In MEI 2001 het ZANDRA DUVENAGE van DURBANVILLE se Dramagroep 'n uiters suksesvolle toneelverwerking van ANDERKANTLAND (TAFELBERG UITGEWERS) op die planke gebring. Daar is ook 'n VIDEO geneem van die opvoering. Indien iemand meer besonderhede verlang, e-pos my gerus.

Die hele storie het begin toe ek een middag na skool in die bos gaan loop het. Ek wou gaan dink. Die enigste plek waar ek dit kan doen, is by my sitplek langs die rivier. Wanneer ek daar sit, voel ek soos 'n koningin, totaal in beheer van alles, van my koninkryk, die bos.

Terwyl ek my treë rek om so gou as moontlik by my sitplek te kom, kom daar van agter 'n boom, reg voor my 'n wolfhond te voorskyn. Ek steek heel verbaas vas. Ons het nie 'n wolfhond op die plaas nie en hy lyk beslis nie na 'n rondloperhond nie. "Siebie, siebie, siebie," roep ek, nes my pa altyd die honde roep, en ek steek my hand uit.

Met donker, donker oë kyk hy my aan, maak sy bek oop en sê: "Wie's jou siebie?"

Op dié noot begin 'n wonderbaarlike (en skreeusnaakse!) verhaal oor 'n doodgewone meisiekind wat op 'n doodgewone middag in die bos op haar pa se plaas gaan stap …. en haar dan skielik en totaal onverklaarbaar in 'n baie, baie anderster soort bos bevind.

RESENSIE

Al leer ons nooit haar naam ken nie, gaan ons in hierdie verhaal op 'n verbeeldingsreis saam met 'n veertienjarige meisie wat ek gerieflikheidshalwe Meisie wil noem.

Martie Preller spreek met hierdie jeugroman die behoefte aan emosionele sekuriteit in die jong leser aan. Anderkantland se parallelle sprokieswêreld bied talle uiters snaakse oomblikke, soos wanneer Niel en Meisie dit in haar stiefmoeder se kamers waag en die spieëltjie ondervra en deur 'n krakerige geïrriteerde stemmetjie geantwoord word. "Ek raak nou baie, baie moeg om dit aanmekaar te sê: Sneeuwitjie is die mooiste. Moet my asseblief nie weer pla nie."

Die sterkste boodskap van die roman is egter dié van ontsag en waardering vir fantasie. Martie Preller het hier 'n baie besonderse verhaal geskep wat met sy universele karakter, oorspronklikheid en geestigheid ook uitmuntend geskik sou wees vir vertaling. Sy verdien vanjaar se Silwer-Sanlamprys vir hierdie unieke bydrae tot die Afrikaanse jeugliteratuur.

Lona Gericke

MOTIVERING VIR TOEKENNING VAN C.P. HOOGENHOUT MEDALJE

Martie Preller se kinder- en jeugboeke verleen 'n nuwe sprankel aan boeke in hierdie genre vanweë die ongewone verbeeldingryke en humoristiese aanslag wat haar lekkerleesboeke karakteriseer.

Anderkantland is dan ook een van die eerste post-modernistiese kinderboeke in Afrikaans waarin die dekonstruksie van die klassieke sprokie met ontsag behandel word.

Met die oopmaak van 'n alleenstaande towerdeur in 'n dennebos maak die spitsvondige heldin 'n towerwêreld vir haarself en die leser oop. Haar pogings om in die verloop van die bekende sprokiesgebeure in te meng, lei tot bisarre en soms onaangename gevolge. 'n Unieke groen telefoon, die kommunikasielyn van die hedendaagse tiener, vervul die rol van 'n geniepsige waghondjie.

Soos wat die heldin egter deurentyd met die leser gesels, kom die ware rede na vore waarom sy na hierdie sekondêre sprokieswêrels ontvlug asook die besef dat in die ware wêreld aanvaarding meer as inmengende verset kan vermag.

'n Geslaagde verhaal wat op 'n vernuwende wyse die leser, nog vertroud met die sprokiesbelewenis, intrek in die jong tienermenswêreld.