私人重地,
非請勿進!!
10月
11月 12月
1月 2月
3月 4月
5月 6月
7月 8月
3-9-2000
KLLY, 生日快樂!!
不過可能你根本就唔應該出世......都係我地唔好
7-9-2000
今日終於唔駛自己一個人食lunch啦^^, 同
Kate 一齊食, 而且終於調番去自己Department既 area,
唔駛一個人俾放逐去山長水遠既地方, 有機會同其他 Temp.
講下野, Office 既生活開始有d趣味 ^-^
9-9-2000
成日都聽到 office
d 人講話落場, 今日第一次落場, 原來個場真係幾大,
不過我真係好質疑有冇人會走去個度行街, 咁人煙稀疏,
又偏僻, d
野又貴, 冷氣又凍到凍死人喎... 仲會滴水tim....
搞到我係咁打冷震. 係場度OT到三點幾, 真係坎坷, 仲要搞到Ada要等我咁耐tim...
Sorry呀!!^_^ 我都唔想架, 不過d野做到一半,
唔可以唔做埋佢架麻, 係咪??
10-9-2000
夜晚同班小學同學一齊食飯,
好多人都甩底, 不過都巳經有好多人出現,
基本上個個都高左唔少, 特別係d男仔, 但係我呢七年都無高過咁滯..."好高架嘛"~~以前就係>.<
而且d男仔既樣都變得好犀利, 有幾個我都認唔出...不過d女仔就大部份冇乜點變.
見到d小學同學, 令我諗起阿 ling,
唔知佢習慣左未呢? 好掛住佢.... 如果佢都係度就好啦....>.<
11-9-2000
今日感冒菌纏身, 咳到死左, 食完藥後差d訓著左... 好彩 Sharona
叫我落場,
如果唔係我一定會訓著, 到時想唔俾人鬧都難...
尋晚真係唔應該同佢地落Barn II, 更加唔應該飲含有酒精既野,
雖然d酒精含量真係好低好低.....
>.<"
12-9-2000
中秋節都冇得早放....不過總算唔駛OT, 都算係咁啦,
原本今日心情勁靚, 雖然依然咳得好辛苦,
不過諗到今晚可以去街街, 聽日又可以接近齊人咁去燒野食喎,
仲要燒夜晚, 我恨左好耐先可以有機會係中秋燒架.
雖然唔係正日, 只係追月, 不過我巳經好滿足.
點知今晚俾人放飛機, 打電話confirm聽日既時間...
一個二個唔知死左去邊, 衰人!!!!! 下次?! 等五年後,
你地仲記得我再算啦>< ... 枉我尋日買Schedule後仲諗下送d乜俾你地留念好...激死我啦!!!
13-9-2000
好開心呀, 第一次夜晚燒野食, 原來真係咁正架.
除左開頭曬d之外, 之後都好涼, 一d都唔算熱,
不過今次買野就有d困難, 入到石澳後先買到炭同燒烤叉,
搵爐就更加難, 好彩搵到一班人諗住個幾鐘後走,
仲留底好多剩餘物資俾我地, 又唔駛透爐, 好方便.
不過開心既原因唔係有得燒野食, 而係因為兩年以來,
都未試過咁齊人, 連一向好難約到既 Manley 都俾面我,
肯一齊去, Jennifer 咁正經到肯陪我地夜晚去石澳, 其他人(Ada,
Cindy, Persis, Selina, Vivian, Miranda, 家怡,
其餘兩位網主以及青檸妹妹)就更加唔駛講啦, Total
有十三個人咁多, 唯一美中不足既係上兩次BBQ都有出席既Heidi
始終都無去到, 有少少失望.
我好耐無落過沙灘浸鹹水啦,
因為我本來都唔係咁鐘意既, 不過今日突然覺得個灘好正, 有d唔捨得,
走之前唔知仲有無機會去多次呢?
