半就會發現張圖有因油而留下既白斑,
最後既結果係因為唔想成績唔好而重新再畫過,
所以只好一直唔用lotion, keep 住隻手free of oil~~ 其實真係好痛>.<
特別係濕水既時候. Ronnie, Ah Per, 今日下午忙於趕圖,
唔得閒同你地傾, 其實我真係好想同你地傾下架,
不過八點鐘要交圖, 唔可以唔先搞掂佢. Sorry!!
e...... 今日打電話俾Sarah先至發現原來佢一直都收唔到我既offline
message, icq搞乜呀? 電話卡講左無耐, 就無錢俾人cut左線,
人地都未講完... >.<過份~~~~
Karen, 今日收到你既e-mail.
恭喜你呀, 亦多謝你講呢個好消息俾我知,
佢係我最近收到最好既消息^^
5-12-2000
收到阿Ling既email, 好開心.
不過坦白講, 最近心情真係唔係咁好. 講唔出點解會係咁,
只係覺得有少許失落, 好似缺乏左一d好重要既野,
圍繞我既其實幾乎都係好消息, 身邊既朋友都過得很好,
再沒有好像前陣子那般個個都唔開心, 可以令我放心.
最近亦忙得很要命, 按常理是沒有時間胡思亂想,
我卻為何會有種講不出既不快?? 其實一切都還算順利,
到底為了什麼??? 為了無法出席Speech Day,
無法與久違了的朋友們見面嗎?
為了星期五要交但卻不知從何入手既論文??
為了那班沒良心既混蛋老是沒消沒息嗎? 我實在弄不清楚.
開這網頁既原意是讓朋友知道自己既近況,
可是最近卻覺得目的巳經變了, 似乎是在為自己不在香港,
沒有了家人及最好既朋友在身邊既時候找一個寄託,
將自己想告訴好朋友而他們卻沒有時間去聽既事寫在這兒,
將重慶這兒既生活一點一點的記下來. 偶然有空既時候,
看看之前發生既每一件小事, 讓自己想起那些令人開心既過去,
笑笑自己在曾幾何時為這樣無聊既小事而大動肝火,
然後看看自己會否在不知不覺中長大......
希望有一天我再看這些日記時,
能夠不為在這裡寫既每一隻字後悔...
6-12-2000
好凍, 身體不斷在抖,
但係心裡面卻不斷地說: "好想食雪糕". 當然,
以我既性格, 結果係毫不理會身體發俾我既訊號, 買左枝甜筒.
原來甜筒係手既時候係唔會覺得凍架喎^^
7-12-2000
今日係Paul's Sec. 既Speech Day,
從來我都唔覺得Paul Sec. 係一間好學校,
不過我真係好想再去看一看那一流既馬場靚景,
靜靜的站在欄杆旁看著那一大片既草地感覺好爽架,
特別係有少少風既時候, d風迎面而來, 好舒服.
我仲想再著多次校服, 雖然未買棉襖&紅色小背囊之前我從來唔覺得套校服好睇,
更加唔覺得我襯件校服... 好想再同Ada佢地著住校服影多幾張相做紀念,
一齊去食飯,
雖然曾守衛住禮頓道大樹早巳經等唔到我地畢業既呢一日,
但係我仍然懷念係個度等燈位既一舜間. 雖然Paul's Sec.
既大部分老師都無盡佢地既本份,
但係都有好幾個係值得我尊重. 我真係好想好想...可以番去,
好掛住一切一切--陪我過左七年既跑馬地.
或者一開始Paul's Sec. 曾經俾個一d唔開心既經歷俾我,
但係到今日為止, 我係呢度過左我三分一既人生,
我總不能說佢對於我來說並不重要, 亦不能否認佢曾俾個一d開心既回憶俾我,
我或許記不起全部, 但係零零碎碎既小事, 要回味既話,
最少要用上一整天吧,
最起碼我係呢度識左好幾個好好好好既朋友, 無左佢地,
我諗唔會係而家d個我.
Sarah,
似乎聖米迦勒對於我地黎講係好重要, 但係Paul's Sec. 都唔係一d地位都無呀呵?
8-12-2000
上網既時候, 突然停電.
整個學校漆黑一遍, 同時全校起了一陣哄動,
斜對面既男生宿舍有一團團光亮既物體從天而降.
佢地用紙製造火球, 從露台掟出黎. 重慶同香港係唔同既,
中國內地既人同香港既人始終都係有分別,
這種事是不可能在香港發生的吧.
