Tevgera rizgarîxwaz a neteweyî û doza Kurd û Kurdistanê di van rojan de ketiye rewşeke gelekî girîng û dijwar. Ev çend meh in mijara şerê li dijî rêjîma Seddam Hisên ê xwînrêj di rojeva cîhanê de mijara yekemîn e. Çiqas ev mijar dikele û gur dibe, ewqas jî aşkere dibe û tê dîtin, ku pêwendiya wê bi çarenûsa neteweya me ve kîp girêdayî ye.
Dewleta Tirkiyayê, ya ku bakurê welatê me dagîr kiriye, pê li hemû mafên dêmokratî, nirxên mirovayetî û zagonên navneteweyî dike. Ew dixwaze keys û delîveyê ji şerê li dijî Seddam wergire û başûrê welatê me jî dagîr bike.
Di vê rewşa bivok de hemû hêzên Kurdan îro di yek eniyê de ne û tirsa li ser neteweya xwe nas kirine, ev jî cihê şanaziyeke mezin e û dîse dide xuya kirin, ku vîna neteweya me ji bo rizgarî û azadiyê di ti dem û heyaman de nikare were şkandin.
Bi vê bizava Tirkiyê doza Kurd û Kurdistanê ji çarçefa sînorên yek dewletê derdikve û dibe dozeke navneteweyî û ji lew re divêt hemû hêzên aştîxwaz û dêmokrat bi berpirsiyariya xwe ya dîrokî rabin, destê bindestan bigirin û piştgîriya tevgera dadimend ya gelê me li dijî sîstêmên nedêmokrat, lêşkerî û xwînrêj bikin, da ew xwe ji vê rewşa dijwar bikare rizgar bike û bi azadî li ser xaka welatê xwe bi hemû gelên cihanê re bi wekhevî bijî.
Em wek navenda PENa Kurd piştgîriya biryarên parlementoya başûrê Kurdistanê dikin û gazî hemû nivîskar, helbestvan, rojnameger, weşanger û tevaya rewşenbîran dikin, ku bi hemû hêzên xwe vê yekîtiya neteweyî biparêzin û bi pêş ve bibin. Her rexneyeke neavaker divêt di vê demê de bête rawestandin û herkes bi berpirsiyarî tevbigere.