今年既"中秋"過得好開心(不過如果冇俾人放飛機既,
我會仲enjoy!), 見到有生以來最靚既月亮(橙色架!^-^),
又有一大班friend同我去玩,
唯一既遺憾應該係仲未食到冰皮月餅~~好想食呀...
14-9-2000
拎左相啦! 除左幾張係唔見得人外,
其他都唔錯 ^^
15-9-2000
今日係Ivy, Dennis 同 Sharona 既 last day.
原來 Dennis 都係 City 架喎, 我同 City 似乎都幾有緣... 話時話,
Sharona 走左, 星期一應該問邊個搵野做呢?
16-9-2000
多謝你請我睇戲呀,
不過要等我請番你既話, 就要等到我出糧先得啦...^^
因為我冇乜錢剩 lu.. 仲有, 多謝你份手信, 個袋仔好靚 ^^
我係咪好白痴呀. 係銅鑼灣番到屋企, 過左一陣又行番去,
為左買支洗頭水 ^0^ 俾你見到我咁低能既一面tim...
Karen, 多謝你既禮物呀!
今日同前幾日收到既禮物居然仲多過我d兩年收到既生日禮物.
你地唔好對我咁好啦, 唔好俾我覺得太幸福,
如果唔係我會好唔捨得架
17-9-2000
清晨兩點幾先有得訓, d人有病架? kkkpppsss
都有人用既?? 搞到我同Sarah要整到咁夜先register到個url....
e....駛唔駛咁快拉晒d老翻呀....
俾我買埋幾張碟都好呀...>.< 好彩今日都買到兩件Tee同埋三隻將會與KPS有密切關係既野
^^ 總算有d收獲.
18-9-2000
無端端俾人調左落場, 跟住幾日既
lunch都要食麥記, 仲要係一間乜都冇既麥記-_- d時間又要改喎,
番11點至8點. Kate 又唔做, Brain 又要留守Office, 得番我同阿Lam係場度,
一d都唔好玩既, 不過都係最後一兩日la, 算... 我忍埋佢...
今日番左十幾個鐘後,
諗住去灣仔換過件Tee, Tee 就換唔到,
不過就買到我需要既老翻碟, 果然係野火燒不盡, 春風吹又生,
咁快又開番啦喎.^^
21-9-2000(morning)
終於訂左機票啦, 五號就走啦...
突然有種好唔舒服既感覺, 其實都唔算突然既, d幾日時不時都係咁.
身邊每一個人都好忙好忙, 覺得自己有種被遺忘既感覺,
前幾日自己都要番工, 都唔得閒靜落黎, 唔會有呢種感覺, 不過yesterday
last day之後, 有番d時間, 開始可以有時間去胡思亂想. 加上yesterday
lunch拉左阿Lam出九龍站食飯. 行左去我好細個時住既個頭,
雖然我對個附近既印像唔深, 不過都覺得好感觸,
好想逐條大街小巷咁慢慢行,
突然驚覺原來我仲有咁多地方未去, 咁多野未做.
好想搵人陪我, 但係又唔想麻煩到身邊既人. 香港買野貴、空氣差、地方細、教育制度唔好,但係始終都係我既屋企,
一個有我回憶的地方, 一個我唔可以捨得既地方.
我點解會變到咁執著?? 以前我冇d咁既夢想,
一向都唔會咁執著, 可能咁我會舒服好多, 開心好多.......我到底係度做緊乜?!
又為左d咩??
22-9-2000
終於搞掂左啦!! YEAH!! ^0^
雖然仲有好多係 under construction...
今日用左唔少時間去 upload 野同做
testing, 整一個網頁真係幾麻煩, 點解人地可以做得咁好,
咁好心機時不時 update 下既?
希望我都會有佢地一半咁好耐性啦! 不過我一向d脾氣都比較差,
冇乜耐性... 嘿嘿..
23-9-2000
今日收獲都唔錯,
想要買既野都差唔多買齊, 不過都仲有頗多野未買.
不過走之前會買得齊既, 如果有人陪我既話....
不過個個都唔得閒, 無謂浪費人地d時間啦.
有時諗落整件男友係度都好既...