9-12-2000
九點鐘俾人嘈醒,
話今日係系館既年會, 要點名, 匆匆忙忙梳洗過後便跑去系館.
所謂年會其實係展示學生成果既exhibition 以及一些比賽.
幾好睇架, d design 亦都好正. 不過咁早俾人整醒就一d都唔好玩,
下午食完飯又再訓過, 之後再出去交上網費,
點知佢話要去另一個地方交, 結果我同章曄就變左去shopping,
又買左一大食既野, 居然買到美極, 正呀!
11-12-2000
前幾日找到一個有關網頁素材既網頁,
好有衝動想幫KPS重整一下, 不過你地就話就快考完試,
又有聖誕假放, 可以去玩. 但係可憐既我要開始準備考試,
又無聖誕假放喎, 邊有咁多時間整? 等到過年啦,
番香港慢慢搞^^
12-12-2000
真係要開始收心養性啦,
以後上網睇完報紙,雜誌, check完 mail 就閃啦, 唔再等一d成日唔出現既人出現啦.
雖然而家開始都冇乜可能可以合格,
但係最起碼唔好考得咁難睇啦...
13-12-2000
娟同小筠終於忍受唔到,
提出要執野. 其實我同章曄巳經忍左好耐,
諗住等佢地畫完圖就馬上搞清潔, 點知佢地亦終於頂唔順,
結果下午第三, 第四節課(接近兩個鐘既時間就用左黎打掃衛生,
宿舍好耐冇試過咁乾淨啦, 坦白講,
打掃之前既宿舍既樣子實在係不堪入目, 簡直唔係人住既地方!!!
14-12-2000
體育課考口試(即背書),
才背了兩句, 老師巳經叫下一個來背 , 我呆了一呆, 跟她說:"我才背了兩句呀..."
誰知道她的回答竟然是: "行了, 我知道你會背,
不過你的普通話實在.... 知道你背了就可以了" 就是這樣,
二十分就拿到了, 體育是一定能合格了, 沒有想到居然能合格....
不過高數沒有什縻可能合格吧,
只要成績不至於太難看就巳經很好了, 補考看來是逃不掉....>.<
15-12-2000
零晨三點半先訓,
巳經成個星期嚴重缺乏睡眠, 我知道再唔夠訓落去既實會感冒,
下個星期二要交圖, 星期三要交畫法幾何作業, 呢個weekend本來巳經諗住用黎搞掂呢作業,
溫習同休息. 班男同學們居然話要去燒烤, 真係頂佢地唔順,
咁好精力既?! 唔駛趕圖呀? bbq 下星期去都得架,
有冇必要一定要呢個星期去呀? 又唔可以次次班活動都唔去...
麻鬼煩
晚上十點多,
阿爸阿媽先後打電話黎, 本來因為時間唔夠用巳經接近崩潰,
再想起就快要考試, 而作業之多, 根本巳經無可能有時間溫一d我完全無時間去做,去睇既高等數學,
講講下電話.. 我巳經全面崩潰, 頂唔順喊左出黎,
其實都冇乜既, 不過真係覺得好辛苦,
需要有人借個膊頭俾我休息下...... 睇黎我都係唔夠 tough,
黎左兩個月就巳經流左兩次眼淚, 好失敗>.<
下個學期一定唔可以俾自己再係咁無用!
17-12-2000
尋日下午一點準時出席班入面既活動--
去華岩寺燒烤, 發現男生們的思想挺奇怪,
怎麼會想到去寺廟燒烤? 其實咁樣真係好不敬, 雖然地方好大,
我地燒烤既地方離寺廟好遠,
而且整個地方有少少似香港既郊野公園咁,
似供人遊山玩水既地方多d, 但係點講都係係人地修道既地方,
我覺得咁樣真係係唔應該lor. 不過男生們堅持無問題,
最後簡左一個好深入(冇乜其他遊客行入黎)既地點生火燒烤.
行到腳軟... 不過真係幾好玩,
唔知係曉丹定係書凝買左幾扎香, 然後我地幾個女子就去d寺入面上香,
到最後一個, 上完香之後, 突然曉丹發現原來個度係公共墓地.......不過冇所謂卦.
入夜之後, 男生們起左一個火溝,
三個好曉玩結他同唱歌既男生係度唱歌, 到後來係全班一齊唱(except
me, coz' haven't heard those songs before =p) 好有氣氛, 不過食唔飽.
