Dîsan dem hatiye ku em germtirîn spasiyan ji dil pêşkêşî we xwendevan, nivîskar, mêvan, hevkar û dostên kovarê bikin. Her yek ji we dikare bi dilpakî dilşad û bextewer be ku bi alîkarî û piştgiriya we me salek din jî ji weşana vê kovarê bire serî.
Bi destûra we hêjayan, dixwazim ji nivîsara xwe ya bi bûneya sersala par kurtebirrekê dubare bikim:
"Bedewtirîn û şengtirîn spasî bo wan xwendevan û nivîskaran ên di demên qelsî û lawaziyê de tovê hêviyên xurt li kovarê reşand. Berztirîn û bilindtirîn giramî û giranî bo dest û dilên wan nivîskaran ên di dema pêdivî de xwe nedan alî lê alîkarî da çandina baxçeyek bi gulên rengîn dagirtî. Germtirîn û kûrtirîn qîmet û rûmet bo wan xwendevanan ên bi şîret û pêşniyazên xwe yên dostane û bihagiran rêyên qenc dan ber me...
Bi vê hejmarê em dikevin çarsaliya weşana Kovara MEHNAME. Em di vê hejmarê de bi hin berhemên taybet spasiya we dikin:
1) HELBESTNAME: Bi bûneya sedsaliya seydayê mezin Cegerxwîn, hûn xwendevanên delal hêjayî zêdeyî 70 helbestên bijare ne.
2) MAFNAME: Ferhengek peyvên dadwerî (hiqûqî) ya kurdî-îngilîzî. Bo berdestkirina bêjeyên kurdî ev jî xebatek biçûk û bikêmasî ye.
3) PEXŞANNAME: Nêzî 1 000 rûpel çîrok û berhemên din ên pexşanî diyarî her kesek dixwaze bi kurdî bixwîne.
4) PENDNAME: Pend û "gotinên navdaran" ji wêjeya cîhanê
5) ZAROKNAME: Helbest û kurteçîrok bo we û zarokên we.
6) BASKÊN ŞKESTÎ: Yek ji sê pirtûkên Ji Xelîl Cibran ku ta niha li kurdî hatine wergerand, piştî "Peyamber, diyarî we têt kirin.