最少有個人可以俾我任煩呀麻. 呵呵呵...^0^
24-9-2000
Sarah今日飛左啦.
要係香港再見到佢, 起碼要等兩年後... ~.~
不過或者呢兩年我會有機會去一去澳洲既,
反正我都想去好耐架啦. 依家個邊又有咁多 friend
令我更加想去. 應該唔駛兩年就有機會見既, 好好保重呀!!
有時間就 send 封 e-mail 俾我呀, 我又未有地址,
又唔可以叫你寫信俾我, so... email 啦.
去到有時間就好搞掂埋你個 part 啦, 如果唔係遲 d "KPS"
會好慘架, 冇人update, 記住喎~~ 希望你去到個邊後一切順利啦!!
^^
今日俾人借左去過橋....
本來都冇乜所謂既, 不過咁樣做真係唔係幾好,
而且你駛唔駛重色輕友成咁?? 等我咁開心以為你幫我餞行,
原來只係利用我, 上次又唔去燒野食, 原因又係為左佢,
你會唔會過份左少少呢? 佢既少少唔開心比起幾年無見既朋友,
比起唯一一次有機會齊人既聚會更加重要.... 愛情真係咁重要?
可能我呢d唔知咩叫愛情既人係唔會明白啦.
點解會咁失水準,
跳水又係得銀牌, 之前既表現明明好穩定, 可以包辦金銀牌架~~~
點解?! >.<
25-9-2000
好耐冇一個人搭五號巴士,
諗番起高考前去補習既日子, 次次都係一個人搭車番屋企架啦,
以前放學我都係時不時一個人走,
以前我可以享受個段獨處既時間, 依家無理由唔得,
有時一個人都好既, 可以慢慢諗下野, 發下夢,
欣賞下周圍既野, 有種冷眼旁觀既悠閒感覺,
個種感覺唔係每一個人都識得欣賞, 不過其實係好正架!
居然俾Karen 搵到"浪花一朵朵"既
midi, 好勁呀! 我搵咁耐都搵唔到, 唔該晒呀^^
26-9-2000
本來今日心情唔錯,
但係特如其來既一個message令我感覺其差,
我好清楚你地好忙,
我唔介意你地冇時間陪我,
亦唔要求你地抽時間黎見我,
但係唔好搞到好似你地依家要施捨我咁.
唔得既話根本無需要勉強,
反正我好快又可以番黎既.
真係有事既我唔mind架喎,
但係你地偏偏次次都係係最後一刻話"唔去得啦,
因為乜乜乜",
而乜乜乜同常都係一d好無謂既原因,
次次都搞到好似係我迫緊你地咁.
其實我本來都預左你地得個講字架啦.
但係可唔可以顧下我既感覺?
我知你地冇心呀....
不過好hurt 我架... 當我係咩喎,
我唔需要你地抽d時間俾我,
我惡,
但係唔代表我會無理取鬧.
你地忙,
我明架.
我唔會迫你地架喎....
不過唔好話俾我聽你趕住去見店長哥哥,
唔好話俾我聽你有時間同一個唔識既人打squash.....Per,
唔好意思,
今晚語氣比較差,
不過我真係心情好差!!!!
唔關你事既...
Sorry
27-9-2000
剪左個新 hairstyle,
唔係好慣... 不過冇左條清楚分明既界, 多左d瀏海都幾好呀. ^^
新既地方, 新既我. 我唔會俾人睇死. 唔好話一年,
五年我都會捱得到!!!
28-9-2000
伏明霞個一跳好正呀!! ~
~
29-9-2000
終於出糧啦^^...
不過俾佢徙左我幾個鐘, 去到尖東又等左好耐,
結果落到銀行時係四點三十二分... 趕唔切入cheque>.<
又要等到聽日先可以睇到紅簿仔上既新數字.
不過都好過下星期先有既.
30-9-2000
充滿睡意既一日,
原因係太早訓... ^^; 呵呵....咁就一個月啦. 居然可以開新版喎.^^