七點半起程番去.
之後番到沙坪壩(學校附近)
有人心血來潮提議個三個男生賣唱,
跟住佢地真係拎左個結他出黎玩, 引黎好多人圍觀,
不過就冇人俾錢=p 好搞鬼, 好瘋, 好好玩, 反正唔係係香港,
而且我只係扮觀眾, 顛都冇所謂la, 呵呵^0^
不過玩完又要趕圖~~
如果唔係又發現d數據有問題, 要等瀟華搞掂佢做個部份,
我諗我呢兩日都唔會打diary 住.
19-12-2000
捱左兩日夜,
諗住今日交左圖之後可以好好咁休息下, 訓番覺飽,
點知居然話俾我知要重畫....天!! 我要死啦,
有少少欲哭無淚既感覺, 兩日訓得六個鐘,
仲要咁捱多個幾星期既話, 我番到香港一定會昏睡幾日.
唔理咁多啦, 先休息下先, 個腦到塞死左, 做唔到野lu.
十三號考完最後一科. 期待呢日既來臨^^
22-12-2000
呢幾日依然係忙到嘔泡, 依然係嚴重缺乏睡眠,
不過身體似乎巳經適應左, 沒有太大既訊號話俾我聽要去訓下,
不過娟同章曄都話我成個人呢幾日望落去好朣喎, 好應該好好咁休息下~~係肥左定係朣,
我真係搞唔清...
前兩日夜晚食得好豐盛, 星期三出席左重大既中外師生既唔知咩活動,
幾無聊下lor, 因為一個人都唔識既, 其他既留學生全部都係黎學漢語,
無人係讀Degree 既, 而且只有我係華裔... 等我仲諗住睇下有冇機會識番個澳門人同台灣人>.<
而且一食就食左成個夜晚, 十一點幾先番到dorm, 乜到冇做到, 尋晚因為係冬至既關係,
我地專門打的去解放碑麥記食飯, 為求食得特別d, 其實好想食煙肉蛋漢堡,
不過呢度又無... 食完後走左去影貼紙相, 好搞笑lor,
i mean 部機, 影出黎d公仔倒轉晒既, 可惜d機咁舊呀, 如果唔係咪好玩d
lor, 不過正如章曄所講, 呢度係重慶, 要求都係唔好咁高好.
還好, 我唔駛讀政治,
呢個星期可以好好咁休息下. 好, 去訓覺啦, 再唔訓,
個黑眼圈就大到連眼鏡都遮唔住啦!
24-12-2000
呢兩日被較空閒去反思(其實係冇mood開工),
加上玩左一個personality test and 同林文海chat 左一陣,
突然間好似更加清楚自己, 亦似乎搵到前排情緒低落既原因...
突然間好似同幾個朋友既距離越黎越遠咁(唔係講文海),
係我變左定係佢地變左, 抑或係大家都冇變, 只是我多心?
我搞唔清楚,
只是隱隱約約咁覺得好似佢地唔再像從前那樣係我身邊支持我,
聽我講野, 為我解困.......
有一件事,
我一直都冇完完整整咁話俾其他人知,
除左兩個聽我講得最多心事既朋友,
冇講俾其他人知唔係因為覺得其他人唔夠朋友,
只是因為只有佢地會有耐性聽我講, 聽我鬧人, 曉得安慰我,
開解我.
而最重要既應該係我無耐性由頭到尾咁一次又一次咁講俾人知...
兩三個星期前我又因為呢件事而煩, 其實唔算係煩既,
只不過係發生左一d野, 我需要有個人去聽我講,
然後話俾我知我咁做到底有冇錯... 我真係好疑惑,
我覺得自己似乎做錯左, 但係我真係搞唔清...
本來係可以同其他人講, 可以問其他人,
不過知道整件事發展過程既只有佢地兩個, 同其他人講,
佢地都唔知到底係點啦. 所以我選擇除左佢地之外,
唔同其他人提呢件事.
不過呢一段時期,
佢地兩個都冇出現, 搵唔到人聽我傾訴,
我覺得我好似係第一次有一個不為人知既秘密咁...
第一次發現原來自己係一個唔想要秘密既人,
第一次發現自己真係好鐘意講野,
將自己既每一件心事講俾朋友知,
發現自己本性根本就唔係一個tough 既人, 不斷告訴自己要堅強,
只係因為自己太清楚我唔夠硬朗,
不斷咁提醒自己唔可以再咁軟弱, 要堅持落去,
因為我唔喜歡自己軟弱既一面,
亦唔希望人地見到我軟弱既一面.
