Piştî ewqas zor û êrişên hovîtî, yên ku ev bêtirî çil salî ne li başurê welatê me berdewam bûn, bi destpêka bihara vê salê re kela zorê hilweşiya û rêjîma Seddamê xwînrêj roxiya. Ji Xaneqînê heya Kerkûkê, heya Mûsil û Şengalê êdî hemû gihiştin herêmên rizgarbûyî.
Em ji navenda PENa Kurd bi şahî û kamiranî van serkeftinan pîroz dikin û her bi hêvî ne, ku hêz û rêberên gelê me li başurê welêt vê keysa dîrokî bi hêviya serxwebûna gel û welatê me ji dest bernedin.
Nabe em bi ti awayî rê bidin dagîrkerên Kurdistanê, ku destên xwe têxin nav kar û barê me yên navxweyî.
Biserketina doza gelê me li başurê welêt û yekgirtina hemû hêzên niştimaperwer li vî beşî, dê bibe bingeh, ku hemû hêzên niştimanperwer li seranserê Kurdistanê hevdû bigirin û li dijî dek û dubareyên Tirkiya, Îran û Sûriyayê bi yek dengî û yek helwestê rawestin.
Ev keys û delîveyeke dîrokî ye, ku piştî ewqas salên bindestî û stûxwarî êdî gelê Kurd li ser xaka welatê xwe bi hemû gelên cîhanê re bi wekhevî bijî.
Ev jî tenê bi yekgirtina hemû hêz û rêxistinên welatparêz gengaz û mimkin e. Ji lew re em bang li hemû hêz û partiyên Kurdistanê dikin, ku bi berpirsiyariya neteweyî rabin, sînorên berjewendiyên partiyetî derbas bikin û nakokiyên ku berê hebûn bi yekcarî deynin aliyekî.
Daxwaza yekgirtina hêz û partiyên Kurdan, daxwazeke neteweyî ye, ew daxwaza giştiya girseyên gelê me li her çar perçeyên welêt û ya hemû Kurdan li seranserê cîhanê ye.