或者我唔應該勉強自己去變得堅強, 應該好好咁做番自己....
不過點都好, 件事早就告一段落,
佢既結局應該唔會有任何人知, 除左我自己以外... ^^
因為巳經唔需要搵人聽我去講, 巳經過左去咁耐,
我做得岩唔岩都好, 都無得改變,
而且我諗大家都唔想再有改變. 或者我太重視感情...
其實根本我唔需要去為呢件事而介懷,
但係我以前一直覺得可以同佢做朋友, 可能係我太天真.
到而家先明白, 當人地係有某種目的既時候,
佢地係唔會想要其他結果, 無論過左幾耐都係... 我真係好蠢...
25-12-2000
尋日下午仍然係活係一片隋落之中,
上網, 睇VCD, 打電話俾Ada佢地(又係講左一半無端端俾人cut左,
之後再打好似係有人聽左然後唔覺意咁cut左,
唔好俾我知係邊個茂利, 打咁耐先打通, 居然....),
然後打左俾公公, 阿爺同阿爸又打左電話過黎,
夜晚十點幾食完火鍋之後, 番到宿舍又係繼續上網. 瘋狂咁down兒歌,
十二點幾諗住執完d衫就開工做野啦,
點知有個我完全唔識既人打電話俾我, 話係咩廣東人呀,
乜呀咁, 一講就講左半個幾鐘, 簡直係無奈呀,
又唔想同佢講喎, 因為我連佢既樣係點都搞唔清,
再加上佢講既野一d建設性都冇, 章曄睇住我咁, 一直係度狂笑,
搞到我都忍唔到, 好彩娟佢地唔識聽廣東話, 如果唔係.... 唉...
實笑死呀. 噢, 講番個位人兄, 叫做李權杰, 台山人, 住我樓下,
去食火鍋之前, 見到三個廣東男仔既其中一個, 咩樣就睇唔到.
Karen, 個位兄台走去叫另一個女仔黎問我既電話,
然後俾個電話佢打電話搵我講D九唔搭八既野,
咁算唔算係追我呀? 如果係既, 我請願留番俾你好過啦,
勁低能呀...... 佢講既野實在太搞笑.... 不能盡錄....
有機會既話俾你知啦.....
hehe~~今日中午小妹親自下廚煮飯食,
第一次我自己一個人煮咋!!! 不過佢地太唔俾面啦,
一個訓覺唔起身, 一個食完先番黎, 一個就唔想食飯,
食得個少少... 從來都冇其他人有幸食過我煮既飯既,
佢地居然咁唔俾面....
oh, Christmas Day, 點到要講句:
"Merry X'mas!" 既
26-12-2000
今朝起身, 發現d頭髮極其唔聽話,
冇辦法收伏佢地, 還好係係重慶, 無所謂既,
不過到下午終於頂唔順, 費盡辦法,
將唔夠長束起既頭髮勉強咁束起後先去上堂, 噢, 對了,
我今日去左我巳經好耐冇去上既計算機課,
而且用左比預期短好多既時間完成左畫法幾何作業^^
有一個對我黎講絕對係好既消息^^,
對於其他人係好定壞就唔知啦, 不過我諗唔會有影響既,
因為我決定左唔話俾各方好友知, so, of course,
我都唔會係度打到底係咩消息,
費事咁橋遇著百年難得人見既來訪者見到啦.
27-12-2000
中午煮既麵條失敗, 勁鹹>.<
下午上堂番黎後, 章曄話電飯煲差d被人沒收, 過左無耐,
管理員入黎話叫我地要好小心好小心咁用d電飯煲,
因為向上頭請示過, 我地間房有特別待遇, 所以可以唔沒收,
不過其他房既全部到沒收左~~ 做alien 都有d好處既, 最起碼,
我地可以明目張膽咁享有特別待遇....
Per, 多謝^^
28-12-2000
收到Ivy同Wendy 既Christmas Card.
好鬼死開心呀^^, 不過對唔住呀, 我咁懶.... 都冇寄幾年啦...
希望你地唔會介意^^;
尋晚賴死唔肯開始畫圖, 走去煎pancake,
搞東搞西... 今朝又唔肯起身.... 今晚慘啦...
希望唔駛搞到好夜啦... 唉. 真係應該改啦. 下學期,
一定會努力.
29-12-2000
倒霉..
尋晚趕圖既時候無端端停電, 雖然唔係停左好耐,
但係都浪費左頗多時間, 停電期間, 為我部好laptop發現左多一個用途--就係當燈黎用啦,
Mon所發出既光勉強足夠我繼續畫圖... 不過感覺真係... 好折隋-_-
四點幾先搞掂, 還好有個"良-",
其實之前都好驚再衰多獲(因為畫得都幾冇心機),
如果又要再重畫.... 我實冇mood 再畫架, 被d幅圖煩左咁耐,
搞都我短期內都唔想再畫呢d圖, 好彩模型係最後一份功課,
下星期五交左就唔駛再上堂lu ^^
Yeah! 青檸妹妹幫我買左史力奇啦,
番到去就可以見到佢=^-^=, 正呀!!
晚上去左所謂既化妝舞會度睇睇...
果然係"化妝出席"既舞會... 我企左一陣,
叫做出現下就同章曄閃去操場果邊趁墟, 諗住果邊會激情少少,
好玩d.... 結果又換黎再一次既失望, 食完野就番宿舍.
30-12-2000
訓左十三個鐘, 好舒服呀^^
31-12-2000
生理時鐘徹底逆轉, 十二點起身,
五點幾食lunch, 凌晨十二點食dinner...聽日係新既一年,
本來好應該改變一下, 不過似乎暫時都係冇乜可能改到,
生活上既習慣唔係話改就改, 只盼望新既一年可以活得更好,
可以對生活有更好既感受...
剛剛睇完一個朋友既網頁...
佢為佢既2000年作了一個總結.
令我好自然咁回想左係過去呢一年我做過d咩... 公元二千年...
太重要既一年, 太特別,
呢一年內發生左好多好多對我黎講好重要好特別既事,
好開心好唔開心既都有...
到而家我都記得一年前既呢個時候我係點樣訓係沙發上面受腸胃炎既折磨,
幾日輕左接近我點減都減唔到既十磅, 不過俾我揀既我寧可肥d,
都唔想一連幾日食乜嘔乜...
二月份識左一個或者...我唔應該識既人,
or maybe 係一件好事黎既, 由二月到十二月d幾段期間學識左唔少野,
最重要既係更加清楚自己需要既係咩...
三月到五月活係a-level 中,
因為讀既係古古怪怪既配搭, 我既A-level
比我身邊朋友持續得更長久, 亦令我過得更痛苦,
六月考內地既大學, 番廣州搵一位叔叔幫我惡補,
一位好好既老師. 認識左佢cool到爆,但一講電腦就眉飛色舞既仔,
考試時同Wendy識左林瑞鳳&黃有賀, 七月考toefl,
明乎其實既考試年..
五月份做左一個星期既影印試卷臨時工,
絕頂優差. 九月份再係奧運站做另一份臨時工,
第一份正正式式既朝九晚五寫字樓工,
認識左我有生以黎第一班同事, 幾個好朋友.
七月份連續兩次放榜既打擊,
幾日之間流既眼淚比起我之前一年所流過既更多...而流既眼淚居然主要係為考得更好個個,
因為並唔甘心, 唔甘心別人唔認同我所付出過的...
哭過以後, 為自己鋪左n條可以滿足我夢想既後路,
同時過左一個最長, 最忙碌亦最好玩既暑假, 去左好多地方,
做過好多以前未做過,未玩過既野,
兜兜轉轉最終都係選擇左第一條路--- 黎重慶, 放棄香港既offer,英國&澳洲既選擇....
九月份開始第一份工之前, 先同Karen,
Sarah開始左做呢個網頁, 中間發生左小波折, kps改做klly,
然後又變番做kps... 希望佢可當呢件事冇發生過...九月人地開學,
我開始番工, 但係暑假既感覺仍然, 雖然好忙, 番工, 做網頁,
準備黎重慶既野, 同人farewell, 第一次見網友,亦係第一次單獨同男仔出街...
十月份離開香港黎到重慶過新既生活,
一條我自己楝既路, 適應一個新既環境, 學左好多野, 普通話,
洗衫(手洗), 煮飯, 第一次離開屋企生活, 一個陌生既地方,
所有既野都有新鮮感...曾經懷疑自己係咪真係捱得過五年,
但係而家我諗應該冇問題.... 係度學識左好多野,
識左唔少朋友, 都過得幾好呀, 我諗揀呢條路應該冇錯...